“Mabira” analongwa mu nsangani unagumanika pa Mateu 25:31-36 asaimirira anthu akulungama mu ntsiku zakumalisa akuti ali na cidikhiro cakukhala pa dziko yapantsi. Anthu anewa asacemerwambo mabira anango. Mwakukhulupirika, iwo asaphedzera anyakudzodzwa akuti asapitiriza pa dziko yapantsi m’basa yakumwaza mphangwa na kucita anyakupfundza pa dziko yonsene yapantsi. (Mat. 24:14; 28:19, 20) Pyaka pyonsene, masumana mangasi Cikumbuso mbicidzati kufika, mabira anango asapangiza kuti asaphedzera abale a Kristu thangwi ya kucita khundu ya kampanya ya dziko yonsene toera kucemera anthu kuti agumanike pa Cikumbuso. Pontho iwo asacita masasanyiro toera kukhala na pidzindikiro pyonsene pya Cikumbuso. Mabira anango asakhala akutsandzaya kakamwe thangwi yakuphedzera abale a Kristu munjira zenezi. Mabira anewa asadziwa kuti Yezu asaona pinacitira iwo abale ace ninga akucitira iye.​—Mat. 25:37-40. w22.01 tsa. 22 ¶11-12

Ife tinakwanisa kutowezera makhaliro a Yezu na njira ikhatsalakana iye  anthu. Mwacitsandzo, iye abvera ntsisi nyamatanya, nkazi wakuti akhali na utenda wakugoswa, pontho abvera ntsisi ale akuti akhaferwa na anyakufunika awo. Natenepa, tingatowezera Yezu ife tinakwanisambo kutowezera Yahova. (Marko 1:40, 41; 5:25-34; Juwau 11:33-35) Tingatowezera makhaliro a Yahova, uxamwali wathu unakhalambo wakuwanga kakamwe na iye. Tingatowezera manyalo a Yezu, pinatiphedza toera tikhonde kudzudzumiswa na pinthu pya dziko ino yakuipa. Namasiku a ntsiku yakumalisa ya umaso wace pa dziko yapantsi, Yezu alonga: “Ine ndakunda dziko.” (Juwau 16:33) Iye akhalonga kuti nee atawirisa kukhuiwa na manyerezero, pifuno na macitiro a anthu a dziko ino yakuipa. Yezu cipo aduwala thangwi idancitisa kubwera pa dziko yapantsi, yakuti ikhali kucenesa dzina ya Yahova. Mphapo ndiye tani ife? Mu dziko ino, muna pinthu pizinji pyakuti pinakwanisa kutidzudzumisa mbaticimwana kutumikira Yahova. Mbwenye tingaikha manyerezero athu m’basa ya Yahova ninga pidacita Yezu, tinakwanisambo “kukunda” dziko.​—1 Juwau 5:5. w21.04 tsa. 3-4 ¶7-8

Mpostolo Paulu akhadziwa pikiro idalonga Yezu kuti ‘munthu onsene anan’khulupira anagumana umaso wakukhonda mala.’ (Juwau 3:16; Aroma 6:23) Mwandimomwene, Paulu akhali m’bodzi mwa ale akhakhulupira ntsembe ya ciomboli. Iye akhali na cinyindiro consene cakuti Yahova ali dzololo toera kulekerera ngakhale ale adacita madawo makulu mbatcunyuka. (Mas. 86:5) Paulu akhakhulupirambo kuti iye akhafuniwa kakamwe na Mulungu thangwi iye akhadziwa kuti Mulungu atuma Yezu toera kufera anthu. Onani mafala akumalisa a Agalata 2:20. Paulu alonga: ‘Mwana wa Mulungu, andifuna mbaperekeka thangwi ya ine.’ Paulu nee akhanyerezera kuti iye akhali wakuipa kakamwe munjira yakuti nee mbadafuniwa na Mulungu. Iye nee anyerezera kuti: ‘Ndisaona kuti Yahova asafuna abale anga, mbwenye iye nee asandifunambo.’ M’mbuto mwace, Paulu akumbusa Akristu a ku Roma: “Kristu atifera mu ndzidzi ukhali ife anyakudawa.” (Aroma 5:8) Natenepa nkhabepo cinthu cinafuna kuticimwanisa toera kufuniwa na Yahova. Paulu akhadziwa kuti ufuni wa Mulungu ndi wakufunika kakamwe. Paulu akhadziwa kuti Yahova apirira kakamwe Aizraeli. w21.04 tsa. 22 ¶8-10

