Yezu alandanisa uxamwali wace na atowereri ace ninga nkumbizi na mabira ace. (Juwau 10:14) Citsandzo ceneci cisabveka mwadidi. Mabira asadziwa nkumbizi wawo, pontho asabvera fala yace. Mamuna unango wakuti asacita ulendo toera kuona mbuto zakusiyana-siyana aona pyenepi. Iye alonga: “Ife tikhafuna kubulusa mafoto mabira anango, natenepa tikhayesera kuacemera abwere dhuzi. Mbwenye iwo nee abwera kuna ife thangwi nee akhadziwa mafala athu. Buluka penepo, m’phale m’bodzi wakuti akhali nkumbizi abwera, pidaacemera iye, iwo abwera mwakucimbiza mbantowera.” Pidacitikira mamuna unoyu pisatikumbusa mafala a Yezu analonga pya mabira ace peno anyakupfundza ace. Iye alonga: “Iwo anadzabva fala yanga.” Nakuti Yezu ali kudzulu, mphapo tinakwanisa tani kubva fala yace? Ife tinapangiza kuti tisabva fala yace tingaphatisira pinatipanga iye.​—Mat. 7:24, 25. w21.12 tsa. 16 ¶1-2

Mpostolo Paulu akhatcinga kakamwe Akristu, mbwenye mukupita kwa ndzidzi adzindikira kuti pikhacita iye pikhali pyakuipa, pontho akhali dzololo toera kucinja makhaliro ace na uunthu wace. (1 Tim. 1:12-16) Na ciphedzo ca Yahova, Paulu adzakhala nkulu wa mpingo waufuni, wantsisi na wakucepeseka. Iye akhakhulupira kuti Yahova mbadamulekerera. (Aroma 7:21-25) Iye akhadziwa kuti nee mbadakwanisa kucita pinthu mwaungwiro. Ngakhale tenepo, iye akhawangisira toera kupangiza makhaliro Acikristu, pontho mwakucepeseka akhanyindira ciphedzo ca Yahova toera kukwanirisa basa yace. (1 Akor. 9:27; Afil. 4:13) Akulu a mpingo nee asakhazikiswa thangwi yakukhala aungwiro. Mbwenye Yahova asadikhira kuti akulu a mpingo adzindikire madodo awo mbawangisira toera kukulisa makhaliro Acikristu. (Aef. 4:23, 24) Nkulu wa mpingo asafunika kupfundza Bhibhlya toera adzindikire makhundu anafunika iye kusasanyira. Angacita pyenepi, Yahova anam’phedza toera akhale nkulu wa mpingo wadidi na wakutsandzaya.​—Tiya. 1:25. w22.03 tsa. 29-30 ¶13-15

Tisafunika kucitanji tingadzindikira kuti tisatonga Akristu andzathu? Tisafunika kukumbuka kuti ife tisafunika kufuna abale athu. (Tiya. 2:8) Pontho tisafunika kucita phembero kuna Yahova, mbatim’phemba toera tisiye kutonga anango. Ife tinakwanisa kucita pinthu mwakubverana na maphembero anthu, tingakhala na ndzidzi wakucedza na munthu adatonga ife. Panango tinam’phemba toera kuenda kamwaza naye mphangwa peno kuncemera toera kudya naye pabodzi. Tingadziwa mwadidi m’bale wathu, tinakwanisa kutowezera citsandzo ca Yahova na Yezu akuti asaona pinthu pyadidi pinacita anango. Tingacita pyenepi, ife tinapangiza kuti tisabvera pidatipanga nkumbizi wadidi kuti lekani kutonga andzanu. Ninga mabira asabva fala ya nkumbizi wawo, atowereri a Yezu asabva fala yace. Mwakukhonda tsalakana khala ndife “nkumbi ung’ono” peno “mabira anango,” ife tinapitiriza kubva fala ya nkumbizi wadidi.​—Luka 12:32; Juwau 10:11, 14, 16. w21.12 tsa. 19 ¶11; tsa. 21 ¶17-18

Robhoamu Pidakhazikiswa iye ninga mambo wa Izraeli, anthu aenda kuna iye toera kuncita phembo. Iwo am’phemba toera alulupise basa ikulu idaapasa babace, Salomoni. Robhoamu acita pinthu mwandzeru mbaenda kaphemba uphungu kuna amuna akulu a mu Izraeli. Amuna akulu anewa apanga Mambo kuti iye mbadatawira phembo idacita anthu iwo mbadantumikira ndzidzi onsene. (1 Ama. 12:3-7) Pisaoneka kuti Robhoamu nee akomerwa na uphungu udapaswa iye na amuna anewa. Natenepa iye aenda kasaka uphungu kuna amuna adakula pabodzi na iye. Mbwenye amuna anewa apasa Robhoamu uphungu wakuipa. Iwo ampanga toera athimizire basa ya mbumba. (1 Ama. 12:9-11) Robhoamu akhafunika kucita phembero kuna Yahova toera kudziwa uphungu ukhafunika iye kubvera. M’mbuto mwakucita pyenepi, iye abvera uphungu udapangwa iye na aphale andzace. Pyenepi pyabweresa nyatwa zizinji kuna Aizraeli na kuna iye. Uphungu unatambira ife panango nee unakhala uphungu unafuna ife kubvesera. Mbwenye khala uphungu unoyu wabuluswa m’Bhibhlya tisafunika kuubvera. w22.02 tsa. 9 ¶6

