Yezu asatifuna kakamwe thangwi yakuperekeka kwace toera kutifera. (Juwau 15:13) Ife nee tinakwanisa kubwezera Yahova na Yezu thangwi yaufuni udapangiza iwo kuna ife. Mbwenye tinakwanisa kupangiza kuti tisapereka takhuta munjira inacita ife pinthu mu umaso wathu ntsiku na ntsiku. (Akol. 3:15) Ciomboli ndi cakufunika kakamwe kuna anyakudzodzwa. (Mat. 20:28) Thangwi ya ciomboli cidikhiro cawo cinadzakwanirisika. Thangwi ya kukhulupira kwawo ciomboli, Yahova asaaona ninga anyakulungama, pontho ninga anace. (Aroma 5:1; 8:15-17, 23) Mabira anango asaperekambo takhuta thangwi ya ciomboli. Thangwi yakukhulupira ciomboli ca Yezu, iwo asakwanisa kutumikira Mulungu mbakhala na cidikhiro cakubuluka “mu nyatwa ikulu.” (Apok. 7:13-15) Misoka miwiri ene isapangiza kuti asapereka takhuta thangwi ya ciomboli thangwi yakugumanika pa Cikumbuso pyaka pyonsene. w22.01 tsa. 23 ¶14-15

Cidatsukwalisa kakamwe Yezu ndi mathangwi adancitisa kuphiwa. Iye apambizirwa kuti akhatikana dzina ya Mulungu, pontho nee akhalemedza dzina ya Mulungu. (Mat. 26:64-66) Pyenepi pyatsukwalisa kakamwe Yezu, pontho iye nee akhadikhira kuti Babace mbadatawirisa kuti anthu ampwaze munjira ineyi. (Mat. 26:38, 39, 42) Yezu akhomerwa pa muti toera kupulumusa Ayuda akuti akhadapaswa dzedze. (Agal. 3:10) Ayuda akhadatawira kubvera Mwambo wa Mulungu, mbwenye iwo nee acita pyenepi. Natenepa iwo akhadathema kufa thangwi yakukhala ana a Adhamu, pontho thangwi ya dzedze ineyi ikhali na iwo. (Aroma 5:12) Mwambo wa Mulungu ukhalonga kuti munthu angacita madawo akuti athema kuphiwa akhafunika kuphiwa. Buluka penepo manungo ace akhafunika amanikwe pa muti. (Dheu. 21:22, 23; 27:26) Nakuti Yezu akhomerwa pa muti, pyenepi pyacitisa kuti Ayuda akhankhonda aphindulembo na ntsembe yace. w21.04 tsa. 16 ¶5-6

Nyerezerani pinthu pidacitika pa ntsiku yakumalisa Yezu mbadzati kuphiwa. Anyankhondo Aciroma am’manga mbam’menya. (Mat. 26:52-54; Juwau 18:3; 19:1) Iwo am’menya na ntcamu wakuti ukhapha kakamwe. Buluka penepo an’thukulisa muti wakulemera kakamwe. Yezu athukula muti unoyu toera kuenda nawo ku mbuto ikhafuna kuphiwa iye, mbwenye mwakukhonda dembuka anyankhondo Aciroma apanga mamuna unango toera athukule muti unoyu. (Mat. 27:32) Pidafika Yezu pa mbuto ikhafuna kuphiwa iye, anyankhondo akhomera manja ace na miyendo yace pa muti unoyu. Nakuti Yezu akhadakhomerwa manja ace na miyendo yace pa muti unoyu, iye akhabva kupha kakamwe thangwi yakulemera kwa manungo ace. Axamwali ace na mai wace akhalira, mbwenye atongi Aciyuda akhansingirira. (Luka 23:32-38; Juwau 19:25) Yezu athabuka munjira ineyi mu ndzidzi uzinji. Ntima wace na mapapu ace nee pikhaphatabve basa mwamphambvu. Natenepa iye nee akhapumabve mwadidi. Yezu adziwa kuti akhali wakukhulupirika, natenepa mbadzati kufa iye acita phembero yakumalisa kuna Yahova. Buluka penepo iye akotamisa nsolo wace mbafa. (Marko 15:37; Luka 23:46; Juwau 10:18; 19:30) Mwakukhonda penula, Yezu afa munjira yakutsukwalisa na yakupasa manyadzo. w21.04 tsa. 16 ¶4

Yezu apanga apostolo ace akukhulupirika 11 thangwi ya pibverano piwiri, cibverano cipswa na cibverano ca Umambo. (Luka 22:20, 28-30) Pibverano pyenepi pyafungula njira toera apostolo na anthu anango akucepa akhale amambo na anyantsembe kudzulu. (Apok. 5:10; 14:1) Anafunika kudya nkate na kumwa vinyu pa Cikumbuso, basi ene ndi Akristu akudzodzwa akuti aciri pa dziko yapantsi, pontho asacita khundu mu pibverano pyenepi piwiri. Yahova aapasa cidikhiro cadidi kakamwe cakukhala na umaso wa kwenda na kwenda kudzulu toera atonge na Yezu Kristu pabodzi na anyakudzodzwa anango akuti asacita khundu ya 144.000. Kusiyapo pyenepi, iwo anakwanisa kuona Yahova Mulungu! (1 Akor. 15:51-53; 1 Juwau 3:2) Anyakudzodzwa asadziwa kuti asafunika kupitiriza kukhala akukhulupirika mpaka kufa.​—2 Tim. 4:7, 8. w22.01 tsa. 21 ¶4-5

