Genese 22:1-24
22 Tsô akaa ne nga karen kera yô, Aôndo u mimi la kar Aberaham,+ a yila un, a kaa ér: “Aberaham!” Aberaham gema kaa ér: “Mo ne!”
2 Maa a kaa ér: “Ma u shi tôô wan wou Isaka,+ wan wou u môm môm u a doo u ishima yum la,+ ma u yem ken tar u Moria,+ ma u za nem nagh ku nanden sha a na, sha uwo ugen u me tese u yô.”
3 Nahan Aberaham mough tugh tugh kange jaki na shidi,* a tôô mbatomov nav uhar kua wan na Isaka. A ar ikyon i za nanden nagh, maa a mough a gba yemen hen ijiir i Aôndo u mimi tese un la.
4 Sha iyange i sha utar la, Aberaham ta ashe za nenge a ijiir la ken ica.
5 Aberaham maa kaa a mbatomov nav mbara ér: “Ne lu nen heen a jaki, kpa mo vea wan ne se kôndo shaala se za civir Aôndo man se hide hen a ven ye.”
6 Tsô Aberaham tôô ikyon i za nanden nagh a mi la penda wan na Isaka sha akende. Maa a tôô usu shi a kôr ihyô ken uwe, tsô ve uhar cii ve gba yemen imôngo.
7 Maa Isaka ôr kwagh a ter na Aberaham ér: “Terem!” Maa a kaa ér: “Een, wan wam!” Nahan a pine un ér: “Usu ngun, ikyon kpa ingin, man iyôngo i za nan nagh a mi ngi hana?”
8 Maa Aberaham kaa ér: “Aôndo iyol na una na se iyôngo i nanden nagh a mi,+ wan wam.” Tsô ve uhar cii ve gba yemen imôngo.
9 Ken masejime yô, ve za nyôr hen ijiir i Aôndo u mimi tese un la, maa Aberaham ta atse her, a penda ikyon sha mi vough vough. Tsô a kôr wan na Isaka a kange un ave man angahar, a penda sha ikyon i sha atse la.+
10 Maa Aberaham za uwegh tôô ihyô sha er una sôngo wan na yô.+
11 Kpa ortyom u Yehova yila un sha kaa a na ér: “Aberaham, Aberaham!” A gema a vengese ér: “Mo ne!”
12 Maa a kaa er: “De vihin wan la iyol ga, de eren un kwagh môm ga, hegen m fa er u cie Aôndo yô, sha ci u u nyumem* wan wou ga, wan wou u môm môm la.”+
13 Tsô Aberaham kende ashe sha, maa a nenge nomiyôngo wever akor ken ageva ken hemen na. Nahan Aberaham za kôr nomiyôngo la, va na nagh ku nanden a mi sha ityough ki wan na.
14 Aberaham maa ii ijiir la iti ér, Yehova-yire.* Ka nahan ve, zan zan nyian kpa i ôron kwagh ne ye, ér: “Sha uwo u Yehova yô, una na kwagh u kwagh a gbe sha mi la.”+
15 Ortyom u Yehova shi yila Aberaham sha kwa har sha,
16 a kaa ér: “Yehova kaa ér, ‘M bum iyol yam mer,+ er u er kwagh ne, u nyumum wan wou, u a lu wan wou u môm môm la ga yô,+
17 me ver u doo doo shi me na ônov ou vea* ngee kpee je a bunde ga, er asan a sha kwavaôndo man er waarawa u hen kpezegemnger nahan.+ Shi wan wou una* ngohol ihindagar i* mbahyomov nav.+
18 Man ka sha ikyev i wan* wou je+ akuraior a sha tar cii aa zua a iveren ye, sha ci u u ungwa imo yam.’”+
19 Tsô Aberaham hide va kohol mbatomov nav, maa ve mough ve hide ken Bersheba;+ nahan Aberaham tema ken Bersheba lu her.
20 Akaa ne nga karen kera yô, i va kaa a Aberaham ér: “Milka kpa mar anngôu Nahor ônov mba nomso.+
21 Wan na u iunda ka Ushi, u dondon ken a na yô ka anngô na Busu, mbagenev yô ka Kemuel, ter u Aram,
22 kua Kesedi man Haso man Pilda man Yidela kua Betuel.”+
23 Betuel va mar Rebeka.+ Ônov mba anigheni mban cii, lu ônov mba Milka mar Nahor anmgbian u Aberaham yô.
24 Shi kwase na u sha uikya u i yilan ér Reuma la kpa mar un ônov mba nomso: Lu Tebaha man Gaham man Tahashi kua Maaka.
