Masomphenya Adaoneswa Juwau 4:1-11
4 Pidamala pyenepi, ine ndaona nsuwo wakufunguka kudzulu, pontho fala yakutoma idabva ine mbikalonga na ine, ikhabveka ninga tuluka, mbilonga: “Kwira kuno, ine ndinakupangiza pinthu pinafuna kucitika.”
2 Buluka penepo, nzimu wakucena watoma kuphata basa muna ine, mbandiona mpando waumambo kudzulu na munthu adakhala pa mpando unoyu.+
3 Ule adakhala pa mpando unoyu akhaoneka ninga mwala wa jaspe+ na mwala wa sardhyo,* pontho mpando waumambo ukhadazungulirwa na utawaleza* ukhaoneka ninga mwala unacemerwa ejimiradha.+
4 Mpando waumambo ukhadazungulirwa na mipando yaumambo yakukwana 24, mʼmipando ineyi, ndaona akulu a mpingo akukwana 24+ adabvala nguwo zakucena, mʼmisolo mwawo akhali na nthimba za ouro.
5 Pa mpando waumambo pakhacetuma,+ pakhabveka mafala na kudhima.+ Patsogolo pa mpando waumambo pakhali na nyale zinomwe zikhagaka moto, nyale zenezi zisaimirira mizimu minomwe ya Mulungu.+
6 Patsogolo pa mpando waumambo pakhali na cinthu cakulandana na bara ya vidhru,+ cakucena kakamwe ninga mwala unacemerwa dhiyamante.
Pakati-nakati pa mbuto inagumanika mpando waumambo, nʼkhundu mwace akhalipo aanju anai+ akuti akhali na maso mazinji kakamwe kutsogolo na nduli mwene.
7 Anju wakutoma akhaoneka ninga nkhalamu,+ anju waciwiri akhaoneka ninga mwanangʼombe wamamuna,+ anju wacitatu+ akhali na nkhope ninga ya munthu, anju wacinai+ akhaoneka ninga capungu mbakamburuka.+
8 Mʼbodzi na mʼbodzi wa aanju anewa, akhali na maphapido matanthatu akuti akhali na maso mazinji kakamwe nʼkhundu na pantsi pene.+ Ndzidzi onsene, masiku na masikati iwo asalonga: “Wakucena, wakucena, wakucena ndi Yahova*+ Mulungu, Wamphambvu Zonsene, wakuti akhalipo, alipo, pontho akubwera.”+
9 Ndzidzi onsene wakuti aanju anewa anai asapasa mbiri, cilemedzo na kupereka takhuta kuna Ule adakhala pa mpando waumambo, Ule wakuti ali mʼmaso kwenda na kwenda,+
10 akulu a mpingo 24+ asagodama patsogolo pa Ule adakhala pa mpando waumambo, asalambira Ule wakuti ali mʼmaso kwenda na kwenda, mbaponya nthimba zawo patsogolo pa mpando waumambo, mbalonga:
11 “Wakuthema ndimwe Yahova* Mulungu wathu, toera kutambira mbiri,+ cilemedzo+ na mphambvu,+ thangwi mwacita pinthu pyonsene,+ pontho pinthu pyonsene pyacitwa thangwi yakufuna kwanu.”
Pidzindikiro Pyapantsi
^ Peno: “mwala wakufuirira wa ntengo ukulu kakamwe.”
^ Peno: “utazimu.”
^ Onani Apendise A5.
^ Onani Apendise A5.
