Umaso wa nkazi unoyu ukhali wakunentsa kakamwe, pontho nee akhali na kobiri izinji toera kugula pinthu pyakufunika mu umaso wace. Ngakhale tenepo, iye aikhambo m’bokosi ibodzi kobiri ziwiri zing’ono za ndzaya, zakuti panango dzumbi yace nee yabveka pidagwa izo m’bokosi. Yezu adziwa kuti nkazi unoyu aikha kobiri ziwiri za ntengo wakucepa kakamwe zakuti zikhaphatisirwa pa ndzidzi unoyu. Pontho munthu nee mbadakwanisa kugula na kobiri ineyi mbalame ing’ono yakuti nee ikhadhula kakamwe mu ndzidzi unoyu. Yezu adzumatirwa kakamwe na nkazi unoyu wa nzice. Natenepa iye acemera anyakupfundzace mbaapanga: “Nzice uyu wakutcerenga aikha pizinji kupiringana anango onsene.” Buluka penepo iye afokotoza: “Iwo onsene aikhamo pire pidapambula iwo mu mpfuma zawo, mbwenye iye, mu utcerengi wace, aikha pinthu pyonsene pikhali na iye, pyonsene pikhali na iye toera kutsalakana umaso wace.” (Marko 12:43, 44) Nzice unoyu aikha kobiri yonsene ikhali na iye ntsiku ineyi, thangwi akhanyindira kuti Yahova mbadantsalakana.​—Mas. 26:3. w21.04 tsa. 6 ¶17-18

Pikhali Yezu pa dziko yapantsi, iye akhali na maonero adidi thangwi ya utumiki wace. Pontho asafuna kuti atowereri ace apitirize kukhala na maonero mabodzi ene thangwi ya utumiki. (Juwau 4:35, 36) Pikhali Yezu na anyakupfundzace, iwo akhamwaza mphangwa mwaphinga. (Luka 10:1, 5-11, 17) Mbwenye mu ndzidzi udamangwa Yezu mbafa, anyakupfundzace akhadaluza cifuno cakumwaza mphangwa. (Juwau 16:32) Pidalamuswa Yezu muli akufa, iye akulumiza anyakupfundzace toera apitirize kumwaza mphangwa. Pidaenda Yezu kudzulu, anyakupfundzace amwaza mphangwa mwaphinga kakamwe, na thangwi ineyi anyamalwa awo alonga mafala anagumanika pa lemba ya ntsiku ya lero. Yezu a­tsogolera Akristu a mu ndzidzi wa apostolo m’basa yawo yakumwaza mphangwa, pontho Yahova aaphedza. Mwacitsandzo, pa Pentekoste wa mu caka 33, anthu cifupi na 3.000 abatizwa. (Mabasa 2:41) Pontho numero ya anyakupfundza yapitiriza kuthimizirika kakamwe. (Mabasa 6:7) Kusiyapo pyenepi, Yezu alonga mwanyapantsi kuti mu ntsiku zakumalisa anthu azinji mbadatawira mphangwa zadidi.​—Juwau 14:12; Mabasa 1:8. w21.05 tsa. 14 ¶1-2

Kodi imwe musakumbuka ndzidzi udatoma imwe kupfundza undimomwene wa m’Bhibhlya? Imwe mukanyerezera kuti anthu onsene mbadakhulupira pinthu pikhapfundza imwe. Imwe mukhali na cinyindiro cakuti mphangwa za m’Bhibhlya mbazidaaphedza toera kukhala na umaso wakutsandzaya lero mbakhala na cidikhiro cakutambira umaso wakukhonda mala ntsogolo. (Mas. 119:105) Natenepa, imwe mwapanga axamwali anu na acibale anu undimomwene unoyu udapfundza imwe. Mbwenye ninji pidacitika? Mwakukhonda dikhira, azinji a iwo nee atawira. Ife nee tisafunika kudzudzumika anthu anango angakhonda kutawira mphangwa zinamwaza ife. Mu ntsiku za Yezu, anthu azinji nee akhatawira mphangwa zikhamwaza iye, maseze iye akhacita pirengo pyakuti pikhapangiza kuti akhaphedzwa na Mulungu. Mwacitsandzo, Yezu alamusa Lazaro muli akufa. Ceneci cikhali cirengo cakuti anthu akhantcinga nee akhafunika kukhonda. Ngakhale tenepo, atsogoleri Aciyuda nee akhatawira kuti Yezu ndi Mesiya. M’mbuto mwace, iwo akhafuna kupha Yezu pabodzi na Lazaro.​—Juwau 11:47, 48, 53; 12:9-11. w21.05 tsa. 2 ¶1-2

Wangisirani toera kugumanika pa misonkhano mwakukhonda phonya. Imwe munaphindula kakamwe na misonkhano ineyi, pontho munakwanisa kudziwana na abale na alongo anu. Citani uxamwali na abale na alongo akuti anakuphedzani toera kupfundza pizinji, mwakukhonda tsalakana thunga yawo peno makhaliro awo. Bhibhlya isatikumbusa kuti udziwisi uli na “ankhalamba.” (Yobe 12:12) Ankhalamba anakwanisambo kupfundza pizinji kuna aphale na atsikana akukhulupirika. Yonatani akhali nkulu kakamwe kupiringana Dhavidhi, mbwenye pyenepi nee pyapingiza uxamwali wawo. (1 Sam. 18:1) Dhavidhi na Yonatani akhaphedzana toera kutumikira Yahova mwakukhonda tsalakana nyatwa zizinji. (1 Sam. 23:16-18) Mulongo Irina wakuti ndiye basi ene Mboni ya Yahova m’banja mwawo alonga: “Abale na alongo anakwanisa kukhala ninga anyakubala athu peno acibale athu. Yahova anakwanisa kuaphatisira toera kutiphedza.” Axamwali anu asafuna kukuphedzani, mbwenye imwe musafunika kuapanga pinthu pinathimbana na imwe. w21.06 tsa. 10-11 ¶9-11