Mungacitisa pfundziro ya Bhibhlya, phedzani nyakupfundza wanu toera afune Yahova. Mphapo munacita tani pyenepi? Khalani na ndzidzi toera kuphedza nyakupfundza wanu kuti adziwe mwadidi makhaliro a Yahova. Kusiyapo pyenepi, phedzani nyakupfundza wanu toera abvesese kuti Yahova ndi Mulungu wakutsandzaya, pontho asaphedza ale ananfuna. (1 Tim. 1:11; Aheb. 11:6) Phedzani nyakupfundza wanu toera adziwe kuti angaphatisira pinthu pinapfundza iye, pinthu pinanfambira mwadidi. Pontho udidi unoyu unafuna kukhala na iye unapangiza kuti asafuniwa na Yahova. (Iza. 48:17, 18) Munjira inango, dziwani kuti nyakupfundza wanu angafuna kakamwe Yahova, pyenepi pinam’phedza toera acite macinjo akufunika mu umaso wace. Toera nyakupfundza wanu wa Bhibhlya athambaruke mpaka kubatizwa, iye asafunika kuwangisira kakamwe. Anyakupfundza anango asafunika kusiya pinthu pya mpfuma. Anyakupfundza anango azinji asasiya kucita uxamwali na anthu akuti nee asafuna Yahova. Anango asakhondiwa na acibale awo akuti nee asakomerwa na Mboni za Yahova. Yezu apikira kuti ale anantowera cipo anadzaphatiswa mwala. M’mbuto mwace, Yahova anadzaapasa nkhombo yakukhala na abale na alongo azinji pakati pa atumiki ace.​—Marko 10:29, 30. w21.06 tsa. 4-5 ¶8-9

Mpostolo Paulu alandanisa basa yakucita anyakupfundza na basa yakulima, toera kupangiza kuti tisafunika kucita pizinji kupiringana basi ene kubzwala mbeu. Na thangwi ineyi iye alonga kuna Akristu a ku Korinto kuti: “Ine ndabzwala mbeu, Apolo aithirira . . . Imwe ndimwe munda wa Mulungu wakuti ukulimwa na iye.” (1 Akor. 3:6-9) Ife tisaphata basa ‘m’munda wa Mulungu.’ Natenepa ife tisabzwala mbeu mu ndzidzi unamwaza ife mphangwa, pontho tisathirira mu ndzidzi unapfundzisa ife anthu. Mbwenye ife tisadziwa kuti ndi Mulungu anakulisa mbeu zinabzwala ife. Ife tiri na mwai ukulu kakamwe wakumwaza mphangwa na kupfundzisa anthu Bhibhlya. Basa ineyi isatitsandzayisa kakamwe. Mpostolo Paulu wakuti aphedza anthu azinji ku Tesalonika toera kukhala anyakupfundza alonga kuti: “Pa ndzidzi wakuonekera kwa Mbuya wathu Yezu, kodi mbani anafuna kudzakhala cidikhiro cathu, kukomerwa kwathu na nthimba ya kutsandzaya kwathu pamaso pace? Kodi simwe tayu? Mwandimomwene, imwe ndimwe mbiri yathu na kukomerwa kwathu.”​—1 Ates. 2:19, 20; Mabasa 17:1-4. w21.07 tsa. 3 ¶5; tsa. 7 ¶17