Munthu wakucepeseka asanyerezera pinthu pyakuti aphale asakwanisa kupicita, tayu basi ene pinthu pyakuti iwo asafunika kupipfundza toera akwanise kupicita. Pontho iye nee ananyerezera kuti iwo akucita pinthu mwamapika, mbwenye anaaona ninga anyabasa andzace. Abale na alongo akukalamba asaona aphale na atsikana ninga muoni wa Yahova, pontho iwo asapereka takhuta kakamwe thangwi ya pinthu pinacita aphale na atsikana anewa. Mu ndzidzi unapitiriza iwo kukalamba, abale na alongo anewa asapereka takhuta kakamwe thangwi yakukhala na aphale na atsikana akuti ali na mphambvu toera kucita mabasa akusiyana-siyana mu mpingo. Naomi analongwa m’Bhibhlya, ndi citsandzo cadidi kakamwe thangwi iye atawira ciphedzo ca ntsikana na ntima onsene. Pidafa mwanace, iye apanga Rute wakuti akhali nkwenyace, toera abwerere kuna acibale ace. Mbwenye Rute akhonda kusiya Naomi, natenepa iwo aenda onsene ku Bhetelehemu. Naomi atsandzaya kakamwe thangwi yakukhala pabodzi na Rute, pontho iye atawira ciphedzo cace. (Rute 1:7, 8, 18) Pyenepi pyabweresa nkhombo kuna iwo. (Rute 4:13-16) Abale na alongo akukalamba akuti ndi akucepeseka anakwanisa kutowezera citsandzo ca Naomi. w21.09 tsa. 10-12 ¶9-11

Babathu wakudzulu asadziwa pinthu pinakwanisa kucita m’bodzi na m’bodzi wa ife. Panango imwe munakwanisa kucita pizinji kupiringana anthu anango anadziwa imwe na anafuna imwe. Peno nee munakwanisa kucita pizinji ninga pinacita anango, panango thangwi ya thunga yanu, ungumi wanu peno thangwi yakutsalakana banja. Khala pyenepi pisacitika kuna imwe lekani kutsukwala. (Agal. 6:4) Yahova nee anaduwala basa yanu. Mungapitiriza kucita pinakwanisa imwe na mathangwi adidi iye anatsandzaya. Yahova asaona ngakhale pinthu pinanyerezera imwe kucita. Iye asafuna kuti mukhale wakutsandzaya, pontho mukomerwe na pinthu pinakwanisa imwe kucita toera kumulambira. Ife tiri na ntendere wa m’manyerezero thangwi tisadziwa kuti Yahova asatiphedza tingathimbana na nyatwa. (Iza. 41:9, 10) Mwandimomwene tiri na mathangwi adidi toera kukhala akutsandzaya pakulambira Babathu waufuni wakuti ndi wakuthema toera ‘kutambira mbiri na cilemedzo’ kubulukira ku pinthu pyonsene pidacita iye!​—Apok. 4:11. w22.03 tsa. 24 ¶16; tsa. 25 ¶18

Ife tisafuna kutowezera Yezu, mbwenye nee tisafunika kubwerera nduli tingaona kuti nee tiri kutowezera mwadidi citsandzo ca Yezu. (Tiya. 3:2) Nyakupfundza nee anakwanisa kupiringana mpfundzisi wace. Mbwenye angapfundza na madodo ace mbapitiriza kuwangisira toera kutowezera mpfundzisi wace, iye anakwanisa kuthambaruka. Munjira ibodzi ene, tingaphatisira pinapfundza ife m’Bhibhlya mbatipitiriza kuwangisira toera kusasanyira madodo athu, ife tinakwanisa kutowezera Yezu mwadidi. (Mas. 119:59) Anthu azinji lero asanyerezera pinthu pyawo basi. Mbwenye atumiki a Yahova ndi akusiyana na anthu anewa. Yezu akhali dzololo toera kuphedza anango, pontho ife tisafuna kutowezera citsandzo cace. (1 Ped. 2:21) Tingawangisira kutowezera citsandzo ca Yezu, tinakhala akutawirika kuna Yahova, pontho pyenepi pinaticitisa kukhala akutsandzaya. w22.02 tsa. 24 ¶16; tsa. 25 ¶18

Ibodzi mwa njira zinaphatisira Yahova toera kutsogolera atumiki ace lero, ndi Bhibhlya. Ife tinganyerezera mwadidi pinatipfundzisa Yahova, tinakwanisa kutowezera citsogolero cace mbaticita mwadidi basa yathu yakumwaza mphangwa. (1 Tim. 4:15, 16) Yahova asaphatisirambo “m’bandazi wakukhulupirika na wandzeru” toera kutitsogolera. (Mat. 24:45) Midzidzi inango, panango m’bandazi unoyu anapereka pitsogolero pyakuti ife nee tisapibvesesa mwadidi. Mwacitsandzo, panango tinapaswa pitsogolero kuti tikhale akukhunganyika toera tikhonde kuphekeswa na cidengwa cacibaliro, cakuti ife tisaona kuti nee cinacitika mu cisa cinakhala ife. Mphapo tisafunika kucitanji tinganyerezera kuti pitsogolero pidapaswa ife ndi pyakusowa basa? Nyerezerani thangwi ya anthu anango analongwa m’Bhibhlya. Midzidzi inango, atumiki a Mulungu apaswa pitsogolero pyakuti pikhaoneka ninga pyakusowa basa, mbwenye pyaphedza anthu toera kupulumuka.​—Aton. 7:7; 8:10. w22.03 tsa. 18-19 ¶15-16