Yezu alonga nsangani wa mambo na nyabasace. Mambo unoyu alekerera nyabasace mangawa mazinji kakamwe akuti nee mbadakwanisa kualipa. Mbwenye mukupita kwa ndzidzi, nyabasa unoyu akhonda kulekerera mangawa akucepa a nyabasa ndzace. Pidabva mambo pinthu pidacita nyabasace unoyu wakuuma ntima, iye anfungira nkaidi. Pinthu pidacita nyabasa unoyu wakuuma ntima nee pyatsukwalisa basi ene iye, mbwenye pyatsukwalisambo anango. Cakutoma, iye akhonda kulekerera nyabasa ndzace “mbaenda kamuikhisa nkaidi mpaka angabwezera mangawa ace.” Caciwiri, ‘anyabasa andzace pidaona iwo pyenepi, atsukwala napyo kakamwe.’ (Mat. 18:30, 31) Munjira ibodzi ene, pinthu pinacita ife pisakhuya anango. Ninji pinafuna kucitika khala munthu unango atitsukwalisa mbatikhonda kumulekerera? Cakutoma, ife tisantsukwalisambo thangwi yakukhonda kumulekerera, panango tinampwaza mbatikhonda kunfuna. Caciwiri, ife tisatsukwalisambo abale na alongo anango mu mpingo angadzindikira kuti nee tisabverana na munthu unoyu. w21.06 tsa. 22 ¶11-12

Sathani asafuna kakamwe kuti anthu acite pinthu pyaulukwali. Pidaona Mulungu kuti ‘uipi watekera kakamwe’ mu ntsiku za Nowa, “Yahova atsukwala thangwi yakucita anthu pa dziko yapantsi, pontho iye atsukwala muntima mwace.” (Gen. 6:5, 6, cidzindikiro capantsi, 11) Kodi pinthu pyacinja kubulukira pa ndzidzi unoyu? Nkhabe. Sathani asakomerwa kakamwe thangwi yakuthimizirika kwa mitundu yonsene yaulukwali, kuphatanizambo kupita m’mabonde kwa amuna na akazi, amuna na amuna peno akazi na akazi. (Aef. 4:18, 19) Pontho iye asakomerwa kakamwe ntumiki wa Yahova angacita madawo. Pantsi pa utongi wa Sathani anthu nee asaponderera basi anthu andzawo toera kuathabusa, mbwenye nee asatsalakanambo mwadidi dziko yapantsi na pinyama pidacita Yahova mbapipereka kuna iwo toera apitsalakane. (Ekle. 8:9; Gen. 1:28) Ninji pinacitika? Asiyentista anango asalonga kuti thangwi yakukhonda kutsalakana mwadidi pinyama, mitundu yakupiringana 1.000.000 ya pinyama nee pinaonekabve mu pyaka pingasi pinatowera. w21.07 tsa. 12 ¶13-14

Atumiki anango a Mulungu asapitiriza kukhala akutsukwala thangwi ya madawo adacita iwo kale. Iwo asapitiriza kunyerezera kuti Yahova cipo anaalekerera, mwakukhonda tsalakana kutcunyuka kudacita iwo. Khala imwe muli kuthimbana na mabvero ninga anewa, kudziwa kuti Mulungu asafuna kakamwe kupangiza ufuni wace wakukhonda mala kuna atumiki ace kunakuphedzani toera mukwanise kutumikira Yahova mwakutsandzaya na cikumbuntima cakucena. Pyenepi pisakwanisika thangwi “ciropa ca Yezu, wakuti ndi Mwanace, cisaticenesa madawo onsene.” (1 Juwau 1:7) Mungatsukwala thangwi ya madawo adacita imwe, kumbukani kuti Yahova ali dzololo toera kukulekererani mungatcunyuka. Nyamasalmo Dhavidhi apangiza kubverana kwa ufuni wakukhonda mala na kulekerera. Iye alemba: “Ninga kudzulu ndi kutali kakamwe na dziko yapantsi, munjira ibodzi ene, ufuni wace ndi ukulu kakamwe kuna ale anan’gopa. Ninga kumabulukiro a dzuwa ndi kutali kakamwe na kumadokero a dzuwa, munjira ibodzi ene, iye asaikha madawo athu kutali kakamwe na ife.”​—Mas. 103:11, 12. w21.11 tsa. 5-6 ¶12-13

Mamuna Wacikristu asafunika kulemedza nkazace. (1 Ped. 3:7) Cilemedzo cisaphataniza kutsalakana anango na ntima onsene. Mwacitsandzo, mamuna asalemedza nkazace angantsalakana ninga munthu wakufunika. Iye nee asaphemba kuti nkazace acite pinthu pizinji pyakuti nee anakwanisa kupicita, pontho iye nee asamulandanisa na akazi anango. Kodi nkazi anapibva tani mamunace angamulandanisa na akazi anango? Mulongo unango anacemerwa Rosa, wakuti mamunace nee ndi Mboni wa Yahova, kazinji kene asamulandanisa na akazi anango, mbancitisa kunyerezera kuti nkhabe munthu ananfuna. Iye alonga: “Ndikhafunika kukumbuka kazinji kene kuti Yahova asandifuna.” Mwakusiyana na mamuna wa mulongo Rosa, mamuna Wacikristu asalemedza nkazace. Iye asadziwa kuti kucita pyenepi kunamphedza toera akhale na uxamwali wadidi na nkazace, pontho toera akhale na uxamwali wadidi na Yahova. Mamuna wakuti asalemedza nkazace, asamulonga mwadidi pamaso pa anango, asansimba, pontho asampanga kuti asanfuna. w21.07 tsa. 22 ¶7-8