Yahova asacitisa m’bodzi na m’bodzi wa ife toera akhale na uxamwali na iye. (Juwau 6:44) Pyenepi ndi pyakudzumatirisa kakamwe. Mu ndzidzi unadinga Yahova mitima ya anthu azinji kakamwe pa dziko yapantsi, iye akwanisa kuona ntimanu kuti ndi wadidi, pontho munakwanisa kunfuna. (1 Kro. 28:9) Yahova asakudziwani, asadziwa mabvero anu, pontho asakufunani. Pyenepi ndi pyakuwangisa kakamwe. Yahova asakutsalakanani kakamwe, pontho iye asatsalakanambo abale na alongo anu onsene. Toera kutiphedza kubvesesa pyenepi, Yezu alandanisa Yahova na nkumbizi. Kodi nkumbizi anacitanji angaona kuti pa mabira 100 ibodzi yataika? Iye “anasiya mabira 99 m’mapiri mbaenda kasaka bira idatayika.” Nkumbizi angagumana bira ineyi nee anaipirwa thangwi yakutayika kwayo. M’mbuto mwace, iye anakomerwa kakamwe. Tisapfundzanji? Mabira onsene ndi akufunika kuna Yahova. Yezu alonga: “Babanga wakudzulu nkhabe funa kuti m’bodzi wa anthu awa akucepeseka wa atayike.”​—Mat. 18:12-14. w21.06 tsa. 20 ¶1-2

Tinganyerezera mwadidi pya ufuni wakukhonda mala wa Mulungu kuna ife, kufuna kwathu Yahova kusathimizirika, pontho uxamwali wathu na iye usakhala wakuwanga. (Aroma 8:38, 39) Tisawangiswa kutowezera citsandzo ca Yezu. (1 Ped. 2:21) Ntsiku zingasi Cikumbuso mbicidzati kufika, ife tisaleri m’Bhibhlya thangwi ya sumana yakumalisa ya Yezu pa dziko yapantsi, kufa kwace, na kulamuswa kwace muli akufa. Pontho ntsiku ya Cikumbuso namasiku, nkhani isatikumbusa ufuni wa Yezu kuna ife. (Aef. 5:2; 1 Juwau 3:16) Tingaleri pya citsandzo cidapangiza Yezu na kunyerezera mwadidi pyenepi, tisakhala na cifuno toera “kupitiriza kufamba ninga mudafambira iye.” (1 Juwau 2:6) Ife tisakhala dzololo toera kupitiriza kukhala axamwali a Yahova. (Yuda 20, 21) Ife tisapitiriza kukhala axamwali a Yahova tingacita pyonsene toera kumbvera, kucenesa dzina yace na kutsandzayisa ntima wace. (Mis. 27:11; Mat. 6:9; 1 Juwau 5:3) Kugumanika pa Cikumbuso kusatiphedza toera kucita pinthu ntsiku zonsene pinapangiza kuti ‘tisafuna kupitiriza kukhala axamwali a Yahova kwenda na kwenda!’ w22.01 tsa. 23 ¶17; tsa. 25 ¶18-19

Yahova atipasa ufulu wakusankhula. Natenepa ife tisakwanisa kusankhula pinthu pinafuna ife kucita mu umaso wathu. Mulungu wathu waufuni asakomerwa kakamwe ife tingasankhula kuntumikira. (Mas. 84:11; Mis. 27:11) Ife tinakwanisa kuphatisira ufulu wathu wakusankhula toera kucita pisankhulo pizinji pyadidi. Ife tinakwanisa kutowezera citsandzo ca Yezu tingaikha pifuno pya anthu anango pa mbuto yakutoma. Ntsiku inango, Yezu na apostolo ace akhadaneta kakamwe, natenepa iwo aenda ku mbuto inango toera apume. Mbwenye iwo nee akwanisa kupuma, thangwi anthu azinji aatowera, pontho anthu anewa akhafuna kakamwe kupfundziswa na Yezu. Mbwenye Yezu nee aipirwa. M’mbuto mwace, iye aabvera ntsisi, mbatoma “kuapfundzisa pinthu pizinji.” (Marko 6:30-34) Tingatowezera Yezu mukuphatisira ndzidzi na mphambvu zathu toera kuphedza anango, ife tinapasa mbiri Babathu wakudzulu.​—Mat. 5:14-16. w21.08 tsa. 3-5 ¶7-8

