Genese 48:1-22
48 Akaa ne nga been yô, i va kaa a Yosev ér: “Nenge, ka tumen teru iyol.” Maa a tôô Manase vea Eferaim, ônov nav mba uhar mbara, a za a ve hen a na.+
2 Maa i kaa a Yakob ér: “Wan wou Yosev va hen a we.” Nahan Iserael nôngo kighir mough sha gambe na tema sha.
3 Yakob maa kaa a Yosev ér:
“Aôndo u Hemban Agee yange ande her a mo hen Lushi, ken tar u Kaanan, verem doo doo.+
4 A kaa a mo ér, ‘Me na u mar u ngee kpishi, shi me gema u u hingir ikyurior i vesen,+ me gema tar ne me na ônov ou,* ua lu u ve gbem.’+
5 Ônov ou mba uhar mba u mar ken tar u Igipiti cii ve m va kohol we ken Igipiti ne, ka mba av.+ Eferaim man Manase vea hingir mba av di vough er Ruben man Shimion kpa ve lu mba av nahan.+
6 Kpa ônov mbagen mba u hide u mar la yô, a lu mba ou. A yilan ve sha iti i anmgbianev vev mban ken dyako ve.+
7 Mo yô, zum u m mough ken Padan m lu van la, Rahel va kpe+ a mo ken tar u Kaanan, er m lu a zurum a Eferata ga la je.+ Nahan m ii un her sha gbenda u yemen ken Eferata, ka Betelehem je la.”+
8 Iserael nengen a ônov mba Yosev yô, a pine ér: “Ka unô nee?”
9 Yosev kaa a ter na ér: “Ka ônov av mba Aôndo a nem hen ijiir ne yô.”+ Maa ter na gema kaa ér: “Kporom ase a ve her a mo yôô, m ver ve doo doo.”+
10 Iserael bee iyol je ashe na pir, kera faantyô u nengen ga. Nahan Yosev kporom a ve ikyua a na, maa a suse ve zwa shi a kuve ve.
11 Iserael kaa a Yosev ér: “Yange m hen mer mayange me kera nenge a ishigh you ga,+ kpa nenge ase yô, Aôndo erem m nenge a ônov ou* je kpaa.”
12 Yosev maa kar a ve hen anu a Iserael kera, shi a ngurum a wa ityough inya.
13 Yosev maa kôr ve mba uhar mban kporom a ve ikyua a na; a kôr Eferaim+ ken uwegh nagh ku yan, a za a na ken uwegh ku Iserael ku imesegh, a gema a kôr Manase+ ken uwegh nagh ku ken imese, a za a na ken uwegh ku Iserael ku iyanegh.
14 Nahan kpa Iserael gema uwegh nagh ku iyanegh penda Eferaim sha ityo, shin er ngula lu u kiriki nahan kpaa, a gema uwegh nagh ku imesegh di a penda Manase sha ityo. A er nahan lu sha awashima je, shin er lu Manase lu waniunda nahan kpaa.+
15 Maa a ver Yosev doo doo a kaa ér:+
“Aôndo u mimi u uter av Aberaham man Isaka zenden sha ishigh nagh la,+Aôndo u mimi u a lu kuran mo ken ayange a uma wam zan zan nyian la,+
16 Ortyom u a yiman mo sha ikyev i hanma kwagh u bo cii la,+ a ver mbayev mban doo doo.+
I̱ yilan ve sha iti yam kua sha iti i uter av, Aberaham man Isaka.
Ve̱ ngee ve seer iyenge sha tar kpishi.”+
17 Zum u Yosev nenge er ter na a penda Eferaim uwegh nagh ku iyanegh sha ityo yô, doo un ga, nahan a gba nôngon ér una tôô ter na uwegh sha ityough ki Eferaim sha, una gema a ver sha ityough ki Manase.
18 Yosev maa kaa a ter na ér: “Ka nahan ga terem, ka waniunda je ne.+ Penda un uwegh ough ku iyanegh sha ityo.”
19 Kpa ter na gba vendan kaan ér: “M fa, wan wam, m fa. Un kpa una va lu ikyurior, shi un kpa una va lu tagher tagher. Nahan kpa, anngô na u kiriki una hemba lun tagher tagher a na,+ shi ônov nav vea* hingir ikyurior i ngeen kpishi.”+
20 Nahan a za hemen u veren ve doo doo sha iyange la,+ a gba kaan er:
“Iserael a̱ ter ne zum u ve lu veren or doo doo yô, ve kaan ér,‘Aôndo a er u lu er Eferaim man Manase nahan.’”
Kape a za hemen u veren Eferaim hiihii a Manase la.
21 Iserael maa kaa a Yosev ér: “Nenge, m ngu kpen,+ kpa Aôndo una za hemen u lun a ven, shi una hide a yem a ven ken tar u uter enev kpee je.+
22 Kpa mo yô, m pav inya you* m na u, i hemba kehen a i anmgbianev ou cii, ka inya i yange m ngohol hen Mbaamor sha sanker wam man sha ada wam la.”