Kodi imwe musatsukwala mungadikhira cinthu cakuti musacifuna kakamwe, mbwenye nee cisafika pa ndzidzi unacifuna imwe? Mphapo mungadziwa mathangwi anacitisa cinthu ceneci kukhonda kufika, munapirira mbamupitiriza kudikhira? Lemba ya Misangani 13:11 isatipfundzisa mathangwi anafuna kuticitisa toera kukhala akupirira. Iyo isalonga: “Mpfuma inawinwa mwakucimbiza inapunguka, mbwenye mpfuma ya ule anaigumanya mwapang’ono-pang’ono inathimizirika.” Kodi vesi ineyi isatipfundzisanji? Isatipfundzisa kuti munthu wandzeru asacita pinthu mwapang’ono-pang’ono na mwakupirira, pontho iye asakhala na maphindu adidi kakamwe. Lemba ya Misangani 4:18 isalonga kuti: “Njira ya anyakulungama ndi ninga kuyetimira kwa ceza ca dzuwa namacibese cakuti cisapitiriza kuthimizirika mpaka namasikati.” Vesi ineyi isapangiza pakweca kuti Yahova asaphedza atumiki ace toera kubvesesa cifuniro cace. Vesi ineyi inakwanisambo kutiphedza toera kubvesesa kuti Nkristu anacita tani macinjo mu umaso wace toera akhale na uxamwali wakuwanga na Yahova. Mbwenye pisakwata ndzidzi toera munthu akhale na uxamwali wakuwanga na Yahova. w21.08 tsa. 8-9 ¶1, 3-4

Ife tiri na basa izinji kakamwe toera kucita mu ndzidzi wakuti kumala kwa dziko ino kuli cifupi. (Mat. 24:14; Luka 10:2; 1 Ped. 5:2) Ife tonsene tisafuna kucita pizinji m’basa ya Yahova. Azinji a ife asathimizira utumiki wawo. Anango asafuna kutumikira ninga apainiya. Anangombo asafuna kutumikira ku Bheteli peno m’basa yakumanga Nyumba za Umambo, Nyumba za Misonkhano, Bheteli peno nyumba zakuthumburuzira mabukhu athu. Kusiyapo pyenepi, abale azinji asawangisira kakamwe toera akhale akuthema kutumikira ninga atumiki akutumikira peno akulu a mpingo. (1 Tim. 3:1, 8) Yahova asakomerwa kakamwe angaona kuwangisira kunacita atumiki ace! (Mas. 110:3) Mphapo imwe muli wakutsukwala thangwi yakukhonda kukwanirisa pifuno pinango pyauzimu? Khala ndi tenepo, citani phembero kuna Yahova thangwi ya pyenepi. (Mas. 37:5-7) Kusiyapo pyenepi, phembani maonero a abale anango akukola mwauzimu toera akuphedzeni m’makhundu anafunika imwe kusasanyira, buluka penepo wangisirani toera kuphatisira maonero awo. Mungacita pyenepi, panango pinakuphedzani toera kukwanirisa pifuno pyanu pyauzimu. w21.08 tsa. 20 ¶1; tsa. 21 ¶4

Mprofeta wa nkazi akhacemerwa Yana akhali nzice wa pyaka 84, “mbwenye ndzidzi onsene iye akhaenda ku templo.” Natenepa Yahova ampasa nkhombo thangwi ya kuenda kwace ndzidzi onsene ku templo, pontho akhala na mwai wakuona Yezu mu ndzidzi ukhali iye mwana. (Luka 2:36-38) Lero, pana abale na alongo azinji akukalamba akuti asatumikira Yahova mwakukhulupirika, pontho iwo ndi pitsandzo pyadidi kuna aphale na atsikana. Pinakhala pyakuwangisa kakamwe kuna ife tingakhala na ndzidzi wa kuacita mibvundzo na kuabvesera mu ndzidzi unalonga iwo nkhombo zidakhala na iwo thangwi yakutumikira Yahova. Abale na alongo athu akukalamba ndi akufunika kakamwe kuna Yahova na mu gulu yace. Iwo akwanisa kuona kuti Yahova asapasa nkhombo gulu yace na atumiki ace munjira zizinji. Iwo akwanisa kupfundza pinthu pizinji thangwi ya madodo akhacita iwo. Natenepa aoneni ninga “ncera wa udziwisi,” pontho pfundzani kubulukira mu pitsandzo pyawo. (Mis. 18:4) Mungakhala na ndzidzi toera kuadziwa  mwadidi, munawangisa cikhulupiro canu. w21.09 tsa. 3 ¶4; tsa. 4 ¶7-8; tsa. 5 ¶11, 13

