Genese 50:1-26
50 Tsô Yosev zungur gbidye sha ter na,+ a gba vaan shi susen un zwa.
2 Mba been yô, Yosev kaa a mbatomov nav mba ve lu mbatwerev la ér ve shighe ikyom i ter na icigh.*+ Nahan mbatwerev mbara shighe Iserael icigh iyol.
3 Ve tôô ayange 40 jimin u shighen un icigh, sha ci u lu ayange a i shighen or icigh je ne, shi Mbaigipiti vaa un ayange 70.
4 Ayange a vaan ku la nga been yô, Yosev lam a mba hen ya u Farou kaa ér: “Aluer doo ne a mo yô, ôrom nen Farou loho ne, kaa un nen ner:
5 ‘Terem yange erem m bum a na,+ a kaa ér: “Nenge! M ngu kpen.+ Yô za iim hen uwar+ u yange m time ken tar u Kaanan la.”+ Nahan wea lumun yô, de m kôndo m za ii terem tsô me hide.’”
6 Farou gema kaa a na ér: “Za za ii teru er yange er u u bum nahan.”+
7 Tsô Yosev mough gba yemen u za iin ter na, mbatomov mba hen ya u Farou cii yem vea na; mbavesen+ mba hen ya u Farou kua mbavesen mba ken tar u Igipiti cii,
8 man mba hen ya u Yosev cii kua anmgbianev nav man mba hen ya u ter na.+ Lu mbayev vev mba kiriki man uzendenya man ilev vev tseegh mase shin ken tar u Goshen ye.
9 Akeke a kpelan+ kua mbaanyinyav kpa za vea na, lu ikpelaior i vesen je.
10 Maa ve va nyôr hen vande u gbidyen iyiav u Atadi, u u lu hen ningir u Yordan la, maa ve vaa her tsung shi ve zungwe kpishi. A vaa ku u ter na her ayange ataankarahar.
11 Ior mba hen tar la, ka Mbakaanan je la, mba nengen er ior mbara lu zungwen hen vande u gbidyen iyiav u Atadi la yô, ve gba kpiligh iyol kaan ér: “Mbaigipiti mban zungwe ku ne dedoo!” Ka nahan man i ii ijiir la iti ér Abel-miseraim* ye, ijiir ne ngi hen ningir u Yordan la.
12 Nahan ônov nav er a na vough er yange kaa ve nahan.+
13 Ônov nav tôô un va a na ken tar u Kaanan va ii un hen bar u a lu hen inya i Makpela, inya i i lu sha ishigh ki Mamre, i Aberaham yange yam a Eferon Orhiti, ér i lu ijiir na i iin ior la.+
14 Yosev iin ter na kera yô, a hide ken Igipiti vea anmgbianev nav man mba ve za vea na u za iin ter na la cii.
15 Anmgbianev mba Yosev mba nengen er ter ve a kpe kera yô, ve kaa ér: “Alaghga tsô Yosev ngu wan kwagh ishima a vese, shi alaghga una or se iyev sha akaabo a yange se er un la cii.”+
16 Nahan ve tindi loho hen Yosev ve kaa ér: “Teru yange lu a kpe ga la kaa ér se ôr u kwagh ne, a kaa ér:
17 ‘Kaa nen Yosev ner: “M zamber we, wea lumun yô de anngôôv ou isholibo ve man kwaghbo u yange ve er u, ve va a imba ican la sha a we la.”’ Yô, gba den mbayev mba Aôndo u teru kwaghbo ve tsô.” Zum u ve ôr Yosev akaa ne yô, a vaa.
18 Tsô anmgbianev nav shi va va gure sha ishigh nagh ve kaa ér: “Nenge, se mba ikpan you je!”+
19 Yosev gema kaa a ve ér: “Ishima i de ze ne iyol ga. Mo m ngu Aôndo?
20 Shin er yange ne wa ishima u bulan mo nahan kpa,+ Aôndo yô soo ér kwagh ne a due i doo, sha er una war ior kpishi yô, er a lu eren nyian nahan.+
21 Nahan hegen yô, de kera cie nen ga. Me za hemen u nan ne kwaghyan, ne kua ônov enev mba kiriki.”+ Nahan a sur ve ishima, a ôr kwagh a ve asema gba ve shimi.
22 Yosev tema ken tar u Igipiti her, un vea ya u ter na, Yosev tsa anyom 110.
23 Yosev nenge a ônov mba Eferaim+ zan zan kov u sha utar, shi a nenge a ônov mba Makir+ wan u Manase kpaa. I mar ve hen anu a Yosev.*
24 Shighe karen yô, Yosev kaa a anmgbianev nav ér: “Mo yô m ngu kpen, kpa Aôndo una umbur ne keng a bunde ga,+ shi una due a ven ken tar ne kera kpee je, una yem a ven ken tar u yange bum a Aberaham man Isaka man Yakob ér una na ve la.”+
25 Nahan Yosev er ônov mba Iserael bum, a kaa ér: “Aôndo una va umbur ne kpee je. Nahan ne duen yô, tôô nen akuhe a am due nen a mi hen ijiir ne kera.”+
26 Tsô Yosev kpe zum u lu anyom 110 la, nahan i shighe ikyom na icigh,*+ i tôô i wa ken akwati, ken Igipiti.
