Genese 30:1-43
30 Zum u Rahel nenge er un mar Yakob ônov ga yô, a gba gban anngô na iyuhwe, a kaa a Yakob ér: “Nam ônov, gayô me kpe.”
2 Nahan ishima vihi Yakob a Rahel, a kaa ér: “M ngu Aôndo u a yange u u maren ônov* laa?”
3 Nahan a kaa ér: “Kpankwase wam Bila ngun.+ Tsa a na sha er una marem ônov,* nahan mo kpaa me zua a ônov hen a na yô.”
4 Nahan a na un kpankwase na Bila hingir kwase na, Yakob maa tsa a na.+
5 Tsô Bila wa iyav mar Yakob wan u nomso.
6 Nahan Rahel kaa ér: “Aôndo ôr ijir yam shi a ungwa imo yam, a nam wan u nomso.” Ka nahan man a ii un iti ér Dan* ye.+
7 Bila kpankwase u Rahel la shi wa iyav mar Yakob wan u nomso u sha uhar.
8 Maa Rahel kaa ér: “M nôngo kwagh a anngôm tsung. Man m hemba kpaa.” Nahan a ii un iti ér Nafetali.*+
9 Zum u Lea nenge er un kera lu maren ônov ga yô, a tôô kpankwase na Selpa a na Yakob ér a hingir kwase na.+
10 Nahan Selpa kpankwase u Lea la, mar Yakob wan u nomso.
11 Lea maa kaa ér: “Iyol doom ve!” Nahan a na un iti ér Gadi.*+
12 Tsô Selpa, kpankwase u Lea, shi va mar Yakob wan u nomso u sha uhar.
13 Maa Lea kaa ér: “Nenge i saan mo iyol sha wono! Gadia ka keng ônkasev vea kaa ér saan mo iyol.”+ Nahan a na un iti ér Asher.*+
14 Tsô sha shighe u sundan alakema la, Ruben+ lu zenden ken toho maa a za zua a atam a mandereki,* nahan a va na ngô na Lea. Maa Rahel kaa a Lea ér: “Wea lumun yô, pande atam a mandereki a wan wou la nam.”
15 Lea gema kaa a na ér: “U ngohol mo nom kpa kuma u ga,+ shi hegen u soo u va ngohol atam a mandereki a wan wam kpaa?” Nahan Rahel kaa ér: “Ka shami. Una tsa a we hen tugh mbun sha ci u atam a mandereki a wan wou la.”
16 Nahan Yakob za ngur hiden ken toho aikighe yô, Lea due za kohol un kaa a na ér: “Ka mo u lu tsan a mo nyian ye, sha ci u m yam u sha atam a mandereki a wan wam.” Nahan a tsa a na hen tugh mbura.
17 Nahan Aôndo ungwa Lea, a wa iyav a mar Yakob wan u nomso u sha utaan.
18 Maa Lea kaa ér: “Aôndo nam injar yam, sha ci u m gema kpan wam m na nomom.” Nahan a ii un iti ér Isakar.*+
19 Lea shi wa iyav mar Yakob wan u nomso u sha ataratar.+
20 Maa Lea kaa ér: “Aôndo nam iyua i dedoo, hegen yô nomom una lumun mo,+ sha ci u m mar un ônov mba nomso ataratar.”+ Nahan a ii un iti ér Sebulon.*+