Atumiki a Mulungu anakwanisa kuphatisira maluso anewa akuti Izaiya aalonga ninga “nkaka wa madzindza.” (Iza. 60:5, 16) Mukuphatisira maluso mazinji a amuna na akazi akuti ali kubwera mu undimomwene, mphangwa zadidi ziri kumwazwa m’madziko akukwana 240, pontho mabukhu athu asabuluswa mu pilongero pyakupiringana 1.000. Mu ntsiku zino zakumalisa, basa yakutekenyesa madzindza isakulumiza anthu toera kucita cisankhulo. Kodi iwo anaphedzera Umambo wa Mulungu peno ananyindira mautongi a dziko ino? Ceneci ndi cisankhulo cakuti m’bodzi na m’bodzi asafunika kucicita. Maseze atumiki a Mulungu asabvera mitemo ya utongi wa dziko inakhala iwo, iwo asakhonda kucita khundu ya ndale za dziko. (Aroma 13:1-7) Thangwi iwo asadziwa kuti Umambo wa Mulungu ndiwo basi ene unafuna kudzamalisa nyatwa zonsene zinathabusa anthu lero. Pontho Umambo unoyu nee usacita khundu ya dziko ino.​—Juwau 18:36, 37. w21.09 tsa. 17-18 ¶13-14

Munthu anafuna imwe angasiya kutumikira Yahova, ndi pyakufunika kakamwe kupitiriza kuwangisa cikhulupiro canu na ca anthu a pabanja panu. Munakwanisa tani kucita pyenepi? Phembani Yahova toera akupaseni mphambvu kuti mukwanise kuleri Bhibhlya ntsiku zonsene na kunyerezera mwacidikhodikho pinaleri imwe, pontho gumanikani pa misonkhano ya mpingo. Joanna wakuti pai wace na m’baleace wa nkazi abuluswa mu mpingo alonga: “Ine ndisakhala wakukhurudzika ndingaleri mphangwa zinalonga pya Abhigaili, Esteri, Yobe, Zuze na Yezu. Pitsandzo pyawo pisandiwangisa, pontho pisandiphedza toera kukhala na maonero adidi.” Mu ndzidzi unakhala imwe wakutsukwala, lekani kusiya kucita phembero kuna Yahova. Phembani Yahova toera akuphedzeni kuona pinthu pyenepi ninga munapionera iye, pontho mphembeni toera ‘akupaseni udziwisi mbakupfundzisani njira inafunika imwe kufamba.’ (Mas. 32:6-8) Mwandimomwene, panango pinakhala pyakunentsa kupanga Yahova mabvero anu. Mbwenye Yahova asabvesesa kakamwe kutsukwala kwanu. Iye asakufunani kakamwe, na thangwi ineyi iye asakukulumizani toera mumpange pinthu pya muntima mwanu.​—Eks. 34:6; Mas. 62:7. w21.09 tsa. 28 ¶9-10

Pidamala Paskwa ya caka ca 32, mpostolo Pedhru, Tiyago na Juwau aona masomphenya akudzumatirisa. Paphiri yakulapha, panango Phiri ya Hermoni, Yezu acinjika pamaso pawo. “Nkhope yace ikhayetimira ninga dzuwa, nguwo zace zacena kakamwe ninga ceza.” (Mat. 17:1-4) Apostolo abva fala ya Mulungu mbilonga: “Uyu ndi Mwananga wakufunika, anakomerwa na ine, mbvereni.” Pinthu pikhacita apostolo anewa atatu pisapangiza kuti iwo akhabvera Yezu. Ife tisafunika kutowezera citsandzo cawo. Ife tisapereka takhuta wankulu kuna Yahova thangwi yakukhazikisa Yezu Kristu ninga “nsolo wa mpingo,” toera kutipasa pitsogolero pyaufuni. (Aef. 5:23) Ninga pidacita mpostolo Pedhru, Tiyago na Juwau, ife tisafunika kukhala dzololo toera ‘kumbvera.’ Tingacita pyenepi, ife tinakhala na nkhombo zizinji cincino, pontho tinadzakhala na kutsandzaya kwakukhonda mala ntsogolo. w21.12 tsa. 22 ¶1; tsa. 27 ¶19

Nkristu unango wa ku Korinto akhacita ulukwali na nkazi wa pai wace. Mpostolo Paulu apanga Akristu a ku Korinto toera abuluse munthu unoyu mu mpingo. Makhaliro aulukwali a mamuna unoyu akhakhuya anthu anango mu mpingo. Pontho anango nee akhaona pyenepi ninga madawo makulu. (1 Akor. 5:1, 2, 13) Mukupita kwa ndzidzi, Paulu abva kuti nyakudawa unoyu akhadatcunyuka na ntima onsene. Paulu apanga akulu a mpingo kuti: “Musafunika kumulekerera na ntima onsene, mbamum’balangaza.” Paulu abvera ntsisi mamuna unoyu wakutcunyuka. Iye nee akhafuna kuona kuti mamuna unoyu ali wakutsukwala kakamwe thangwi ya pinthu pidacita iye mpaka kunyerezera kuti nee alekererwa madawo ace. (2 Akor. 2:5-8, 11) Ninga Yahova, akulu a mpingo asakomerwa na kubvera ntsisi anthu anango. Iwo asasandika mwakuwanga munthu adacita madawo, mbwenye asam’bverambo ntsisi khala ndi pyakufunika. Akulu a mpingo angakhonda kusandika munthu adacita madawo, iwo nee asam’bvera ntsisi, mbwenye asantawirisa toera apitirize kucita pinthu pyakuipa. w21.10 tsa. 11-12 ¶12-15

