Masalmo 116:1-19
116 Ine ndisafuna YahovaThangwi iye asabva* fala yanga na kudembetera kunacita ine toera kuphemba ciphedzo.+
2 Thangwi iye asakotama* toera kundibvesera,+Pontho ndinadzancemera mu ndzidzi unakhala ine mʼmaso.*
3 Nkhambala zinabweresa kufa zandizungulira;Nthumbi yandikunda.*+
Ine ndakundwa na nyatwa, pontho na kutsukwala.+
4 Natenepa ndacemera dzina ya Yahova:+
“Imwe Yahova, ndipulumuseni!”
5 Yahova ndi wakukoma ntima* na waulungami;+Mulungu wathu ndi wantsisi.+
6 Yahova asatsidzikiza anyakusowa maluso.+
Ndikhali wakusowa mphambvu, mbwenye iye andipulumusa.
7 Umaso wanga mbupume pontho,Thangwi Yahova anditsalakana munjira yadidi.
8 Imwe mwandipulumusa toera ndikhonde kuphiwa,Mwatsidzikiza maso anga toera akhonde buluka misozi, manyalo anga toera akhonde kugwegweduka.+
9 Ine ndinadzafamba pamaso pa Yahova mu dziko ya anthu ali mʼmaso.
10 Ndikhali na cikhulupiro, na thangwi ineyi, ine ndalonga;+Ine ndikhali wakutsukwala kakamwe.
11 Ine ndasowa cakucita mbandilonga:
“Anthu onsene asalonga uthambi.”+
12 Ninji pinafuna ine kupasa YahovaThangwi ya pinthu pyonsene pyadidi pinandicitira iye?
13 Ndinadzathukula khomitco ya cipulumuso,*Pontho ndinadzacemera dzina ya Yahova.
14 Ndinadzakwanirisa mapikiro anga kuna YahovaPamaso pa mbumba yace yonsene.+
15 Yahova asabva kupha kakamwe*Atumiki ace akukhulupirika angafa.+
16 Ndisakudembeterani imwe Yahova,Thangwi ine ndine ntumiki wanu.
Ndine ntumiki wanu, mwana wa bitcu wanu wankazi.
Mwasudzula maunyolo adamangwa na ine.+
17 Ine ndinadzapereka kuna imwe ntsembe yakupereka takhuta;+Ndinadzacemera dzina ya Yahova.
18 Ndinadzakwanirisa mapikiro anga kuna Yahova+Pamaso pa mbumba yace yonsene,+
19 Pa kintalo ya nyumba ya Yahova,+Mu nzinda wa Yerusalemu.
Simbani Yahova!*+
Pidzindikiro Pyapantsi
^ Munjira inango: “Ine ndisafuna thangwi Yahova asabva.”
^ Peno: “asafungula makutu ace.”
^ Fala na Fala: “mu ntsiku za umaso wanga.”
^ Fala na Fala: “Nyatwa zinabwereswa na nthumbi zandigumana.”
^ Peno: “wadidi.”
^ Peno: “cipulumuso cikulu.”
^ Fala na Fala: “Ndi nkhani ikulu kuna Yahova.”
^ Peno: “Aleluya!” Fala na Fala: “Yah.” Yah ndi dzina ya Yahova ingalembwa mwacigwagwa.
