Genese 25:1-34
25 Aberaham shi er kwase ugen, iti na lu Ketura.
2 Shighe kar yô, a mar un Shimeran man Yokeshan man Medan man Midian+ man Ishebaki kua Shua.+
3 Yokeshan mar Sheba man Dedan.
Ônov mba Dedan yô, lu Ashurim man Letushim man Leumim.
4 Ônov mba Midian mba nomso lu Efa man Efer man Hanoki man Abida kua Eldaa.
Mban cii lu ônov mba Ketura mba nomso.
5 Shighe kar yô, Aberaham gema akaa a na cii na Isaka,+
6 kpa Aberaham na ônov mba mar a kasev nav mbagen mbara uiyua. Maa er lu uma her la je, a na ve gbenda ve yem vegher u sha ityoughkitaregh, ve za lu ica a wan na Isaka,+ ken tar u sha Ityoughkitaregh.
7 Anyom a Aberaham tsa sha won cii yô, kohol lu 175.
8 Tsô Aberaham sule, a tsa kpishi cii man a mase kpen ye, a bee iyol. I ii un a ior nav imôngo.*
9 Ônov nav, Isaka man Ishemael, ve ii un ken bar u Makpela u lu hen ishigh ki Mamre, hen inya i Eferon wan u Sohar, Orhiti,+
10 i Aberaham yam hen ônov mba Heti la. Lu her i ii Aberaham vea kwase na Sara ye.+
11 Aberaham kpen kera yô, Aôndo za hemen u veren wan na Isaka doo doo,+ Isaka tema ikyua a Ber-lahai-roi.+
12 Ka yiase i Ishemael+ wan u Aberaham, u Hagar,+ Wanigipiti, kpankwase u Sara la mar Aberaham la je ne.
13 Ka ati a ônov mba Ishemael, man ati a icombor i i dugh ken ve je ne: Waniunda u Ishemael lu Nebayoti,+ maa shi a mar Kedar+ man Adebeel man Mibesam+
14 man Mishema man Duma man Masa
15 man Hadadi man Tehema man Yetur man Nafishi kua Kedema.
16 Ka ônov mba Ishemael mba nomso je ne, ka ati a ve sha ajiir a ve tema man sha ajiir a ve haa afo je ne,* lu mbatarev 12 sha uipyaven vev.+
17 Ishemael tsa anyom 137 maa a kpe. I ii un a ior nav imôngo.*
18 Ve tema hii hen Havila+ u a lu ica ga a Shur+ ikyua a Igipiti la, zan zan za ar Ashiria. A tema ikyua a anmgbianev nav cii.*+
19 Ngun ka yiase i Isaka wan u Aberaham je ne.+
Aberaham mar Isaka.
20 Isaka lu anyom 40 shighe u vôso Rebeka wan u Betuel,+ Oraram u ken Padan-aram la; ka ingyôr i Laban Oraram la je la.
21 Isaka zer zamber a Yehova sha kwagh u kwase na, sha ci u lu ikyômkwase; nahan Yehova ungwa zamber na la, tsô kwase na Rebeka wa iyav.
22 Nahan ônov mba ve lu un ken uya la gba nôngon ker ayol a ve,+ maa a kaa ér: “Aluer ka nahan yô, shi ityôkyaa ngi i me lu uma?” Nahan a pine Yehova kwagh ne.
23 Yehova gema kaa a na ér: “Akuraior ahar nga u ken uya,+ iniongoior ihiar ia due ken a we,+ i ia zua ga yô; ikyurior igen la ia hemba taver a igen la,+ shi wan u vesen la una shire u kiriki la.”+
24 Shighe va kom u una mar yô, nenge! lu ahina lu un ken uya ye.
25 Nahan u hiihii la due nyian bong* shi lu a ice iyol kpishi,+ nahan ve ii un iti ér Isou.*+
26 Isou dugh yô, anngô na kpa due, a gba un uwegh shin ikishinguhar er lu duen la,+ nahan i ii un iti ér Yakob.*+ Isaka lu anyom 60 shighe u kwase na mar ve la.
27 Mbayev mbara mba ngur vesen yô, Isou hingir ortato u fan ikyôr,+ or u ken toho, kpa Yakob yô lu or u eren kwagh u vough, luun ken utenti.+
28 Isaka soo Isou, sha ci u vaan un a swase, kpa Rebeka yô gema soo Yakob.+
29 Sha shighe ugen la, Yakob lu jiidi kwaghyan sha shighe u Isou za hide ken toho vôr kpishi yô.
30 Nahan Isou kaa a Yakob ér: “Er kwaghyan u u lu a mi heela a nyian la kpase nam yôô, gadia m vôr kpishi!”* Ka nahan ve iti na lu Edom* ye.+
31 Maa Yakob kaa a na ér: “Vande teen mo ian you i* waniunda la!”+
32 Isou maa kaa ér: “M ngu nôngon u kpen! Ian i waniunda ngim a inja sha nyi?”
33 Yakob gema kaa ér: “Vande bumun ase!” Tsô a bum a na, nahan a tee Yakob ian na i waniunda la.+
34 Maa Yakob na Isou beredi kua alev a jiidi, a ya shi a ma, maa a mough a yem kwagh na. Kape Isou laha ian na i waniunda je la.
Ngeren mba shin kpe
^ Zwa Heberu, “i za ver un a ior nav imôngo.” Ka injakwagh i ôron kwagh u kuugh.
^ Shin “sha ajiir a ve haa afo, ve wa ugir je ne.”
^ Zwa Heberu, “i za ver un a ior nav imôngo.” Ka injakwagh i ôron kwagh u kuugh.
^ Shin a fatyô u kaan ér, “lu ihyom a anmgbianev nav cii.”
^ Shin “nyian iyol cica.”
^ Inja na yô ér, “U Lun a Ice.”
^ Inja na yô ér, “Or u Kôron Or Ikishinguhar; Or u Ngohol Or Ian.”
^ Shin “ijen kôrom je gande.”
^ Inja na yô ér, “Nyian.”
^ Shin “dyako wou u.”
