Genese 44:1-34
44 Tsô Yosev kaa a or u nengen sha ya na la ér: “Haa ior mban kwaghyan ken aba a ve poo er vea fatyô u tôôn la cii, shi wa hanmô ve inyaregh ki nan sha zwa u ibya i nan.+
2 Kpa gema tôô kôôpu wam* wa sha zwaibyaa u u kiriki la, kôôpu u* azurufa la, kua inyaregh ki a ve a mi u va yamen samuyia la.” Nahan a er er Yosev kaa un nahan.
3 Kpernan sev mbu wanger yô, i na ior mbara gbenda a ujaki vev ve gba yemen.
4 Ve lu a gba ica a gar ga je maa Yosev kaa a or u nengen un sha ya la ér: “Mough sha! Zenda ior mbara ijime! U za kohol ve yô pine ve wer, ‘Er nan man ne kimbi kwagh u bo sha kwagh u dedoo nahana?
5 Ka kôôpu u* orvesen wam a me kwagh a mi shi a tsenganpasen akaa a mi ne gaa? Ka iferkwagh je ne er ye.’”
6 Nahan a za kohol ve, a ôr ve mkaanem man nahan.
7 Kpa ve kaa a na ér: “Er nan ve terem a ôr imbakwagh ngila nahana? Mayange je ikpan you ia er imbakwagh la nahan ga.
8 Nenge ase yô, inyaregh ki yange se zua a mi ken aba a ase la kpa se mough a mi ken tar u Kaanan je, se hide a mi hen a we.+ Nahan a er nan man se ii azurufa shin zanaria hen ya u orvesen wouwe?
9 Aluer i zua a mi hen ma kpan wou yô nana kpe, shi se mbagen cii se hingir ikpan i orvesen wam.”
10 Nahan or la kaa ér: “I lu er ne kaa nahan: Or u i zough nan a mi la nana hingir kpan wam, kpa ne mbagen cii ne lu iyolishô.”
11 Maa hanmô ve nan shir ibya i nan fese nan ver inya, nan sagh i.
12 Tsô a gba keren vighe vighe, hii sha u vesen la zan zan va kure sha u kiriki la. Maa a za zua a kôôpu* la ken ibya i Benyamin.+
13 Tsô ve ande akondo a ve, hanmô ve yua ikyav mbi nan penda sha jaki i nan, ve cin ve hide ken gar.
14 Shighe u Yuda+ vea anmgbianev nav mbara va nyôr hen ya u Yosev la, Yosev lu her; nahan ve haa inya sha ishigh nagh.+
15 Yosev pine ve ér: “Ka nyi kwagh ne er nee? Ne fa er or er mo nahan nana fa u tsenganpasen akaa tsembelee gaa?”+
16 Yuda gema kaa ér: “Ka nyi se ôr a orvesen wama? Se kaa ser nena? Shi se ôr ishô yase nena? Aôndo u mimi la zua ikpan you a ibo.+ Hegen yô se mba ikpan you orvesen wam. Se kua or u i zough a kôôpu* ne sha ikyev na la cii!”
17 Kpa a gema a kaa ér: “Mayange me er imbakwagh ne ga! Or u i zough a kôôpu* ne hen a na la una hingir kpan wam.+ Kpa ne mbagen cii yô, yem nen hen ter wen bem bem.”
18 Yuda maa kporom va kaa a na ér: “M zamber we terem, wea lumun yô, shi kegh ato a wanakiriki wou a ôr kwagh a we, ishima i de vihin we a kpan wou ga, gadia we u ngu er ka Farou iyol na nahan.+
19 Orvesen wam yange pine ikpan na ér, ‘Ne mba a ter shin anmgbiana?’
20 Nahan se kaa a orvesen wam ser, ‘Se mba a ter u a bee iyol yô, shi ngu a wan u masetyô u a mar ken iyolbeen na yô.+ Anmgbian na yô saa ku,+ ka un tseegh a mase shin hen hunda u ngô na ye,+ man a doo ter na ishima.’
21 Tsô u kaa a ikpan you wer, ‘Va nen a na sha er me nenge a na yô.’+
22 Kpa se gema se kaa a orvesen wam ser, ‘Wan la una fatyô u undun ter na ga. Aluer a undu ter na yô, ter na una kpe kpee.’+
23 Maa u kaa a ikpan you wer, ‘Aluer anmgbian wen u kiriki la va a ven imôngo ga yô, de kera va nengen nen a ishigh yagh ga.’+
24 “Nahan se yem se za ôr kpan wou terem, mkaanem ma we orvesen wam yange u ôr la.
25 Shighe karen yô ter wase kaa ér, ‘Hide za yam nen se kwaghyan kpuaa.’+
26 Kpa se kaa ser, ‘Se fatyô u zan ga. Kpa aluer anngô wase u kiriki la ngu vea vese yô se za, gadia se fatyô u za nengen a ishigh ki or la ga, saa anngô wase u kiriki la una lu vea vese.’+
27 Maa kpan wou terem kaa a vese ér, ‘Ne fa dedoo er yange kwase wam marem mbayev uhar tseegh yô.+
28 Kpa ugen la yange undum, nahan m kaa mer: “A shi nan kpa inyamkyume ande un javer javer!”+ man m kera nenge a na ga zan zan nyian.
29 Aluer ne kar a ngun kpa sha ishigh yagh kera man kwagh u vihin za tser un yô, ne na ivu yam ia sen shin Uwar*+ a ijungwen kpee je.’+
30 “Man aluer hegen ne m hide m yem hen kpan wou terem, man wan ne ngu a vese imôngo ga yô, er uma na a var a uma u ngun nahan,
31 una za nengen ér wan ne ngu ga yô, una kpe, nahan ikpan you ia na ivu i wanakiriki wou ter wase, ia sen shin Uwar* a ijungwen mimi je.
32 Mo kpan wou yange m bum a terem mer uma u wan ne a lu sha ikyev yam, m kaa mer, ‘Aluer m hide a na hen a we ga yô, me lu a ibo sha ishigh ki terem gbem sha won.’+
33 Nahan wea lumun yô, mo kpan wou me lu heen sha ityough ki wan ne, me hingir kpan wou orvesen wam, sha er wan la una hide a yem vea anmgbianev nav yô.
34 A er nan man me hide hen terem a wan ne shio? Me fatyô u za kenger sha ican i ia tser terem la ga!”
Ngeren mba shin kpe
^ Shin “iyongo yam.”
^ Shin “iyongo i.”
^ Shin “iyongo i.”
^ Shin “iyongo.”
^ Shin “iyongo.”
^ Shin “iyongo.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “Sheol,” ka uwar u uumace je la. Nenge Ngeren u Pasen Asember.