Yahova nee asafuna kuti pinthu pyonsene pikhale sawasawa. Ife tisadziwa pyenepi thangwi Yahova acita pinthu pya mitundu yakusiyana-siyana, ninga miti, pinyama, kuphatanizambo ife anthu. Anthu onsene ndi akusiyana. Na thangwi ineyi, Yahova cipo asakulandanisani na munthu unango. Iye asadinga ntima wanu, pontho asakudziwani mwadidi. (1 Sam. 16:7) Iye asadziwa pinthu pinakwanisa imwe kucita na pinacimwana imwe kucita, pontho iye asadziwa njira idakuzwa imwe. Iye nee asakuphembani kuti mucite pinthu pyakuti nee munakwanisa kupicita. Ife tisafunika kukhala na maonero mabodzi ene ninga ali na Yahova thangwi ya ife. Mungacita pyenepi, imwe munakwanisa kukhala “na manyerezero adidi,” mbamukhonda kunyerezera kuti ndimwe wakufunika kakamwe peno nee ndimwe wakufunika kakamwe. (Aroma 12:3) Ndimomwene kuti ife tinakwanisa kupfundza pizinji tingaona m’bale peno mulongo wakuti asakwanisa kucita pizinji m’basa yakumwaza mphangwa. (Aheb. 13:7) Panango tinakwanisa kuona njira yakuthimizira maluso athu m’basa yathu yakumwaza mphangwa. (Afil. 3:17) Mbwenye kutowezera makhaliro adidi a munthu ndi pyakusiyana na kulandanisika na munthu unoyu. w21.07 tsa. 20 ¶1-2

Imwe munakwanisa kukulisa cikhulupiro canu kuna Mulungu mungadinga pinyama, miti na nyenyezi. (Mas. 19:⁠1) Mungapfundza mwadidi pinthu pyenepi, imwe munakwanisa kukhala na cinyindiro cakuti Yahova ndi Nciti wathu. Mu ndzidzi unapfundza imwe pinthu pidacita Mulungu, onani mwadidi kuti pinthu pyenepi pisapangiza tani makhaliro a Mulungu. (Aroma 1:20) Mwacitsandzo, imwe musadziwa kuti dzuwa isapisa mbibulusa ceza toera kuphedza pinthu pya umaso pa dziko yapantsi. Iyo isabulusambo mphambvu inango yakuphekesa. Mbwenye ife nee tisaphekeswa na mphambvu ineyi ya dzuwa. Thangwi yanji? Thangwi kudzuludzulu kwa dziko yapantsi kuli na muya wakuti usathowesa mphambvu ineyi ya dzuwa. Mu ndzidzi unathimizirika mphambvu ineyi ya dzuwa, muya wakudzuludzulu usathimizirikambo. Natenepa, kodi imwe nee musatawira kuti pinthu pyonsene pyacitwa na Mulungu, pontho iye ndi waufuni na waudziwisi? w21.08 tsa. 17 ¶9-10

Munthu angamala kubatizwa tisafunika kupitiriza kunfuna na kumulemedza. (1 Juwau 4:20) Mphapo tinacita tani pyenepi? Njira ibodzi yakucita pyenepi ndi kunsimba thangwi ya cisankhulo cidacita iye. Mbwenye iye angacita cinthu cakuti nee tacibvesesa mwadidi, nee tisafunika kumpenula. M’mbuto mwace, ife tisafunika kumulemedza mbatimuona ninga nkulu kupiringana ife. (Aroma 12:10; Afil. 2:3) Natenepa, ife tisafunika kukhala antsisi na akukoma ntima kuna anthu onsene. Khala ife tisafuna kucita khundu ya atumiki a Yahova kwenda na kwenda, tisafunika kuphatisira pinalonga Bhibhlya mu umaso wathu. Mwacitsandzo, Yezu alonga kuti tisafunika kukhala antsisi na akukoma ntima kuna anthu onsene, kuphatanizambo anyamalwa athu. (Luka 6:32-36) Midzidzi inango, panango pyenepi pinakhala pyakunentsa kuna ife toera kupicita. Khala ndi tenepo, ife tisafunika kupfundza kunyerezera na kucita pinthu ninga Yezu. Tingawangisira toera kubvera Yahova na kutowezera Yezu, tinapangiza kuna Babathu wakudzulu kuti tisafuna kucita khundu ya atumiki ace kwenda na kwenda. w21.08 tsa. 6 ¶14-15

