Genese 49:1-33
49 Tsô Yakob yila ônov nav kaa a ve ér: “Kohol nen imôngo m ôr ne kwagh u una er ne ken ayange a masejime yô.
2 Kohol nen imôngo kegh nen ato, ne ônov mba Yakob, een, kegh nen ato a ter wen Iserael.
3 “Ruben,+ ka we u lu wan wam u iunda ye,+ u ngu tahav av man mhii u agee a am a maren ônov, mhembe u icivir man mhembe u agee.
4 U gbuusu er ka mngerem ma kuan iubububu nahan. Ú hemba anngôôv ou ga, sha ci u u unde sha gambe u teru.+ Hen shighe la je u hôngor a* gambe wam. A unde sha mi je!
5 “Shimion vea Levi ka anmgbianev.+ Usanker vev ka ikyav vev mbi tswamev mbi wuan kwagh a mi.+
6 De nyer nongo a ve ga, uma* wam. Icivir yam* kpaa i de lu ape ve kohol ga, sha ci u sha ishimavihin ve la ve wua ior,+ shi ve tser anomabua igbila i shin angahar, sha ci u msaanyol ve.
7 Ifyan i kôr ishimavihin ve la, sha ci u i vihi gande, man ishimanyoon ve la, sha ci u i doo tu ga.+ Me sar ve wue wue ken Yakob, me sambe ve ken Iserael.+
8 “We Yuda yô,+ anmgbianev ou vea wuese we.+ Uwegh ough kua lu sha mon u mbahyomov ou.+ Ônov mba teru vea ngurum sha ishigh you.+
9 Yuda ka wanbegha.+ Ú mough hen inyam i u woo la kera, wan wam. A yav inya, a naregh iyol er ka begha nahan, man ka an nana cihi a kpoghor un u a lu er ka begha nahan laa?
10 Tôgh kua kar hen Yuda kera ga,+ shi gbough ku orhemen kpaa kua kar hen angahar a na kera ga, zan zan Shilo* una kar van,+ man ka un ior vea ungwan un ye.+
11 Una zer jaki na hen itine i wain, wanjaki na kpaa hen itine i wain i dedoo, una kire akondo a na shin wain, man ikyondo na i huan kpaa shin zar u atam a wain.
12 Ashe a na nyian sha ci u zar u wain, anyi na kpaa kungu sha atumba.
13 “Sebulon+ una tema hen kpezegemnger, shin kpe ape i zeren utso la,+ ikighirtar na i gban ica ia lu vegher u Shidon la.+
14 “Isakar+ ka jaki i i taver akuhe yô, a yav hen atô u aba ahar a i kange un sha shidi* yô.
15 Una nenge er ijiir i memen la i kundu iyol shi tar la u doo yô. Una shiligh kwende na una tôô ikyav mbi yuhwan, una lumun ér i kighir un a tom u sha ican.
16 “Dan+ u a lu ken uipyaven mba Iserael la una ôr ior nav ijir.+
17 Dan a lu iyô i hen kpegbenda, igbinde i menden akor i hen gbenda, i ka i nyima nyinya hen ikishinguhar, or u hendan un nan gba tiôr la.+
18 Me kegh myom wou, Yehova.
19 “Gadi yô,+ mbanumungbenda vea ta num sha a na, kpa un kpa una cir ve ijime una gba tan num sha a ve.*+
20 “Kwaghyan* u Asher+ una ngee,* una va a kwaghyan u a kom sha ci u tor yô.+
21 “Nafetali+ ka ngôashim u lun zenga zenga. Ngu ôron mkaanem ma doon.+
22 “Yosev+ ka gbaa u kon u umen atam, kon u umen atam u hen imbormnger, u agbaa a u a samber a aver kpekpe yô.
23 Kpa mbakeren avaan zer hiin un shi keren un avaan shi kôron un ihyom kpaa.+
24 Nahan kpa ada na lu her dông,+ ave a na kpaa taver her, a vôr ga.+ Kwagh ne lu sha ave a u ageegh u Yakob, orkuran u a lu iwen i Iserael la.
25 A* due hen Aôndo u teru, man una wase u, shi ngu vea Uhembanagee Cii, una na u averen a sha kua averen a shin atô u inyaagh,+ man averen a atumba kua a sagh kpaa.
26 Averen a teru aa hemba averen a iwo i tsôron, man akaainjaa a utsembaagunguv.+ Aa lu sha ityough ki Yosev her, man sha idyer i tor i sha ityough ki un u i tsough un i ver kposo a anngôôv nav la.+
27 “Benyamin+ una za hemen u anden inyam er ka gbaseela nahan.+ Una ya inyam i a ker la pepe, aikighe di una kar kwar a ishar i a ye la.”+
28 Mban cii ka uipyaven mba 12 mba Iserael je ne, man ka kwagh u ter ve ôr a ve shighe u lu veren ve doo doo la je la. Hanmô ve yô, a na nan iveren i nan vough.+
29 Been yô a ôr ve mkaanem man, a kaa ér: “Mba sôôn za iin mo a ior av imôngo.*+ Za iim nen a uter av imôngo ken bar u a lu hen inya i Eferon Orhiti la,+
30 bar u a lu hen inya i Makpela, hen ishigh ki Mamre, ken tar u Kaanan la, ka inya i Aberaham yange yam vea Eferon Orhiti, ér i lu ijiir na i iin ior la je la.
31 Ka her yange i ii Aberaham vea kwase na Sara ye.+ Shi ka her yange i ii Isaka+ vea kwase na Rebeka ye, ka her yange m ii Lea kpaa ye.
32 Inya la man bar u a lu her la cii, yange i yam hen ônov mba Heti.”+
33 Yakob er ônov nav akaa ne cii been yô, a kohol angahar a na a haa sha gambe, maa a sule. I ii un a ior nav imôngo.*+
Ngeren mba shin kpe
^ Shin “u laha.”
^ Nenge Ngeren u Pasen Asember.
^ Shin a fatyô u kaan ér, “Ishima yam.”
^ Inja na yô ér, “Un u I Lu Kwagh Na La; Un u I Lu u Na La.”
^ Ka kwagh u pendan zendenya sha igyundu teman sha mi.
^ Zwa Heberu, “una ta num sha akishiangahar a ve.”
^ Zwa Heberu, “Beredi.”
^ Zwa Heberu, “una kehe.”
^ Ka Yosev je la.
^ Zwa Heberu, “za veren mo a ior av imôngo.” Ka injakwagh i ôron kwagh u kuugh.
^ Zwa Heberu, “I za ver un a ior nav imôngo.” Ka injakwagh i ôron kwagh u kuugh.