Mambava mawiri akhadakhomerwambo pa muti n’khundu mwa Yezu. (Luka 23:40, 41) M’bodzi wa iwo adzindikira Yezu mbalonga: “Ndikumbukireni mungapita mu Umambo wanu.” (Luka 23:42) Mafala anewa asapangiza kuti Yezu apasa cidikhiro mbava unoyu thangwi iye akhadziwa kuti Yahova ndi wantsisi kakamwe. (Mas. 103:8; Aheb. 1:3) Yahova asafuna kutilekerera na kutibvera ntsisi. Mbwenye iye anacita pyenepi basi ene tingasiya kucita pinthu pyakuipa na ntima onsene mbatikhulupira ntsembe yaciomboli ya Yezu Kristu. (1 Juwau 1:7) Anango nee asakhulupira kuti Yahova anakwanisa kualekerera. Khala imwe midzidzi inango musakhala na mabvero anewa nyerezerani ipi: Yezu mbadzati kufa, iye abvera ntsisi mbava wakuti akhadatoma kwene kupangiza cikhulupiro kuna iye. Pyenepi pisapangiza kuti Yahova anakwanisa kubvera ntsisi atumiki ace akukhulupirika.​—Mas. 51:1; 1 Juwau 2:1, 2. w21.04 tsa. 9 ¶5-6

Thangwi yakukhulupirika kwace mpaka kufa, Yezu akwanirisa pinthu pizinji. Cakutoma, iye apangiza kuti Sathani ndi nyauthambi. Yezu apangiza kuti munthu waungwiro anakwanisa kupitiriza kukhala wakukhulupirika mwakukhonda tsalakana mayesero onsene a Sathani. Caciwiri, Yezu apereka umaso wace ninga ciomboli. Nakuti Yezu apereka umaso wace ninga ntsembe, pyenepi pyacitisa kuti anthu akusowa ungwiro akhale na uxamwali wakuwanga na Mulungu mbakhala na cidikhiro cakutambira umaso wakukhonda mala. Cacitatu, Yezu apangiza kuti Yahova ndi ntongi wakulungama, pontho iye acenesa dzina ya Babace yakuti ikhapswipiswa. Natenepa tendeni tione ntsiku ibodzi na ibodzi ninga ntsiku yathu yakumalisa toera kupangiza kuti ndife akukhulupirika. Tingacita pyenepi, ngakhale tithimbane na mayesero akuti anaticitisa kuluza umaso wathu, ife tinakwanisa kulonga kuti “Yahova, ine ndacita pyonsene toera kupitiriza kukhala wakukhulupirika, ndapangiza kuti Sathani ndi nyauthambi, pontho ndacenesa dzina yanu.” w21.04 tsa. 12 ¶13-14

Yezu atongwa mwakusowa ulungami, asingirirwa, amenywa, buluka penepo mbakhomerwa pa muti. Iye akhomerwa manja na miyendo yace. Natenepa iye akhabva kupha kakamwe. Ngakhale tenepo, iye akwanisa kulonga pinthu pyakufunika kakamwe. Ife tapfundza pinthu pyakufunika kakamwe na mafala akumalisa a Yezu. Iwo asatikumbusa kuti tisafunika kulekerera anango mbatinyindira kuti Yahova anatilekererambo. Ife tiri na abale na alongo azinji mu mpingo akuti ali dzololo toera kutiphedza, mbwenye toera akwanise kucita pyenepi, ife tisafunika kuapanga nyatwa zinathimbana na ife. Kusiyapo pyenepi, ife tisadziwa kuti Yahova anatiphedza toera kupirira nyatwa zonsene zinathimbana na ife. Pontho tapfundza kuti ife tisafunika kukhala akukhulupirika ntsiku zonsene mbatinyindira kuti ngakhale tife Yahova anadzatilamusa muli akufa. w21.04 tsa. 8 ¶1; tsa. 13 ¶17

Tingatowezera manyalo a Yezu, tinakwanisa kukhala na umaso wakukhonda mala. Mu ndzidzi udabvundzwa Yezu na m’phale unango wakupfuma kuti akhafunika kucitanji toera akhale na umaso wakukhonda mala, Yezu antawira: “Bwera ukhale nyakupfundza wanga.” (Mat. 19:16-21) Kuna Ayuda anango akuti nee akhakhulupira kuti Yezu ndi Kristu, iye alonga: “Mabira anga . . . asanditowera. Ine ndisaapasa umaso wakukhonda mala.” (Juwau 10:24-29) Ife tinapangiza kuti tisakhulupira Yezu tingaphatisira pinthu pidapfundzisa iye na kutowezera pinthu pidacita iye. Tingacita pyenepi, tinapitiriza mu nseu unatsogolera ku umaso wakukhonda mala. (Mat. 7:14) Mbatidzati kutowezera manyalo a Yezu mwakukhulupirika, cakutoma tisafunika kundziwa. ‘Kudziwa’ Yezu ndi cinthu cakuti tisafunika kupitiriza kucicita. Ife tisafunika kupitiriza kupfundza thangwi ya makhaliro ace, manyerezero ace na midida yace. Mwakukhonda tsalakana pyaka piri na ife mu undimomwene, ife tisafunika kupitiriza kuwangisira toera ‘kudziwa’ Yahova pabodzi na Mwanace. w21.04 tsa. 4 ¶9-10