Yezu alonga na cinyindiro consene mafala a lemba ya ntsiku ya lero. Yezu akhadziwa kuti umaso wace wa ntsogolo ukhanyindira Yahova, pontho iye akhali na cinyindiro consene cakuti Babace mbadankumbuka. Tisapfundzanji na mafala adalonga Yezu? Pitirizani kunyindira Yahova maseze umaso wanu ukhale pangozwi. Toera kucita pyenepi, imwe musafunika ‘kunyindira Yahova na ntima wanu onsene.’ (Mis. 3:5) Onani citsandzo ca Joshua wa pyaka 15 pyakubalwa wakuti akhali na utenda wakugoswa kakamwe. Iye akhonda ukondzi wakuti nee usabverana na mitemo ya Mulungu. Mu ndzidzi ukhadasala iye pang’ono toera kufa, iye apanga mai wace: “Mama ine ndiri m’manja mwa Yahova. . . . Ine ndiri kukupangani na cinyindiro consene mama: Yahova anadzandilamusa muli akufa. Iye asadziwa manyerezero anga na mabvero anga, pontho ine ndisanfuna kakamwe.” Natenepa m’bodzi na m’bodzi wa ife asafunika kubvundzika: ‘Ndingathimbana na mayesero akuti anandicitisa kuluza umaso wanga, kodi ndinapitiriza kukhala wakukhulupirika kuna Yahova mbandinyindira kuti iye anadzandikumbuka?’ w21.04 tsa. 12-13 ¶15-16

Atumiki a Yahova asawangiswa angamwaza mphangwa kuna anango. Tisakhala na mphambvu mwakukhonda tsalakana khala iwo asatibvesera peno nkhabe. Thangwi ya makhaliro awo, anango asanyerezera kuti nee anakwanisa kucita pizinji mu utumiki. Khala imwe musanyerezera tenepo, kumbukani kuti Yahova asakomerwa na pire pinakwanisa imwe kucita. Yahova asadziwa kuti tisafuna kumwaza mphangwa, mbwenye asadziwambo kuti anango a ife nee asakwanisa kubuluka panyumba toera kuenda kamwaza mphangwa. Natenepa, Yahova asatiphedza toera kumwaza mphangwa kuna ale anatitsalakana peno maenfermero. Ife tingalandanisa pinthu pinacita ife cincino na pikhacita ife nduli tinatsukwala. Mbwenye tingadzindikira njira inatiphedza Yahova cincino, tinakhala na mphambvu inafuna ife toera kupirira pinentso mwakutsandzaya. Ife nkhabe kupidziwa khala mbeu ya undimomwene idabzwala ife inakhala na mitcici mbitoma kukula.​—Ekle. 11:6. w21.05 tsa. 24-25 ¶14-17

Ntima wakufuna pyonsene wacitisa Mambo Dhavidhi kuduwala pinthu pyonsene pidampasa Yahova ninga mpfuma, cidzo na kukunda anyamalwa ace azinji. Dhavidhi akhadziwa kuti nkhombo zidapaswa iye na Yahova zikhali ‘zizinji kakamwe toera kuzilonga.’ (Mas. 40:5) Mbwenye mukupita kwa ndzidzi Dhavidhi aduwala pinthu pyonsene pidampasa Yahova. Maseze Dhavidhi akhali na akazi azinji, iye atoma kusirira nkazi wa ndzace. Nkazi unoyu akhali Bhatisebha mamunace akhali Uriya wa dzindza ya Eti. Dhavidhi apita m’mabonde na Bhatisebha mbakhala na mimba. Kusiyapo pyenepi, Dhavidhi acita masasanyiro toera kuphesa Uriya mamunace Bhatisebha. (2 Sam. 11:2-15) Thangwi yanji Dhavidhi acita pyenepi? Kodi iye akhanyerezera kuti Yahova nee akumuona? Maseze Dhavidhi atumikira Yahova mu pyaka pizinji, iye adzakhala na ntima wakufuna pyonsene, pontho pyenepi pyam’bweresera nyatwa zizinji. Mbwenye mukupita kwa ndzidzi, Dhavidhi abweka madawo ace mbatcunyuka. Iye apereka takhuta kakamwe thangwi yakulekererwa madawo ace na Yahova.​—2 Sam. 12:7-13. w21.06 tsa. 17 ¶10

Panango tinanyerezera kuti nee tinakwanisa kucitisa pfundziro ya Bhibhlya. Kusiyapo pyenepi, panango tinanyerezera kuti tisafunika kukhala na maluso mazinji toera kupfundzisa munthu Bhibhlya. Khala musanyerezera tenepo, tendeni tione pinthu pitatu pyakuti pinakuphedzani toera kukhala na cipapo cakupfundzisa munthu Bhibhlya. Cakutoma, Yahova asakuonani kuti imwe munakwanisa kupfundzisa anango. Caciwiri, Yezu wakuti ‘apaswa mphambvu zonsene kudzulu na pa dziko yapantsi,’ akupangani toera mupfundzise anthu. (Mat. 28:18) Cacitatu, imwe munakwanisa kunyindira ciphedzo ca anango. Mwacitsandzo, Yezu akhanyindira pinthu pidampfundzisa Babace toera kulonga, natenepa imwe munakwanisambo kucita pibodzi pyene. (Juwau 8:28; 12:49) Kusiyapo pyenepi, imwe munakwanisa kuphemba muyang’aniri wanu wa nsoka wa basa ya m’munda, mpainiya peno m’mwazi mphangwa unango wa maluso toera akuphedzeni kutomesa na kucitisa pfundziro ya Bhibhlya. Toera mukhale na maluso akucitisa mwadidi pfundziro ya Bhibhlya, imwe musafunika kukhala pabodzi na m’bodzi wa amwazi mphangwa anewa mu ndzidzi unacitisa iye pfundziro yace. w21.07 tsa. 6 ¶12

