Misangani 4:1-27
4 Ananga, bveserani mungalangwa na pai wanu;+Bveserani mwadidi toera mukhale na luso yakubvesesa,
2 Thangwi ine ndinakupfundzisani pinthu pyadidi;Lekani kusiya pinakupfundzisani ine.*+
3 Ndikhali mwana wadidi kuna babanga,+Pontho ndikhali mwana wakufuniwa kakamwe na mai wanga.+
4 Iye akhandipfundzisa mbandipanga: “Koya mafala anga muntima mwako.+
Koya matongero anga mbupitiriza kukhala mʼmaso.+
5 Khala na udziwisi, khala na luso yakubvesesa.+
Leka kuduwala, pontho leka kukhonda kubvera mafala analonga ine.
6 Leka kusiya udziwisi, thangwi iwo unakutsidzikiza.
Funa udziwisi, thangwi iwo unakutsidzikiza.
7 Udziwisi ndi cinthu cakufunika kakamwe,+ natenepa khala na udziwisi,Mu pinthu pyonsene pinafuna kukhala na iwe, leka kupwaza luso yakubvesesa.+
8 Lemedza udziwisi, thangwi iwo unadzakukuza.+
Ungaukhumbatira, iwo unakulemedza.+
9 Udziwisi unadzaikha nkhata ya maluwa munsolo mwako;Unadzakubalikisa na nthimba yakubalika.”
10 Mwananga bvesera, mbubvera pinalonga ine,Iwe unadzakhala na umaso mu pyaka pizinji.+
11 Ndinakupfundzisa toera ufambe munjira yaudziwisi;+Ndinakutsogolera munjira zaulungami.+
12 Ungafamba, nkhabe cinthu cinafuna kupingiza miyendo yako;Ungathamanga nee unagwegweduka.
13 Tawira kulangwa, leka kukhonda.+
Kumbuka pidapfundza iwe, thangwi pinakuphedza toera kukhala na umaso.+
14 Leka kupita munjira ya anyakuipa,Pontho leka kufamba munjira ya anthu akuipa.+
15 Icalire, leka kupita na njira ineyi;+Leka kupita na njira ineyi, ndoko na njira inango.+
16 Thangwi iwo nkhabe kwanisa kugona angakhonda kucita pinthu pyakuipa.
Iwo nkhabe kuphatwa na citulo angakhonda kugwisa munthu.
17 Uipi ndi nkate unadya iwo,Uphanga ndi vinyu inamwa iwo.
18 Mbwenye njira ya anyakulungama ndi ninga kuyetimira kwa ceza ca dzuwa namacibeseCakuti cisapitiriza kuthimizirika mpaka namasikati.+
19 Njira ya anyakuipa ndi ninga cidima;Iwo nkhabe dziwa cinaagwegwedusa.
20 Mwananga, bvesera mwadidi mafala anga;Bvesera mwadidi pinalonga ine.
21 Mbaleke kubuluka pamaso pako;Akoye mwadidi muntima mwako,+
22 Thangwi iwo ndi umaso kuna ale anaagumana+Pontho manungo awo onsene anakhala na ungumi wadidi.
23 Kupiringana pinthu pyonsene pinatsidzikiza iwe, tsidzikiza ntima wako,+Thangwi umaso wako usanyindira ntima wako.
24 Leka kulonga mafala akuipa,+Mafala authambi asafunika kukhala kutali na iwe.
25 Maso ako asafunika kuyangʼana kutsogolo,Inde, yangʼana kutsogolo kwako.+
26 Sasanyira njira yako,*+Pontho njira zako zonsene zinakhala zakutsidzikizika.
27 Leka kupeukira kunkono wamadyo peno wabzwere.+
Thawisa miyendo yako ku pinthu pyakuipa.