Pisaoneka kuti mpostolo Paulu akhatsukwala kakamwe mu ndzidzi ukhanyerezera iye pinthu pidacita iye mbadzati kukhala Nkristu. Na thangwi ineyi, iye alonga kuti ndi “nyakudawa kakamwe.” (1 Tim. 1:15) Mbadzati kudziwa undimomwene, Paulu akhatcinga Akristu m’mizinda yakusiyana-siyana, mbaikha anango nkaidi, pontho iye akhapha anango. (Mabasa 26:10, 11) Mwakukhonda penula, Paulu akhatsukwala kakamwe pikhaonana iye na m’phale Wacikristu wakuti anyakubala ace aphiwa mukutawiriswa na iye. Paulu akhatsukwala kakamwe thangwi ya pinthu pidacita iye, mbwenye iye akhadziwa kuti nee mbadakwanisa kupicinja. Kusiyapo pyenepi, Paulu akhakhulupira kuti Kristu afera iye, na thangwi ineyi iye alemba: “Thangwi ya kukoma ntima kukulu kwa Mulungu, ine ndine mpostolo.” (1 Akor. 15:3, 10) Kodi pinthu pyenepi pisatipfundzisanji? Ife tisafunika kukhala na cinyindiro consene cakuti Yezu afera ife, pontho acitisa kuti tikwanise kukhala na uxamwali wakuwanga na Yahova. (Mabasa 3:19) Natenepa pinthu pyakufunika kakamwe kuna Mulungu ndi pire pinacita ife cincino na pinafuna kucita ife ntsogolo, tayu madodo adacita ife nduli.​—Iza. 1:18. w21.04 tsa. 23 ¶11

Maseze Ayuda azinji nee akhakhulupira kuti Mesiya mbadafa, Malemba akhadalonga kale mwanyapantsi kuti: “Iye apereka umaso wace mpaka kufa, pontho aoniwa ninga m’bodzi wa anyakudawa; iye athukula madawo a anthu azinji, pontho iye apita pakati toera kuphedza anyakudawa.” (Iza. 53:12) Natenepa, Ayuda nee akhali na mathangwi toera kukhonda Yezu pidaphiwa iye ninga nyakudawa. Lero ife tinakwanisa kucalira kugwegweduka tingadziwa undimomwene. Mu Nkhani yace ya Paphiri, Yezu acenjeza anyakubvesera ace kuti anthu anango ‘mbadaapambizira ntundu onsene wa pinthu pyakuipa.’ (Mat. 5:11) Mbwenye uthambi unoyu usabuluka kuna Sathani. Iye asakulumiza anthu anatitcinga toera amwaze uthambi thangwi ya ife. (Apok. 12:9, 10) Ife nee tisafunika kutawira uthambi unalonga anyamalwa athu. Pontho ife nee tisafunika kutawirisa kuti uthambi unoyu uticimwanise kutumikira Mulungu peno kufewesa cikhulupiro cathu. w21.05 tsa. 12 ¶14-16

Phedzani nyakupfundza wanu Bhibhlya toera anyindire Yahova. Yezu apanga anyakupfundzace kuti Yahova mbadaaphedza thangwi iye asaafuna kakamwe. (Mat. 10:19, 20, 29, 30) Natenepa panganimbo nyakupfundza wanu kuti Yahova anam’phedzambo. Imwe munakwanisa kumphedza kuti anyindire Yahova mukucita phembero pabodzi na iye thangwi ya pifuno pyace. Franciszek wakuti asakhala ku Poloniya alonga: “Kazinji kene mpfundzisi wanga akhalonga pifuno pyanga m’maphembero ace. Pidaona ine kuti Yahova atawira maphembero a mpfundzisi wanga, ine ndatomambo kucita phembero. Ine ndakwanisa kuona ciphedzo ca Yahova mu ndzidzi udaphemba ine patrau wanga toera andipase ndzidzi kuti ndigumanike pa misonkhano ya mpingo na ya gawo.” Yahova asatsalakana kakamwe anyakupfundza athu a Bhibhlya. Yahova asakomerwa kakamwe na abale na alongo thangwi yakuwangisira kwawo toera kuphedza anthu kuti akhale na uxamwali wakuwanga na iye, pontho iye asaafuna kakamwe thangwi ya basa ineyi inacita iwo. (Iza. 52:7) Khala imwe nee musacitisa pfundziro ya Bhibhlya cincino, imwe munakwanisa kuphedza anyakupfundza a Bhibhlya toera kuthambaruka mpaka kubatizwa mungaenda na amwazi mphangwa anango ku mapfundziro awo a Bhibhlya. w21.06 tsa. 7 ¶17-18