Kumala kwa makhaliro akuipa a dziko ino kuli dhuzi kakamwe. Natenepa tisafunika kunyindira kakamwe njira inacita Yahova pinthu cincino kupiringana kale. Thangwi yanji? Thangwi pa ndzidzi wa nyatwa ikulu panango tinatambira pitsogolero pyakuti pisaoneka ninga ndi pyakunentsa kupibvesesa peno kupiphatisira. Mwandimomwene Yahova nee analonga na ife nkhope na nkhope. Panango anaphatisira anthu adakhazikisa iye toera kutipasa pitsogolero. Unoyu nee unadzakhala ndzidzi toera kupenula peno kubvundzika: ‘Kodi pitsogolero pyenepi piri kubulukadi kuna Yahova peno ndi cisankhulo ca abale anapereka pitsogolero pyenepi?’ Kodi imwe munanyindira Yahova na gulu yace pa ndzidzi unoyu wakufunika kakamwe? Ntawiro unanyindira njira inaona imwe pitsogolero pya Yahova cincino. Khala imwe musanyindira pitsogolero pinatambira imwe lero, mbamupiphatisira mwakukhonda nyinyirika, panango munacitambo pibodzi pyene pa ndzidzi wa nyatwa ikulu. w22.02 tsa. 6 ¶15

Yahova aphedza Jidhiyoni pabodzi na anyankhondo ace 300 toera kuwina nkhondo, pinthu pyakuti mbapidaacitisa toera kudzikuza. Buluka penepo, amuna a dzindza ya Efraimu aenda kaonana na Jidhiyoni tayu toera kunsimba, mbwenye toera kulongezana naye. Iwo akhadaipirwa kakamwe thangwi Jidhiyoni nee akhadaacemera toera kamenya pabodzi nkhondo. (Aton. 8:1) Jidhiyoni aakumbusa pinthu pizinji pidacita iwo na ciphedzo ca Yahova. Natenepa “iwo akhurudzika.” (Aton. 8:3) Munjira ineyi, Jidhiyoni akhala wakucepeseka toera kukhazikisa ntendere pakati pa atumiki a Mulungu. Pinthu pidacita amuna a dzindza ya Efraimu pisatipfundzisa kuti ife nee tisafunika kupasika mbiri tekhene, mbwenye tisafunika kupasa mbiri Yahova. Misolo ya banja na akulu a mpingo anakwanisa kupfundza kubulukira mu pinthu pidacita Jidhiyoni. Khala munthu unango aipirwa thangwi ya pinthu pidacita ife, ife tisafunika kubvesesa kuti thangwi yanji iye aipirwa. Kusiyapo pyenepi, ife tisafunikambo kusimba munthu unoyu thangwi ya pinthu pyadidi pidacita iye. Mbwenye cinthu cakufunika kakamwe ndi kukhazikisa ntendere na abale athu m’mbuto mwakudzikuza. w21.07 tsa. 16-17 ¶10-12

Yahova apangiza kuti ndife akufunika thangwi yakuticita mwakulandana na iye. Nakuti ife tacitwa mwakulandana na Mulungu, tinakwanisa kupangiza makhaliro ace adidi kakamwe ninga ufuni, ntsisi, kukhulupirika na ulungami. (Mas. 86:15; 145:17) Tingapangiza makhaliro anewa tisalemedza Yahova, pontho tinapangiza kuti tisapereka takhuta kuna iye. (1 Ped. 1:14-16) Tingapangiza makhaliro anakomerwa na Babathu wakudzulu, ife tinakhala akutsandzaya. Nakuti Yahova aticita mwakulandana na iye, iye atipasa maluso akuti anatiphedza toera kucita khundu ya atumiki ace. Yahova aticitira dziko yapantsi yakuti ndi yadidi kakamwe. Mbadzati kucita munthu, pakutoma Yahova acita dziko yapantsi toera anthu akhalemo. (Yobe 38:4-6; Yer. 10:12) Nakuti Yahova ndi wakupasa mwakudzala manja, iye acita pinthu pizinji pyadidi toera titsandzaye napyo. (Mas. 104:14, 15, 24) Pontho pidamala iye kucita pinthu pyenepi, iye aona kuti pinthu pyonsene ‘pikhali mwadidi.’​—Gen. 1:10, 12, 31. w21.08 tsa. 3 ¶5-6

Ife tonsene tiri na basa yakumwaza mphangwa na kucita anyakupfundza. (Mat. 28:19, 20; Aroma 10:14) Kodi imwe musafuna kuthimizira maluso anu m’basa ineyi yakufunika kakamwe? Pfundzani bhruxura yakuti Wangisirani Toera Kuleri Mwadidi na Kupfundzisa. Mu ndzidzi unakhazikisa imwe pifuno pyauzimu, lekani kuduwala cinthu cakufunika kakamwe cakuti ndi kukulisa makhaliro Acikristu. (Akol. 3:12; 2 Ped. 1:5-8) Mwakukhonda penula, ife tonsene tisafuna kucita pizinji m’basa ya Yahova kupiringana pire pinakwanisa ife kucita cincino. Mu dziko ipswa, ife tinadzatumikira Mulungu mwakukwana. Ndzidzi unoyu mbudzati kufika, tendeni ticite pyonsene pinakwanisa ife toera kukhazikisa pifuno pyakuti tinakwanisa kupikwanirisa, pyenepi pinatiphedza toera tikhale akutsandzaya kakamwe. Kusiyapo pyenepi, ife tinapasa mbiri Yahova, ‘Mulungu wathu wakutsandzaya.’ (1 Tim. 1:11) Natenepa, tendeni tipitirize kukhala akutsandzaya na pinthu pinakwanisa ife kucita kuna Yahova. w21.08 tsa. 25 ¶18-20

