Genese 1:1-31
1 Sha hiihii la Aôndo gba usha man tar.+
2 Tar gba lun dang tsô shi u lu gbilin,* ime wa sha zegemnger,*+ shi jijingi u Aôndo*+ lu karen sha mngerem mara.+
3 Tsô Aôndo kaa ér: “Iwanger i lu.” Maa iwanger lu je.+
4 Tsô Aôndo nenge er iwanger i doo yô, nahan Aôndo gba paven iwanger a ime.
5 Aôndo yila iwanger la ér Sev, kpa ime la yô a yila ér Tugh.+ Nahan hingir aikighe man pepe, ka iyange i hiihii je la.
6 Tsô Aôndo kaa ér: “Zegeian a̱ gba+ hen atô u mngerem mara, a̱ pav mngerem a mngerem.”+
7 Maa Aôndo er ian la gba hen atô. A pav mngerem mara, magen lu ian la shin, magen lu ian la sha.+ Maa lu nahan je.
8 Tsô Aôndo yila ian la ér Sha.* Nahan hingir aikighe man pepe, ka iyange i sha uhar je la.
9 Maa Aôndo kaa ér: “Mngerem ma shin mara ma kohol ijiir i môm, tareghnyaagh u due.”+ Maa lu nahan je.
10 Aôndo yila tareghnyaagh la ér Tar.+ Kpa mngerem ma ma kohol la yô, a yila ma ér Uzegembamngerev.+ Nahan Aôndo nenge yô, kwagh la doo.+
11 Maa Aôndo kaa ér: “Tar u mende toho man imendenev mbi wan isham man ikyon i umen atam sha anza a i kposo kposo, i umen atam a lun a ake* kimi sha tar.” Maa lu nahan je.
12 Nahan tar gba menden toho man imendenev mbi wan isham+ man ikyon i umen atam a lun a ake* kimi sha anza a i kposo kposo. Tsô Aôndo nenge yô, kwagh la doo.
13 Nahan hingir aikighe man pepe, ka iyange i sha utar je la.
14 Aôndo maa kaa ér: “Akaa a tan iwanger*+ a̱ lu sha kwavaôndo sha, sha er aa pav sev a tugh yô.+ Aa lu akav a tesen ashighe man ayange kua anyom.+
15 Aa lu akaa a sha kwavaôndo a tan iwanger sha tar.” Maa lu nahan je.
16 Nahan Aôndo er akaa a tan iwanger a vesen ahar, u hemban la sha u a lu a tahav atetan,+ u hiden ijime la di sha u a lu a tahav tugh. Shi a gba asan kpaa.+
17 Nahan Aôndo ver akaa ne sha kwavaôndo ér a taan iwanger sha tar,
18 a̱ lu a tahav atetan man tugh, shi a paven iwanger a ime.+ Nahan Aôndo nenge yô kwagh la doo.
19 Nahan hingir aikighe man pepe, ka iyange i sha unyiin je la.
20 Aôndo maa kaa ér: “Mngerem ma iv a akaauma shimi, shi akaa a purugh kpaa a purugh sha tar sha kwavaôndo sha.”+
21 Aôndo shi gba ishôso i vesen i shin zegemnger, kua akaauma a a yemen shi a ningir shin mnger imôngo cii sha anza a ve kposo kposo, man akaa a purugh a lun a ingyur cii sha anza a a. Nahan Aôndo nenge yô kwagh la doo.
22 Tsô Aôndo ver ve doo doo, a kaa ér: “Mar nen kpishi, seer nen ngeen, iv nen zegemnger,+ shi akaa a purugh kpaa a ngee kpishi sha tar.”
23 Nahan hingir aikighe man pepe, ka iyange i sha utaan je la.
24 Aôndo shi kaa ér: “Akaauma a̱ lu sha tar sha anza a a kposo kposo, uzendenya man akaa a kpelan a kpela inya* man inyamtoho i sha tar sha anza a i kposo kposo.”+ Maa lu nahan je.
25 Nahan Aôndo er inyamtoho i sha tar sha anza a i kua uzendenya kpaa sha anza a ve, shi a er akaa a kpelan a kpela inya cii sha anza a ve kposo kposo. Nahan Aôndo nenge yô kwagh la doo.
26 Maa Aôndo kaa ér: “De se+ er or sha ibyeen yase,+ nana lu er se nahan.+ Ishu i shin zegemnger kua akaa a purugh sha aôndo man uzendenya man tar cii, kua akaa a kpelan a kpela inya, a a zenden sha tar cii a lu sha ikyev i nan.”+
27 Tsô Aôndo gba or sha ibyeen na, lu sha ibeen i Aôndo je a gba nan ye. A gba ve lu nomsoor man kwase.+
28 Maa Aôndo ver ve doo doo, Aôndo kaa a ve ér: “Mar nen kpishi, seer nen ngeen, iv nen tar.+ Gema nen u u lu sha ikyev yen.+ Ishu i shin zegemnger man akaa a purugh sha aôndo man hanma kwagh u uma u a zenden sha tar cii kpaa a̱ lu sha ikyev yen.”+
29 Aôndo shi kaa ér: “M na ne hanma imendenegh ki wan isham ki sha tar cii, kua hanma kon u umen atam a lun a ake kimi* cii. Ve lu kwaghyan wen.+
30 Shi hanma inyam i ken toho i sha tar cii, kua hanma kwagh u a purugh sha aôndo man hanma kwagh u a zenden sha tar, u a lu a uma ken a na yô, m na ve imendenev cii. Mbi lu kwaghyan ve.”+ Maa lu nahan je.
31 Tsô Aôndo gem nengen hanma kwagh u er cii yô, nenge! lu u doon tsung.+ Nahan hingir aikighe man pepe, ka iyange i sha ataratar je la.
Ngeren mba shin kpe
^ Shin “kwagh lu sha u ga.”
^ Shin “mngerem ma zan.”
^ Shin “tahav mbu Aôndo.” Nenge Ngeren u Pasen Asember, “Jijingi.”
^ Shin “Kwavaôndo.”
^ Shin “isham.”
^ Shin “isham.”
^ Shin “akaa a yeghen usu.”
^ Shin “annyamev mba kpelan iyav inya,” ikyav tese ér kwagh ne kua annyamev mbagenev mba ve lu kposo a mba i ter sha heen mbara cii.
^ Shin “lun a isham ker.”
