Genese 4:1-26
4 Tsô Adam tsa a kwase na Ifa, maa a wa iyav.+ A mar wan, i ii un iti ér Kain,+ maa a kaa ér: “M mar wan u nomso sha iwasen i Yehova.”
2 Shighe kar yô shi a mar anngô na Abel.+
Abel hingir or u kuran ilev, Kain di lu or u kahan sule.
3 Ka ze deghôô yô, Kain va a iyiav mbi ken sule sha u va nan Yehova nagh a mi.
4 Abel di gema va a ônov mba ilev nav hii maren la,+ kua ahôm a ve. Yehova lumun Abel kua nagh ku na la,+
5 kpa a lumun Kain kua nagh ku na la ga. Nahan ishima vihi Kain ker tsung, a gba yuen.*
6 Maa Yehova pine Kain ér: “Er nan ve ishima i vihi u shi u yuen nahana?
7 Aluer u gema u ngu eren kwagh u dedoo yô a lumun we gaa?* Kpa aluer u gema, u ngu eren kwagh u dedoo ga yô, nenge isholibo kegh sha hunda, isharen i i yô ka u hungwan a we; kpa ka we ma u hembe i ga zee?”
8 Tsô Kain va kaa a anngô na Abel ér: “Se za ken toho.” Nahan er ve lu ken toho la, Kain ta num sha anngô na Abel maa a wua un.+
9 Shighe kar yô, Yehova va pine Kain ér: “Anngôu Abel ngu hana?” A kaa a na ér: “M fa ga. M kor anngômô?”
10 Tsô Aôndo kaa a na ér: “Ka nyi u er nee? Nenge! Awambe a anngôu nga vaan hen inya yilan mo.+
11 Nahan hegen ne m wa u ifyan, shi m zenda u hen inya i i aver zwa i mena awambe a anngôu sha uwegh ough ne kera.+
12 U kaha inya ne kpa ia doo u iyiav ga.* U hingir or u azende azende man or u yevese wue wue sha tar.”
13 Maa Kain kaa a Yehova ér: “Mtsaha u sha isholibo yam ne kehe gande.
14 Nyian ne, u ngu zendan mo hen tar ne kera, me kera lu sha ishigh you ga; me hingir or u azende azende man or u yevese wue wue sha tar. Nahan hanma or u nan nenge a mo cii nana wuam kpee je.”
15 Nahan Yehova kaa a na ér: “Sha ityôkyaa la yô, or u nan woo Kain cii a or iyev sha nan kwa taankaruhar.”
Tsô Yehova ver Kain ikyav, sha er or a nenge a na kpa nana wua un ga yô.
16 Maa Kain kar sha ishigh ki Yehova sha, za tema ken tar u Noda,* u u lu Eden vegher u sha ityoughkitaregh la.+
17 Shighe kar yô, Kain tsa a kwase na,+ maa a wa iyav, a mar Enoki. Tsô a gba maan gar, a yila gar la sha iti i wan na Enoki.
18 Enoki va mar Irada, Irada gema mar Mehuyael, Mehuyael gema mar Metushael, Metushael di gema mar Lameki.
19 Lameki vôso kasev uhar. Iti i u hiihii la ér Ada, iti i u sha uhar la ér Sila.
20 Ada mar Yabal. Un lu ter u mba* tsan ken tenti, mba ve lu a ilev yô.
21 Iti i anmgbian na lu Yubal. Un lu ter u mba* kuhwan adiguve man mba tôngon imar.
22 Sila kpa mar Tubal-kain, un lu or u varen hanma inja i uikya sha togula man iyôgh cii. Anmgbian u Tubal-kain u kwase lu Naama.
23 Tsô Lameki wa kasev nav, Ada man Sila, icam kaa ér:
“Ungwa nen imo yam, ne kasev mba Lameki;Kegh nen ato a kwaghôron wam:
M wua or sha ci u nan gberem ivav,Ka gumor sha ci u nan vihim iyol.
24 Aluer ka u a or iyev i Kain kwa 7 yô,+A or i Lameki kwa 77.”
25 Adam shi tsa a kwase na, kwase na mar un wan u nomso. A ii un iti ér Setu,*+ sha ci u a kaa ér, “Aôndo nam wan* ugen sha ityough ki Abel, sha ci u Kain wua un.”+
26 Setu kpa va mar wan, a ii un iti ér Enoshi.+ Hen shighe la ior hii u yilan sha iti i Yehova.
