Samweli Wakutoma 22:1-23
22 Natenepa Dhavidhi abuluka kweneko,+ mbathawira ku mphako ya Adhulamu.+ Abale ace pabodzi na anthu a pabanja pawo pidabva iwo pyenepi, aenda kukhali iye.
2 Pontho anthu onsene akuti akhali pa nyatwa, anyamangawa na anyakutsukwala aenda kuna Dhavidhi, pontho iye adzakhala ntsogoleri wawo. Pakhali na anthu cifupi na 400.
3 Mukupita kwa ndzidzi, Dhavidhi abuluka kweneko mbaenda ku Mispe, ku Moabhe+ mbapanga mambo wa ku Moabhe kuti: “Ndaphata miyendo, tawirisani kuti pai wanga na mai wanga akhale pabodzi na imwe mpaka ndingadziwa pinafuna kucita Mulungu kuna ine.”
4 Natenepa iye aasiya mʼmanja mwa mambo wa ku Moabhe, iwo akhala kweneko ndzidzi onsene ukhali Dhavidhi ku mbuto yakubisalira.+
5 Pidapita ndzidzi ungasi, mprofeta Gadhi+ apanga Dhavidhi: “Leka kukhalabve ku mbuto yakubisalira. Buluka kweneko toera uende ku dziko ya Yuda.”+ Natenepa Dhavidhi abuluka mbaenda ku nsitu wa Ereti.
6 Sauli abva kuti Dhavidhi pabodzi na anthu akhali na iye aoniwa. Pa ndzidzi unoyu, Sauli akhali nawa ku Jibheya+ pantsi pamuti wa tamarigera* pa nthunda, iye akhali na dipa mʼmanja mwace, pontho atumiki ace onsene akhali nʼkhundu mwace.
7 Natenepa Sauli apanga atumiki akhali nʼkhundu mwace: “Imwe anthu a dzindza ya Bhenjamini. Kodi mwana wa Yese+ anakupasanimbo minda ya mauva na minda inango ninga pidacita ine? Kodi iye anakhazikisa imwe monsene toera mukhale atsogoleri a anthu 1.000 na atsogoleri a anthu 100?+
8 Imwe monsene mwandisandukira! Nee mʼbodzi wa imwe andipanga kuti mwananga acita cibverano na mwana wa Yese!+ Nee mʼbodzi wa imwe andibvera ntsisi mbandipanga kuti mwananga ene akulumiza ntumiki wanga toera andibisalire kuti andiphe, ninga pinacita iye cincino.”
9 Buluka penepo, Dhoegi+ wa ku Edhomi wakuti akhali ntsogoleri wa atumiki a Sauli atawira:+ “Ine ndaona mwana wa Yese mbafika ku Nobhe toera kuonana na Aimeleki mwana wa Aitubhe.+
10 Iye abvundzisa Yahova thangwi ya Dhavidhi, buluka penepo ampasa pyakudya. Kusiyapo pyenepi, iye ampasa supada ya Nfilisti Goliyati.”+
11 Penepo pene mambo acemeresa nyantsembe Aimeleki pabodzi na anyantsembe onsene a panyumba ya babace, akuti akhali ku Nobhe. Natenepa onsene aenda kuna mambo.
12 Sauli alonga: “Bvesera iwe mwana wa Aitubhe!” Iye atawira: “Ndiri kubva mbuyanga.”
13 Sauli ambvundza: “Thangwi yanji iwe na mwana wa Yese mwabverana toera kundisandukira? Thangwi yanji wampasa mikate, supada, mbubvundzisa Mulungu thangwi ya iye? Iye andisandukira, pontho andibisalira toera kundicita pyakuipa, ninga pinacita iye cincino.”
14 Natenepa Aimeleki atawira mambo: “Kodi mwa atumiki anu alipo unango wakuti asanyindirwa* kakamwe kupiringana Dhavidhi?+ Iye ndi nkamwene wanu,+ ndi nkulu wa anyankhondo anakuonerani, pontho iye asalemedzwa panyumba panu.+
15 Kodi uno ndi ulendo wakutoma udabvundzisa ine Mulungu thangwi ya iye?+ Ine cipo ndanyerezera kukusandukirani! Mambo lekani kunyerezera pinthu pyakuipa kuna ine ntumiki wanu, nee kuna anthu a panyumba ya babanga, thangwi ine ntumiki wanu nee ndikhadziwa cinthu.”+
16 Mbwenye mambo alonga: “Mwakukhonda penula, iwe Aimeleki unaphiwa+ pabodzi na anthu onsene a panyumba ya babako.”+
17 Penepo mambo apanga anyakuonera* akhali nʼkhundu mwace: “Phani anyantsembe a Yahova, thangwi iwo ali kukhundu ya Dhavidhi! Iwo nee andipanga kuti iye akhali nyakuthawa, maseze iwo akhapidziwa!” Mbwenye atumiki a mambo nee akhafuna kupha anyantsembe a Yahova.
18 Natenepa mambo apanga Dhoegi:+ “Iwe phaa anyantsembe!” Penepo pene Dhoegi wa ku Edhomi+ apha anyantsembe. Pa ntsiku ineyi, iye apha amuna 85 akuti akhabvala efodhi ya linyu.+
19 Iye aphambo na supada anthu a ku Nobhe,+ nzinda wa anyantsembe. Iye apha amuna, akazi, ana, akhombwani, ngʼombe zimuna, maburu na mabira.
20 Mbwenye Abhiyatari,+ mʼbodzi wa ana a Aimeleki, mwana wa Aitubhe, athawa mbatowera Dhavidhi.
21 Abhiyatari apanga Dhavidhi: “Sauli apha anyantsembe a Yahova.”
22 Natenepa Dhavidhi apanga Abhiyatari: “Pa ntsiku ineyi pidaona ine Dhoegi wa ku Edhomi pa mbuto ineyi, ndadziwa+ kuti iye analonga pyonsene kuna Sauli. Ndine adadawisa toera anthu onsene a panyumba ya babako aphiwe.
23 Khala pabodzi na ine. Leka gopa, thangwi munthu anafuna kukupha asafunambo kupha ine; ine ndinakutsidzikiza.”+
Pidzindikiro Pyapantsi
^ Muti unoyu uli na masamba mangʼono kakamwe na maluwa akufuirira peno akucena.
^ Peno: “ndi wakukhulupirika.”
^ Fala na Fala: “anyakuthamanga.”
