Genese 27:1-46
27 Zum u Isaka bee iyol, ashe na kpa pir, kera lu fantyô u nengen ga yô, a yila wan na u iunda Isou,+ a kaa a na ér: “Wan wam!” Un kpaa lumun ér: “Mo ne!”
2 Maa a kaa ér: “M bee iyol hegen. M fa iyange i me kpe ga.
3 Nahan wea lumun yô, tôô ikyav you mbi yaren ikyôr hegen, gbandeavaan wou man ada wou, za ken toho za wuam swase.+
4 Va er ankwaghyan u nyohon, imba i ka m soo la, vam a mi, sha er me ya me ver u doo doo cii man me kpe yô.”
5 Kpa Rebeka gema lu ungwan er Isaka lu lamen a wan na Isou yô. Tsô Isou due yem ken toho u za keren swase van a mi.+
6 Maa Rebeka ôr a wan na Yakob ér:+ “M ungwa teru ngu lamen a anmgbian wou Isou, kaan ér,
7 ‘Vam a swase, va erem kwaghyan u nyohon, m̱ ya m̱ ver u doo doo sha ishigh ki Yehova cii man me kpe ye.’+
8 Yô wan wam, kegh ato a mo zulee, er kwagh u m lu ôron we ne.+
9 M zamber we, za ken ikyumuile, za vam a anivoov uhar mba hemban doon, sha er me er teru kwaghyan u nyohon a mi, u ka a soo la vough yô.
10 Maa u tôô u za a mi hen teru, sha er una ya una ver u doo doo cii man una kpe yô.”
11 Yakob kaa a ngô na Rebeka ér: “Kpa Isou anmgbian wam ka or u lun a ice iyol,+ man mo m gema m kôngor iyol.
12 Aluer terem za bendem ave iyol ye?+ A lu inja er m ngu eren beer sha a na nahan, nahan me va a ifyan sha iyol yam, a kera lu iveren ga.”
13 Tsô ngô na kaa a na ér: “Aluer una wa u ifyan yô, ifyan la i hide sha a mo wan wam. Er er m ôr u nahan ka cii la, za za vam a ve.”+
14 Tsô a za, a za kôr ve a va na ngô na, ngô na maa er kwaghyan u nyohon imba i ka i doo ter na la vough.
15 Maa Rebeka za tôô akondo a wan na u vesen Isou, a hemban doon a a lu a mi ken iyou la, a va hua Yakob, wan na u kiriki la.+
16 Shi a tôô akôv a anivoov mbara a cir un sha ave, shi a cir un sha mon ape ice lu ga la.+
17 Maa a tôô kwaghyan u nyohon u a er la kua beredi, a na wan na Yakob.+
18 Tsô a za nyôr hen ape ter na lu la, a kaa ér: “Terem!” Ter na gema kaa ér: “Mo ne! Ka we ana, wan wam?”
19 Yakob gema kaa a ter na ér: “Ka mo wan wou u iunda Isou.+ M er kwagh u u kaam la vough. Mough ase tema sha, ya swase u m za ve u a mi ne, sha er u verem doo doo yô.”+
20 Tsô Isaka pine wan na ér: “Er nan u zough a mi fele yum nahana wan wam?” Maa a gema a kaa ér: “Ka sha ci u Yehova Aôndo wou na ikyôr doom.”
21 Maa Isaka kaa a Yakob ér: “Shi kporom ikyua yôô, wan wam, m bende u ave iyol, sha er me fa wea lu wan wam Isou mimi shin wea lu un ga yô.”+
22 Nahan Yakob kporom ikyua a ter na Isaka, tsô Isaka bende un ave iyol, maa a kaa ér: “Ikyenge yô ka ikyenge i Yakob, kpa ave yô gema ka ave a Isou.”+
23 A kav un ga, sha ci u ave na lu a ice sha mi er ka ave a anmgbian na Isou nahan. Nahan a ver un doo doo.+
24 Maa a pine un ér: “U ngu wan wam Isou mimi?” Ngula kaa a na ér: “Een, m ngu.”
25 Maa a kaa a na ér: “Kporom ase a swase u u vem a mi la m ya, wan wam, maa me ver u doo doo.” Tsô a kporom a mi a ya, shi a va un a wain kpaa a ma.
