Genese 37:1-36
37 Yakob tema lu ken Kaanan her, ape ngise ter na lu shir la.+
2 Ngun ka yiase i tsombor u Yakob* je ne.
Zum u Yosev+ lu anyom 17 la, lu kuran iyôngo+ vea ônov mba Bila+ man ônov mba Selpa,+ kasev mba ter na. Nahan Yosev va ôr ter ve akaa a doon ga a ve lu eren yô.
3 Yosev gema doo Iserael ishima, hemba ônov nav mbagen mbara cii,+ sha ci u lu wan na u ken iyolbeen. Shi a kor un riga u gban shin u doon tsung.
4 Anmgbianev nav mba nengen ér ter ve hemba soon un a anmgbianev nav mbagen cii yô, ve kôr un ihyom, ve kera lamen a na ken bem ga.
5 Shighe kar yô mnyam cie Yosev, maa a za ôr anmgbianev nav ma,+ tsô shi ve zua a ityôkyaa i hemban kôron un ihyom cii.
6 A kaa a ve ér: “Nea lumun yô, kegh nen ato m ôr ne mnyam ma ma ciem ne.
7 Se lu kangen aile a uiyia ken sule, maa ile wam mough tile sha jighilii, tsô aile a en kase ile wam, gba ngurum u inya.”+
8 Anmgbianev nav gema kaa a na ér: “Inja na yô ka u u va ver iyol you tor sha a vese shi u hemen se zee?”+ Nahan shi ve zua a ityôkyaa igen i kôron un ihyom, sha ci u mnyam ma ma cie un man kwagh u a ôr la.
9 Ka been yô, mnyam magen shi ma cie un, shi a ôr anmgbianev nav ma, a kaa ér: “Shi mnyam magen ciem, kwa ne yô, iyange man uwer man asan 11 lu ngurum mo inya.”+
10 Tsô a ôr ter na kua anmgbianev nav ma, nahan ter na gba zôhôn a na kaan ér: “Inja i mnyam ou man ér nyi jimi? Inja na yô, ka u mo kua ngôu man anmgbianev ou se va ngurum we inya je la ga̱?”
11 Nahan anmgbianev nav gba gban un iyuhwe,+ kpa ter na yô koso mkaanem man ken ishima na.
12 Tsô kwagen la, anmgbianev nav yem u za kuran ilev mbi ter ve ikyua a Shekem.+
13 Nahan Iserael kaa a Yosev ér: “Anmgbianev ou yem u za kuran ilev ikyua a Shekem, shin ka nahan ga? Yô va, m tindi u hen a ve.” A gema a kaa a na ér: “Ka shami!”
14 Maa a kaa a na ér: “Yô za ase, za nenge anmgbianev ou vea lu doo doo yô, shi nenge er ilev mbi lu la hide va ôrom.” Maa a tindi un, a mough hen pev* u Heberon,+ a ver ishigh yemen vegher u Shekem la.
15 Shighe kar yô, orgen va zua a na er lu zenden ken toho wue wue yô. Or shon pine un ér: “Ka nyi u kerene?”
16 A kaa a na ér: “M ngu keren anmgbianev av. Wea lumun yô, tesem ape ve lu kuran ilev la.”
17 Or la gema kaa ér: “Ve mough heen kera, yange m ungwa ve lu kaan ér, ‘Se yem nen ken Dotan.’” Nahan Yosev gba tôvon anmgbianev nav ityô zan zan za zua a ve ken Dotan.
18 Er lu a va nyôr hen ape ve lu la ga je tsô, ve ta ashe ve za nenge a na ken ica, nahan ve gba kôson ker ayol a ve ér vea wua un.
19 Ve gba kaan ker ayol a ve ér: “Nenge! Ormnya la ngula van heela la.+
20 De se wua un nen, se kende un nen shin ijôr i môm ken azôr a a lu heen ne, maa se kaa ser ka inyamkyume i wua un ye. Nahan se nenge er mnyam nam mara ma a za yô.”
21 Ruben+ ongo kwagh ne yô, a gba keren gbenda u yiman un sha ikyev ve. Nahan a kaa ér: “Se wua un nen ga.”+
22 Ruben shi kaa a ve ér: “De hee nen awambe inya ga.+ Kende un nen shin ijôr ne, hen taaikyôngo heen, kpa de bulan nen un ga.”*+ Awashima na yô, lu sha er una yima un sha ikyev ve, una hide a na hen ter na yô.
23 Yosev va nyôron a nyôr ape anmgbianev nav lu la nahan maa, ve er un riga, riga na u gban shin u doon tsung u hua la,+
24 ve kôr un ve kende shin ijôr la. Hen shighe la ijôr la uma, mngerem lu shimi ga.
25 Tsô ve tema inya ve gba yan kwagh. Mba va moughon ashe sha yô, ve nenge mbakasuav mba Ishemael+ due ken Gileadi tim nongo gba van. Urakumi vev tôô tsur u human doon kua balsam* man avuu a ikyon*+ ve ver ishigh u senen shin Igipiti.
26 Nahan Yuda kaa a anmgbianev nav ér: “Aluer se wua anngô wase se yer kwagh u se er la yô, a lu se a inja sha nyi?+
27 Yô de se tôô un nen se tee+ Mbaishemael mban, se bende un nen ave ga. Kera ga kpa ka anngô wase, ka iyol yase je.” Nahan ve ungwa imo i anngô ve.
28 Nahan Mbamidian+ mba zenden kasua mbara mba va ngur karen yô, ve dugh Yosev shin ijôr la, ve gema un ve tee Mbaishemael mbara sha agbenger a azurufa 20.+ Tsô ior mbara tôô Yosev yem a na ken Igipiti.
29 Ruben va hidi ze hen ijôr la, nengen a Yosev shimi ga yô, a ande akondo a na.
30 Hidi hen anmgbianev nav yô, a gba ôron sha ikyenge ér: “Wan la kera ngu ga! Man mo yô, me er nena sha wono?”
31 Tsô ve kôr kpev ve sôngo, maa ve gema gôgôriga u Yosev la ve mir shin awambe a na.
32 Maa ve tôô riga u doon tsung u gban shin la ve tindi a mi hen ter ve, ve kaa ér: “Ka kwagh u se zough a mi je ne, nenge tsembelee a lu riga u wan wou shin a lu un ga yô.”+
33 A nenge i, maa a kaa ér: “Ka riga u wan wam! Ka keng inyamkyume za ya un! I ande Yosev javer javer je ka u henen a hen ga!”
34 Tsô Yakob ande akondo a na, a tsule ikyondo i zungwen shin iwenge,* a vaa wan na ayange kpishi.
35 Ônov nav mba nomso man mba kasev cii gba nôngon ér vea sur un ishima, kpa a lu vendan ér ve de surun un ishima ga, a kaa ér: “Me vaa wan wam gbem me kar yemen shin Uwar!”*+ Nahan ter na za hemen u vaan un.
36 Mbamidian mbara yem a na ken Igipiti, za gema un tee Potifar. Un lu or u eren tom hen ya u Farou,+ shi lu orvesen u mbakuran kpaa.+
Ngeren mba shin kpe
^ Shin “yiase i Yakob.”
^ Shin “pev u lun gburumaa.”
^ Shin “de benden nen un uwegh iyol ga.”
^ Nenge Ngeren u Pasen Asember.
^ “Yange i dugh mningem ken avuu a ikyon ne i er senti a mi.”
^ Shin “a ta nyagba uya.”
^ Shin “Sheol,” ka uwar u uumace je la. Nenge Ngeren u Pasen Asember.
