Genese 26:1-35
26 Tsô ijen gba ken tar la, kpa ka ijen i hiihii i yange i gba sha ayange a Aberaham la ga.+ Nahan Isaka za hen Abimeleki tor u Mbafiliti, hen Gerar.
2 Maa Yehova ande hen a na, a kaa a na ér: “De senen shin Igipiti ga. Tema ken tar u me tese u yô.
3 Tema lu shiror ken tar ne,+ me za hemen u lun a we shi me ver u doo doo kpaa, me gema ityar ne cii me na u kua ônov ou,*+ shi me er kwagh u yange m bum a teru Aberaham mer me er la, m kaa mer:+
4 ‘Me na ônov ou* vea ngee er asan a sha kwavaôndo nahan;+ shi me na ônov ou* ityar ne cii;+ man ka sha ikyev i ônov ou* akuraior a sha tar cii aa zua a iveren ye,’+
5 sha ci u Aberaham yange ungwa imo yam, shi za hemen u eren ishima yam shi kuran atindi a am kua akaawan a am man atindiakaa a am.”+
6 Nahan Isaka tema ken Gerar her.+
7 Zum u mba hen ijiir la zer pinen un kwagh u kwase na yô, lu kaan a ve ér: “Ka ingyôr yam.”+ Lu cian u kaan ér, “Ka kwase wam,” sha ci u a kaa ér, “Alaghga ior mba hen ijiir ne vea va wuam sha ci u Rebeka,” gadia yange doo kwase kpishi.+
8 Shighe kar yô, Abimeleki tor u Mbafiliti, ta ashe sha windou nenge Isaka lu hian a* kwase na Rebeka.+
9 Maa her je, Abimeleki yila Isaka kaa a na ér: “Ka kwase wou je! Man er nan ve u kaa wer, ‘Ka ingyôr yama’?” Tsô Isaka kaa ér: “Yange m ôr nahan sha ci u m lu cian mer me va kpe sha kwagh na.”+
10 Kpa Abimeleki gema kaa ér: “Ka nyi kwagh u er a vese nee?+ Ka ican ga u orgen ma nan yav a kwase wou, nahan ma u hee se ibo iyol je!”+
11 Abimeleki maa ta ior cii icin ér: “Aluer or bende or ne shin kwase na ave yô, a wua nan kpee je!”
12 Tsô Isaka gba lôôn iyiav ken tar la, nahan ken inyom la, a sunda kwagh u lôô la kuma kwa 100, sha ci u Yehova lu veren un doo doo.+
13 Or la hingir yôughyôugh, shi akaa a na lu seer a seer zan zan va hingir u lun a inyaregh kpishi.
14 Lu a akumaiyôngo kpishi, shi lu a ibua akum akum, mbatomov nav kpa ngee,+ nahan Mbafiliti gba gban un iyuhwe.
15 Mbafiliti kura inya cir azôr a mbatomov mba ter na Aberaham time sha ayange a Aberaham la cii.+
16 Abimeleki maa kaa a Isaka ér: “Mough hen ijiir yase kera, gadia u hemba se ngee yum.”
17 Nahan Isaka mough heela za haa afo shin pev* u Gerar,+ tema her.
18 Tsô Isaka hide saar azôr a yange i dugh sha ayange a ter na Aberaham, kpa Mbafiliti cir shighe u Aberaham kpe kera la,+ shi a yila a sha ati a yange ter na vande yilan a la.+
19 Mbatomov mba Isaka mba ngur saar azôr a hen pev* la yô, ve za zua a ijôr i lun a mngerem ma dedoo.
20 Tsô mbakuranilev mba hen Gerar mough ayôôso a mbakuranilev mba Isaka, ve gba kaan ér: “Ka mngerem asem!” Nahan a ii ijôr la iti ér Eseki,* sha ci u ve er ayôôso a na.
21 Shi ve za hii u timen ijôr igen, ingila kpaa ve gba za gban anyiman sha mi. Nahan a yila i ér Setena.*
22 A va mough heela a za time ijôr igen, kpa ve kera gba anyiman sha ingila ga. Nahan a yila i ér Rehoboti,* a kaa ér: “Ka sha ci u hegen Yehova na se ian gbanger gbanger, shi a na se iveren kpishi hen tar ne.”+
23 Maa a mough heela a yem ken Bersheba.+
24 Yehova ande hen a na hen tugh mbura, a kaa a na ér: “Mo m ngu Aôndo u teru Aberaham.+ De cie ga,+ gadia m ngu a we, me ver u doo doo shi me na ônov ou vea* ngee sha ci u wanakiriki wam Aberaham.”+
25 Tsô Isaka ta atse a nanden nagh her, a yila sha iti i Yehova.+ A tim tenti her,+ shi mbatomov nav time ijôr hen ijiir la.
26 Shighe kar yô, Abimeleki za mough ken Gerar va hen a na, un vea Ahusati or u wan un kwagh, man Pikol or u hemen ikyumutya na.+
27 Tsô Isaka kaa a ve ér: “Ne kôrom ihyom shi ne zendam hen ijiir yen kera, man ka nyi shi ne ve hen a mo?”
28 Maa ve kaa a na ér: “Se nenge wang er Yehova a lu a we yô.+ Nahan se kaa ser, ‘Wea lumun yô, ma se bum a ayol a ase,* ma u ye ikyur a vese wer+
29 u er se kwagh môm u vihin ga vough er se kpa se er u ifer ga nahan, gadia ka kwagh u dedoo tseegh se er a we ye, yange se de u u yem bem bem, man hegen Yehova ver u doo doo.’”
30 Maa a yôr ve iwer, ve ya kwagh shi ve ma kwagh.
31 Kpernan ve mough tugh tugh, ve bum a ayol a ve.+ Mba been yô Isaka na ve gbenda, ve mough hen a na bem bem ve yem.
32 Sha iyange shon la, mbatomov mba Isaka va ôr un kwagh u ijôr i ve time yô,+ ve kaa a na ér: “Se zua a mngerem!”
33 Nahan a yila i ér Sheba. Ka nahan ve i yer gar la iti ér Bersheba+ zan zan nyian ye.
34 Isou nyer anyom 40 yô, a vôso Yuditi wan u Beeri, Orhiti, kua Basemati wan u Elon, Orhiti.+
35 Kasev mban na Isaka man Rebeka ishimavihin kpishi.+
Ngeren mba shin kpe
^ Zwa Heberu, “vor wou.”
^ Zwa Heberu, “vor wou.”
^ Zwa Heberu, “vor wou.”
^ Zwa Heberu, “vor wou.”
^ Shin “lu kuven.”
^ Shin “uwagh.”
^ Shin “uwagh.”
^ Inja na yô ér, “Ayôôso.”
^ Inja na yô ér, “U Wan Or Kwagh Iyol.”
^ Inja na yô ér, “Ajiir a Gbanger.”
^ Zwa Heberu, “vor wou ua.”
^ Shin “ma se er iceghzwa.”
