Genese 33:1-20
33 Yakob kenden ashe sha yô, a nenge Isou lu van, iorov 400 lu vea na.+ Nahan a pav ônov mbara, a wa sha ikyev i Lea man Rahel man ikpan i ukase i ihiar la.+
2 A ver ikpan i ukase la kua ônov vev sha hemen,+ Lea vea ônov nav dondo sha a ve,+ Rahel+ vea Yosev ve mase.
3 Un iyol na kar ve sha hemen, gba ngurum zan er lu mgbôghom a anmgbian na la. A ngurum kwa taankaruhar.
4 Kpa Isou yevese va kohol un, a kuve un shi a suse un zwa, maa ve hembe mliam ve gba vaan.
5 Moughon ityough sha yô, a nenge a kasev man mbayev mbara, nahan a pine un ér: “Ka unô ve lu vea we nee?” A gema a kaa ér: “Ka mbayev mba Aôndo a tese wanakiriki wou erdoo, a ne un yô.”+
6 Tsô ikpan i ukase la kporom a mbayev vev va ngurum sha ishigh nagh,
7 Lea kpa kporom a mbayev nav ve va ngurum sha ishigh nagh. Maa Yosev kporom vea Rahel, ve kpa ve va ngurum sha ishigh nagh.+
8 Isou pine un ér: “Awashima wou u tindin mbazendev mba m zough a ve kpishi ne yô ka nyi?”+ A gema a kaa ér: “Ka sha er a doo terem a mo yô.”+
9 Maa Isou kaa ér: “M ngu a akaa kpishi, anngôm.+ Lu a akaa a ou.”
10 Kpa Yakob kaa ér: “Ei, m zamber. Aluer doo u a mo yô, ngohol iyua yam sha uwegh agh, sha ci u m va a mi sha er me nenge a ishigh you yô. Man hegen m nenge a ishigh you er ka ishigh ki Aôndo nahan, sha ci u u ngohol mo saan saan.+
11 Wea lumun yô, gba ngohol iyua* i m ve u a mi ne tsô,+ gadia Aôndo er a mo doo, shi m ngu a hanma kwagh u kwagh a gbem a mi cii.”+ Nahan a sendegh her gbem, tsô a ngohol.
12 Shighe kar yô, Isou kaa ér: “Mough se yem, mo me zaan we sha hemen.”
13 Kpa a kaa a na ér: “Terem, u fa er mbayev mban ve lu a tsoghul ga yô,+ shi m ngu a iyôngo man ibua i i lu a ônov ityô yô. Aluer i torough a ve ken iyange i môm yô, ilev cii mbia kpe.
14 Terem una lumun yô, a hemen a wanakiriki na, mo me za hemen a zende ne kure kure, sha tahav mbu ilev yav mbin man mbayev mban, zan zan me kar va kohol terem hen Seir.”+
15 Maa Isou kaa ér: “Yô de m undu ior av mbagen vea we.” Kpa a gema a kaa ér: “Nahan keng-nee? De i gba doon we a mo tsô terem.”
16 Nahan Isou hide gba yemen ken Seir sha iyange la.
17 Yakob di kar yem ken Sukoti,+ a za maa ya na ker, shi a maa atôrauile. Ka nahan man a ii ijiir la iti ér Sukoti* ye.
18 Er Yakob mough zende ken Padan-aram yô,+ a va zan zan a va nyôr hen gar u Shekem doo doo,+ ikyua a tar u Kaanan,+ maa a haa afo ikyua a gar shon.
19 Tsô a yam inya hen ônov mba Hamor ter u Shekem, hen ape a tim tenti la, sha agbenger a inyar 100.+
20 A ta atse a nan nagh her, a yila a ér, Aôndo ka Aôndo u Iserael.+
