Genese 17:1-27
17 Shighe u Aberam lu anyom 99 la, Yehova ande hen Aberam kaa a na ér: “Mo m ngu Aôndo u Hemban Agee Cii. Zenden sha ishigh yagh, shi eren kwagh u perapera.*
2 Me ya ikyur a we,+ me na u seer iyenge, u ngee kpishi.”+
3 Tsô Aberam yav cir ishigh inya; Aôndo shi kaa a na ér:
4 “Mo yô m ya ikyur a we,+ ú hingir ter u akuraior kpishi, a bunde ga.+
5 Iti you a kera lu Aberam* ga, kpa iti you ia hingir Aberaham,* sha ci u me gema u u hingir ter u akuraior kpishi.
6 Me na u u ngee kpishi, u hingir akuraior, utor kpaa vea due ken a we.+
7 “Me na ikyur i m ye vea we+ man wan wou* ne ia za hemen u lun her sha ikyov ikyov, a lu ikyuryan i tsôron. Me lu Aôndo wou kua u ônov* ou mba vea va lu shighe u u kera lu ga la.
8 Me gema tar u yange u lu shir ker la me na u kua ônov ou*+—ka tar u Kaanan cii je la—ua lu kwagh ve gbem sha won, shi me lu Aôndo ve kpaa.”+
9 Aôndo shi kaa a Aberaham ér: “We yô, kuran ikyuryan yam, we vea ônov ou mba vea va lu* shighe u u kera lu ga la, sha ikyov ikyov.
10 Ka ikyur i m ye vea we, i i gbe u we vea ônov ou* ne kuran je ne: Hanma wan wen u nomso yô, i tsôngo nan kpee je.+
11 Icôngo ne ngi hange hange, ia lu ikyav i tesen ér m ya ikyur a ven.+
12 Ken ikyov yen cii, i tsôngon hanma wanyenomso u nan nyer ayange anigheni yô,+ hanma or u i mar nan hen ya wou kua hanma or u nan lu wan wou* ga kpa i yam nan sha inyar hen ortyôtyev cii.
13 Hanma or u i mar nan hen ya wou kua hanma or u u yam nan sha inyar cii, i tsôngo nan kpee je.+ Ikyuryan yam i̱ i er ikyav i i̱ sha iyol yen ne, ia lu ikyuryan i tsôron.
14 Aluer oripyusu nan tsôngo ga yô, i wua nan* kpee je. Nan vihi ikyuryan yam.”
15 Aôndo shi kaa a Aberaham ér: “Hide kwase wou Sarai yô,+ de kera yilan un wer Sarai* ga, sha ci u a gema yilan un ér Sara.*
16 Me ver un doo doo, shi me na u wan hen a na;+ me ver un doo doo una hingir akuraior; ator a akuraior aa due ken a na.”
17 Maa Aberaham gba cir ishigh inya, gba sen ôron ken ishima ér:+ “Or u nan lu anyom 100 nahan kpa shi nana mar wanaa? Man Sara, kwase u a lu anyom 90 ne kpa una mara?”+
18 Tsô Aberaham kaa a Aôndo u mimi la ér: “Ishemael ma a shi lu uma sha ishigh you!”+
19 Aôndo gema kaa ér: “Kwase wou Sara una mar u wan u nomso kpee je, u ii un iti wer Isaka.*+ Shi me ya ikyur a na kua ônov nav mba vea va lu* shighe u una kera lu ga la, man a lu ikyuryan i tsôron.+
20 Kpa sha kwagh u Ishemael yô, m ungwa msen wou. Nenge! me ver un doo doo, me er un una seer iyenge, una ngee kpishi. Mbatarev 12 vea due ken a na. Shi me gema un una hingir ikyurior i vesen.+
21 Nahan cii kpa, ka Isaka me ya ikyur a na ye,+ un shon u Sara una mar u hen shighe ne inyom i sha la.”+
22 Aôndo lamen a Aberaham been yô, a kar hen a na kera.
23 Tsô Aberaham tsôngo wan na Ishemael, shi a kohol ior mba hen ya na cii a tsôngo, kua hanma or u i yam sha inyar cii, hanma nomsoor u nan lu hen ya u Aberaham cii. Sha iyange la je a tsôngo ve cii, er Aôndo ôr un nahan.+
24 Aberaham lu anyom 99 zum u i tsôngo un la.+
25 Wan na Ishemael di lu anyom 13 zum u i tsôngo un la.+
26 Sha iyange shon la je i tsôngo Aberaham kua wan na Ishemael.
27 Shi nomso mba hen ya na cii, hanma or u i mar nan hen ya na kua hanma or u i yam nan sha inyar hen ortyôtyev cii, i tsôngo nan a na imôngo.
Ngeren mba shin kpe
^ Shin “zenden sha ishigh yagh a acôghor iyol shio.”
^ Inja na yô ér, “I Kende a Ter Sha.”
^ Inja na yô ér, “Ter u Ikpelaior (Ikyumior); Ter u Ior Kpishi.”
^ Ken zwa Heberu yô, ishember ne ngi ôron kwagh u wan, kpa shi a fatyô u kaven i ér ngi ôron kwagh u ônov kpaa.
^ Zwa Heberu, “vor wou.”
^ Zwa Heberu, “vor wou.”
^ Zwa Heberu, “vor wou u ua va lu.”
^ Zwa Heberu, “vor wou.”
^ Zwa Heberu, “vor wou.”
^ Zwa Heberu, “i gber nan hen ior mba nan kera.”
^ Alaghga inja na yô ér, “Anyiman.”
^ Inja na yô ér, “Wantor.”
^ Zwa Heberu, “vor na u ua va lu.”
^ Inja na yô ér, “Ahan.”
