Genese 32:1-32
32 Tsô Yakob kar gba yemen, maa mbatyomov mba Aôndo va kohol un.
2 Yakob nengen a nenge a ve nahan maa a kaa ér: “Ijiir ne ka afo a Aôndo!” Maa a ii ijiir la iti ér Mahanaim.*
3 Tsô Yakob tindi mbatomov nav a loho ér ve hemen, ve za hen anmgbian na Isou, ken tar u Seir,+ hen haregh u Edom.+
4 A kaa a ve ér: “Ka kwagh u ne za ôr terem Isou je ne, ‘Wanakiriki wou Yakob kaa ér: “M za shir hen Laban m za tsa shighe gôgônan hegen.+
5 M za zua a ibua man ujaki man iyôngo man ikpan i nomso man i ukase,+ nahan m tindi loho ne mer i va ôr u terem, sha er a doo u a mo yô.”’”
6 Shighe kar yô, mba i tindi ve mbara va hide hen Yakob, ve kaa ér: “Se zua a anngôu Isou, ngu van sha gbenda u va kohol we, man nomso 400 mba vea na.”+
7 Nahan cier Yakob iyol kpishi, shi ishima gba nyian un tsung.+ Tsô a pav ior mba ve lu vea na la ker akum ahar, kua ilev man ibua man ujaki kua urakumi kpaa.
8 A kaa ér: “Aluer Isou ta num sha ikyum i môm yô, ikyum igen la ia war.”
9 Yakob been yô, a kaa ér: “Aôndo u terem Aberaham man Aôndo u terem Isaka, Yehova, we u u kaa a mo wer, ‘Hide ken tar wou man hen anmgbianev ou, shi me er a we doo doo’ ne,+
10 m kuma sha dooshima u vesen u u tesem ne ga, man sha gbenda u u er kwagh a wanakiriki wou sha mimi la kpaa ga.+ Gadia lu gbough agh tseegh m per Yordan ne a mi ye, kpa hegen m hingir akum ahar je.+
11 M ngu sônon mer, yimam+ sha ikyev i anmgbian wam Isou, gadia m ngu cian mer una va ta num sha a mo,+ kua sha ungô a ônov vev.
12 Gadia yange u kaa wer: ‘Me er a we a doo kpee je, me gema ônov ou vea* hingir er waarawa u shin zegemnger nahan, u u ngee u gande u ôron iyenge la.’”+
13 Maa a tsa her. Tsô a pande akaa agen a a lu a mi la, sha u za nan anngô na Isou iyua a mi:+
14 Ungômbaivoov lu 200, ikpev lu 20, ungômbaiyôngov 200, anomaiyôngo 20,
15 urakumi 30 a ônov vev ityô, ungômbaibuav 40, anomabua 10, ungômbajaki 20, man anomajaki 10.+
16 A gema mbi a wa sha ikyev i mbatomov nav, sha akum akum, a kaa a mbatomov nav ér: “Vande peren nen a mo, de lun nen ijiir i môm ga, hanma ikyum i lu ica a igen.”
17 Shi a kaa a u hiihii la ér: “Aluer anngôm Isou za zua a we man a pine u ér: ‘We u ngu u ana, man u ngu zan hana, man akaa a u lu a mi ne ka a ana?’ yô,
18 kaa wer, ‘Ka a wanakiriki wou Yakob. Ka iyua i a tindi terem Isou a mi yô,+ man nenge! un iyol na kpa ngu van se ken ijime.’”
19 U sha uhar man u sha utar kua mba ve dondo akumauile ken ijime la cii kpaa kape a kaa a ve je la, ér: “Ôr nen Isou mkaanem man nahan, zum u ne za zough a na yô.
20 Shi kaa nen a na ner, ‘Wanakiriki wou Yakob kpa ngu van se ken ijime.’” Gadia a ôr ken ishima na ér: ‘Aluer m wam un sha u tindin a iyua sha hemen yô,+ alaghga una ngohol mo doo doo zum u me nenge a na yô.’
21 Nahan i hemen peren a uiyua mbara, kpa un iyol na yô tsa ken afo.
22 Tugh mbura je, a va mough a kasev nav uhar+ kua ikpan i ukase na i ihiar la+ man ônov nav mba nomso mba 11 mbara, ve per ihyongo i Yaboki.+
23 Nahan a va mough a ve, ve per uwagh la,* shi a per a hanma kwagh ugen u lu a mi cii.
24 Ken masejime yô Yakob va shi un tswen, maa orgen gba va nôngon wav a na zan zan sha use.+
25 Va nengen er un hembe Yakob ga yô, a za a bende un a ikyooso,* maa ikyooso i Yakob poso er lu nôngon wav a na la.+
26 Maa or shon kaa a na ér: “Pasem m yem, gadia sev mbu aven.” A gema a kaa a na ér: “M ngu den we mer yem ga, saa u verem doo doo.”+
27 Nahan a pine un ér: “Iti you ér ana?” A gema a kaa ér: “Iti yam ér Yakob.”
28 Tsô a kaa ér: “Iti you ia kera lu Yakob ga, kpa a lu Iserael,*+ sha ci u u nôngo kwagh a Aôndo+ kua ior zan zan u kar hemban.”
29 Yakob gema kaa ér: “Wea lumun yô ôrom iti you.” Kpa a kaa a na ér: “Er nan u pinen iti yama?”+ Maa a ver un doo doo her.
30 Nahan Yakob na ijiir la iti ér Peniel,*+ sha ci u a kaa ér, “M nenge a Aôndo ishigh a ishigh, kpa uma wam war.”+
31 Karen a kar hen Penuel* kera nahan maa iyange due, kpa lu keer sha ci u ikyooso na la.+
32 Ka nahan ve zan zan nyian kpa ônov mba Iserael ve ye igbila i hen nam, i i lu hen ijuan i hen ikyooso la ga ye, sha ci u yange bende a ikyooso i Yakob, hen ape igbila i sha nam i zough la.
