Genese 13:1-18
13 Aberam mough ken Igipiti ver ishigh gba yemen Negebi.+ A mough vea kwase na man hanma kwagh u lu a mi cii, Loti kpa lu vea na.
2 Aberam lu a ilev kpishi, kua azurufa man zanaria.+
3 A mough hen Negebi a gba haan afo yemen Betel, zan zan a za nyôr hen ijiir i yange vande timin tenti hen atô u Betel man Ai,+
4 ape yange vande tan atse a nan nagh la. Tsô Aberam yila sha iti i Yehova her.
5 Loti u yange lu yemen vea Aberam la kpaa lu a iyôngo man ibua kua utenti.
6 Nahan ijiir i ve lu her la kera kuma i vea fatyô u lun her imôngo ga; akaa a ve lu a mi la ngee kpishi, nahan lu u vea kera fatyô u teman ijiir i môm ga.
7 Kwagh la na yô ayôôso gba hen atô u mbakuranilev mba Aberam vea mbakuranilev mba Loti. (Sha ayange la, Mbakaanan man Mbaperishi lu ken tar la.)+
8 Nahan Aberam kaa a Loti+ ér: “Nenge,* doo u ayôôso aa lu hen atô wam vea we ga, shin hen atô u mbakuranilev av vea mbakuranilev ou kpaa ga, gadia se mba anmgbianev.
9 U ngu a ian i teman ape u soo cii ken tar ne gaa? Wea lumun yô, se kera lu ijiir i môm ga.* Aluer u yem ken imese yô, mo me yem ken iyan, kpa aluer u yem ken iyan yô, mo di me yem ken imese.”
10 Tsô Loti gem kenger yô, a nenge haregh u Yordan+ la cii lu haregh u lu a mngerem kpishi yô (shighe ne Yehova lu a tim Sodom man Gomora ga), lu er ka sule u Yehova yô,+ man er tar u Igipiti nahan, zan zan za ar Soar.+
11 Maa Loti tsua ér una yem haregh u Yordan la. Nahan Loti mough twev za tema vegher u sha ityoughkitaregh la, maa ve kera lu imôngo ga.
12 Aberam lu ken tar u Kaanan, kpa Loti yô tema ken agar a hen haregh la.+ Shighe kar yô, a za tim tenti na ikyua ikyua a Sodom.
13 Kpa ior mba ken Sodom lu aferaior, ve eren asorabo a vihin tsung sha ishigh ki Yehova.+
14 Tsô Yehova ôr kwagh a Aberam zum u Loti pav a na kera la, a kaa ér: “Wea lumun yô, kende ashe sha, kenger ijiir i u lu her ne, hii ken imbusutarimese man imbusutariyan zan zan due sha ityoughkitaregh man shin ityôtar,
15 sha ci u ka u me na u tar u u nenge a mi ne cii, we kua ônov ou,* ua lu kwagh wen gbem sha won.+
16 Me er ônov ou vea* lu er ka vuulevu u hen inya nahan, nahan aluer ka u or a fatyô u ôron iyenge i vuulevu u hen inya yô, nana fatyô u ôron iyenge i ônov ou* kpaa.+
17 Mough sha, zende nenge iniembe man igbanger i tar ne, sha ci u m ngu nan we u.”
18 Nahan Aberam za hemen u lun ken utenti. Shighe kar yô, a va tema hen uzegembaikyonov mba Mamre,+ mba ve lu ken Heberon+ la, shi a ta atse a nanden Yehova nagh her kpaa.+