Ife tinapangiza kuti tisapereka takhuta kuna Yahova thangwi yakutipasa Bhibhlya tingaileri ntsiku zonsene. Ife tisafunika kukhala na ndandanda toera kuleri na kupfundza Bhibhlya, tayu kucita pyenepi basi ene tingakhala na ndzidzi. Thangwi tingaleri Bhibhlya ntsiku zonsene, ife tinakwanisa kupitiriza kukhala na cikhulupiro cakuwanga. Mwakusiyana na “anthu audziwisi na andzeru” a dziko ino, ife tiri na cikhulupiro cakuwanga thangwi ya pinthu pinapfundza ife m’Bhibhlya. (Mat. 11:25, 26) Kusiyapo pyenepi, Bhibhlya isafokotoza kuti thangwi yanji nyatwa ziri kuthimizirika pa dziko yapantsi, pontho Yahova anadzacitanji toera kuzimalisa. Natenepa, tendeni ticite pyonsene pinakwanisa ife toera tiwangise cikhulupiro cathu na kuphedza anthu azinji kuti akhalembo na cikhulupiro cibodzi cene kuna Mulungu. (1 Tim. 2:3, 4) Pontho tendeni tipitirize kudikhira mpaka pa ndzidzi wakuti anthu anadzasimba Yahova mbalonga mafala  anagumanika pa Apokalipse 4:11 kuti: “Wakuthema ndimwe Yahova Mulungu wathu, toera kutambira mbiri . . . thangwi mwacita pinthu pyonsene.” w21.08 tsa. 19 ¶18-20

Ninga akumbizi, akulu a mpingo ali na basa yakupereka uphungu pingafunika. Iwo asafunika kupereka uphungu wakuphedza, wakuwangisa na ‘wakutsandzayisa ntima.’ (Mis. 27:9) Akulu a mpingo asafuna kakamwe abale na alongo awo. Midzidzi inango iwo asapangiza ufuni unoyu angapasa uphungu munthu wakuti atoma kufamba mu njira yakuipa. (Agal. 6:1) Nkulu wa mpingo mbadzati kupasa munthu uphungu, mphyadidi kuti anyerezere pinthu pingasi pidalonga Paulu thangwi ya kupangiza ufuni. Iye alonga: “Ufuni ndi wakupirira na wakukoma ntima. . . . Usaphimbira pinthu pyonsene, usakhulupira pinthu pyonsene, usadikhira pinthu pyonsene, usapirira pinthu pyonsene.” (1 Akor. 13:4, 7) Nkulu wa mpingo anganyerezera mwadidi mavesi anewa, pinam’phedza toera akhale na cinyindiro cakuti ali kupereka uphungu munjira yadidi. Munthu anapaswa uphungu angaona kuti nkulu wa mpingo asantsalakana, panango anatawira uphungu unapaswa iye. w22.02 tsa. 14 ¶3; tsa. 15 ¶5

Yahova acita aanju na anthu mwakulungama na mwakusowa madodo. Adhamu na Eva akhali anthu akulungama, mbwenye Sathani wakuti adzakhala anju wakukhonda bvera aacitisa kusandukira Yahova. Aanju anango na anthu asankhulambo kukhonda bvera Yahova. (Yuda 6) Mwandimomwene Yahova atsukwala na pyenepi. Ngakhale tenepo, iye apirira, pontho iye anapitiriza kupirira mpaka ndzidzi unafuna kufudza iye anthu onsene akukhonda bvera. Pyenepi pinadzabweresa nkhombo kuna atumiki ace akukhulupirika akuti pabodzi na iye asapirira pinthu pyakuipa mu dziko ino! Sathani apambizira ntumiki wakukhulupirika wa Yahova anacemerwa Yobe mbalonga kuti atumiki onsene a Yahova asalambira Mulungu thangwi ya pinthu pinapaswa iwo na iye. (Yobe 1:8-11; 2:3-5) Mpaka lero, Dyabo asapitiriza kupambizira atumiki a Yahova. (Apok. 12:10) Tingapirira pinentso, mbatipitiriza kukhala akukhulupirika kuna Yahova thangwi ya ufuni wathu kuna iye, tinapangiza kuti Sathani ndi nyauthambi. w21.07 tsa. 9 ¶7-8

Mpostolo Paulu aphatisira citsandzo cibodzi, toera kutipfundzisa kuti ndi pyakufunika kakamwe kucinja makhaliro athu. Iye alonga kuti tisafunika kukhomera “pamuti” makhaliro athu akale. (Aroma 6:6) Pyenepi pisabveka kuti tisafunika kutowezera citsandzo ca Yezu. Iye akhali dzololo kukhomerwa pamuti toera akomerese Yahova. Munjira ibodzi ene, toera kukomeresa Yahova tisafunika kukhala dzololo toera kusiya makhaliro na macitiro akuti Yahova asaaida. Kucita pyenepi kunatiphedza toera tikhale na cikumbuntima cakucena na cidikhiro cakukhala na umaso wakukhonda mala. (Juwau 17:3; 1 Ped. 3:21) Yahova nee anacinja mitemo yace toera kutitsandzayisa. M’mbuto mwace, ndife anafunika kucinja makhaliro athu mbatibvera mitemo yace. (Iza. 1:17, 18; 55:9) Ngakhale pakumala kubatizwa, imwe musafunika kupitiriza kuthimbana na pifuno pyakuipa. Phembani ciphedzo ca Yahova, pontho nyindirani nzimu wace wakucena, tayu mphambvu zanu. (Agal. 5:22; Afil. 4:6) Tisafunika kuwangisira toera kudula uunthu wakale. w22.03 tsa. 6 ¶15-17

