Genese 35:1-29
35 Tsô Aôndo kaa a Yakob ér: “Mough yem ken Betel+ za tema ker, za ta Aôndo u mimi la atse ker, un u yange ande hen a we zum u u lu yevese anngôu Isou la.”+
2 Maa Yakob kaa a ior mba hen ya na kua mba ve lu a na la cii ér: “Haa nen mbaaôndo mba akuraior agen mba ne lu a mi la kera,+ wanger nen ayol a en, shi musan nen akondo a en.
3 Mough nen se kôndo nen sha Betel. Me za ta Aôndo u mimi la atse her, un u yange ungwa imo yam sha iyange i ican yam, shi a lu a mo hanma ijiir i* m ze cii la.”+
4 Nahan ve na Yakob mbaaôndo mba akuraior agen mba ve lu a mi la, kua mbaabinkwini mba ve lu a mi ken ato la,* maa Yakob ii ve* hen itine i zegekon u lu ikyua a Shekem la.
5 Er ve lu yemen la, mciem ma Aôndo gba ior mba ken agar a a kase ve la cii iyol, nahan ve kera zenda ônov mba Yakob ijime ga.
6 Ken masejime yô, Yakob va nyôr hen Lushi,+ ka Betel je la, ken tar u Kaanan, un kua ior mba ve lu a na cii.
7 A ta atse her, a ii ijiir la iti ér El-betel,* sha ci u lu her Aôndo u mimi la pase iyol na hen a na* zum u yevese anngô na la ye.+
8 Shighe kar yô, Debora,+ yese u Rebeka la kpe, nahan i ii un ikyua a Betel, hen itine i kon u ouki. Maa a ii u iti ér Alon-bakuti.*
9 Aôndo shi ande hen Yakob shighe u mough ken Padan-aram lu hiden la, a ver un doo doo.
10 Aôndo kaa a na ér: “Iti you ér Yakob.+ Kpa iti you a kera lu Yakob ga, iti you a hingir Iserael.” Nahan a gba yilan un ér Iserael.+
11 Aôndo shi kaa a na ér: “Mo m ngu Aôndo u Hemban Agee Cii.+ Mar nen kpishi, seer nen ngeen. Akuraior man akuraior a vesen aa due ken a we,+ utor kpaa vea due ken a we.*+
12 Me gema tar u m ne Aberaham man Isaka la me na u, shi me va na ônov ou mba vea* va lu shighe u u kera lu ga la tar la.”+
13 Tsô Aôndo mough undu un hen ijiir i a lam a na la.
14 Tsô Yakob tim iwen hen ijiir i a lam a na la, lu iwen i umbur, maa a haa nagh ku kwaghman sha mi, kua mkurem.+
15 Nahan Yakob za hemen u yilan ijiir i Aôndo lam a na her la ér Betel.+
16 Maa ve mough hen Betel kera. Er ve lu a zurum a Eferata yum ga la je maa, Rahel hii u toghor mar, man mar la na un ican kpishi.
17 Er lu toghor sha ican tsung la je, kwase u kôron mar la kaa a na ér: “De cie ga, u mar wan u nomso ne kpaa.”+
18 Er uma na lu karen kera la je (gadia lu kpen), a ii un iti ér Ben-oni,* kpa ter na yila un ér Benyamin.*+
19 Nahan Rahel kpe, i ii un sha gbenda u yemen Eferata, ka Betelehem je la.+
20 Yakob tôô zegeiwen ver sha uwar na; ka iwen i uwar u Rahel zan zan nyian.
21 Iserael maa mough her za kar gôgôyou u Eder ken hemen daalaa, maa tim tenti na her.
22 Kwagen la, Ruben za tsa a Bila, kwase u ter na u sha uikya zum u Iserael tema ken tar shon la, nahan Iserael va ungwa kwagh shon.+
Yakob lu a ônov 12.
23 Ônov mba Lea mar yô, lu Ruben, waniunda u Yakob,+ maa Shimion man Levi man Yuda man Isakar kua Sebulon.
24 Ônov mba Rahel mar yô, lu Yosev man Benyamin.
25 Ônov mba Bila kpankwase u Rahel yô, lu Dan man Nafetali.
26 Ônov mba Selpa kpankwase u Lea yô, lu Gadi man Asher. Ka ônov mba Yakob mba i mar un ve ken Padan-aram je la.
27 Ken masejime yô, Yakob va nyôr hen ape ter na Isaka lu hen Mamre,+ hen Kiriati-arba la, ka Heberon je la; ape Aberaham man Isaka cii yange ve vande lun ushirmbaiorov la.+
28 Isaka yange tsa anyom 180.+
29 Tsô Isaka sule, i ii un a ior nav imôngo,* a tsa kpishi cii man a mase kpen ye;* ônov nav Isou man Yakob ve ii un.+
Ngeren mba shin kpe
^ Shin “sha gbenda u.”
^ Shin “inyarev vev mbi ken ato.”
^ Shin “yer ve shin inya.”
^ Inja na yô ér, “Aôndo u Betel.”
^ Shin “ande hen a na.”
^ Inja na yô ér, “Ouki u Mlia.”
^ Zwa Heberu, “vea due hen ikyum you.”
^ Zwa Heberu, “vor wou u ua.”
^ Inja na yô ér, “Wan u Uwegh ku Iyanegh.”
^ Inja na yô ér, “Wan u Ijungwen Yam.”
^ Zwa Heberu, “i za ver un a ior nav imôngo.” Ka injakwagh i ôron kwagh u kuugh.
^ Zwa Heberu, “a bee iyol, a iv a ayange.”