Kutsukwala kunakwanisa kulandaniswa na pironda. Pinango pisakhala ping’ono, pinango pisakhala pikulu. Mwacitsandzo, panango tingaphatisira mpeni tinacekeka pang’ono pa cala. Cironda ceneci panango cinapha. Mbwenye pakupita ntsiku ibodzi peno ziwiri, panango ife tinaduwala mbuto idacekeka ife. Munjira ibodzi ene, pinthu pinango pinaticitira anthu mbatitsukwala nee ndi pikulu pyene. Mwacitsandzo, panango xamwali wathu analonga peno anacita pinthu pyakuti pinatitsukwalisa, ngakhale tenepo ife tinakwanisa kumulekerera mwakukhonda nentsa. Mbwenye khala cironda cathu ndi cikulu, panango dotoro anafunika kucisona mbacipyangirira na tsakala. Ife tingapitiriza kucitcera peno kuciphata-phata, panango nee cinapola mwakucimbiza peno cinathimizirika. Munjira ibodzi ene, pyenepi panango pinacitikambo kuna munthu wakuti atsukwaliswa kakamwe. Natenepa, panango iye anapitiriza kunyerezera kutsukwaliswa kudacitwa iye. Mbwenye anthu anapitiriza kukoya pinthu pyakuipa muntima, basi ene asathimizira kutsukwala kwawo. Natenepa ndi pyakufunika kakamwe kubvera uphungu unagumanika pa lemba ya ntsiku ya lero. w21.12 tsa. 12 ¶15

Nyerezerani kuti nkulu wa mpingo asanentseka thangwi ya mabvaliro a m’bale m’bodzi mu mpingo. Nkulu wa mpingo anakwanisa kubvundzika: ‘Pana mathangwi a m’Bhibhlya toera kupereka uphungu?’ Nakuti nkulu wa mpingo nee asafuna kulonga maonero ace, panango anabvundza nkulu wa mpingo unango peno m’bale, ngakhale mulongo wakuti ali na maonero adidi. Iwo anakwanisa kuona pontho pabodzi uphungu wa Paulu unalonga thangwi ya kubvala mwadidi. (1 Tim. 2:9, 10) Paulu alonga pinthu pingasi pinapangiza kuti Akristu asafunika kubvala nguwo zakuthema. Mbwenye iye nee alonga nguwo zakuti munthu asafunika kuzibvala peno nguwo zakuti nee asafunika kuzibvala. Iye akhadziwa kuti nee ndi pyakuipa kuti abale na alongo asankhule ntundu wa nguwo zinafuna iwo kubvala zakuti nee zisaphonyana na pinalonga Bhibhlya. Natenepa, akulu a mpingo asafunika kuona khala pisankhulo pya munthu pisapangiza kuti ali na maonero adidi peno nkhabe. Tisafunika kukumbuka kuti abale awiri anakwanisa kucita pisankhulo piwiri pyakusiyana. Mbwenye pyenepi nee pisabveka kuti m’bodzi ali kucita pinthu pyadidi, pontho unango ali kucita pyakuipa. Nee tisafunika kukakamiza  abale athu toera kucita pinthu pinaona ife kukhala pyadidi. w22.02 tsa. 16 ¶9-10

Ife tiri na mathangwi adidi toera kupangiza ufuni wakukhonda mala kuna unango na ndzace. Ndi api anango mwa mathangwi anewa? Mavesi mangasi a m’bukhu ya Misangani anatiphedza kutawira mbvundzo unoyu. Iwo asalonga: “Leka kusiya kupangiza ufuni wakukhonda mala na kukhulupirika . . . Natenepa unakhala wakutawirika na waudziwisi pamaso pa Mulungu na pa anthu.” “Munthu anapangiza ufuni wakukhonda mala asaphedzeka ekhene.” “Ule anawangisira kucita pinthu pyadidi na kupangiza ufuni anagumana umaso.” (Mis. 3:3, 4; 11:17; 21:21) Mavesi anewa asalonga mathangwi matatu anaticitisa kupangiza ufuni wakukhonda mala. Yakutoma, tingapangiza ufuni wakukhonda mala tisakhala anthu akufunika kakamwe kuna Mulungu. Yaciwiri, tingapangiza ufuni wakukhonda mala, tisakhala na maphindu mazinji cincino. Mwacitsandzo, ife tisabverana kakamwe na andzathu. Yacitatu, tingapangiza ufuni wakukhonda mala tinadzatambira nkhombo zizinji ntsogolo, kuphatanizambo umaso wakukhonda mala. Natenepa, ife tiri na mathangwi adidi toera kubvera mafala awa a Yahova: “Tsalakananani unango na ndzace mwaufuni na mwantsisi.” w21.11 tsa. 8 ¶1-2

Khala nyatwa zidathimbana na imwe peno zinathimbana na imwe cinci­no zisa­fewesa cikhulupiro canu, lekani kubwerera nduli. Onani pyenepi ninga mwai toera kuwangisa cikhulupiro canu. citani phembero na ntima onsene kuna Yahova makamaka mungathimbana na nyatwa. Pontho dziwani kuti Yahova anakwanisa kukuphedzani na pinthu pinafunika kuna imwe mukuphatisira acibale anu peno axamwali anu. Mungatawirisa kuti Yahova akuphedzeni kupirira pinentso pinathimbana na imwe cincino, imwe munakwanisa kukhala na cinyindiro cakuti iye anakuphedzani toera kupirira pinentso pinafuna kuthimbana na imwe ntsogolo. Yezu aphedza anyakupfundzace toera aone kuti akhafunika kucitanji toera athimizire cikhulupiro cawo, mbwenye iye nee apenula kuti Yahova mbadaaphedza toera kupirira mayesero akhafuna kuthimbana na iwo ntsogolo. (Juwau 14:1; 16:33) Iye akhali na cinyindiro cakuti cikhulupiro cakuwanga mbicidaphedza mwinji ukulu wa anthu toera kupulumuka pa nyatwa ikulu. (Apok. 7:9, 14) Imwe munadzakhala pabodzi na anthu anewa mungacita pyonsene pinakwanisa imwe cincino toera kuwangisa cikhulupiro canu!​—Aheb. 10:39. w21.11 tsa. 25 ¶18-19

