Genese 7:1-24
7 Ka been yô Yehova kaa a Noa ér: “Nyôr ase ken tso we vea mba hen ya wou cii, sha ci u m nenge yô ken kov ne cii ka we u eren kwagh u perapera sha ishigh yagh ye.+
2 Hanma inja inyam i wang cii yô, nyôr a i itiankarihiar itiankarihiar,+ nom man ngô, nom man ngô; kpa hanma inja inyam i wang ga yô i lu ihiar ihiar tseegh, nom man ngô, nom man ngô.
3 Shi nyôr a akaauma a purugh sha kwavaôndo kpaa ataankarahar ataankarahar, nom man ngô, nom man ngô, sha er vea war vea za hemen u lun uma sha tar yô.+
4 Gadia shi ayange ataankarahar tsô me nôô ura+ sha tar ayange 40, tugh man atetan cii,+ me tim hanma kwagh u uma u m gbe a lu sha tar cii.”+
5 Maa Noa er hanma kwagh u Yehova kaa un cii.
6 Noa lu anyom 600 shighe u mngerem ma deemee va sha tar la.+
7 Nahan Noa man ônov nav man kwase na kua kasev mba ônov nav cii nyôr ken tso cii ve mngerem ma deemee va ye.+
8 Inyam i wang man inyam i wang ga kua akaauma a purugh sha, man hanma kwagh u uma u a zenden sha tar cii,+
9 nyôr ken tso uhar uhar va kohol Noa, nom man ngô, nom man ngô, vough er Aôndo vande ôron Noa nahan.
10 Nahan ayange nga kar ataankarahar yô, mngerem va sha tar deemee.
11 Ken inyom i Noa iv anyom 600 la, ken uwer u sha uhar ayange a u 17, sha iyange la, aan a mngerem ma sha kwavaôndo cii ande, shi aan a sha kpaa bugh.+
12 Ura nôô sha tar ayange 40, tugh man atetan cii.
13 Sha iyange shon la, Noa nyôr ken tso vea ônov nav, Shem man Ham man Yafeti,+ kua kwase na man kasev mba ônov nav mba utar mbara.+
14 Ve nyôr ker vea hanma inja inyamtoho cii, kua hanma inja zendenya cii, kua hanma inja i inyam i kpelan a kpela inya sha tar cii, man hanma inja i kwaghuma u purugh kpaa, hanma inyon man hanma kwagh u wan ingyur cii.
15 Ve lu zan hen Noa za nyôron ken tso la uhar uhar, hanma inja i kwaghuma u lun a iôôn i uma cii.
16 Nahan hanma kwagh u uma cii nyôr ker, nom man ngô, nom man ngô, vough er Aôndo kaa Noa nahan. Maa Yehova wuhe hunda.
17 Mngerem mara za hemen u lun sha tar deemee ayange 40, ma lu seer a seer, tôôn tso kenden a mi sha. Tso la lu kuan sha zarmnger sha, tareghnyaagh lu shin.
18 Mngerem hingir sha tar jangemaan shi ma lu seer a seer kpishi, kpa tso la yô lu kuan sha zarmnger.
19 Mngerem ngee sha tar kpishi je yô, iwo i taven sha tar cii uve.+
20 Mngerem mara kar iwo sha, tav kuma aseva 15.*
21 Nahan akaauma a zenden sha tar cii kpe+—akaauma a purugh man uzendenya man inyamtoho man hanma kwaghuma u zenden akum akum kpaa, kua uumace cii.+
22 Hanma kwagh u lu sha tar* u lu a iôôn i uma ken ahenga cii kpe kera.+
23 Nahan Aôndo tim hanma kwaghuma u lu sha tar cii kera, or man annyamev man akaauma a kpelan a kpela inya man a purugh sha kwavaôndo cii. I tim ve cii sha tar kera;+ lu Noa man mba ve lu vea na ken tso la tseegh ve war ye.+
24 Mngerem mara uve tar her zan zan ayange 150.+
Ngeren mba shin kpe
^ Ishiva i môm yange i kuma usentimita 44.5 (uinci 17.5). Nenge Ngeren u Seer u B14 la.
^ Shin “sha inya.”
