Genese 6:1-22
6 Tsô zum u ior hii u seer iyenge sha tar, man er ve lu maren ônov mba kasev kpaa yô,
2 ônov mba Aôndo u mimi la*+ gba nengen er ior mar ônov mba kasev ve doo ishima yô. Nahan ve gba vôson mba ve soo la cii, ve lu hingir kasev vev.
3 Maa Yehova kaa ér: “Jijingi wam una kera wa ishima a or gbem sha won ga,+ sha ci u nan ngu di a mhen u* iyolough tsô. Sha nahan yô, nana tsa anyom 120.”+
4 Sha ayange la Akôraior* lu sha tar, shi ve za hemen u lun kpaa. Hen shighe la ônov mba Aôndo u mimi za hemen u tsan a ônov mba iorov mba kasev, nahan ve mar ve ônov. Ve lu ior mba ageev mba sha ashighe a tsuaa la, mba duen ati.
5 Nahan Yehova va nenge yô iferkwagh i or kehe sha tar, shi mbamhen mba ken ishima i nan cii lu mba bov tseegh hanma shighe cii.+
6 Yehova vaa afanyô* er un er or sha tar yô, vihi un ken ishima.*+
7 Nahan Yehova kaa ér: “Ka u me tim ior mba m gbe mban sha tar kera, or kua zendenya man ishôso i kpelan a kpela inya man akaauma a purugh sha aôndo cii, sha ci u m vaa afanyô er m gbe ve yô.”
8 Kpa gema doo Yehova a Noa.
9 Ngun ka yiase i Noa ne.
Noa lu orperapera.+ Lu wang* hen atô u mba ve lu uma hen shighe na* la cii. Noa zenden vea Aôndo u mimi la.+
10 Shighe kar yô Noa mar ônov utar, lu Shem man Ham man Yafeti.+
11 Kpa tar gema vihi sha ishigh ki Aôndo u mimi, shi tar iv a tswam kpaa.
12 Aôndo gema kenger tar yô, tar vihi cica;+ uumace cii er akaa a vihin sha tar.+
13 Tsô Aôndo kaa a Noa ér: “Ka u me tim uumace cii kera, sha ci u ve na tar iv a tswam, nahan m ngu timin ve a tar imôngo.+
14 Yô er tso sha kon u gofer,*+ tôndo ukpar ker, shighe un mningem*+ ken atô man ken won.
15 Kape u er un ne: Ilihen na i lu aseva 300,* igbanger na i lu aseva 50, ityaven na i lu aseva 30.
16 Er windou* sha tso la sha er iwanger ia nyôr yô, a lu ikyua a haav ishiva i môm. Er hunda hen imbusu i tso la;+ er un a lu a kpo u shin, u hen atô, man u sha.
17 “M ngu van a mngerem ma deemee+ sha tar, ma a tim hanma kwagh u a lu a iôôn i uma sha tar cii kera. Hanma kwagh sha tar cii una tim.+
18 M ngu yan ikyur a we, u nyôr ken tso la, we man ônov ou man kwase wou man kasev mba ônov ou cii.+
19 Nyôr a hanma kwagh u a lu a uma cii uhar uhar ken tso la,+ nom man ngô,+ sha er vea lu uma a we imôngo yô;
20 akaauma a purugh sha anza a a, man uzendenya sha anza a ve, man hanma kwagh u a kpelan a kpela inya cii sha inja na, hanmô ve yô vea va hen a we uhar uhar sha er vea lu uma yô.+
21 We gema kohol hanma inja kwaghyan cii nyôr a mi ken tso la,+ sha er we kua annyamev mbara cii ne yaan yô.”
22 Nahan Noa er hanma kwagh u Aôndo kaa un la cii. A er nahan vough.+
Ngeren mba shin kpe
^ Ka gbenda u i yilan mbatyomov mba Aôndo sha injakwagh ken zwa Heberu yô.
^ Shin “nan eren kwagh sha inja i.”
^ A fatyô u lun “Mbazôhôn ior,” inja na yô ka mba nan ér ior ve gba. Nenge Ngeren u Pasen Asember.
^ Shin “zungwe.”
^ Shin “ishima doo un ker ga.”
^ Shin “Lu a acôghor iyol ga.”
^ Zwa Heberu, “hen ikyov na.”
^ Shin “kon u leghem; kon u dedoo.”
^ Shin “tsur.”
^ Ishiva i môm yange i lu usentimita 44.5 (uinci 17.5). Nenge Ngeren u Seer u B14 la.
^ Zwa Heberu, “tsohar.” Mbagenev nenge ér tsohar ne lu windou shin ian i iwanger nyôron ga, kpa lu haav mbu mbu mough sha shin mbu nusu kuma ishiva i môm yô.