Yahova apikira kuti iye anatipasa cakudya, cakubvala na pakugona tingaikha pa mbuto yakutoma Umambo wace na kubvera midida yace yakulungama. (Mat. 6:33) Tinganyindira pikiro ineyi, ife nee tinanyerezera kuti pinthu pyakumanungo pya dziko ino pinakwanisa kutitsidzikiza na kutipasa umaso wakutsandzaya kwenda na kwenda. Ife tisadziwa kuti tinakwanisa kukhala na ntendere wandimomwene basi ene tingacita cifuno ca Yahova. (Afil. 4:6, 7) Maseze tikwanise kugula pinthu pizinji, ife tisafunika kunyerezera khala tinakwanisa kukhala na ndzidzi peno mphambvu toera kupiphatisira na kupitsalakana. Kodi imwe musanyindira kakamwe pinthu piri na imwe? Kukumbuka kuti Mulungu atipasa basa toera kuicita pakati pa atumiki ace. Natenepa ife nee tisafunika kutawira kudzudzumiswa na pinthu pinango. Mwandimomwene ife nee tisafuna kukhala ninga mamuna wakuti akhafuna kakamwe mpfuma kupiringana kukhala nyakupfundza wa Yezu. Thangwi iye aluza mwai wakutumikira Yahova na kukhala m’bodzi wa anace.​—Marko 10:17-22. w21.08 tsa. 6-7 ¶17

Mungacita pyenepi, imwe munadziwa mwadidi Yahova na makhaliro ace. Pontho makhaliro anewa asapangizwa mwadidi mu pinthu pidacita iye. Kusiyapo pyenepi, makhaliro anewa a Yahova asatiphedza toera kukhulupira kuti mwandimomwene iye alipo. (Eks. 34:6, 7; Mas. 145:8, 9) Mungadziwa mwadidi Yahova, cikhulupiro canu cinawanga, ufuni wanu kuna iye unathimizirika, pontho uxamwali wanu na iye unakhala wakuwanga kakamwe. Longani pinthu pinapfundza imwe m’Bhibhlya kuna anango. Mphapo munacitanji khala munthu anamwazira imwe mphangwa nee asatawira kuti Mulungu alipo, pontho imwe nee musadziwa pinafuna imwe kulonga? Sakani lemba ibodzi inafokotozwa m’mabukhu athu, buluka penepo tawirani mbvundzo wa munthu unoyu mukuphatisira mphangwa zidagumana imwe. Imwe munakwanisambo kusaka ciphedzo kuna m’bale peno mulongo wakuti anakwanisa kukuphedzani toera kutawira mbvundzo wace. Mwakukhonda tsalakana khala munthu unoyu atawire mphangwa za m’Bhibhlya zidacedza imwe, imwe munaphindula kakamwe na mphangwa zidafufudza imwe. Pontho cikhulupiro canu cinadzakhala cakuwanga. w21.08 tsa. 18 ¶14-15

Ife nee tisafunika kusiya pinthu pyonsene pinatitsandzayisa toera kutumikira Yahova. (Ekle. 5:19, 20) Mbwenye tingacalira kusiya pinthu pinango toera kucita pizinji m’basa ya Yahova, ife tinakhala ninga mamuna adalonga Yezu mu nsangani wace wakuti akhakomerwa kakamwe na pinthu pyace, m’mbuto mwakutumikira Mulungu. (Luka 12:16-21) Mu ndzidzi unathimbana ife na pinentso, ife tisacita phembero kuna Yahova toera atiphedze, buluka penepo tisanyerezera mwadidi pinthu pisafunika ife kucita thangwi ya pinentso pyenepi. (Mis. 3:21) Yahova asatipasa nkhombo munjira zakusiyana-siyana. Ife tinapangiza kuti tisapereka takhuta thangwi ya nkhombo zenezi mukucita pyonsene pinakwanisa ife toera kunsimba. (Aheb. 13:15) Ife tinakwanisa kucita pinthu pizinji toera kutumikira Yahova. Tingacita pyenepi, Yahova anatipasa nkhombo zizinji kakamwe. Ntsiku zonsene, tendeni tisake njira toera tikwanise ‘kuyesera na kuona kuti Yahova ndi wadidi.’ (Mas. 34:⁠8) Tingacita pyenepi, ife tinakhala ninga Yezu adalonga kuti: “Cakudya canga ndi kucita pinafuna ule adandituma, mbandimalisa basa yace.”​—Juwau 4:34. w21.08 tsa. 30-31 ¶16-19

Sathani asafuna kuti tikhale akudzikuza. Thangwi iye asadziwa kuti tingakhala akudzikuza tinakhala ninga iye, pontho tinaluza umaso wakukhonda mala. Na thangwi ineyi, mpostolo Paulu acenjeza kuti munthu anakwanisa “kudzikuza kakamwe mbatongwa munjira ibodzi ene ninga mudatongerwa Dyabo.” (1 Tim. 3:6, 7) Pyenepi pinakwanisa kucitika kuna ife tonsene, mwakukhonda tsalakana khala ndife apswa mu undimomwene peno tisatumikira Yahova mu pyaka pizinji. Munthu wakudzikuza asaona kuti ndi wakufunika kakamwe kupiringana anango. Sathani asayesera kuticitisa kunyerezera basi ene pinafuna ife mbatikhonda kunyerezera pinafuna Yahova, makamaka mu ndzidzi unathimbana ife na nyatwa. Mwacitsandzo, kodi imwe mwapambizirwa kale pinthu pyakuti nee mwapicita? Kodi alipo adakutsalakanani mwakusowa ulungami? Sathani asakomerwa angaona kuti mwaipirwa na Yahova peno na abale na alongo anu. Kusiyapo pyenepi, Sathani asafuna kuti imwe mucite pinthu mwakubverana na pinafuna imwe m’mbuto mwakubvera pitsogolero pya Yahova pinagumanika m’Bhibhlya.​—Ekle. 7:16, 20. w21.06 tsa. 15 ¶4-5