Khala imwe mwakuzwa na anyakubala akuti ndi Mboni za Yahova, mwakukhonda penula imwe mwapfundza pya Yahova kutomera uwana wanu. Imwe mwapfundziswa kuti iye ndi Nciti wathu, iye ali na makhaliro adidi kakamwe, pontho asafuna kucitisa dziko yapantsi kukhala Paraizu. (Gen. 1:1; Mabasa 17:24-27) Anthu azinji nee asakhulupira kuti Mulungu alipo, pontho nee asatawira kuti ndiye adacita pinthu pyonsene. Mbwenye iwo asakhulupira kuti umaso watomeka okhene, pontho mwapang’ono-pang’ono pyadzacinja mbapikhala pinthu pya umaso pyakuti ndi pyakunentsa kubvesesa. Anthu anango anakhulupira pyenepi ndi akupfundza kakamwe. Iwo asalonga kuti siyensiya isapangiza kuti pinalonga Bhibhlya ndi pyakuphonyeka, pontho anthu anakhulupira Mulungu ndi akusowa basa. Mwakukhonda tsalakana khala tatoma kale kutumikira Yahova peno nkhabe, tonsene tisafunika kupitiriza kuwangisa cikhulupiro cathu. Tingacita pyenepi, ife nee tinapeuswa na “udziwisi wa anthu a dziko na manyengerero apezi” analongwa na anthu akuti nee asakhulupira pinalonga Bhibhlya.​—Akol. 2:8. w21.08 tsa. 14 ¶1-3

Abheli, Nowa, Abhrahamu na Yobe apangiza kuti akhalemedza Yahova, akhanfuna, akhambvera, akhan’khulupira, pontho akhapereka ntsembe kuna iye. Iwo acita pyonsene pikhakwanisa iwo toera kupasa mbiri Yahova, pontho ulambiri wawo ukhali wakutawirika kuna iye. Mukupita kwa ndzidzi, Yahova aphatisira Mose toera kupereka Mwambo kuna Aizraeli. Mwambo unoyu ukhaphataniza pitsogolero pizinji pikhapangiza kuti Yahova akhafuna kulambirwa munjira ipi. Pakumala kufa na kulamuswa kwa Yezu, Yahova nee akhadikhirabve kuti atumiki ace amulambire mwakubverana na Mwambo udapasa iye Aizraeli. (Aroma 10:4) Akristu akhafunika kutowezera Mwambo upswa wakuti ndi “mwambo wa Kristu.” (Agal. 6:2) Toera kucita pyenepi iwo nee akhafunika kukoya “mwambo” na kubvera mitemo mizinji, mbwenye akhafunika kutowezera citsandzo ca Yezu na kucita pinthu pidapfundzisa iye. Lero, Akristu asacitambo pyonsene pinakwanisa iwo toera atowezere Kristu, akomerese Yahova ‘mbagumana ciwangiso.’​—Mat. 11:29. w22.03 tsa. 20-21 ¶4-5

Yahova asabvesera anace. Iye abvesera maphembero mazinji adacita Yezu mu ndzidzi ukhali iye pa dziko yapantsi. Mwacitsandzo, iye abvesera Yezu mu ndzidzi ukhacita iye phembero thangwi ya pisankhulo pyakufunika kakamwe. Cibodzi mwa pisankhulo pyenepi cikhali pidasankhula iye apostolo akukwana 12. (Luka 6:12, 13) Kusiyapo pyenepi, Yahova abveserambo phembero ya Yezu mu ndzidzi ukhali iye wakutsukwala. Pontho mbadzati kusandukirwa na Yuda, Yezu acita phembero kuna Babace thangwi ya pinthu pikhafuna kuncitikira. Yahova nee abvesera basi ene phembero ya Yezu, mbwenye atumambo anju toera awangise Mwanace wakufunika. (Luka 22:41-44) Lero, Yahova asapitiriza kubvesera maphembero a atumiki ace, pontho iye asaatawira mu ndzidzi wakuthema na munjira yadidi. (Mas. 116:1, 2) Mwacitsandzo, mulongo unango wa ku Indiya akwanisa kuona njira idatawira Yahova maphembero ace. Iye akhali wakudzudzumika kakamwe, pontho iye acita phembero kuna Yahova na ntima onsene thangwi yakudzudzumika kwace. Iye alemba: “Programu ya JW Broadcasting^® ya Maio ya 2019 yabwera pa ndzidzi wakuthema thangwi iyo yandiphedza toera kudziwa kuti ndinathimbana tani na kudzudzumika, pontho iyo ikhali ntawiro wa maphembero anga.” w21.09 tsa. 21-22 ¶6-7