Ife nee tisadikhira kuti Yahova anatitsidzikiza mwacirengo. Mbwenye ife tisadziwa kuti ale ananyindira Yahova anadzatambira umaso wakukhonda mala, ngakhale afe cincino. Mwakukhonda dembuka, kunyindira kwathu Yahova kunadzayeserwa. Nsoka wa madzindza, Goge wa Magoge ungapomokera atumiki a Mulungu, panango tinanyerezera kuti iwo anatipha. Ife tisafunika kunyindira kuti Yahova anakwanisa kutipulumusa, mwandimomwene anatipulumusa. Kuna anthu, ife tinaoneka ninga mabira akuti nee ali na munthu toera kuatsidzikiza. (Ezek. 38:10-12) Ife nee tinakhala na pida pya nkhondo, pontho nee tinapfundziswa kumenya nkhondo. Iwo ananyerezera kuti pinakhala pyakukhonda nentsa kutikunda. Iwo nee asadziwa kuti aanju a Yahova ali dzololo toera kutitsidzikiza. Mbwenye ife tisadziwa pyenepi thangwi tiri na cikhulupiro. Mwandimomwene, iwo nee anabvesesa pinthu pinafuna kudzacitika. Thangwi iwo nee ali na cikhulupiro. Iwo anadzakhala akudzumatirwa kakamwe angaona aanju mbakamenya nkhondo toera kutitsidzikiza.​—Apok. 19:11, 14, 15. w22.01 tsa. 6 ¶12-13

Nakuti abale na alongo athu ndi akufunika kakamwe kuna Yahova, iwo ndi akufunikambo kakamwe kuna ife. Kusiyapo pyenepi, ife tisafunika kucita pyonsene pinakwanisa ife toera kuatsalakana mwadidi na kuatsidzikiza. Tingadzindikira kuti tatsukwalisa m’bale peno mulongo, ife tisafunika kupangiza citsalakano kuna iye, pontho tisafunika kucalira kumuona ninga munthu wakuti asaipirwa mwakucimbiza. Thangwi yanji anthu anango asaipirwa? Panango thangwi ya njira idakula iwo, abale na alongo anango asaona ninga akupwazika. Abale na alongo anango ndi apswa mu undimomwene, pontho nee asadziwa kuti asafunika kulekerera anango angaatsukwalisa. Mwakukhonda tsalakana khala tatsukwalisa anango peno tatsukwaliswa tisafunika kulekererana toera tikhale pa ntendere. Kusiyapo pyenepi, khala munthu ali na nsambo wakuipirwa mwakucimbiza asafunika kucita pyonsene pinakwanisa iye toera kucinja nsambo unoyu. Angacita pyenepi, pinam’phedza toera kukhala wakutsandzaya mbakhala pa ntendere na abale na alongo. w21.06 tsa. 21 ¶7

Yezu asabvesesa mabvero athu. Tingathimbana na nyatwa, ife tisakomerwa kucedza na xamwali wakuti asabvesesa mabvero athu, makamaka khala iye athimbanambo na nyatwa zibodzi zene. Yezu ndi ninga xamwali unoyu. Iye asadziwa kuti munthu asapibva tani angatsukwala mbafuna ciphedzo. Iye asabvesesa kufewa kwathu, pontho anacita pyonsene toera kutiphedza “pa ndzidzi wakuthema.” (Aheb. 4:15, 16) Yezu atawira ciphedzo ca anju m’bodzi mu ndzidzi ukhali iye m’munda wa Getsemani. Ife tisafunikambo kutawira ciphedzo ca Yahova cinatipasa iye kubulukira m’mabukhu, mavidhyu, nkhani, tingacedzerwa na nkulu wa mpingo peno Nkristu wakuti ali na uxamwali wakuwanga na Yahova. (Luka 22:39-44) Yahova anakupasani “ntendere wa Mulungu,” pontho anakupasani mphambvu. Tingacita phembero, ife tinatambira “ntendere wa Mulungu wakuti usapiringana kubvesesa konsene.”​—Afil. 4:6, 7. w22.01 tsa. 18-19 ¶17-19

Ndzidzi onsene Yahova asacita pinthu pyadidi. Mbwenye panango pinanentsa kunyindira anthu adakhazikisa iye toera kutsogolera atumiki ace. Panango tinapenula khala mwandimomwene anthu adakhazikisa Yahova mu gulu yace toera kutsogolera asatowezera pitsogolero pyace peno nkhabe. Natenepa, khala nee tisanyindira abale anewa, nee tinakwanisa kulonga kuti tisanyindira Yahova. Lero, Yahova asaphatisira “m’bandazi wakukhulupirika na wandzeru” toera kutsogolera khundu ya dziko yapantsi ya gulu yace. (Mat. 24:45) M’bandazi wakukhulupirika na wandzeru asatowezera citsandzo ca mathubo akutonga a mu ndzidzi wa apostolo. Iwo asatsalakana atumiki a Yahova pa dziko yonsene, pontho asapereka pitsogolero kuna akulu a mpingo. Buluka penepo, akulu a mpingo asaphatisira pitsogolero pyenepi mu mpingo. Ife tisapangiza kuti tisanyindira njira inacita Yahova pinthu tingabvera pitsogolero pinatambira ife kubulukira mu gulu yace na akulu a mpingo. w22.02 tsa. 4 ¶7-8