Nyindirani Yahova. Iye apikira kuti anatipasa nkhombo zizinji tingan’nyindira mbatiwangisira toera kucita basa yace. M’bhibhlya muli na pitsandzo pizinji pya anthu akuti acita pinthu pizinji m’basa ya Yahova. Toera apaswe nkhombo, kazinji kene iwo akhafunika kupangiza kuti asanyindira Yahova. Mwacitsandzo, Abhrahamu apaswa nkhombo na Yahova pidamala iye kufuluka mu dziko yace mbaenda, ‘maseze nee akhadziwako kukhaenda iye.’ (Aheb. 11:8) Kusiyapo pyenepi, Yakobe apaswa nkhombo pidamala iye kuthimbana na anju. (Gen. 32:24-30) Pontho mu ndzidzi ukhali Aizraeli cifupi toera kupita mu Dziko Yakupikirwa, iwo akwanisa kuwambuka Nkulo wa Yordani mu ndzidzi udaponda anyantsembe madzi a mu nkulo unoyu. (Yos. 3:14-16) Imwe munakwanisambo kupfundza kubulukira mu pitsandzo pya abale na alongo azinji a ntsiku zino akuti akwanisa kuthimizira utumiki wawo thangwi ya kunyindira Yahova. w21.08 tsa. 29-30 ¶12-14

Imwe abale na alongo akukalamba, musadziwa njira ikhacitwa pinthu kale, mbwenye mwaona kufunika kwa kucita macinjo thangwi ya makhaliro acincino. Imwe abale na alongo akukalamba akuti mwabatizwa cincino. Aphale na atsikana anakomerwa kakamwe na kubva pinthu pidakucitikirani na pidapfundza imwe. Natenepa ‘mungapitiriza’ kupfundzisa anango pinthu pyenepi, Yahova anakupasani nkhombo kakamwe. (Luka 6:38) Abale na alongo akukalamba angacita uxamwali na aphale na atsikana, iwo anakwanisa kuphedzana unango na ndzace. (Aroma 1:12) Thangwi onsene ali na pinthu pyakufunika kakamwe. Abale na alongo akukalamba ali na udziwisi na maluso. Aphale na atsikana ali na mphambvu. Aphale na atsikana angaphata basa pabodzi na abale na alongo akukalamba ninga axamwali, anapasa mbiri Babathu wakudzulu, pontho pyenepi pinabweresa nkhombo kuna onsene mu mpingo. w21.09 tsa. 8 ¶3; tsa. 13 ¶17-18

Thangwi yanji Ayuda azinji asiya kukhulupira Yezu na njira idafa iye? Kuna iwo Yezu afa ninga nyakudawa, na thangwi ineyi iwo akhonda kunkhulupira ninga Mesiya. (Dheu. 21:22, 23) Ayuda azinji adakhonda kukhulupira Yezu acimwana kudzindikira kuti iye nee akhadadawa, mbwenye akhadacita kupambizirwa, pontho akhatsalakanwa mwakusowa ulungami. Pontho ale akhatonga Yezu nee aphatisira ulungami. Anyakutonga miseru Aciyuda agumanyikana mwakucimbiza toera kutonga Yezu, mbwenye iwo nee atowezera ntemo. (Luka 22:54; Juwau 18:24) M’mbuto mwakubvesera mwadidi mathangwi adacitisa Yezu kumangwa, iwo “akhasaka umboni wauthambi toera kupha Yezu.” (Mat. 26:59; Marko 14:55-64) Pidalamuswa Yezu muli akufa, anyakutonga miseru anewa akusowa ulungami alipa anyankhondo Aciroma akhaonera nthumbi na “kobiri zizinji za parata” toera akhonde kulonga undimomwene wakuti Yezu alamuswa muli akufa.​—Mat. 28:11-15. w21.05 tsa. 11-12 ¶12-13