Yahova apasa mprofeta Ajeu basa yakufunika kakamwe. Pisaoneka kuti Ageu akhali pakati pa anthu ale adabwerera ku Yerusalemu kubuluka ku ubi­tcu ku Bhabhilonya mu caka 537 Kristu Mbadzati Kubalwa. ­Pidafika iwo ku Yerusalemu, alambiri anewa aku­khulupirika a Yahova mwakukhonda dembuka atoma kumanga templo. (Esd. 3:8, 10) Mbwenye pidapita ndzidzi pang’ono pacitika cinthu cakutsukwalisa. Iwo asiya kumanga templo thangwi anthu akakhala m’madziko a cifupi na iwo akhaatcinga. (Esd. 4:4; Ajeu 1:1, 2) Natenepa mu caka ca 520 Kristu Mbadzati Kubalwa, Yahova apanga Ajeu toera aphedze Ayuda kuti apitirize kumanga templo mpaka kuimalisa. (Esd 6:14, 15) Mphangwa zidapaswa Ajeu zikhali toera kuwangisa cikhulupiro ca Ayuda kuna Yahova. Mafala akuti “Yahova wa anyankhondo” akhali akuwangisa kakamwe. Yahova ali na anyankhondo azinji kakamwe aanju, natenepa Ayuda akhafunika kun’nyindira toera pinthu piafambire mwadidi. w21.09 tsa. 14-15 ¶4-5

Lero, kuzungulira dziko yonsene yapantsi Mboni za Yahova zisafunana kakamwe, pontho ndi zakuphatana. Ife tasiyana kakamwe na mauphemberi anango onsene, thangwi tisakhala ninga banja, mwakukhonda tsalakana khala tabuluka m’madziko akusiyana peno makhaliro athu. Ife tisakwanisa kuona ufuni unoyu pa misonkhano yathu ya mpingo, ya cisa na ya gawo. Pyenepi pisatiphedza toera kukhala na cinyindiro cakuti tisalambira Yahova munjira yakutawirika kuna iye. (Juwau 13:34) Bhibhlya isatikulumiza toera ‘kufunana kakamwe unango na ndzace.’ (1 Ped. 4:8) Njira ibodzi yakupangiza ufuni ndi kulekererana na kupirirana unango na ndzace. Kusiyapo pyenepi, ife tisasaka miyai toera kukhala akupasa mwakudzala manja na kupangiza kutambira alendo kuna onsene mu mpingo, ngakhale kuna ale akuti panango atitsukwalisa. (Akol. 3:12-14) Tingafunana munjira ineyi, tinapangiza pakweca kuti ndife Akristu andimomwene. w21.10 tsa. 22-23 ¶13-14

Kodi munthu angabuluswa mu mpingo pinamphedza toera atcunyuke mbasiya pinthu pyakuipa pikhacita iye? Inde pinamphedza. Abale na alongo azinji akuti akhacita madawo makulu alonga kuti kubuluswa mu mpingo kwaaphedza toera kudzindikira pinthu pyakuipa pikhacita iwo, pontho kwaaphedza toera kusiya pinthu pikhacita iwo mbabwerera kuna Yahova. (Aheb. 12:5, 6) Onani citsandzo ici: Nyerezerani kuti nkumbizi wa mabira adzindikira kuti bira yace ibodzi iri kuduwala. Iye asadziwa kuti toera kukondza bira ineyi kuti iwange, asafunika kuibulusa pa nkumbi. Mbwenye mabira asakomerwa kukhala pa nkumbi. Natenepa panango pinakhala pyakunentsa toera kuapambula. Kodi pyenepi pisabveka kuti nkumbizi ndi wakuipa ntima thangwi yakubulusa pa nkumbi bira ya kuduwala? Nkhabe. Iye asadziwa kuti angatawirisa kuti bira ineyi ya kuduwala ikhale pabodzi na nkumbi, inathapulisambo mabira anango. Natenepa, thangwi yakubulusa bira ibodzi pa nkumbi iye asatsidzikiza nkumbi onsene. w21.10 tsa 10 ¶9-10

Ife tisapereka takhuta kakamwe thangwi yakukhala na abale na alongo pa dziko yonsene yapantsi akuti asafunana unango na ndzace. Ife tisafuna kuti anthu azinji abwere toera kudzalambira Mulungu pabodzi na ife. Na thangwi ineyi, ife cipo tisafunika kucita pinthu pyakuti pinacitisa anthu kuona mwakuipa Yahova na atumiki ace. Ndzidzi onsene tisafunika kupangiza makhaliro adidi akuti anacitisa anthu kufuna kupfundza pya Yahova na kuntumikira. Midzidzi inango, anthu anango anakwanisa kutipokanya peno kutitcinga thangwi tisabvera Babathu wakudzulu. Mphapo tisafunika kucitanji khala tisagopa kulonga na anango pinthu pinakhulupira ife? Ife tisafunika kunyindira ciphedzo ca Yahova pabodzi na Mwanace. Yezu apanga anyakupfundzace kuti iwo nee asafunika kudzudzumika thangwi ya pinthu pinafuna iwo kulonga. Thangwi yanji? Yezu afokotoza: “Thangwi pa ndzidzi unoyu Mulungu anadzakupangani pinafunika imwe kulonga; thangwi simwe basi tayu anafuna kulonga, mbwenye nzimu wa Babanu wakudzulu unadzakuphedzani toera kulonga.”​—Mat. 10:19, 20. w21.09 tsa. 24-25 ¶17-18