Pikhali pyakunentsa kakamwe kuna Ayuda a mu ndzidzi wa apostolo kusiya pinthu pyonsene pikhali na iwo mbatoma umaso upswa mbuto inango. Iwo akhafunika kunyindira kuti Yahova mbadaapasa pinthu pyonsene pikhafunika kuna iwo. Cinthu cinango cidaphedza Akristu anewa, ndi uphungu udaapasa mpostolo Paulu pyaka pixanu nduli Aroma mbadzati kuzungulira nzinda wa Yerusalemu. Iye alonga: “Mu umaso wanu, khalani anthu akukhonda kufuna kakamwe kobiri, mbwenye mukomerwe na pinthu piri na imwe. Thangwi iye alonga: ‘Ine cipo ndinadzakusiya, pontho cipo ndinadzakuthawa.’ Toera tikhale na cipapo kakamwe, mbatilonga kuti: ‘Yahova ndiye anandiphedza; nee ndinadzagopa. Kodi munthu anandicitanji?’” (Aheb. 13:5, 6) Pikhali pyakukhonda nentsa kuna Ayuda adabvera uphungu wa Paulu toera kutsandzaya na pinthu pyakucepa pikhali na iwo ku mbuto idathawira iwo. Iwo akhali na cinyindiro cakuti Yahova mbadaapasa pinthu pikhafunika kuna iwo. w22.01 tsa. 4 ¶7, 9

Tingabva mafala akuti munthu wantsisi, ife tisanyerezera munthu wakuti ndi wakukoma ntima, waufuni na wakupasa mwakudzala manja. Kusiyapo pyenepi, ife tisanyerezerambo pya nsangani udalonga Yezu thangwi ya Nsamariya wadidi. Mamuna unoyu wa dzindza inango ‘apangiza ntsisi’ kuna Muyuda wakuti akhadaphekeswa na mambava. Iye ‘abvera ntsisi’ Muyuda unoyu mbankwata toera kuntsalakana mwaufuni. (Luka 10:29-37) Nsangani unoyu usatipfundzisa thangwi ya ntsisi, wakuti ndi n’khaliro wadidi kakamwe wa Mulungu wathu. Mulungu ndi wantsisi thangwi iye asatifuna. Pontho iye asatibvera ntsisi munjira zakusiyana-siyana ntsiku zonsene. Pana njira inango yakuti munthu anakwanisa kupangiza ntsisi. Munthu wantsisi panango anasankhula kukhonda kusandika munthu wakuti athema kusandikwa. Na thangwi ineyi, Yahova asabvera ntsisi ife tonsene. Nyamasalmo alemba: “Iye nee asatitsalakana mwakubverana na madawo athu.” (Mas. 103:10) Ngakhale tenepo, midzidzi inango Yahova asasandika mwakuwanga munthu adacita madawo. w21.10 tsa. 8 ¶1-2

Yahova asapangiza ufuni wace wakukhonda mala basi ene kuna atumiki ace akuti ali na uxamwali wakuwanga na iye. Ife tisakwanisa kuona pyenepi kubulukira m’mafala adalonga Mambo Dhavidhi na mprofeta Dhanyeli. Mwacitsandzo, Mambo Dhavidhi alonga: “Pitirizani kupangiza ufuni wanu wakukhonda mala kuna ale anakudziwani.” “Ufuni ukulu wa Yahova usakhala kwenda na kwenda kuna ale anan’gopa.” Pontho mprofeta Dhanyeli alonga: “Yahova Mulungu wandimomwene, musapangiza ufuni ukulu kuna ale anakufunani na kuna ale anabvera mitemo yanu.” (Mas. 36:10; 103:17; Dhan. 9:4) Mwakubverana na mafala anewa akupumirwa, Yahova asapangiza ufuni wakukhonda mala kuna atumiki ace thangwi iwo asandziwa, asan’gopa, asanfuna, pontho asakoya matongero ace. Yahova asapangiza ufuni wakukhonda mala basi ene kuna atumiki ace anamulambira munjira yakuthema. Mbatidzati kutoma kutumikira Yahova, ife tatambira ufuni wa Mulungu unapangiza iye kuna anthu onsene. (Mas. 104:14) Mbwenye ninga atumiki ace, ife tisaphedzekambo na ufuni wace wakukhonda mala. w21.11 tsa. 3-4 ¶8-9

Mwakukhonda tsalakana pinthu pinafuna kuticitikira, ife tiri akutonga toera kubvera mafala a Yezu anagumanika padzulu apa. Lero, anthu azinji asakomerwa na kubvesera pinthu pinalonga atsogoleri a mauphemberi. Midzidzi inango, iwo asatsalakana atsogoleri anewa a mauphemberi ninga alungu awo. Anthu azinji asaenda m’magereja mwawo, mbagula mabukhu awo, pontho asaapasa kobiri zizinji peno asaphedzera misoka ya atsogoleri anewa auphemberi. Anthu anango asakhulupira pinthu pyonsene pinalonga iwo. Pontho nkhabe dziwika kuti mbadaona Yezu Kristu mbadakhulupirambo pyonsene pikhalonga iye. Mbwenye alambiri andimomwene a Yahova nee asakhulupira pinalonga atsogoleri anewa auphemberi. Maseze ife tisalemedza ale anatsogolera mu gulu yathu, ife tisabvera mafala adalonga Yezu kuti: “Monsene ndimwe abale.” (Mat. 23:8-10) Ife nee tisalambira anthu, mwakukhonda tsalakana khala ndi atsogoleri a mauphemberi peno atsogoleri a ndale za dziko. Kusiyapo pyenepi, ife nee tisaphedzera ulambiri wawo peno pinthu pinacita anthu a ndale za dziko. Natenepa, ife ndife akusiyana kakamwe na mauphemberi anango analonga kuti ndi Akristu.​—Juwau 18:36. w21.10 tsa. 20 ¶6-7