Ife tisatsandzaya kakamwe, pontho tisaona kuti ndi nkhombo kukhala Mboni za Yahova! Ife tisatsandzaya tingakwanisa kuphedza munthu wakuti ‘asafuna kutawira undimomwene unapasa umaso wakukhonda mala’ mbatoma kutumikira Yahova. (Mabasa 13:48) Ife tisakhala na mabvero mabodzi ene ninga a Yezu wakuti “akomerwa kakamwe” pidapangwa iye na anyakupfundzace pinthu pyadi­di pidagumanikana na iwo mu ndzidzi ukhamwaza iwo mphangwa. (Luka 10:1, 17, 21) Mpostolo Paulu acenjeza Timoti: “Cita mphole-mphole thangwi ya iwe, pontho thangwi ya cipfundziso cinapereka iwe.” Paulu athimiza: “Ungacita pyenepi, unadzapulumusa umaso wako na wa ale anakubvesera.” (1 Tim. 4:16) Natenepa, basa yathu yakumwaza mphangwa isapulumusa umaso. Ndzidzi onsene tisafunika kucita mphole-mphole thangwi ndife anthu a Umambo wa Mulungu. Ndzidzi onsene ife tisafunika kucita pinthu pyakuti pinapasa mbiri Yahova, pontho pyakuti pisapangiza kuti tisakhulupira mphangwa zadidi zinamwaza ife. (Afil. 1:27) Ife tinapangiza kuti ‘tisacita mphole-mphole thangwi ya cipfundziso cinapereka ife’ tingakhunganyika mwadidi, pontho tingaphemba ciphedzo ca Yahova mbatidzati kuenda kamwaza mphangwa. w21.10 tsa. 24 ¶1-2

“Uunthu upswa” ndi njira yakunyerezera na kucita pinthu ninga munapicitira Yahova. Munthu asabvala uunthu upswa angapangiza misapo ya nzimu wakucena wa Mulungu, mbatawirisa kuti nzimu unoyu utsogolere manyerezero ace, mabvero ace na pinthu pinacita iye. Mwacitsandzo, iye asafuna Yahova na mbumba yace. (Mat.22:36-39) Munthu anacita pyenepi asapitiriza kukhala wakutsandzaya mwakukhonda tsalakana nyatwa zinathimbana na iye. (Tiya. 1:2-4) Iye ndi munthu wakuti asawangisira toera kukhazikisa ntendere. (Mat. 5:9) Iye asatsalakana anango mwakukoma ntima na mwakupirira. (Akol. 3:13) Iye asakomerwa na pinthu pyadidi, pontho asapicita. (Luka 6:35) Pyonsene pinacita iye pisapangiza kuti cikhulupiro cace kuna Babace wakudzulu ndi cakuwanga. (Tiya. 2:18) Iye angasoswa asapitiriza kukhala wakukhurudzika, pontho asawangisira toera akhonde kugwa m’mayesero. (1 Akor. 9:25, 27; Tito 3:2) Toera tibvale uunthu upswa ife tisafunika kukulisa makhaliro onsene analongwa pa Agalata 5:22, 23 na analongwa m’makhundu anango a m’Bhibhlya. w22.03 tsa. 8-9 ¶3-4

Akulu a mpingo anakwanisa kutowezera Paulu, tayu basi ene pakumwaza mphangwa nyumba na nyumba, mbwenye asafunikambo kukhala akukhunganyika toera kumwaza mphangwa midzidzi yonsene. (Aef. 6:14, 15) Ninga Paulu, akulu a mpingo anakwanisambo kupfundzisa anango m’basa yakumwaza mphangwa, kuphatanizambo atumiki akutumikira. (1 Ped. 5:1, 2) Mbwenye akulu a mpingo nee asafunika kukhala akuphatika kakamwe na mabasa, mpaka kusowa ndzidzi toera kumwaza mphangwa. (Mat. 28:19, 20) Toera akwanise kuphatisira mwadidi ndzidzi wawo, midzidzi inango iwo asafunika kukhonda mabasa anango. Pakumala kunyerezera mwadidi na kucita phembero thangwi ya pyenepi, panango iwo anadzindikira kuti angatawira basa ineyi, nee anakwanisa kukhala na ndzidzi wakucita pinthu pinango pyakufunika kakamwe, ninga kulambira kwa banja, kukhala aphinga m’basa yakumwaza mphangwa na kupfundzisa anawo basa ineyi. Iwo asafunika kukhala na cinyindiro cakuti Yahova asabvesesa cifuno cawo cakukhala na maonero akulinganira mu pinthu pyonsene. w22.03 tsa. 27 ¶4, 7; tsa. 28 ¶8