Mose alongambo kuti Mulungu ndi mbuto yathu yakuthawira. (Mas. 90:1) Kusiyapo pyenepi, Mose pikhali iye cifupi na kufa, alonga mafala anango akubalangaza kakamwe. Iye alonga: “Mulungu ndi mbuto yakuthawira kutomera kale na kale, iwe uli m’manja akuti anakhala kwenda na kwenda.” (Dheu. 33:27) Kodi mafala akuti ‘iwe uli m’manja anakhala kwenda na kwenda’ asatipfundzisanji thangwi ya Yahova? Yahova angakhala Pakuthawira pathu, ife tisakhala akutsidzikizika. Ngakhale tenepo, midzidzi inango ife tinakwanisa kufewa manungo mbatipitiriza kukhala akutsukwala. Midzidzi ninga ineyi, Yahova anacitanji kuna ife? (Mas. 136:23) Iye anatiphata na manja ace mbatilamusa mwaufuni, pontho anatiphedza toera tikhonde kukhala pontho akutsukwala. (Mas. 28:9; 94:18) Ife tisadziwa kuti ndzidzi onsene tinakwanisa kunyindira Mulungu. Pyenepi pisatiphedza munjira ziwiri. Yakutoma, mwakukhonda tsalakana mbuto inakhala ife, tisadziwa kuti Yahova ndzidzi onsene anatitsidzikiza. Yaciwiri, Babathu wakudzulu asatitsalakana mwaufuni kakamwe. w21.11 tsa. 6-7 ¶15-16

Yezu akhadziwa kuti kusowa ulungami mbakudayesera cikhulupiro ca anyakupfundzace. Toera kuaphedza kupirira pyenepi, iye aapanga nsangani wakuti usagumanika m’bukhu ya Luka. Yezu alonga pya nzice wakuti apitiriza kulira kuna nyakutonga miseru wakuti antonga mwakusowa ulungami. Iye akhali na cinyindiro cakuti angapitiriza kulira, nyakutonga unoyu mbadam’phedza. Natenepa nyakutonga miseru atawira phembo yace. Kodi nsangani unoyu usatipfundzisanji? Yahova nee ndi wakusowa Ulungami. Yezu alonga: “Maseze Mulungu asapangiza kupirira kwace kuna anthu ace adasankhulwa akuti asalira kuna iye masiku na masikati, kodi iye nee anacita pyonsene toera iwo acitirwe ulungami?” (Luka 18:1-8) Buluka penepo Yezu athimiza: “Mwana wa munthu angafika, anadzagumanadi anthu akuti ali na cikhulupiro pa dziko yapantsi?” Tingatsalakanwa mwakusowa ulungami, ife tisafunika kupirira toera kupangiza kuti tiri na cikhulupiro cakuwanga ninga ca nzice unoyu. Tingakhala na cikhulupiro cakuwanga, ife tinakwanisa kukhala na cinyindiro cakuti Yahova anatiphedza. Kusiyapo pyenepi, ife tisafunikambo kukhulupira kuti maphembero athu ali na mphambvu kakamwe. w21.11 tsa. 23 ¶12; tsa. 24 ¶14

Aphale na atsikana, kodi midzidzi inango musaona kuti nee munakwanisa kucita pinthu pinafuna imwe thangwi yakubvera Yahova? Sathani asafuna kuti imwe munyerezere tenepo. Iye asafuna kakamwe kukucitisani kunyerezera kuti umaso wa ale anafamba mu nseu ukulu ndi wakutsandzaya kakamwe kupiringana wanu. Iye asafuna kuti imwe munyerezere kuti umaso wa andzanu akuxikola peno anthu anango anaona imwe mu interneti ndi wadidi kakamwe. Pontho Sathani asafuna munyerezere kuti pitsogolero pya Yahova pisakupingizani toera mukhonde kutsandzaya na umaso. Mbwenye kumbukani ipi: Sathani nee asafuna kuti ale anafamba mu nseu wace adziwe pinafuna kuacitikira ntsogolo. (Mat. 7:13, 14) Mbwenye mwakusiyana na Sathani, Yahova asafuna mudziwe kuti mungapitiriza mu nseu ung’ono, imwe munadzakhala na umaso wadidi kakamwe.​—Mas. 37:29; Iza. 35:5, 6; 65:21-23. w21.12 tsa. 23-24 ¶6-7