21 Shighe karen yô a mar wan u kwase, a ii un iti ér Dina.+
22 Ken masejime yô, Aôndo umbur Rahel. Aôndo ungwa msen na sha u nan ér a wa iyav.*+
23 Tsô a wa iyav a mar wan u nomso. Maa a kaa ér: “Aôndo kar a ihyeen yam kera!”+
24 Nahan a ii un iti ér Yosev,*+ a kaa ér: “Yehova seer mo wan u nomso ugen.”
25 Rahel maren Yosev yô, Yakob kera ngôôr ga je kaa a Laban ér: “Nam ian m hide m yem ken ijiir yam, ken tar wam.+
26 Nam kasev av man ônov av mba m er u tom sha ci ve ne, sha er me yem yô. Gadia u fa tom u m er u la dedoo.”+
27 Nahan Laban kaa a na ér: “Aluer a doo u a mo yô,—m nenge a ikyav i* tesen ér Yehova ngu veren mo doo doo sha ci wou.”
28 Shi a kaa ér: “Ôrom injar you, nahan me kimbi u i.”+
29 Yakob gema kaa a na ér: “U fa er m er u tom, man er i kpe ilev you iyol sha ikyev yam yô.+
30 Shighe u m lu a va ga la, u lu a akaa kpuaa, kpa ilev you seer hegen, mbi ngee kpishi, man hii shighe u m va la je Yehova ngu veren we doo doo. Nahan ka hanma shighe me va er kwagh sha ci u ya wama?”+
31 Maa a pine ér: “Ka nyi m na u we?” Yakob gema kaa ér: “De nem kwagh môm môm ga! Kpa aluer u erem kwagh môm ne yô, me hide me za hemen u kuran ilev you shi nengen sha i.+
32 Me kar her atô u ilev you cii nyian. Nahan u pav hanma iyôngo i i lu amian amian man i i lu iyol abeen abeen, man hanma gumiyôngo u a we zan il cii, kua hanma ngôivo u a lu iyol abeen abeen shin amian amian cii u ver kposo. Hii hegen je vea gema lun injar yam.+
33 Ken hemen yô, perapera wam una erem shiada zum u u va u va nengen injar yam yô; hanma ngôivo u a lu iyol amian amian ga shi a lu iyol abeen abeen ga, man hanma gumiyôngo u a we zan il ga u u zough a mi hen mo cii yô, tese ér m ii un a ii je ve.”
34 Nahan Laban kaa ér: “Kwagh la doo! I lu er u ôr nahan.”+
35 Sha iyange la je, a pav ikpev i lun iyol anger anger man abeen abeen kua ungômbaivoov mba lun iyol amian amian man abeen abeen cii, kua hanma gumiyôngo u lu a ibyeenegh ki pupuu iyol man u wan zan il cii, a gema a wa sha ikyev i ônov nav.
36 Nahan a pav a Yakob a yem ica kuma er zende u ayange atar nahan, tsô Yakob gba kuran iyôngo i Laban i i shi her la.
37 Yakob maa za gber igbough i ndor sha kon u setoraki man kon u amondi man kon u pelatanu, a va bugh i avuu sha ajiir ajiir, sha er u kungun u ken atô la una due yô.
38 Nahan a gema igbough mbi a bugh mbi avuu la a penda sha ishigh ki ilev mbira, shin mbaakpa kua shin mkam ma ilev man mngerem shimi, hen ape ilev va maan mngerem la, sha er mbia vever hen ishigh ki igbough mbira shighe u mbi ve u man mngerem yô.
39 Tsô ilev mbira lu vever hen ishigh ki igbough mbira, nahan mbi gba maren ônov mba lun anger anger man mba lun amian amian man mba lun iyol abeen abeen.
40 Tsô Yakob pav agumaiyôngo ver kposo, maa a gema ilev mbigen mbira a ver mbi mbi na ishigh ken mbi mbi lu iyol anger anger kua mbi mbi wa lun il ken ilev mbi Laban la. Maa a pav ilev nav a ver kposo, a kera nungwa mbi vea ilev mbi Laban ga.
41 Nahan ilev mbi taver iyol mbira mbia vever yô, Yakob a ver igbough la shin mbaakpa sha ishigh ki ilev mbira, sha er mbia vever hen igbough mbi shon yô.
42 Kpa a luun ilev mbi mbi taver iyol ga yô, a ver igbough ga. Nahan hanma shighe mbi taver ga mbira luun mbi Laban, mbi taver iyol mbira di mbi hingir mbi Yakob.+
43 Nahan or la hingir yôughyôugh, a lu a ilev kpishi, kua ikpan i nomso man i ukase, man urakumi kua ujaki kpaa.+
Ngeren mba shin kpe
^ Shin “u a yange u u jilen iyol.”
^ Zwa Heberu, “sha er una mar sha anu a am.”
^ Inja na yô ér, “Orjir.”
^ Inja na yô ér, “M Nôngo Kwagh.”
^ Inja na yô ér, “Iyol Doo.”
^ Inja na yô ér, “Saan Iyol; Msaanyol.”
^ Ka i yila iti ne ken zwa Buter ér mandrake. Kasev yange ve ya atam a ankon ne, sha ci u ve hen ér aa wase ve u wan iyav.
^ Inja na yô ér, “Ngu Injar.”
^ Inja na yô ér, “Mlumun.”
^ Zwa Heberu, “sha u bughun un sagh.”
^ Ka gbenda u tiônôô u yilan Yoshifia, inja na yô ér, “Yehova A Seer.”
^ Shin “avindigh a.”
