Genese 45:1-28
45 Tsô Yosev kera fatyô u wan ishima sha ishigh ki mbatomov nav ga.+ Nahan a kaa genger genger ér: “Hanma or nana kar ape m lu sha!” Orgen môm lu her shighe u Yosev pase iyol na hen anmgbianev nav la ga.+
2 Tsô a gba vaan genger genger je Mbaigipiti kpa za ungwa, shi i ungwa hen ya u Farou kpaa.
3 Ken masejime yô Yosev kaa a anmgbianev nav ér: “Ka mo Yosev. Terem ngu uma here?” Kpa anmgbianev nav fatyô u bughun zwa a na ga, sha ci u kwagh na ne kpiligh ve iyol.
4 Nahan Yosev kaa a anmgbianev nav ér: “Nea lumun yô kporom nen ikyua a mo.” Maa ve kporom ikyua a na.
Tsô a kaa ér: “Ka mo Yosev anngô wen u yange ne tee ken Igipiti la je ne.+
5 Kpa hegen ne yô, ishima i de vihin ne a ayol a en ga, shi de zôhôn nen a ayol a en sha ci u yange ne teem heen ga; gadia Aôndo tindim ér m hemen a ven, sha er a va war uma yô.+
6 Ka inyom i sha uhar i ijen ken tar ne je ne,+ man anyom shi her ataan a or a kaha kwagh ga shi or a sunda kwagh ga yô.
7 Kpa Aôndo tindim ér m hemen a ven, sha er a yima ne sha myom u vesen,+ nahan ne kera tim sha tar a bee ga yô.
8 Nahan, ka ne yange ne tindim heen ga, kpa ka Aôndo u mimi la, sha er una verem m lu orvesen u wan Farou kwagh,* m lu or u nengen sha ya na cii, shi m hemen tar u Igipiti cii ye.+
9 “Hide za nen hen terem fese za kaa nen a na ner, ‘Ka kwagh u wan wou Yosev a ôr je ne: “Aôndo verem m ngu ityough sha Igipiti cii.+ Nahan yô, sen va kohol mo, de ngôôr ga.+
10 U va tema ken tar u Goshen,+ ape u lu ikyua a mo ne—we vea ônov ou man ônov mba ônov ou, man ilev you man uzendenya ou man hanma kwagh u u lu a mi cii.
11 Me naan we kwaghyan her, gadia anyom a ijen shi her ataan.+ Gayô u kungu ican, we kua ya wou, shi akaa a u lu a mi cii aa saa ishe.”’
12 Ne vea anmgbian wam Benyamin cii, ne nenge sha ashe a en er i lu mo jim jim m lu lamen a ven yô.+
13 Nahan za ôr nen terem icivir i m lu a mi ken Igipiti ne cii, kua hanma kwagh u ne nenge cii. Za nen fefa, za va nen a terem heen.”
14 Tsô a kuve* anngô na Benyamin maa a gba vaan. Benyamin kpa gba vaan er a kamber un ave sha mon la.+
15 Shi a suse anmgbianev nav cii zwa, a kuve ve a vaa her, been yô, anmgbianev nav lam a na.
16 Nahan i za ungwa ken ya u Farou ér: “Anmgbianev mba Yosev va!” Nahan kwagh la doo Farou kua mbatomov nav.
17 Tsô Farou kaa a Yosev ér: “Kaa a anmgbianev ou wer, ‘Er nen kwagh ne: Kange nen ikyav sha uzendenya enev hide za nen ken tar u Kaanan,
18 za va nen a ter wen kua icombor yen cii her a mo heen, me na ne akaa a dedoo a ken tar u Igipiti, shi ne ya* akaa a hemban doon* a hen tar ne.’+
19 Shi m ngu nan zwa mer kaa a ve wer:+ ‘Er nen kwagh ne: Tôô nen akeke a kpelan+ a hen tar u Igipiti sha ci u ônov enev man kasev enev, shi tôô nen ter wen sha igen, va nen a na heen.+
20 Ishima i de ze ne iyol sha ci u akaa a ne lu a mi la ga,+ sha ci u vegher u tar u Igipiti u hemban doon la cii ka u wen.’”
21 Tsô ônov mba Iserael er kwagh ne, nahan Yosev na ve akeke a kpelan er Farou ôr nahan, shi a na ve akaa a yan sha gbenda kpaa.
22 A na hanmô ve ikyondo i he, kpa Benyamin yô, a na un agbenger a azurufa 300 kua akondo a he ataan.+
23 Shi a tindi ter na a akaa ne: ujaki pue mba tôôn akaainjaa a Igipiti, kua shi ungômbajaki pue mba tôôn samuyia man beredi, man kwaghyan u ter na una lu yan sha gbenda yô.
24 Nahan a wa anmgbianev nav ikyav. Er ve lu moughon la a kaa a ve ér: “De zôhôn nen a ayol a en sha gbenda ga.”+
25 Tsô ve mough ken tar u Igipiti, ve kôndo ve yem tar u Kaanan hen ter ve Yakob.
26 Maa ve kaa a na ér: “Yosev ngu uma her, shi ka un a lu hemen tar u Igipiti cii ye!”+ Kpa hingir un ken ishima gboong, sha ci u a na ve jighjigh ga.+
27 Er ve lu ôron ter ve Yakob akaa a Yosev ôr a ve la, shi er nenge a akeke a kpelan a Yosev tindi a mi ér i va tôô un la yô, ishima i ter ve Yakob gba saan shimi.
28 Iserael maa kende kaa ér: “Kuma nahan! Wan wam Yosev ngu uma her! Yô me za nenge a na keng man me mase kpen ye!”+