Yahova mbadakwanisa kufudza kalene dziko ino yakuipa. Mbwenye kupirira kwace kusatiphedza kakamwe! Anthu onsene a dzindza ya Adhamu na Eva asabalwa na madawo. Ngakhale tenepo, Yahova asaafuna, pontho asaatsalakana, kusiyapo pyenepi aapikira kuti anadzamalisa uipi onsene unacitika lero. (1 Juwau 4:19) Iye akhazikisa ndzidzi wakuti anadzamalisa nyatwa zonsene zinathimbana na anthu. Ufuni wa Yahova usatikulumiza toera tipitirize kupirira mpaka pa ndzidzi unoyu. Yahova asapirira kakamwe. Yezu atowezerambo kupirira kwa Babace. Mwacitsandzo, pikhali iye pa dziko yapantsi, Yezu apirira kutikanwa, kupaswa manyadzo na kuthabuswa pamuti udakhomerwa iye thangwi ya ife. (Aheb. 12:2, 3) Mwakukhonda penula, kupirira kwa Yahova kwapasa mphambvu Yezu toera akwanisembo kupirira. Munjira ibodzi ene, kupirira kwa Yahova kunatipasambo mphambvu toera tikwanise kupirira. w21.07 tsa. 12-13 ¶15-17

Ntsiku zonsene, Babathu wakudzulu asatibvera ntsisi na kutilekerera. (Mas. 103:10-14) Anyakupfundza a Yezu akhali akusowa ungwiro, na thangwi ineyi, iye akhaabvera ntsisi na kualekerera. Kusiyapo pyenepi, Yezu apereka umaso wace ninga ntsembe toera tilekererwe madawo athu. (1 Juwau 2:1, 2) Tingalekererana unango na ndzace, ufuni wathu kuna abale na alongo usathimizirika. (Aef. 4:32) Mwandimomwene, midzidzi inango pisakhala pyakunentsa kulekerera anango, na thangwi ineyi tisafunika kuwangisira toera kucita pyenepi. Mulongo unango aphindula kakamwe pidaleri iye nsolo wa A Sentinela wakuti “Perdoem uns aos outros liberalmente.” Iye alemba: “Nsolo unoyu wafokotoza kuti kulekerera anango nee pisabveka kuti pyakuipa pidacita iwo ndi pyadidi peno ndi pyakukhonda kutsukwalisa. Mbwenye pisabveka kukhonda kukoya muntima pinthu pyakuipa pidacita iwo na kupitiriza kukhala antendere.” Natenepa, ife tingalekerera na ntima onsene abale na alongo athu, tinapangiza kuti tisaafuna, pontho tisatowezera Babathu, Yahova. w21.09 tsa. 23-24 ¶15-16

Yezu akhafuna undimomwene unalonga pya Mulungu na cifuniro cace. Umaso wa Yezu pa dziko yapantsi ukhapangiza kuti iye akhadziwa undimomwene, pontho aphedzambo anango toera kudziwa undimomwene unoyu. (Juwau 18:37) Atowereri andimomwene a Yezu akhafunambo kakamwe undimomwene. (Juwau 4:23) Mpostolo Pedhru alonga kuti cikhulupiro ca Akristu ndi “njira ya undimomwene.” (2 Ped. 2:2) Thangwi yakufuna kakamwe undimomwene, Akristu a mu ndzidzi wa apostolo nee akhatawira maonero a mauphemberi, misambo yawo na pinthu pinango pyakuti nee pikhabverana na undimomwene. (Akol. 2:8) Munjira ibodzi ene lero, Akristu andimomwene asawangisira kakamwe toera “kufamba mu undimomwene,” pontho pinthu pyonsene pinacita iwo na pinakhulupira iwo pisabverana na Mafala a Yahova. (3 Juwau 3, 4) Mboni za Yahova nee zisalonga kuti ndzidzi onsene zisabvesesa pinthu pyonsene pinalongwa m’Bhibhlya. Midzidzi inango, iwo asadodomeka njira inafokotoza iwo pipfundziso pya m’Bhibhlya na njira inasasanyira iwo pinthu mu mpingo. Natenepa, angabvesesa mwadidi cinthu, iwo asacita masasanyiro anafunika. w21.10 tsa. 22 ¶11-12