Nkristu onsene wakuti asafuna kukhala wakucena nee asafunika kusiya kuti munthu unango peno pinthu pinango pikhale pyakufunika kakamwe kuna iye kupiringana uxamwali wace na Mulungu. Natenepa, nakuti ndife Mboni za Yahova, tisafunika kucalira pinthu pyonsene pinapswipisa dzina yace yakucena. (Lev. 19:12; Iza. 57:15) Aizraeli apangiza kuti iwo atawira Yahova ninga Mulungu wawo thangwi ya kubvera matongero ace. Lemba ya Levitiko 18:4 isalonga: “Musafunika kubvera matongero anga, mbamutsogolerwa na mitemo yanga. Ine ndine Yahova Mulungu wanu.” Mu kapitulu 19 musagumanikambo “mitemo” mingasi idapaswa Aizraeli. Mwacitsandzo, vesi 5-8, 21 na 22 asalonga pya ntsembe za pinyama. Aizraeli nee akhafunika kupereka ntsembe zenezi munjira yakuti ‘mbadapswipisa pinthu pyakucena pya Yahova.’ Kuleri mavesi anewa kusafunika kutikulumiza toera kukomeresa Yahova na kupereka ntsembe zakutawirika zakunsimba ninga pinalongwa pa Ahebheri 13:15. w21.12 tsa. 5-6 ¶14-15

Anyakumanga banja apswa lero anakwanisa kupfundza pizinji na pitsandzo pya mabanja anango akuti anyindira Yahova. Anyakumanga banja anango panango atumikira m’basa ya ndzidzi onsene mu pyaka pizinji. Khala imwe musanyerezera pya kutumikira m’basa ya ndzidzi onsene, ndiye tani kuphemba uphungu wawo? Ineyi ndi njira yakupangiza kuti imwe musanyindira Yahova. (Mis. 22:17, 19) Akulu a mpingo anakwanisambo kuphedza anyakumanga banja apswa toera akhazikise pifuno pyauzimu na kupikwanirisa. Kumbukani kuti banja ndi muoni wakubuluka kwa Yahova. (Mat. 19:5, 6) Natenepa iye asafuna kuti anyakumanga banja akomerwe na muoni unoyu. Anyakumanga banja apswa, nyerezerani mwadidi pinthu pinacita imwe mu umaso wanu. Kodi imwe musawangisira toera kupangiza kupereka takhuta kuna Yahova thangwi ya muoni udakupasani iye? Longani na Yahova m’phembero. Sakani m’Mafalace midida yakuti munakwanisa kuiphatisira mu umaso wanu. Buluka penepo bverani uphungu unakupasani Yahova. Khalani na cinyindiro cakuti mungaikha manyerezero anu m’basa yakutumikira Yahova, imwe munakhala akutsandzaya kakamwe! w21.11 tsa. 19 ¶16, 18

Tiyago nee akhaona kuti ndi wakufunika kakamwe kupiringana anango. Tiyago nee akhanyerezera kuti ndi wakufunika kakamwe kupiringana abale anango, thangwi yakukhala m’bale wa Yezu, peno thangwi ya mabasa mazinji akhadapaswa iye. Iye alonga kuti Akristu andzace ndi ‘abale ace akufunika.’ (Tiya. 1:16, 19; 2:5) Iye nee ayesera kucitisa anango kunyerezera kuti iye nee akhadawa. Tisapfundzanji: Kumbukani kuti tonsene tisadawa. Ife nee tisafunika kunyerezera kuti ndife apadzulu kakamwe kupiringana anyakupfundza athu a Bhibhlya. Thangwi yanji? Tingacitisa anyakupfundza athu kunyerezera kuti ife nee tisadodoma, iwo panango ananyerezera kuti nee anakwanisa kukomeresa Mulungu. Mbwenye tingaapanga kuti pikhalimbo pyakunentsa kuna ife toera kuphatisira uphungu wa Bhibhlya, mbatiapanga kuti Yahova atiphedza tani toera kucita macinjo mu umaso wathu, tinaaphedza toera aone kuti iwo anakwanisambo kutumikira Yahova. w22.01 tsa. 11-12 ¶13-14

Tingapitiriza kunyerezera ninga Yezu pinakhala pyakukhonda nentsa kucita pinthu ninga mukhapicitira iye na kutowezera makhaliro ace. (Aheb. 1:3) Panango tinanyerezera: ‘Yezu ndi waungwiro. Cipo ndinakwanisa kukhala ninga iye.’ Khala imwe musanyerezera tenepo, kumbukani pinthu ipi: Cakutoma, ife tacitwa mwakulandana na Yahova na Yezu. Natenepa, ife tinakwanisa kutowezera citsandzo cawo, pontho tinakwanisa kukhala akulandana na iwo. (Gen. 1:26) Caciwiri, ife tisafunika kukumbuka kuti nzimu wakucena wa Mulungu ndi wamphambvu kakamwe kudzulu na pa dziko yapantsi. Na ciphedzo ca nzimu unoyu, ife tinakwanisa kucita pinthu pyakuti cipo mbatidakwanisa kupicita tekhene. Cacitatu, cincino Yahova nee asadikhira kuti tipangize misapo ya nzimu wakucena mwakukwana. Na thangwi ineyi, Babathu waufuni apasa ale akuti ali na cidikhiro cakukhala pa dziko yapantsi pyaka 1.000 toera akhale aungwiro. (Apok. 20:1-3) Cincino, Yahova asafuna kuti ticite pyonsene pinakwanisa ife mbatinyindira ciphedzo cace. w22.03 tsa. 9 ¶5-6

