Samweli Wakutoma 21:1-15
21 Mukupita kwa ndzidzi, Dhavidhi afika ku Nobhe+ kuna nyantsembe Aimeleki. Aimeleki pidaona iye Dhavidhi atoma kutetemera thangwi ya kugopa, mbambvundza: “Thangwi yanji uli wekhene? Thangwi yanji nee wabwera na munthu unango?”+
2 Dhavidhi atawira nyantsembe Aimeleki kuti: “Mambo andituma toera ndikacite cinthu, mbwenye andipanga: ‘Leka kupanga munthu pinakupanga ine toera ukacite, pontho leka kupanga munthu pitsogolero pidakupasa ine.’ Na thangwi ineyi, ndabverana na atumiki anga toera tikaonane pa mbuto inango.
3 Khala muna mikate mixanu peno cakudya cinango, ndipaseni.”
4 Mbwenye nyantsembe atawira Dhavidhi: “Ine nkhabe mikate inango, mbwenye ndiri na mikate yakuceneswa basi.+ Ine ndinakupasa basi ene khala aphale ali na iwe nee apita mʼmabonde na akazi.”+
5 Dhavidhi atawira nyantsembe: “Khalani na cinyindiro cakuti nee tapita mʼmabonde na akazi ninga maulendo anango mu ndzidzi ukhaenda ine kamenya nkhondo.+ Khala aphale akhali akucena pikhaphata iwo mabasa anango, lero iwo ali akucena kakamwe toera kuphata basa ineyi yakufunika!”
6 Natenepa nyantsembe apasa Dhavidhi mikate yakuceneswa,+ thangwi penepo nee pakhali na mikate inango kusiyapo mikate ya ntsembe* yakuti ikhadabuluswa pamaso pa Yahova mbiikhwa ipswa pa ntsiku yakubulusa mikate.
7 Pa ntsiku ineyi, mʼbodzi wa anyabasa a Sauli akhali penepo, pontho iye akhadakakamizwa toera akhale pamaso pa Yahova. Dzina yace ikhali Dhoegi+ wa ku Edhomi,+ ntsogoleri wa akumbizi a Sauli.
8 Natenepa Dhavidhi abvundza Aimeleki: “Kodi pano muli na dipa peno supada? Ine nee ndakwata supada yanga, pontho nee ndakwata pida pyanga pya nkhondo thangwi basa idandipasa mambo ikhafunika kucitwa mwakucimbiza.”
9 Nyantsembe atawira: “Pano pana supada ya Goliyati,+ Nfilisti adapha iwe ku Gowa ya Elaa,+ supada ineyi yapyangirirwa na nguwo kuntsi kwa efodhi.+ Ungafuna, ikwate thangwi ndi supada ineyi basi iri pano.” Dhavidhi alonga: “Ndipaseni, thangwi nkhabe supada inango yakulandana na ineyi.”
10 Pa ntsiku ineyi Dhavidhi alamuka mbapitiriza kuthawa Sauli,+ pakumalisa iye afika kuna Mambo Akisi wa ku Gati.+
11 Anyabasa a Akisi ambvundza: “Kodi uyu nee ndi Dhavidhi, mambo wa dziko ya Izraeli? Kodi siye tayu akhaimbirwa, pontho anthu akhambvinira, mbalonga:‘Sauli apha anyamalwa 1.000,Mbwenye Dhavidhi apha anyamalwa 10.000’?”+
12 Dhavidhi anyerezera pidalonga iwo, mbagopa kakamwe+ Mambo Akisi wa ku Gati.
13 Natenepa iye acita pinthu ninga nyansala+ pamaso pawo. Iye akhakudza-kudza misuwo mikulu mbadjodjesa masiriri pa ndebvu zace.
14 Pakumalisa Akisi abvundza anyabasa ace kuti: “Kodi imwe nee mukuona kuti munthu uyu ndi nyansala? Thangwi yanji mwamʼbweresa kuna ine?
15 Kodi anyansala ali na ine acepa toera mundibweresere unango? Thangwi yanji ndisafunika kutawirisa kuti munthu unoyu apite nʼnyumba mwanga?”
Pidzindikiro Pyapantsi
^ Fala na Fala: “mikate yacipangizo.”
