Genese 43:1-34
43 Ijen la kôr ken tar la tsung.+
2 Nahan zum u ve ya samuyia u ve za shin Igipiti ve za va a mi la bee yô,+ ter ve kaa a ve ér: “Hide shi za yam nen kwaghyan kpuaa u se ya yô.”
3 Maa Yuda kaa a na ér: “Or la yange ta se icin gbang gbang ér, ‘Aluer anngô wen ngu vea ven ga yô, de kera va nengen nen a ishigh yagh ga.’+
4 Nahan, aluer u tindi anngô wase a vese imôngo yô, se sen se za yam u kwaghyan.
5 Kpa aluer u tindi un ga yô, se sen ga, sha ci u or la yange kaa a vese ér, ‘De kera va nengen nen a ishigh yagh ga, saa anngô wen una lu a ven imôngo.’”+
6 Tsô Iserael+ pine ve ér: “Er nan ne ve a kwaghtseren ne sha a mo, sha u kaan a or la ner ne mba a anmgbian ugene?”
7 Ve gema ve kaa ér: “Or la yange pine se kwagh wase man u ior asev jighilii, a pine ér, ‘Ter wen ngu uma here? Ne mba a anmgbian ugene?’ Nahan se ôr un akaa ne cii sha mimi.+ Yange se fa inyô ser una kaa ér, ‘Va nen a anmgbian wene’?”+
8 Yuda maa gba zamber a ter na Iserael kaan ér: “Na wan la a za vea mo,+ de se za sha er se lu uma se kpe ga yô+—se vea we man ônov asev.+
9 Uma u wan la a lu sha ikyev yam.*+ Aluer kwagh za er un yô kôrom. Aluer m fatyô u hiden a na hen a we va nan we ga yô, me lu a ibo sha ishigh you gbem sha won.
10 Kpa luun er se timbir ga yô, hegen nahan ma se ze ma se hidi ma i kom kwa har.”
11 Nahan ter ve Iserael kaa a ve ér: “Aluer ka u a lu nahan keng yô, er nen kwagh ne: Tôô nen akaa a hen tar ne a hemban doon ken aba a en, za na nen or la iyua a mi;+ pande nen balsam+ kua iyough kpuaa, man tsur u human doon+ man avuu a ikyon* man ake a pisitashio* kua amondi.
12 Tôô nen inyaregh ki kuma er ki yange ne vande tôôn la nahan kwa har; shi tôô nen inyaregh ki yange i hide a mi i wa sha zwa u aba a en la kpaa.+ Alaghga yange nzughul ve a nzughul.
13 Kua nen a anngô wen, hide za nen hen or la.
14 Aôndo u Hemban Agee Cii la a na kunya u kôr or la a ven, sha er una pase anngô wen ugen la una va kohol ne, shi una de Benyamin kpaa yô. Kpa mo yô, aluer ka u ônov vea timim yô, vea tim di je!”+
15 Nahan ior mbara tôô uiyua mbara, shi ve tôô inyaregh kuma er ki yange ve vande tôôn kwa hiihii la nahan kwa har, kua Benyamin. Maa ve mough ve kôr gbenda ave, ve yem shin Igipiti, shi ve za tile sha ishigh ki Yosev.+
16 Yosev za nengen a Benyamin a ve imôngo je maa, a kaa a or u nengen un sha ya la ér: “Yem a ior mban ken ya, za sôngo ilev er kwaghyan, sha ci u ka u ior mban vea ya kwagh vea mo atetan.”
17 Her ave ave je maa or la er er Yosev kaa nahan,+ a tôô ior mbara a yem a mi hen ya u Yosev.
18 Kpa er i lu yemen a ior mbara hen ya u Yosev yô, cier ve iyol, ve gba kaan ér: “Ka sha ci u inyaregh ki yange i hide i wa se ken aba a ase, kwa hiihii u yange se va heen la je i ve a vese heen ye. Vea ta num sha a vese, vea gema se se hingir ikpan shi vea ngohol se ujaki!”+
19 Nahan ve kporom hen or u nengen Yosev sha ya la, ve za lam a na hen hunda u nyôron ken ya la.
20 Ve kaa a na ér: “Ya se anyi, terem! Yange se va heen kwa u hiihii la se va yam kwaghyan.+
21 Kpa se mba za nyer hen ijiir i tsan, se mba ngur saghen aba a ase yô, nenge ase, inyaregh ki hanmô wase lu sha zwa u ibya i nan her gedee.+ Nahan se soo u hiden a mi iyol yase.
22 Shi se va a inyaregh kigenegh kpaa, u va yamen kwaghyan. Se fa or u yange nan hide a inyaregh yasegh nan wa ken aba a ase ga.”+
23 Maa a kaa a ve ér: “Ka kwagh ga. Ishima i de nyian ne ga. Ka Aôndo wen kua Aôndo u ter wen yange wa ne akaainjaa ken aba a en ye. Yange inyaregh yenegh ar a mo.” Tsô a za due a Shimion, a va a na ape ve lu la.+
24 Tsô or la nyôr a ve hen ya u Yosev, a na ve mngerem ma ôôn angahar shi a na ujaki vev kwaghyan.
25 Tsô ve dugh uiyua+ mba va nan Yosev atetan, gadia ve ungwa ér mba va yan kwaghyan vea na her.+
26 Yosev va nyer ken iyou la yô, ve za va a uiyua vev mbara ve va na un ken iyou shon shi ve gure un inya.+
27 Maa a pine ve er ve lu yô, a kaa ér: “Ter wen u been iyol u yange ne ôr kwagh na la ngu nena? Ngu uma heree?”+
28 Maa ve kaa ér: “Wanakiriki wou ter wase ngu dedoo. Ngu uma her.” Tsô shi ve gure ve kuma ishigh inya.+
29 Moughon ashe sha yô, a nenge a anngô na Benyamin, wan u ngô na,+ maa a pine ve ér: “Ka anngô wen u kiriki u yange ne ôrom kwagh na nee?”+ Maa shi a kaa ér: “Aôndo a er a we dedoo wan wam.”
30 Maa Yosev kar fese due gba za keren ijiir i una vaa yô, sha ci u er nenge a anmgbian na yô, kôr un ken ishima.* Nahan a za nyôr ken iyou igen, lu ker tswen, maa a gba vaan ker.+
31 Been yô, a ôô ishigh maa a due, a tile a ishima shimi, maa a kaa ér: “Due nen a kwaghyan.”
32 Ve na un u na kposo, shi ve na ve u ve kposo, Mbaigipiti mba ve lu vea na la kpa ve lu yan u ve kposo, gadia Mbaigipiti yaan kwagh imôngo vea Mbaheberu ga, sha ci u u eren nahan la lu Mbaigipiti kwagh u ndôhôrshima.+
33 Anmgbianev nav mban tema sha ishigh nagh sha adondo adondo, hii sha waniunda sha ian na i waniunda la,+ zan zan due sha u masetyô la sha iyev nagh. Kpiligh ve iyol, ve gba geman kenger ayol a ve.
34 A lu tôôn kwaghyan hen tebul na nan ér i za seer ve. Hanma kwa yô, u Benyamin a hemba u mbagen mbara cii kwa taan.+ Nahan ve za hemen u yan kwagh shi man kwagh vea na zan zan ve kar iden.
