Genese 47:1-31
47 Nahan Yosev za kaa a Farou ér:+ “Terem man anmgbianev av mough ken tar u Kaanan va heen. Ve va a ilev vev man uzendenya vev man hanma kwagh u ve lu a mi cii. Mba ken tar u Goshen.”+
2 A tôô anmgbianev nav utaan a za a ve sha ishigh ki Farou.+
3 Farou pine anmgbianev nav mbara ér: “Ka nyi tom ne erene?” Ve gema ve kaa a Farou ér: “Se mbayev ou se mba kuran iyôngo, se man uter asev cii.”+
4 Shi ve kaa a Farou ér: “Se va ser se va tema shir ken tar ne,+ sha ci u ijiir kera ngi i ilev mbi mbayev ou mbia ya toho ga, gadia ijen gba ken tar u Kaanan je zua ga.+ Nahan wea lumun yô, de mbayev ou ve tema ken tar u Goshen.”+
5 Tsô Farou kaa a Yosev ér: “Teru man anmgbianev ou ve va her a we heen.
6 Tar u Igipiti cii ngu sha ikyev you. Na teru man anmgbianev ou vegher u hemban doon u ken tar ne ve tema.+ Ve tema ken tar u Goshen, man aluer u fa mbagenev ken a ve mba ve fe tom tsembelee yô, ver ve ve̱ nengen sha ilev yav.”
7 Tsô Yosev nyôr a ter na Yakob, va a na sha ishigh ki Farou, maa Yakob ver Farou doo doo.
8 Farou pine Yakob ér: “U ngu anyom a me?”
9 Yakob gema kaa a Farou ér: “Anyom a m lu zenden sha tar wue wue yô,* nga 130. Anyom a uma wam vese ga, shi m ya ican ken a,+ shi a ngee kuma sha anyom a uter av lu uma shighe u ve lu zenden wue wue sha tar la ga.”*+
10 Mba been yô, Yakob ver Farou doo doo, maa a due hen Farou kera.
11 Nahan Yosev na ter na man anmgbianev nav ijiir ken tar u Igipiti ér ve tema, a na ve ijiir i hemban doon ken tar u Ramese,+ er Farou kaa nahan.
12 Yosev za hemen u nan ter na man anmgbianev nav man ya u ter na cii kwaghyan,* sha iyenge i ônov mba ve lu a mi la.
13 Ken ityar la cii kwaghyan* lu ga, sha ci u ijen la kôr tsung, tar u Igipiti man tar u Kaanan cii hungwa ashe ikyôr* sha ci u ijen la.+
14 Yosev lu ngohol inyaregh ki ken tar u Igipiti man ki ken tar u Kaanan cii sha samuyia u ior lu va yamen la,+ Yosev lu van a inyaregh kira hen ya u Farou.
15 Shighe karen yô, inyaregh ki ken tar u Igipiti man ki ken tar u Kaanan cii va bee, nahan Mbaigipiti gba van hen Yosev va kaan a na ér: “Na se kwaghyan! A er nan man se gba kpen sha ishigh you sha ci u inyaregh yasegh bee kera nahana?”
16 Nahan Yosev kaa a ve ér: “Aluer inyaregh yenegh bee yô, va nam nen ilev yenev, nahan me na ne kwaghyan sha ilev yenev.”
17 Nahan ve gba va nan Yosev uzendenya vev, Yosev di gema lu nan ve kwaghyan sha anyinya a ve man uzendenya vev man ilev vev kua ujaki vev, a za hemen u nan ve kwaghyan sha uzendenya mba ve lu van a mi la cii ken inyom la.
18 Inyom la been, ka kôron ken inyom igen yô, ve gba van her a na va kaan ér: “Se yer terem kwagh ne ga, inyaregh yasegh man uzendenya asev cii se vande nan terem kera. Se kera mba a kwagh ugen môm u nan terem ga, saa ayol a ase man inya yase tsô.
19 A er nan man se gba kpen sha ishigh you, shi inya yase kpa ia hingir ice nahana? Yam se kua inya yase sha kwaghyan, nahan se hingir ikpan i Farou, shi inya yase kpaa ia hingir i na. Na se samuyia sha er se lu uma se kpe ga, shi inya yase kpaa ia hingir ice ga yô.”
20 Yosev maa yam inya i Mbaigipiti cii na Farou, gadia hanma Origipiti cii tee inya i nan, sha ci u ijen la kôr tsung; nahan inya la hingir i Farou.
21 Maa a kura ior cii a va a ve ken ugar, hii hen ikighir i tar u Igipiti ingin zan zan za ar hen ingila.+
22 Lu inya i upristi la tseegh a yam ga ye,+ sha ci u upristi zuan a kwar ve hen Farou, man lu kwar u Farou naan ve la ve yaan ye. Ka nahan man ve tee inya ve ga ye.
23 Yosev maa kaa a ior ér: “Nenge, m yam ne nyian kua inya yen cii m na Farou, m ngu nan ne ivor ne, ne va lôô i hen inya shon.
24 Ne va sundan yô, ne na Farou môm ken utaan,+ kpa avegher a anyiin la yô a lu vor u ne va kaha ken ityev yô, shi a lu kwaghyan u ne kua mba sha uya enev man ônov enev cii ne ya yô.”
25 Nahan ve kaa ér: “U war uuma asev.+ Yô ma i doo terem a vese, ma se hingir ikpan i Farou.”+
26 Tsô Yosev gema kwagh ne hingir tindi ken tar u Igipiti zan zan nyian, ér môm ken utaan ka u Farou. Lu inya i upristi tseegh hingir i Farou ga ye.+
27 Iserael tema ken tar u Igipiti ken tar u Goshen,+ ve tema her ve mar ve seer ingyegh kpishi.+
28 Yakob tsa ken tar u Igipiti anyom 17, nahan ayange a Yakob tsa sha won cii yô, kohol lu anyom 147.+
29 Shighe va zurum u Iserael una kpe yô,+ a yila wan na Yosev a kaa a na ér: “Aluer doo u a mo yô, verem uwegh hen nam, tese wer m doo u ishima sha mimi, shi er kwagh a mo sha mimi. Wea lumun yô, de iin mo ken Igipiti ga.+
30 Zum u me kpe* yô, tôôm due a mo ken Igipiti kera, za iim ken uwar u uter av.”+ Maa a kaa ér: “Me er vough er u kaa nahan.”
31 Tsô a kaa ér: “Bum ase.” Maa a bum a na.+ Tsô Iserael sua ityough sha ityough ki gambe na.+
