Genese 24:1-67
24 Aberaham yange bee iyol, tsa anyom kpishi, shi Yehova ver Aberaham doo doo sha hanma kwagh cii.+
2 Aberaham kaa a ortom na u hemba lun ortom u vesen hen ya na, u nengen sha akaa a a lu a mi cii la ér:+ “Wea lumun yô, shi verem uwegh hen nam,
3 me er u bum ken iti i Yehova, Aôndo u sha man tar, wer u er wan wam kwase ken ônkasev mba Mbakaanan mba m tem hen atô ve ne ga.+
4 Kpa u gema u za ken tar wam, hen ior av,+ u za er wan wam Isaka kwase ker.”
5 Kpa ortom na la gema pine un ér: “Nahan, aluer kwase la nana̱ lumun u van vea mo ken tar ne ga di ye? M hide m yem a wan wou ken tar u u dugh ker laa?”+
6 Tsô Aberaham kaa a na ér: “Wa ikyo, de tôôn wan wam yemen a mi ker ga.+
7 Yehova Aôndo u sha, u a due a mo hen ya u terem, ken tar u ior av kera,+ u a lam a mo shi a bum a mo a kaa ér:+ ‘Me na ônov ou*+ tar ne’ la,+ una tindi ortyom na una hemen we,+ nahan u za er wan wam kwase ker keng je a bunde ga.+
8 Kpa aluer kwase la nana lumun u van a we ga yô, u due iyolishô sha ibumun ne. Kpa wan wam yô, mayange de tôôn un yemen a na ker ga.”
9 Nahan ortom la penda uwegh hen namegh ku orvesen na Aberaham, maa a bum a na sha kwagh ne.+
10 Tsô ortom la tôô urakumi mba orvesen na pue, shi a tôô hanma injakwagh i dedoo i orvesen na cii. Maa a mough a gba yemen ken Mesopotamia, hen gar u Nahor.
11 A za er urakumi mbara gure hen ijôr i kesen mngerem i i lu ken wongar la. Lu er aikighe nahan, shighe u kasev duen za kesen mngerem la.
12 Maa a kaa ér: “Yehova Aôndo u orvesen wam Aberaham, wea lumun yô na akaa a za a mo i doo nyian, tese orvesen wam Aberaham dooshima wou u a been ga la.
13 M tile hen imbormnger heen, man ônkasev mba ior mba ken gar ne mba duen u va kesen mngerem.
14 Yô, na sha er gumkwase u me kaa a nan mer, ‘Wea lumun yô, shir ityegh ki mngeregh you kira m ma mngerem,’ man nana kaa ér, ‘Ma, shi me na urakumi ou kpa ve ma’ la, i lu kwase u u tsough sha ci u wanakiriki wou Isaka je la. Ma u er kwagh ne sha er me fa mer dooshima wou a orvesen wam ka u been ga yô.”
15 Er lu a kure iliam ga je tsô, Rebeka wan u Betuel+ u kwase, za va a ityegh ki mngeregh sha kwende. Ka Betuel wan u Nahor, u kwase na Milka+ mar un la. Nahor+ lu anmgbian u Aberaham.
16 Gumkwase ne doo ashe tsung, lu iniuunkwase, or lu a vande yaven a na ga. A kar a sen shin ijôr* la a za kese mngerem shin ityegh nagh poo, a hide a due.
17 Maa fese je ortom la yevese za kohol un, a kaa a na ér: “Wea lumun yô, nam anmnger hen ityegh you kira kpuaa m ma.”
18 A gema a kaa ér: “Ma, terem.” Maa a shiligh a ityegh ki mngeregh nagh kira fele a kôr ér a ma.
19 Ne un mngerem mara me cii yô, shi a kaa ér: “De m kese m na urakumi ou kpaa ve ma i kuma ve.”
20 Nahan a gema mngerem ma shin ityegh nagh kira, a haa shin ikyagh ki nan ilev mngerem fese, a hide a yevese a yem shin ijôr la a za kese magen. Lu kesen va haan zan zan urakumi nav mbara cii ma.
21 Hen shighe la cii, or la hide lu ving lu kenger un, kpiligh un iyol, lu henen ér Yehova na zende na ne doo a doo je ve shinii?
22 Urakumi mbara mba me mngerem cii yô, a dugh iyôgh ki sha zanaria ki wan sha ihinga ki* yuhwan kuman vegher shekel,* a na wankwase la, kua mbaagba uhar mba yuhwan kuman ushekel* pue.