Ninga mipanda ya mizinda ya ndzidzi wakale yakuti ikhatsidzikiza anthu akuti akhagumanika nkati mwa mizinda ineyi, ufuni wakukhonda mala wa Yahova usatitsidzikiza mwauzimu ku pinthu pyakugoswa pyakuti mbapidayesera kukhulupirika kwathu. Kusiyapo pyenepi, ufuni wakukhonda mala wa Yahova usaticitisa kukhala cifupi na iye. (Yer. 31:3) Nyamasalmo Dhavidhi aphatisira citsandzo cinango toera kupangiza kuti Mulungu asatsidzikiza tani atumiki ace. Iye alemba: ‘Mulungu ndi mbuto yanga yakuthawira yakutsidzikizika, Mulungu wakuti asapangiza ufuni wakukhonda mala kuna ine.’ Kusiyapo pyenepi, Dhavidhi athimiza: ‘Iye ndi citsidzikizo canga, pontho asapangiza ufuni wace wakukhonda mala kuna ine, iye ndi mbuto yanga yakuthawira yakutsidzikizika na mpulumusi wanga, iye ndi xango yanga, pontho ine ndisathawira kuna Iye.’ (Mas. 59:17; 144:2) Thangwi yanji Dhavidhi alandanisa ufuni wakukhonda mala wa Yahova na pakuthawira pathu, pontho na mbuto yakuthawira yakutsidzikizika? Mwakukhonda tsalakana mbuto inakhala ife, tingapitiriza kukhala atumiki ace, Yahova anadzatipasa citsidzikizo cinafunika ife toera kutsidzikiza uxamwali wathu wakufunika kakamwe na iye. w21.11 tsa. 6 ¶14-15

Mu ndzidzi ukhacita Yezu ulendo pabodzi na anyakupfundzace m’mwadiya, catoma condzi cikulu m’bara. Pontho Yezu aphatisira condzi ceneci toera kuphedza anyakupfundzace kubvesesa kuti iwo akhafunika kukhala na cikhulupiro cakuwanga. (Mat. 8:23-26) Mu ndzidzi ukhacitika condzi, pontho mu ndzidzi ukhamenywa mwadiya na mabimbi, Yezu akhagona. Mu ndzidzi udalamuswa Yezu na anyakupfundzace akuti akhagopa kakamwe mbam’phemba toera aapulumuse, iye aabvundza: “Thangwi yanji musagopa kakamwe, imwe anthu a cikhulupiro cakucepa?” Kodi imwe muli kuthimbana na nyatwa yakulandana na condzi? Panango imwe mwagwerwa na cidengwa cacibaliro. Panango imwe muli kuthimbana na utenda wakuti usakucitisani kukhala wakutsukwala kakamwe mbamusowa cidikhiro. Midzidzi inango panango imwe munadzudzumika kakamwe, mbwenye lekani kutawirisa kuti kudzudzumika kweneko kukucitiseni kusiya kunyindira Yahova. Khalani  cifupi na iye mukucita phembero yakubulukira muntima. Wangisani cikhulupiro canu mukunyerezera midzidzi idakuphedzani Yahova nduli. (Mas. 77:11) Pontho khalani na cinyindiro cakuti iye cipo anakusiyani. w21.11 tsa. 22-23 ¶7, 10

