Genese 11:1-32
11 Tar cii lu zwa môm, shi gbenda u ôron kwagh kpa lu môm.*
2 Mba ngur yemen vegher u sha ityoughkitaregh la yô, ve za zua a pev u lun gburumaa ken tar u Shinar,+ maa ve tema her.
3 Maa ve kaa a ayol a ve ér: “Va nen se ta* nen akam, se sôô* nen a.” Nahan akam hingir ve awen a maan kwagh a mi, inya i tiher di gema hingir ve inya i maan kwagh a mi.
4 Maa ve kaa ér: “Va nen! Se maa nen gar man gôgôyou u taven, a tav a za tagher sha aôndo, nahan iti yase i za gwa sha won, se kera samber nen sha tar cii ga.”+
5 Tsô Yehova sen sha u una nenge gar man gôgôyou u ônov mba iorov maa la.
6 Nahan Yehova kaa ér: “Nenge! Mba nongoior môm, zwa kpaa môm,+ man ka kwagh u ve hii u eren je ne. Ma kwagh u vea wa ishima u eren u una hemba ve je kpa ngu ga.
7 Yô va! Se+ sen se za nzughul ve zwa sha er vea kera fatyô u ungwan ayol a ve kaven ga yô.”
8 Nahan Yehova va num ve heregh, sambe ve sha ajiir wue wue sha tar,+ maa kure kure tsô ve de u maan gar la.
9 Ka nahan man i yer un ér Babel*+ ye, sha ci u ka heregh Yehova nzughul zwa u ior mba sha tar cii ye, shi ka heregh Yehova sambe ve sha tar wue wue kpaa ye.
10 Ngun ka yiase i Shem ne.+
Shem lu anyom 100 shighe u a mar Apakashadi,+ zum u mngerem ma deemee bee anyom kar ahar la.
11 Shem maren Apakashadi kera yô, a hide a tsa anyom 500. Shi a mar ônov mba nomso man mba kasev.+
12 Apakashadi tsa anyom 35 maa a mar Shela.+
13 Apakashadi maren Shela kera yô, a hide a tsa anyom 403. Shi a mar ônov mba nomso man mba kasev.
14 Shela tsa anyom 30 maa a mar Eber.+
15 Shela maren Eber kera yô, a hide a tsa anyom 403. Shi a mar ônov mba nomso man mba kasev.
16 Eber tsa anyom 34 maa a mar Pelegi.+
17 Eber maren Pelegi kera yô, a hide a tsa anyom 430. Shi a mar ônov mba nomso man mba kasev.
18 Pelegi tsa anyom 30 maa a mar Riu.+
19 Pelegi maren Riu kera yô, a hide a tsa anyom 209. Shi a mar ônov mba nomso man mba kasev.
20 Riu tsa anyom 32 maa a mar Serugi.
21 Riu maren Serugi kera yô, a hide a tsa anyom 207. Shi a mar ônov mba nomso man mba kasev.
22 Serugi tsa anyom 30 maa a mar Nahor.
23 Serugi maren Nahor kera yô, a hide a tsa anyom 200. Shi a mar ônov mba nomso man mba kasev.
24 Nahor tsa anyom 29 maa a mar Tera.+
25 Nahor maren Tera kera yô, a hide a tsa anyom 119. Shi a mar ônov mba nomso man mba kasev.
26 Tera tsa anyom 70 maa a mar Aberam+ man Nahor+ man Haran.
27 Ngun ka yiase i Tera ne.
Tera mar Aberam man Nahor man Haran; Haran gema mar Loti.+
28 Haran yange kpe ken tar na ken Ur+ u Mbakaldi,+ er ter na Tera lu uma la je.
29 Tsô Aberam man Nahor vôso kasev. Iti i kwase u Aberam lu Sarai,+ iti i kwase u Nahor lu Milka,+ wan u Haran u kwase. Haran lu ter u Milka man Yiseka.
30 Sarai gema lu ikyômkwase;+ a mar wan ga.
31 Tsô Tera tôô wan na Aberam man Loti, wan u wan na,+ wan u Haran, kua Sarai kwase u wan na, ka kwase u wan na Aberam je la, ve due ken Ur u Mbakaldi ve yem ken tar u Kaanan.+ Shighe kar yô ve va nyôr hen Haran+ ve tema twev her.
32 Ayange a Tera tsa sha won cii yô lu anyom 205. Maa Tera kpe ken Haran.