Ife tisadziwa kuti ndi pyadidi, pontho ndi pyakufunika kakamwe kulekerera anango. Mbwenye midzidzi inango pisanentsa kulekerera anango. Mpostolo Pedhru panango akhalambo na mabvero anewa. (Mat. 18:21, 22) Mphapo ninji pinafuna kutiphedza? Cakutoma, tisafunika kunyerezera njira inatilekerera Yahova. (Mat. 18:32, 33) Ife nee tathema kulekererwa na iye, mbwenye iye asatilekerera na ntima onsene. (Mas. 103:8-10) Na thangwi ineyi, “ifembo tisafunika kufunana unango na ndzace.” Natenepa ndi pyakufunika kakamwe kulekerera anango. Tingakhonda kulekerera anango, tisafunika kudziwa kuti tiri na mangawa na abale na alongo athu. (1 Juwau 4:11) Caciwiri, nyerezerani pinthu pinafuna kucitika tingalekerera anango. Mwacitsandzo, ife tinaphedza munthu adatitsukwalisa, tinacitisa mpingo kukhala wakuphatana, tinatsidzikiza uxamwali wathu na Yahova, pontho tinakhala akutsandzaya. (2 Akor. 2:7; Akol. 3:14) Pakumalisa, citani phembero kuna Yahova wakuti asatiphemba toera kulekerera anango. Lekani kutawirisa kuti Sathani afudze uxamwali wanu na abale na alongo anu. (Aef. 4:26, 27) Ife tisafunika ciphedzo ca Yahova toera tikwanise kukhala pa ntendere na abale na alongo athu mu mpingo. w21.06 tsa. 22 ¶11; tsa. 23 ¶14

Dhavidhi akhathawa toera kupulumusa umaso wace. Thangwi mambo wamphambvu wa mu Izraeli, Sauli, akhafuna kumupha. Mu ndzidzi ukhathawa iye, alimira mu nzinda wa Nobhe, pontho aphemba nyantsembe Aimeleki toera ampase mikate mixanu. (1 Sam. 21:1, 3) Buluka penepo, Dhavidhi na amuna akhali na iye athawira mu mphako. (1 Sam. 22:1) Thangwi yanji pyenepi pikhacitika na Dhavidhi? Sauli akhali na bibvu na Dhavidhi thangwi anthu azinji akhakomerwa na Dhavidhi, pontho akhansimba, nakuti iye akhadawina nkhondo zizinji. Kusiyapo pyenepi, Sauli akhadziwa kuti iye akhadakhondiwa na Yahova thangwi nee akhadambvera pontho kuti Yahova akhadasankhula Dhavidhi toera kukhala mambo. (1 Sam. 23:16, 17) Nakuti pa ndzidzi unoyu Sauli akhapitiriza kukhala mambo mu Izraeli, iye akhali na anyankhondo azinji, pontho akhaphedzerwa na anthu azinji, natenepa Dhavidhi akhafunika kuthawa toera apulumuse umaso wace. Kodi Sauli akhanyerezera kuti mbadakwanisa kupingiza Mulungu toera kukhazikisa Dhavidhi ninga mambo? (Iza. 55:11) Bhibhlya nee isatawira mbvundzo unoyu, mbwenye tiri na cinyindiro cakuti Sauli akhaikha umaso wace pangozwi. Thangwi ndzidzi onsene ale anamenya nkhondo na Mulungu asaluza! w22.01 tsa. 2 ¶1-2

Yezu akhamwaza mphangwa mwaphinga. Yezu akhafuna anthu, na thangwi ineyi akhabandza miyai yonsene toera kuamwazira mphangwa. (Luka 19:47, 48) Ninji pikhankulumiza toera kucita pyenepi? Yezu akhabvera anthu ntsisi. Midzidzi inango anthu akhafuna kubva pikhapfundzisa Yezu, natenepa iye na anyakupfundza ace ‘nee akhaona ndzidzi toera kudya.’ (Marko 3:20) Yezu amwaza mphangwa ngakhale na masiku, mu ndzidzi wakuti mamuna m’bodzi akhafuna kubvesera mphangwa zace. Anthu azinji adabvesera Yezu pakutoma nee adzakhala anyakupfundza ace. Mbwenye onsene ale adabvesera atambira mphangwa za Umambo. Lero ife tisafunambo kupasa anthu onsene mwai wakubvesera mphangwa zadidi. (Mabasa 10:42) Toera kukwanisa pyenepi, panango tisafunika kucinja njira yathu yakumwaza mphangwa. Ife nee tisafunika kumwaza mphangwa basi ene pa ndzidzi wakuti ndi wakuthema kuna ife, mbwenye tisafunika kukhala dzololo toera kumwaza mphangwa mu ndzidzi wakuti tinakwanisa kugumana anthu azinji. Tingacita pyenepi, ife tinakwanisa kukhala na cinyindiro cakuti Yahova anakomerwa kakamwe. w22.01 tsa. 17 ¶13-14

Lero, anthu azinji asaona kuti ndi pyakunentsa kunyindira atsogoleri. Thangwi mautongi na mitemo isatsidzikiza anthu akupfuma na apidzo, mbwenye nee isaphedza anthu akutcerenga. Kusiyapo pyenepi, atsogoleri anango a mauphemberi asacita pinthu pyakuipa. Pyenepi pisacitisa anthu anango kusiya kunyindira Mulungu. Natenepa, tingapfundza Bhibhlya na munthu tisafunika kumphedza toera anyindire Yahova na ale adakhazikisa iye toera kutsogolera. Mwandimomwene, nee ndi anyakupfundza Bhibhlya basi anafunika kupfundza kunyindira Yahova na gulu yace. Ngakhale ife akuti tisatumikira Yahova mu pyaka pizinji tinakwanisambo kuluza cinyindiro cathu cakuti njira inacita Yahova pinthu ndzidzi onsene ndi yadidi. Midzidzi inango, pinacitika pinthu pyakuti panango pinayesera kunyindira kwathu Yahova. w22.02 tsa. 2 ¶1-2