Tsamba Kuna Akristu a ku Galasya 6:1-18
6 Abale anga, khala munthu atoma kufamba munjira yakuipa, ngakhale mwakukhonda dziwa, imwe akuti ndimwe akukola mwauzimu yeserani kuphedza munthu unoyu mwakukhurudzika.+ Mbwenye citani mphole-mphole+ toera mukhonde kuyeserwambo.+
2 Pitirizani kuthukulirana mitolo ya unango na ndzace,+ munjira ineyi, imwe munapangiza kuti musabvera mwambo wa Kristu.+
3 Khala munthu asanyerezera kuti ndi wakufunika, mbwenye mbakhonda kukhala wakufunika,+ iye ali kunyengezeka ekhene.
4 Mbwenye mʼbodzi na mʼbodzi asafunika kudinga mabasace;+ natenepa, iye anadzakhala na thangwi toera kutsandzaya na pinthu pinacita iye, tayu kulandanisa na pinacita munthu unango.+
5 Thangwi mʼbodzi na mʼbodzi anadzathukula ntolo wace.*+
6 Kusiyapo pyenepi, munthu anapfundziswa mafala a Mulungu, mbagawane pinthu pyadidi pyonsene na ule anampfundzisa.+
7 Lekani kunyengezwa: Mulungu nkhabe kusingirirwa. Thangwi cinabzwala munthu, ndico cinafuna kudzabvuna iye;+
8 thangwi ule anabzwala mukutsogolerwa na pifuno pyace pyaunyama, anadzabvuna kufa thangwi ya pifuno pyace pyaunyama, mbwenye ule anabzwala mukutsogolerwa na nzimu wakucena, anadzabvuna umaso wakukhonda mala thangwi ya nzimu wakucena.+
9 Natenepa, mbatilekeni kubwerera nduli* pakucita pinthu pyadidi, thangwi tinadzabvuna pa ndzidzi wakuthema tingakhonda kufewa manungo.*+
10 Na thangwi ineyi, mu ndzidzi wakuti tinakwanisa kuphedza anango,* tendeni tiphedze anthu onsene, mbwenye makamaka tiphedze anyakukhulupira andzathu.
11 Onani maletra makulu adakulemberani ine na manja anga.
12 Ale onsene anafuna kukomeresa anthu,* ndiwo anakukakamizani toera musidzwe, iwo asacita pyenepi basi ene toera akhonde kutcingwa thangwi ya Kristu.*
13 Thangwi na ale ene anatawira kusidzwa, iwo nee asabvera Mwambo,+ mbwenye iwo asafuna kuti imwe musidzwe toera akwanise kugaya thangwi ya manungo anu.
14 Mbwenye ine cipo ndinagaya thangwi ya cinthu cinango, basi ene ndinagaya thangwi ya Mbuyathu Yezu Kristu+ adafa pamuti wakusikimizira,* wakuti kubulukira mwa iye, kwa ine dziko yafa, pontho mʼmaonero a dziko, inembo ndafa.
15 Thangwi kusidzwa na kukhonda kusidzwa nkhabe basa,+ mbwenye cinafunika ndi kukhala munthu mupswa.+
16 Onsene anatowezera ntemo unoyu, inde, Izraeli wa Mulungu mbakhale na ntendere, pontho Mulungu apangize ntsisi kuna iye.+
17 Kutomera lero, nee mʼbodzi asafunika kundionesa nyatwa, thangwi mʼmanungo mwanga ndiri na pidzindikiro pinapangiza kuti ndine bitcu wa Yezu.+
18 Abale anga, kukoma ntima kukulu kwa Mbuyathu Yezu Kristu mbakukhale na imwe thangwi ya makhaliro adidi anapangiza imwe.* Ameni.
Pidzindikiro Pyapantsi
^ Peno: “anadzacita ekhene pisankhulo pyace.”
^ Peno: “kuneta, kubwerera nduli.”
^ Peno: “mbatilekeni kuneta.”
^ Peno: “pa ndzidzi wakuthema.”
^ Peno: “Ale anafuna kuoneka ninga ndi adidi pamaso pa anthu.”
^ Fala na Fala: “thangwi ya muti wakusikimizira wa Kristu.” Onani Mabvekero a Mafala Anango.
^ Onani Mabvekero a Mafala Anango.
^ Peno: “thangwi ya nzimu unapangiza imwe.”