23 Maa a pine un ér: “Ôrom ase yôô, u ngu wan u ana? Ijiir ngi hen ya u teru ape se tsa jee?”
24 Maa a kaa a na ér: “M ngu wan u Betuel,+ wan u Milka mar Nahor la.+
25 Se mba a ijiir i tsan, kua adenga man toho kpishi sha ci u urakumi.”
26 Maa or la gure kuma ishigh inya gba sughun Yehova
27 kaan ér: “I wuese Yehova, Aôndo u orvesen wam Aberaham, sha ci u a za hemen u tesen orvesen wam dooshima shi eren kwagh a na sha mimi. Yehova hemen mo va nyôr a mo hen ya u anmgbianev mba orvesen wam.”
28 Tsô wankwase la yevese za ôr mba hen ya u ngô na akaa ne.
29 Rebeka gema lu a anmgbian u nomso, iti na lu Laban.+ Tsô Laban due yevese za kohol or la shin kpejôr.
30 Zum u a nenge a iyôgh ki* sha ihinga man mbaagba mba ingyôr na Rebeka lu a mi ken ave la, shi ungwa mkaanem ma ingyôr na lu kaan ér, “Ka gbenda u or ne a lam a mo ne” yô, a due a za u za kohol or shon, or la gema tile a urakumi hen kpejôr.
31 Fese je a kaa ér: “Va, we u Yehova a ver u doo doo ne. Er nan u til ken won heen here? M sôr iyou ker, shi m sôr ijiir sha ci u urakumi kpaa.”
32 Tsô or la va ken ya, nahan a* sagh urakumi ikyav, shi a na urakumi mbara adenga man toho, maa a na or la mngerem a ôô angahar, un kua nomso mba ve lu vea na la.
33 Nahan kpa, mba va veren un kwaghyan yô, a kaa ér: “Me ya kwagh ga, saa me vande ôron kwagh u m lu a mi u ôron ne.” Nahan Laban kaa ér: “Ôr ase!”
34 Maa a kaa ér: “Mo m ngu ortom u Aberaham.+
35 Man Yehova haa orvesen wam iveren kpishi, a er un a hingir yôughyôugh, sha u nan un iyôngo man ibua man azurufa kua zanaria kua ikpan i nomso man i ukase man urakumi kua ujaki kpaa.+
36 Bee heela kera yô, Sara kwase u orvesen wam mar un wan u nomso ken iyolbeen,+ man ka u una na un hanma kwagh u a lu a mi cii.+
37 Nahan orvesen wam erem m bum, a kaa ér: ‘De eren wan wam kwase ken ônkasev mba Mbakaanan mba m tem hen atô ve ne ga.+
38 Kpa za ken ya u terem, hen tsombor wam,+ za vôso kwase ker va na wan wam.’+
39 Kpa m gema m pine orvesen wam mer: ‘Nahan aluer kwase la nan lumun u van vea mo ga di ye?’+
40 A gema a kaa a mo ér: ‘Yehova u m zenden sha ishigh nagh la,+ una tindi ortyom na+ vea we, shi una na zende wou ua doo keng, nahan u vôso kwase sha ci u wan wam hen tsombor wam hen ya u terem.+
41 U due iyolishô sha ibumun you a mo, aluer u za hen tsombor wam man ve venda u nan we kwase yô. Aluer ka nahan yô, u due iyolishô sha ibumun ne.’+
42 “M va nyer hen ijôr* la nyian yô, m kaa mer: ‘Yehova Aôndo u orvesen wam Aberaham, aluer ka u u na zende wam ne u doo yô,
43 m tile hen kpejôr* heen. Yô, na sha er gumkwase+ u nana va sha u va kesen mngerem, u me kaa a nan mer, “Wea lumun yô, nam anmnger shin ityegh you kin m ma,”
44 man nana kaa a mo ér, “Ma, shi me kese me na urakumi ou kpaa ve ma” la yô, i lu kwase u Yehova a tsough sha ci u wan u orvesen wam je la.’+
45 “Er m lu a kure kwagh u m lu ôron ken ishima yam la ga je tsô, Rebeka za due gba van a ityegh ki mngeregh sha akende, a kar a hungwa shin ijôr* la a gba za kesen mngerem. Maa m kaa a na mer: ‘Wea lumun yô, nam mngerem m ma.’+
46 Nahan a shiligh a ityegh ki mngeregh nagh ki a tôô sha akende la fese, a kaa ér: ‘Ma,+ shi me na urakumi ou kpaa ve ma.’ Nahan m ma, shi a kese a na urakumi kpaa.
