Genese 23:1-20
-
Ku u Sara man ijiir i iin ior (1-20)
23 Sara tsa anyom 127; ka anyom a Sara tsa sha won je la.+
2 Maa Sara kpe ken Kiriati-arba,+ ka Heberon je la,+ ken tar u Kaanan.+ Nahan Aberaham gba zungwen shi vaan Sara.
3 Tsô Aberaham mough hen ikyom i kwase na, za kaa a ônov mba Heti ér:+
4 “M ngu orvannya man shiror hen atô wen.+ Yô, nam nen ijiir hen atô wen i me iin ior yô, sha er me ii ku u u lum inya ne yô.”
5 Nahan ônov mba Heti gema kaa a Aberaham ér:
6 “Kegh ato a vese terem. We u ngu ortaregh u Aôndo* hen atô wase.+ U fatyô u iin ku wou hen iwar yase i hemban doon cii la. Or wase môm nana nyume u ijiir i nan ér i hemba u u iin ku wou ga.”
7 Tsô Aberaham mough ngurum sha ishigh ki ior mba hen tar la, ka ônov mba Heti je la,+
8 a kaa a ve ér: “Aluer ka sha ishima yen u m due a ku wam m za ii yô, kegh nen ato a mo, nahan kaa nen Eferon wan u Sohar
9 a teem bar u Makpela u a lu a mi la; ngu hen ikighir i inyaagh na. Me kimbi un azurufa sha ishe i i kom sha mi la,+ sha er me lu a ijiir i iin ior yô.”+
10 Eferon gema tema hen atô u ônov mba Heti. Nahan Eferon Orhiti la, gema kaa a Aberaham sha ato a ônov mba Heti, man sha ato a mba ve lu nyôron sha hundagar na la cii+ ér:
11 “Ka nahan ga terem! Kegh ato a mo. M na u ijiir la, kua bar u a lu her la cii. M na u i sha ashe a ônov mba ior av, ii ku wou her.”
12 Tsô Aberaham ngurum sha ishigh ki ior mba ken tar la,
13 a lam a Eferon sha ato a ior mbara, a kaa ér: “Kegh ato a mo, aluer a doo u yô! Me kimbi u azurufa sha inya shon, sha ishe i i kom la. Ngohol un, sha er me ii ku wam her yô.”
14 Maa Eferon kaa a Aberaham ér:
15 “Terem, kegh ato a mo. Ishe i inya ne kuma ushekel* mba azurufa 400, kpa mo vea we nahan ka u se za ôr ngula ga. Gba iin ku wou tsô.”
16 Aberaham ungwa kwagh u Eferon ôr la, nahan Aberaham kar myohom ma azurufa ma Eferon ôr sha ato a ônov mba Heti la, na un. Lu ushekel* mba azurufa 400, sha myohom ma mbakasuav lumun a mi la.+
17 Nahan inya i Eferon i i lu ken Makpela sha ishigh ki Mamre la, kua bar u lu ker man ikyon i i lu hen ijiir la cii, hingir
18 kwagh u Aberaham yam sha ishigh ki ônov mba Heti man sha ishigh ki mba ve lu nyôron hen hunda u gar na cii yô.
19 Ka been cii yô, Aberaham ii kwase na Sara ken bar u hen inya i Makpela i i lu sha ishigh ki Mamre la, ka Heberon je la, ken tar u Kaanan.
20 Nahan ônov mba Heti gema ijiir la man bar u lu her la cii na Aberaham, hingir ijiir na i iin ior heregh.+
Ngeren mba shin kpe
^ Shin a fatyô u kaan ér, “ortaregh u vesen.”
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