Kodi imwe mukhagopa kukhala m’bodzi wa Mboni za Yahova? Panango imwe mukhaona kuti nee mbamudakwanisa kumwaza mphangwa nyumba na nyumba. Kusiyapo pyenepi, panango imwe mukhagopa kuti acibale anu peno axamwali anu mbadakutcingani. Khala imwe mukhali na mabvero ninga anewa, dziwani kuti nyakupfundza wanu wa Bhibhlya anakwanisambo kukhala na mabvero mabodzi ene. Yezu alonga kuti anthu anango mbadakhala na mabvero anewa akugopa. Mbwenye iye apanga anyakupfundzace kuti aleke kusiya kutumikira Yahova thangwi ya kugopa. (Mat. 10:16, 17, 27) Mwapang’ono-pang’ono phedzani nyakupfundza wanu wa Bhibhlya toera alonge kuna anango pinthu pinapfundza iye. Panango anyakupfundza a Yezu agopa mu ndzidzi udaatuma iye toera kamwaza mphangwa. Mbwenye Yezu aaphedza mukuapanga mbuto ikhafuna kamwaza iwo mphangwa na pinthu pikhafuna kulonga iwo. (Mat. 10:5-7) Munatowezerambo tani citsandzo ca Yezu? Phedzani nyakupfundza wanu toera adziwe kuti ndi ndzidzi upi wakuti anakwanisa kumwaza mphangwa. Mwacitsandzo, mbvundzeni khala asadziwa munthu wakuti asafuna kupfundza Bhibhlya. Buluka penepo mphedzeni toera akhunganyike pinthu pya m’Bhibhlya pisafunika iye kulonga kuna munthu unoyu. w21.06 tsa. 6-7 ¶15-16

“Mu mphindi zakucepa, maloja na nyumba zatoma kugwa.” “Anthu azinji akhagopa kakamwe . . . Anthu azinji alonga kuti pyenepi pyacitika mu mphindi ziwiri, mbwenye kuna ine pikhaoneka ninga pyacitika mu ndzidzi uzinji kakamwe.” Anewa ndi mafala a anthu adapulumuka pa citeketeke cidacitika mu caka 2015 ku Nepal. Mbwenye lero pana ntundu unango wa citeketeke cakuti cisacitika pa dziko yonsene yapantsi. Mprofeta Ageu alemba: “Thimize pang’ono ndinadzatekenyesa kudzulu na pantsi.” (Ajeu 2:6) Citeketeke cidalonga mprofeta Ageu nee ndi citeketeke candimomwene cakuti cisafudza pinthu. Mbwenye ico ndi citeketeke cakuti cisabweresa pinthu pyadidi. Thangwi Yahova alonga: “Ndinadzatekenyesa madzindza onsene, pontho pinthu pyakufunika kakamwe pya madzindza onsene pinadzapita n’nyumba ineyi; ine ndinadzadza nyumba ineyi na mbiri.” w21.09 tsa. 14 ¶1-3

Khala musafuna kucita uxamwali na munthu unango, imwe musafunika kucedza naye kazinji kene na kumpanga mabvero anu. Munjira ibodzi ene, tisafunikambo kucita pyenepi kuna Yahova. Tingalonga mabvero athu, manyerezero athu na pinthu pinadzudzumika na ife kuna Yahova, tinapangiza kuti tisanyindira Yahova, pontho tisadziwa kuti iye asatifuna. (Mas. 94:17-19; 1 Juwau 5:14, 15) Ife tisafunika kucedza na abale na alongo athu, thangwi iwo ndi muoni udabuluka kuna Yahova. (Tiya. 1:17) Babathu wakudzulu asapangiza kuti asafuna m’bodzi na m’bodzi wa ife mukutipasa abale na alongo akuti asapangiza ‘ufuni ndzidzi onsene.’ (Mis. 17:17) Mu tsamba idalemba mpostolo Paulu kuna Akolose, iye alonga pya Akristu anango akuti am’phedza, pontho alonga kuti Akristu anewa ‘am’balangaza kakamwe.’ (Akol. 4:10, 11) Ngakhale Kristu Yezu apereka takhuta kakamwe thangwi ya ciphedzo cidatambira iye kuna axamwali ace, akuti akhali aanju na anthu. (Luka 22:43) Tingalonga nyatwa zathu kuna xamwali wathu wakukola mwauzimu, nee pisabveka kuti tiri na cikhulupiro cakufewa. Mbwenye pyenepi pinakwanisa kutiphedza. w21.04 tsa. 24-25 ¶14-16

Ndiye tani khala m’bale peno mulongo akutsalakanani mwakuipa? Musafunika kuwangisira toera kukhazikisa ntendere. Citani phembero kuna Yahova toera kumpanga mabvero anu. Phembani Yahova toera aphedze m’bale peno mulongo unoyu adakutsalakanani mwakuipa, pontho toera akuphedzeni kuti mukwanise kuona makhaliro adidi a munthu unoyu akuti Yahova asakomerwa nawo. (Luka 6:28) Kusiyapo pyenepi, khala nee musakwanisa kulekerera m’bale peno mulongo unoyu, yeserani kucedza naye. Ndzidzi onsene ndi pyadidi kunyerezera kuti m’bale peno mulongo unoyu nee atitsukwalisa mwakufuna. (Mat. 5:23, 24) Mu ndzidzi unacedza imwe, calirani kumpasa mulando. Mphapo ndiye tani khala iye nee asafuna kukhazikisa ntendere? ‘Pitirizani kukhala wakupirira.’ (Akol. 3:13) Kusiyapo pyonsene, lekani kukoya pinthu muntima, thangwi pyenepi pinafudza uxamwali wanu na Yahova. Pontho lekani kutawira kugwegweduswa na anango. Mungacita pyenepi, imwe munapangiza pakweca kuti musafuna kakamwe Yahova kupiringana pyonsene.​—Mas. 119:165. w21.06 tsa. 23 ¶15