Genese 39:1-23
39 Tsô i yem a Yosev shin Igipiti,+ nahan Origipiti ugen iti na lu Potifar,+ lu or u eren tom hen ya u Farou, shi lu orvesen u mbakuran, a va yam un hen Mbaishemael+ mba ve yem a na shimi la.
2 Kpa Yehova lu a Yosev.+ Nahan a na akaa lu zan a na doo doo, shi i ver un lu nengen sha ya u orvesen na, Origipiti la.
3 Shi orvesen na nenge er Yehova lu a na, man er Yehova lu veren hanma kwagh u lu eren cii doo doo yô.
4 Kwagh u Yosev za hemen u doon un je yô, a va hingir ortom na u a na un jighjigh yô. Nahan a ver un lu ityough sha ya na, shi a gema akaa a a lu a mi cii a wa un sha ikyev.
5 Hii shighe u ver un ér a nengen sha ya na kua akaa a na cii la je, Yehova lu veren ya u Origipiti la doo doo sha ci u Yosev. Shi Yehova lu veren akaa a lu a mi ken ya man a lu a mi ken ityev la cii doo doo.+
6 Ken masejime yô, a gema hanma kwagh u lu a mi cii, a wa sha ikyev i Yosev, kera veren ishima sha kwagh ugen môm ga, saa di kwaghyan u yaan la tseegh. Heela tseegh ga, Yosev vese kuma ashe, shi doo or kpaa.
7 Ken masejime u akaa ne yô, kwase u orvesen u Yosev gba kenger un kaan a na ér: “Va yav a mo.”
8 Kpa a venda, a kaa a kwase u orvesen na ér: “Nenge, orvesen wam kera veren ishima sha kwagh môm u m nengen sha mi hen ya ne ga, a gema hanma kwagh u a lu a mi cii a wam sha ikyev.
9 Or môm hembam hen ya ne ga, shi a yangem kwagh môm môm kpaa ga, saa we tseegh, sha ci u we u ngu kwase na. Nahan a er nan man me er kwaghbo u vihin ngun, me er Aôndo isholibo nahana?”+
10 Nahan a zer lamen a Yosev ayange ayange, kpa Yosev lumun u yaven a na shin lun ape a lu tsô kpaa ga.
11 Kpa iyange igen la a za nyôr ken iyou sha er una er tom na yô, man mbatomov mba hen ya mbagenev cii lu ken iyou shon ga.
12 Maa kwase la gba un uwegh sha ikyondo kaa a na ér: “Va yav a mo!” Kpa a undu un a ikyondo na sha ave, a yevese a due ken won.
13 Nengen er a undu un a ikyondo na sha ave, a yevese a due ken won yô,
14 a gba vaan yilan nomso mba hen ya na, lu kaan a ve ér: “Nenge! A za va a Orheberu ne ér a va gema se se hingir kwagh u hômon kwagh a mi.* A va heen ér una va yav a mo, kpa m hii u ngoron genger genger.
15 Ongo er m lu ngoron taver taver yô, a undum a ikyondo na, a yevese a due ken won.”
16 Tsô a gema ikyondo na la a ver hen kpe, zan zan orvesen na kar hiden hen ya.
17 Maa a ôr un kwagh shon môm, a kaa ér: “Kpan u Heberu u u ve se a mi ne va ér una va gemam m hingir kwagh u hômon kwagh a mi.*
18 Kpa m ngur ngoron genger genger yô, a undum a ikyondo na, a yevese a due ken won.”
19 Orvesen na ongo a ungwa mkaanem ma kwase na ôr a na kaa ér: “Ka akaa a kpan wou a er a mo ne” je maa, ishima gba vihin un tsung.
20 Nahan orvesen u Yosev kôr un za wuhe ken purusu, hen ape i wuhen mbakwarev mba tor la, a lu ken purusu her.+
21 Kpa Yehova lu a Yosev her, shi a za hemen u tesen un dooshima sha u nan ér i doo orvesen u mbakuran purusu la a na.+
22 Nahan orvesen u mbakuran purusu la gema mba ken purusu cii wa Yosev sha ikyev, shi hanma kwagh u i lu eren her cii kpaa, lu un lu nan zwa i lu eren ye.+
23 Ishima nyian orvesen u mbakuran purusu la sha kwagh môm môm u wa Yosev sha ikyev ga, sha ci u Yehova lu a Yosev, shi Yehova na hanma kwagh u lu eren cii lu zan doo doo.+