Nee ndi phembero basi yakuti inatiphedza toera kuwangisa uxamwali wathu na Yahova. Kupfundza Mafala a Mulungu na kugumanika pa misonkhano ya mpingo pinatiphedzambo toera kuwangisa uxamwali wathu na Mulungu. Tinacitanji toera kuphatisira mwadidi ndzidzi unapfundza ife Bhibhlya na ndzidzi unagumanika ife pa misonkhano? Bvundzikani: ‘Ninji pinandidzudzumisa pa ndzidzi unagumanika ine pa misonkhano na mu ndzidzi unapfundza ine Bhibhlya?’ Kodi musadzudzumika munthu angakumenyerani ntokodzi, angakutumizirani e-mail peno mphangwa mu ntokodzi peno n’thabhuleti? Mungaona kuti mukutoma kunyerezera pinthu pinango mu ndzidzi unapfundza imwe Bhibhlya peno mu ndzidzi wa misonkhano ya mpingo, phembani ciphedzo ca Yahova. Panango pinakhala pyakunentsa kuna imwe toera kusiya kunyerezera pinthu pinakudzudzumisani, mbamuikha manyerezero anu m’Mafala a Mulungu, mbwenye ndi pyakufunika kakamwe kucita pyenepi. Phembani Yahova toera akupaseni ntendere wakuti unatsidzikiza ntima wanu na “manyerezero anu.”​—Afil. 4:6, 7. w22.01 tsa. 29-30 ¶12-14

Mambo Uziya akhonda kubvera uphungu. Iye apita m’mbuto inango mu templo ya Yahova yakuti basi ene ndi anyantsembe akhatawiriswa kupita toera kupereka insenso. Anyantsembe a Yahova ampanga: ‘Mambo Uziya, imwe nee musafunika kupisa insenso kuna Yahova. Basi ene ndi anyantsembe asafunika kupisa insenso.’ Uziya atawira tani? Iye mbadacepeseka mbatawira uphungu mbabuluka mu templo mwakucimbiza, panango Yahova mbadamulekerera. Mbwenye “Uziya aipirwa.” Thangwi yanji iye nee abvera uphungu? Pisaoneka kuti thangwi ya kukhala mambo anyerezera kuti mbadakwanisa kucita pinthu pyonsene pikhafuna iye. Mbwenye Yahova nee akhanyerezera tenepo. Thangwi yakucita pinthu pyakuti iye nee akhadatawiriswa kupicita, Uziya aphatwa na matanya, pontho “apitiriza na matanya mpaka ntsiku yakufa kwace.” (2 Kro. 26:16-21) Citsandzo ca Uziya cisatipfundzisa kuti mwakukhonda tsalakana miyai iri na ife, tingakhonda kubvera uphungu wa m’Bhibhlya nee tinakhala akutawirika kuna Yahova. w22.02 tsa. 9 ¶7

Munthu anatsogolerwa na ‘uunthu wakale,’ kazinji kene asanyerezera na kucita pinthu pyakuipa. (Akol. 3:9) Panango asanyerezera pinthu pyace basi, asaipirwa mwakucimbiza, nee ndi wakupereka takhuta, pontho ndi wakudzikuza. Kusiyapo pyenepi, panango asakomerwa kuona ucipezipezi na mafilimu anapangiza ulukwali na uphanga. Panango iye ali na makhaliro anango adidi, pontho asapasika mulando thangwi ya pinthu pyakuipa pinalonga iye na pinacita iye. Mbwenye cifuno cace toera kucinja manyerezero ace na makhaliro ace ndi cakucepa. (Agal. 5:19-21; 2 Tim. 3:2-5) Nakuti ndife akusowa ungwiro, ife nee tinakwanisa kumalisa manyerezero na pifuno pyonsene pyakuipa muntima mwathu. Midzidzi inango tinalonga peno tinacita pinthu pyakuti tingamala tinatsumbikika napyo. (Yer. 17:9; Tiya. 3:2) Mbwenye tingadula uunthu wakale nee tisatsogolerwabve na manyerezero na macitiro akuipa. Ife tisacinja makhaliro athu.​—Iza. 55:7. w22.03 tsa. 3 ¶4-5

Akulu a mpingo, onani makhaliro adidi ali na abale na alongo anu. Ife tonsene ndife akusowa ungwiro. Ngakhale tenepo, m’bodzi na m’bodzi wa abale athu ali na makhaliro akuti tisakomerwa nawo. Ndimomwene kuti midzidzi inango akulu a mpingo asafunika kupasa uphungu abale na alongo. Mbwenye ninga mpostolo Paulu, iwo asafunika kuwangisira toera akhonde kunyerezera kakamwe pya macitiro na mafala akudzidzida adalonga munthu. M’mbuto mwace, iwo asafunika kunyerezera kakamwe thangwi ya ufuni uli na munthu unoyu kuna Yahova, kupirira kunacita iye pakutumikira Mulungu na kuwangisira kwace toera kucita pinthu pyadidi. Akulu a mpingo akuti asaona makhaliro adidi a anango, asaphedza abale na alongo toera aone kuti asafuniwa na onsene mu mpingo. Kumbukani kuti Yahova nee asadikhira kuti mukhale aungwiro; mbwenye asafuna kuti mukhale akukhulupirika. (1 Akor. 4:2) Imwe musafunikambo kukhala na cinyindiro cakuti Mulungu asakomerwa na basa inam’phatira imwe. Yahova cipo anadzaduwala “basa yanu na ufuni udapangiza imwe kuna dzina yace pakutumikira anthu akucena, mbamupitiriza kuatumikira.”​—Aheb. 6:10. w22.03 tsa. 31 ¶19, 21