26 Maa ter na Isaka kaa a na ér: “Kporom va susem zwa yôô, wan wam.”+
27 Nahan a kporom a va suse un zwa, maa a ungwa ihyuma i akondo a na.+ Tsô a ver un doo doo, a kaa ér:
“Nenge, ihyuma i wan wam ngi er ka ihyuma i inya i Yehova a ver i doo doo yô.
28 Aôndo u mimi a nôô u avure a sha,+ shi a na u inya i doon iyiav shin tar,+ kua samuyia kpishi man wain u he.+
29 Ior ve er u tom, akuraior a gure u inya. Lu orvesen u anmgbianev ou, shi ônov mba ngôu ve ngurum sha ishigh you.+ Ifyan i kôr hanma or u nan we u ifyan cii, or u nan ver u doo doo yô, nan kpa nana zua a iveren.”+
30 Isaka ne Yakob iveren been, Yakob karen a kar sha ishigh ki ter na Isaka kera nahan maa, anmgbian na Isou za hide ikyôr.+
31 Un kpa va er kwaghyan u nyohon za a mi hen ter na, maa a kaa a ter na ér: “Terem a mough sha a ya swase u wan na a za ve a mi ne, sha er una verem doo doo yô.”
32 Tsô ter na Isaka pine un ér: “Ka we ana?” A kaa ér: “Ka mo wan wou u iunda Isou.”+
33 Maa Isaka gba gbidyen akarkase iyol kaan ér: “Tsô ka an ashen nan za ker swase nan ve a mi hen a moo? M ya cii ve u va nyer ye, shi m ver nan doo doo kpaa—man nana lu a iveren kpee je!”
34 Isou ongo kwagh u ter na ôr ne yô, ishima vihi un tsung, a gba vaan genger genger kaan a ter na ér: “Nam iveren, mo kpa verem doo doo terem!”+
35 Kpa a kaa ér: “Anngôu va tsughum ngohol iveren you la.”
36 Maa Isou kaa ér: “Ka nahan ve i yer un ér Yakob* ye gaa? A ngohol mo ian ka kwa har je ne.+ A vande ngohol mo ian i waniunda,+ shi hegen a va ngohol mo iveren!”+ Maa a pine un ér: “U shim iveren her gaa?”
37 Kpa Isaka gema kaa a Isou ér: “M ver un mer a lu orvesen wou,*+ shi m na un anmgbianev nav cii mer ve lu mba eren un tom, shi m na un samuyia man wain sha u suen un.+ Nahan shi ka nyi i shi i me er u, wan wama?”
38 Isou kaa a ter na ér: “Ka iveren i môm tseegh u lu a mi yee, terem? Nam iveren, mo kpa verem doo doo, terem!” Tsô Isou ngor mliam gba vaan genger genger.+
39 Nahan ter na Isaka kaa a na ér:
“Nenge, ijiir you i teman ia lu ica a inya i doon iyiav i shin tar, shi ia lu ica a avure a sha kpaa.+
40 Ka sha sanker wou man u lu uma ye,+ u shiren anngôu.+ Kpa zum u u va kera fatyô u wan ishima ga yô, u kever igbur na sha mon wou kera.”+
41 Nahan kpa, Isou wa ken ishima u eren Yakob kwaghbo sha ci u iveren i ter na na un la.+ Isou zer kaan ken ishima na ér: “Ayange a zungwen terem nga zurum.+ Aa been yô, me wua anngôm Yakob.”
42 Zum u i za ôr Rebeka mkaanem ma wan na u vesen Isou ôr ne yô, fese je a tindi i yila wan na u kiriki Yakob, a kaa a na ér: “Nenge, anngôu Isou ngu wan ishima u oron iyev sha u wuan we.*
43 Nahan yô, wan wam, er kwagh u me kaa u ne, mough yevese yem hen anngôm Laban ken Haran.+
44 Za lu vea na anshighe a kar zan zan ishima i kar gban anngôu shimi,
45 zan zan ishima i i lu vihin anngôu a we la i̱ kar been, a̱ hungur a kwagh u u er un la. Maa me tindi a za kaa u ker u hide. A er nan ve ne uhar cii ne saam ken iyange i mômô?”
46 Tsô Rebeka zer kaan a Isaka ér: “Duem ishima a ônkasev mba Heti mban.+ Aluer Yakob er kwase ken ônov mba Heti mba lun er ônkasev mba hen tar ne nahan yô, shi uma wam una lum a inja sha nyi?”+