47 Been yô, m pine un mer, ‘U ngu wan u ana?’ A gema a kaa a mo ér, ‘M ngu wan u Betuel, wan u Nahor u Milka mar un yô.’ Maa m wa un iyôgh* sha ihinga, shi m wa un mbaagba ken ave.+
48 Maa m gure m kuma ishigh inya sha ishigh ki Yehova, m wuese Yehova Aôndo u orvesen wam Aberaham,+ u a hemen mo a ve a mo sha gbenda u vough, sha u m va vôso wan u anmgbian u orvesen wam m za na wan na la.
49 Yô kaam nen ase, aluer ne soo u tesen orvesen wam dooshima shi eren kwagh a na sha mimi yô; kpa aluer ka nahan ga yô ôrom nen, sha er me ker gbenda ugen yô.”*+
50 Maa Laban man Betuel gema kaa ér: “Kwagh ne ka hen Yehova a dugh ye. Se mba sha ian i kaan a we ser se lumun shin se venda ga.*
51 Rebeka ngun heen ne; tôô un yem a na a za hingir kwase u wan u orvesen wou, vough er Yehova a kaa nahan.”
52 Ortom u Aberaham la ongo mkaanem vem man yô, fese je a gure inya sha ishigh ki Yehova.
53 Maa ortom la gba dughun akaa a eren hwe a mi a sha azurufa man a sha zanaria kua akondo nan Rebeka, shi a na anmgbian na u nomso la kpa akaainjaa kua ngô na.
54 Mba been yô, un vea ior mba ve lu vea na la ve ya kwagh shi ve ma kwagh, maa ve tsa her.
Kpernan nderen pepe yô, a kaa ér: “Nam nen gbenda m hide m yem hen orvesen wam.”
55 Tsô anmgbian u wankwase la kua ngô na gema kaa ér: “A gande kpa de gumkwase la a tsa vea vese ayange pue, tsô una yem.”
56 Kpa a kaa a ve ér: “Er Yehova a ver zende wam doo doo yô, de kera timbir nen mo ga. Nam nen gbenda m hide m yem hen orvesen wam.”
57 Nahan ve kaa ér: “De se yila gumkwase la se pine un.”
58 Ve yila Rebeka ve pine un ér: “U yem vea or nee?” A gema a kaa ér: “Een, me yem.”
59 Tsô ve na ingyôr ve Rebeka+ gbenda un vea yese na,*+ ve yem vea ortom u Aberaham la, kua ior nav.
60 Nahan ve ver Rebeka doo doo ve kaa ér: “Ingyôr yase, za za hingir ngô u udubu kwa dubu pue, shi ônov ou* ve ngohol ihindagar i* mbahyomov vev.”+
61 Tsô Rebeka vea kasev mba shiren un, ve mough ve henda urakumi, ve dondo sha or la. Nahan ortom la gba yemen a Rebeka.
62 Hen shighe la, Isaka gema mough vegher u Ber-lahai-roi la hide,+ sha ci u yange tema ken tar u Negebi.+
63 Tsô Isaka due za ken akôngo er aikighe nahan, u za henen sha kwagh.+ Moughon ityough sha yô, a nenge urakumi lu van!
64 Rebeka moughon ityough sha yô, a nenge a Isaka, maa fese je a hungwa sha rakumi.
65 Tsô a pine ortom la ér: “Ka hanma or nan lu zenden ken akôngo van u va kohol se laa?” Ortom la gema kaa ér: “Ka orvesen wam.” Maa a tôô ikyondo a yisa ishigh nagh.
66 Tsô ortom la ôr Isaka hanma kwagh u un er cii.
67 Maa Isaka kua a na, yem a na hen tenti u ngô na Sara.+ Nahan a tôô Rebeka hingir kwase na; a doo un ishima tsung,+ nahan Isaka zua a msurshima sha ku u ngô na.+
Ngeren mba shin kpe
^ Zwa Heberu, “vor wou.”
^ Shin “imbormnger.”
^ Shin “abinkwini u sha zanaria u wan sha ihinga u.”
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shin “abinkwini u.”
^ A shi nan kpa ka Laban je la.
^ Shin “imbormnger.”
^ Shin “hen kpe u imbormnger.”
^ Shin “imbormnger.”
^ Shin “abinkwini.”
^ Zwa Heberu, “sha er me gema ken iyan shin me gema ken imese yô.”
^ Shin “se fatyô u ôron kwagh u bo shin kwagh u dedoo ga.”
^ Ka yese na u hen shighe ne hingir u eren un tom la je la.
^ Zwa Heberu, “vor wou.”
^ Shin “agar a.”
