Tsamba Kuna Akristu a ku Kolose 3:1-25
3 Mphapo, khala imwe mwalamuswa muli akufa pabodzi na Kristu,+ pitirizani kusaka pinthu pyakudzulu, kule kunakhala Kristu kunkono wamadyo wa Mulungu.+
2 Pitirizani kunyerezera* pinthu pyakudzulu,+ tayu kunyerezera pinthu pya pa dziko yapantsi.+
3 Thangwi imwe mwafa, pontho umaso wanu wabiswa mwa Kristu mwakubverana na pinafuna Mulungu.
4 Kristu, wakuti ndi umaso wathu,+ angadzapangizwa, imwembo munadzapangizwa pabodzi na iye mu mbiri yace.+
5 Natenepa, citisani kuti makhundu a manungo anu*+ akhale akufa ku macitiro aulukwali,* makhaliro akunyanyasa, kusirira kakamwe pinthu pyaulukwali,+ pifuno pyakuipa na kufuna pyonsene, kwakuti ndi kulambira madzimunthu.
6 Thangwi pinthu pyenepi ndipyo pinafuna kubweresa ukali wa Mulungu.
7 Makhaliro anu akhalimbo tenepo* mu umaso wanu wakale.*+
8 Mbwenye cincino musafunika kusiya pyonsene ipi: Ukali, kuipirwa, uipi+ na mafala akutikana;+ pontho pamulomo panu nee pasafunika kubuluka makani akuzuda.*+
9 Lekani kulonga uthambi kuna unango na ndzace.+ Dulani uunthu* wanu wakale+ na macitiro ace,
10 mbwenye bvalani uunthu upswa,+ wakuti kubulukira mu cidziwiso candimomwene uli kusasanyirwa mwakubverana na makhaliro a Ule adaucita,+
11 uunthu upswa nkhabe kusiyanisa Agerego na Ayuda, anthu akusidzwa na akukhonda sidzwa, nee munthu wa dziko yakunja, nee Sita,* nee bitcu peno munthu waufulu; mbwenye Kristu ndi pinthu pyonsene, pontho ali mwa onsene.+
12 Munjira ibodzi ene, ninga anthu adasankhulwa na Mulungu,+ akucena na akufuniwa, khalani akubvera ntsisi kakamwe,+ akukoma ntima, akucepeseka,*+ akupfulika+ na akupirira.+
13 Pitirizani kupirirana unango na ndzace mbamulekererana na ntima onsene,+ mwakukhonda tsalakana khala munthu ali na thangwi toera kutsukwala na pidacitirwa iye na ndzace.+ Ninga mudakulekererani Yahova* na ntima onsene, imwe musafunikambo kucita pibodzi pyene.+
14 Mbwenye kusiyapo pinthu pyenepi, bvalani ufuni,+ thangwi iwo usaphedza anthu toera kukhala akuphatana kakamwe.+
15 Pontho, ntendere wa Kristu utonge mitima yanu,*+ thangwi imwe mwacemerwa muntendere unoyu toera mukhale manungo mabodzi. Perekani takhuta ndzidzi onsene.
16 Mafala a Kristu akhale muna imwe mbakupasani udziwisi onsene. Pitirizani kupfundzisana na kuwangisana unango na ndzace pakuphatisira masalmo,+ kusimba Mulungu, mbamuimba nyimbo zauzimu mwakupereka takhuta. Pitirizani kuimbira Yahova* mʼmitima yanu.+
17 Cinthu consene cinacita imwe mʼmafala peno mʼmacitiro, citani pyonsene mu dzina ya Mbuya Yezu, mbamupereka takhuta kuna Mulungu Baba mu dzina yace.+
18 Imwe akazi, bverani amunanu,+ thangwi pyenepi mphyakuthema pamaso pa Mbuya.
19 Imwe amuna, pitirizani kufuna akazanu,+ pontho lekani kuipirwa kakamwe* na iwo.+
20 Imwe ana, bverani anyakubala anu mu pinthu pyonsene,+ thangwi pyenepi mphyadidi kakamwe pamaso pa Mbuya.
21 Imwe ababa, lekani kutsukwalisa ananu,+ toera iwo akhonde kufewa manungo.
22 Imwe mabitcu,* bverani ambuyanu mu pinthu pyonsene,+ tayu basi mu ndzidzi unakuonerani iwo,* toera kukomeresa anthu, mbwenye na ntima wanu onsene, mwakugopa Yahova.*
23 Pyonsene pinacita imwe, piciteni na ntima wanu onsene ninga mukuphatira Yahova,*+ tayu anthu,
24 thangwi imwe musadziwa kuti ndi Yahova* anafuna kudzakupasani unthaka ninga muoni.+ Tumikirani Mbuya, Kristu.
25 Mwandimomwene, ule anacita pinthu pyakuipa, anadzabwezerwa pinthu pyakuipa pidacita iye,+ thangwi Mulungu nkhabe tsankhulo.+
Pidzindikiro Pyapantsi
^ Fala na Fala: “kuikha manyerezero ku.”
^ Fala na Fala: “makhundu a manungo anu akuti ali pa dziko yapantsi.”
^ Mucigerego ndi porneia. Onani Mabvekero a Mafala Anango.
^ Peno: “pikhacita imwe pinthu pyenepi.”
^ Peno: “Kale imwe mukhafambambo tenepo.”
^ Peno: “aulukwali.”
^ Peno: “makhaliro.”
^ Sita ndi fala yakuti kale ikhaphatisirwa toera kuthula anthu akuti akhapwazwa thangwi ya makhaliro na misambo yawo.
^ Peno: “a manyerezero akucepeseka.”
^ Onani Apendise A5.
^ Peno: “mʼmitima yanu.”
^ Onani Apendise A5.
^ Peno: “kukhala aukali.”
^ Peno: “anyabasa.”
^ Fala na Fala: “tayu mwaciphamaso.”
^ Onani Apendise A5.
^ Onani Apendise A5.
^ Onani Apendise A5.
