Genese 29:1-35
29 Tsô Yakob za hemen a zende na zan zan a za nyôr ken tar u ior mba sha ityoughkitaregh.
2 Maa a za nenge a ijôr igen ken toho, iyôngo yav hen kpe u i akum atar, sha ci u lu hen ijôr ne i va naan akumauile mngerem ye. Zegeiwen lu sha zwa u ijôr shon.
3 Yange a kohol akumauile her cii yô, i menger iwen i sha zwa u ijôr la kera i na ilev mngerem, a been yô, i hide a iwen la i cir sha zwa u ijôr la her.
4 Nahan Yakob pine ve ér: “Anmgbianev av, ka hanma ijiir ne dugh?” Ve gema ve kaa ér: “Se mba ior mba ken Haran.”+
5 Maa a pine ve ér: “Ne fa Laban+ wan u wan u Nahor laa?”+ Maa ve kaa ér: “Se fa un.”
6 Maa a pine ve ér: “Ngu dedoo kpa?” Ve kaa a na ér: “Ngu dedoo. Man ka wan na u kwase Rahel+ je a lu van a iyôngo heen ne!”
7 Maa a kaa ér: “Iyange ngi sha tembe her. Shighe ngu a kuma u kohol ilev ga. Yô na nen ilev mngerem i ma, hide yem nen a i i za ya kwagh.”
8 Maa ve kaa ér: “I na se ian i eren nahan ga, saa a vande kohol akumauile cii ijiir i môm, a menger iwen sha zwa u ijôr la kera ve se na iyôngo mngerem ye.”
9 Er lu lamen a ve la je, Rahel va due a iyôngo i ter na, sha ci u kuran ilev.
10 Yakob nengen a Rahel wan u Laban, tien u ngô na, kua iyôngo i Laban yô, fese je a za menger iwen la sha zwa u ijôr la kera, shi a kese mngerem a na iyôngo i Laban tien u ngô na.
11 Maa Yakob suse Rahel zwa, shi a ngor mliam a gba vaan.
12 Tsô Yakob gba ôron Rahel er un lu anngô u ter na, man er un lu wan u Rebeka yô. Maa Rahel yevese za ôr ter na kwagh ne.
13 Laban+ ongo kwagh u Yakob wan u ingyôr na ne je maa, a yevese a za kohol un. A kuve un, a suse un zwa shi a va a na hen ya na. Maa Yakob gba ôron Laban akaa ne cii.
14 Laban kaa a na ér: “U ngu kuhe wam man inyam yam jim jim.”* Nahan a lu vea na uwer jimin.
15 Tsô Laban kaa a Yakob ér: “Doo u u gbaa shiren mo gbilin tsô sha ci u u ngu anngôm yumu?+ Ôrom ase yôô, ka nyi injar me kimbin we?”+
16 Laban gema lu a ônov mba kasev uhar, iti i u vesen la lu Lea, iti i u kiriki la lu Rahel.+
17 Lea nger ashe, kpa Rahel yô kuma ashe shi doo kwase vindi vindi.
18 Rahel doo Yakob ishima, nahan a kaa ér: “Me er u tom anyom ataankarahar sha ci u Rahel, wan wou u kwase u kiriki la.”+
19 Maa Laban kaa ér: “Guda me na u un, a u geman nan orgen la. Lu vea mo her.”
20 Nahan Yakob er un tom anyom ataankarahar sha ci u Rahel,+ kpa lu un er ka ayange kpuaa tseegh nahan, sha ci u a doo un ishima.
21 Tsô Yakob kaa a Laban ér: “M er u tom sha ayange a i gbe u me er u la cii, nahan nam ase kwase wam m tsa a na.”
22 Tsô Laban kohol ior mba hen ijiir la cii, a er iniongo.
23 Kpa iyange been yô, a gema a tôô wan na Lea a va na un ér a tsa a na.
24 Laban shi tôô kpan na u kwase Selpa, na wan na Lea ér a hingir kpan na.+
25 Sev mbu aven Yakob nengen yô, lu Lea! Maa a kaa a Laban ér: “Ka nyi u er a mo nee? Ka sha ci u Rahel m er u tom gaa? Er nan u bumem nahana?”+
26 Laban gema kaa ér: “Ka ieren yase heen u vanden nan wan u kiriki kera a u vesen ga.
27 Er iniongo i ember kwase ne kasua jimin. U been yô, a na u kwase ugen la kpaa, maa shi u erem tom anyom ataankarahar.”+
28 Yakob er nahan, a er iniongo i ember kwase la kasua jimin, been yô shi a na un wan na Rahel ér a lu kwase na.
29 Laban shi gema kpankwase na Bila,+ na wan na Rahel ér a hingir kpan na.+
30 Tsô Yakob tsa a Rahel kpaa. Rahel hemba doon un ishima a Lea, nahan a shi a er un tom anyom ataankarahar.+
31 Zum u Yehova nenge er i soo Lea ga* yô, a na Lea wa iyav,*+ kpa Rahel yô lu ikyômkwase.+
32 Nahan Lea wa iyav mar wan u nomso, a ii un iti ér Ruben,*+ sha ci u a kaa ér: “Ka sha ci u Yehova nenge ican yam,+ hegen yô me doo nomom ishima.”
33 Shi a wa iyav a mar wan u nomso, maa a kaa ér: “Ka sha ci u Yehova kegh ato ungwa er i soom ga yô, nahan a nam ngun kpaa.” Tsô a ii un iti ér Shimion.*+
34 Maa shi a wa iyav a mar wan u nomso, tsô a kaa ér: “Hegen yô nomom una var a mo, sha ci u m mar un ônov mba nomso utar.” Nahan i ii un iti ér Levi.*+
35 A shi a wa iyav mbugen a mar wan u nomso, maa a kaa ér: “Kwa ne yô me wuese Yehova.” Nahan a ii un iti ér Yuda.*+ Tsô a mem mar.
