Genese 15:1-21
15 Akaa ne nga been cii yô, Yehova ande hen Aberam ken mpase u sha mnenge kaa a na ér: “De cie ga+ Aberam. Mo me kura u.*+ Me na u injar i vesen.”+
2 Aberam gema kaa ér: “Yehova Ter u Hemban Cii, ka nyi u nama? Gadia m ngu a wan ga, shi or u nana ya dyako u ya wam kpa ka Eliezar, Ordamaseku.”+
3 Aberam shi kaa ér: “U nam wan*+ ga, shi ka or* u hen ya wam i lu u nana yam dyako ye.”
4 Kpa Yehova gema kaa a na ér, “Or ne una ya u dyako ga, kpa ka wan u u mar iyol you* una ya u dyako ye.”+
5 Maa a due a na ken won, a kaa ér: “Wea lumun yô, kenger sha kwavaôndo, ôr iyenge i asan wea fatyô yô.” Maa shi a kaa ér: “Kape ônov ou vea* lu je la.”+
6 Tsô a na Yehova jighjigh,+ nahan A nenge un ér ngu perapera.+
7 Shi a kaa a na ér: “Ka mo Yehova, u m dugh a we ken Ur u Mbakaldi, sha u me na u tar ne ya dyako u u la.”+
8 Tsô a pine un ér: “Yehova Ter u Hemban Cii, a er nan man me fa mer ua hingir dyako wama?”
9 A gema a kaa a na ér: “Vam a tulebua u lun anyom atar kua tuleivo u lun anyom atar man tuleyôngo u lun anyom atar, kua atii man ikyungugh ki ki lu a tsa kpishi ga yô.”
10 Nahan a tôô akaa la cii, a tôndo a ker atôôn ahar ahar. A ver tiôn u môm keen tiôn ugen keela,* kpa annyonov mbara yô a tôndo ve ga.
11 Maa inyon i yaren ikyôr gba van ér ia va ya inyam la, kpa Aberam lu zendan i kera.
12 Iyange va hiin u miren yô, Aberam gba mnyam kpum kpum, shi zege angôghime shile sha a na.
13 Tsô A kaa a Aberam ér: “Fa dedoo wer, ônov ou vea* va lu ushirmbaiorov ken tar u u lu u ve ga yô, shi ior mba ken tar la vea kôr ve ikpan, vea er ve ican anyom 400.+
14 Kpa me ôr ikyurior i vea za shire i la ijir,+ shi a been kera yô vea due a akaa a dedoo kpishi.+
15 Kpa we yô u za kohol uter ou bem bem; u tsa sha won kpishi, u bee iyol man u kpe a ii u ye.+
16 Kpa kov ve u sha unyiin la ua hide heen,+ sha ci u ka a kuma u a tsaha Mbaamor sha isholibo ve la ga.”+
17 Iyange va miren, ime ngi we mgbigh mgbigh yô, atse a duen mnyim va ande shi ikyaghusu kar hen atô u atôôn a inyam la.
18 Sha iyange la, Yehova ya ikyur a Aberam+ kaa ér: “Me na ônov ou* tar ne,+ hii hen ifi u Igipiti zan zan za ar hen zegeifi la, ka ifi u Uferati je la:+
19 Ka tar u Mbakeni+ man Mbakenishi man Mbakademoni je la,
20 kua Mbahiti+ man Mbaperishi+ man Mbarefaim+
21 man Mbaamor man Mbakaanan man Mbagirgashi kua Mbayebushi.”+