Panango munthu unango ananyerezera kuti angakhonda kukwata cinthu ca mwanaciro, iye ali kubvera ntemo unoyu. Mbwenye panango iye asaba munjira zinango. Mwacitsandzo, nyamalonda angaphatisira cakupima naco cakuti nee ndi cadidi mbanyengeza anango, iye ali kuabera. Bukhu ya Levitiko 19:​13 isalandanisa kuba na kucita malonda mwakusowa ulungami. Thangwi iyo isalonga: “Leka kuponderera ndzako.” Natenepa, munthu anadyera ndzace nkopekope pakucita malonda ali kuba. Matongero acisere asalonga kuti kuba ndi kwakuipa. Mbwenye mphangwa zinagumanika m’bukhu ya Levitiko zisatiphedza kubvesesa kufunika kwa kucita pinthu pyonsene mwakukhulupirika. Ndi pyadidi kakamwe kuna ife kunyerezera kuti Yahova asaona tani kucita pinthu mwakukhonda kukhulupirika na kuba. Natenepa tisafunika kubvundzika: ‘Mwakubverana na mphangwa zinagumanika pa Levitiko 19:11-13, kodi pana cinthu cakuti ndisafunika kucisasanyira mu umaso wanga peno mu ndzidzi unacita ine malonda?’ w21.12 tsa. 9-10 ¶6-8

Ntsiku zonsene mungacita phembero panu mwekha, pangani Yahova pinthu pyakuipa pidacita imwe pa ntsiku ineyi, pontho mphembeni toera akulekerereni. Mbwenye khala mwacita madawo makulu, imwe musafunikambo kusaka ciphedzo kuna akulu a mpingo. Iwo anakubveserani, pontho anakupasani uphungu mwaufuni mukuphatisira Bhibhlya. Iwo anacita phembero pabodzi pene na imwe, mbaphemba Yahova toera apitirize kuphatisira ntsembe ya Yezu Kristu “toera mukwanise kuwangiswa mwauzimu.” (Tiya. 5:14-16) Pontho pinakhala mwadidi kakamwe munganyerezera mwacidikhodikho thangwi ya ciomboli. Panango imwe munatsukwala kakamwe munganyerezera munjira idathabuswa Mwana wa Mulungu. Mbwenye munganyerezera mwacidikhodikho thangwi ya ntsembe ya Yezu, imwe munanfuna kakamwe kuphatanizambo Babace. Pyaka pyonsene ife tisapangiza kupereka takhuta kakamwe thangwi ya ciomboli tingagumanika pa Cikumbuso ca kufa kwa Yezu na kucemera anango toera agumanikembo pa cikumbuso ceneci. Yahova atipasa mwai ukulu kakamwe wakupfundzisa anango thangwi ya Mwanace. w21.04 tsa. 18-19 ¶13-16

Nyerezerani pidacita Yezu mu ndzidzi udantowera anthu paphiri. Yezu akhadamala masiku amumphu mbakacita phembero. Panango iye akhadaneta kakamwe. Mbwenye pidaona iye mwinji wa anthu, aabvera ntsisi thangwi anango mwa iwo akhali akutcerenga, pontho anango akhabva kupha. Iye aawangisa, mbaacitira nkhani yakuwangisa kakamwe kupiringana zonsene, yakuti yadzadziwika ninga Nkhani ya Paphiri. (Luka 6:12-20) Yezu akhaphatisirambo ndzidzi wace toera kuphedza anango. Nyerezerani kuti Yezu apibva tani pidadziwa iye kuti xamwali wace Juwau M’batizi aphiwa. Bhibhlya isalonga: “Pidabva iye [thangwi yakufa kwa Juwau], Yezu abuluka penepo na mwadiya mbaenda ku mbuto yakutali na anthu toera akhale ekhene.” (Mat. 14:10-13) Mbwenye mwinji wa anthu wafika pa mbuto ineyi Yezu mbadzati kufika. (Marko 6:31-33) Yezu adzindikira kuti iwo akhafuna ciphedzo na cibalangazo, natenepa iye aaphedza mwakucimbiza.​—Luka 9:10, 11. w22.02 tsa. 21 ¶4, 6

Tinacitanji tingadzindikira kuti tatsukwalisa m’bale peno mulongo? Ife tisafunika kucita phembero yakudembetera kuna Yahova toera atiphedze. Pontho tisafunika kuphemba Yahova toera atiphedze kukhazikisa ntendere na m’bale peno mulongo wathu. Ife tisafunika kusaka ndzidzi toera kudinga makhaliro athu. M’bodzi na m’bodzi asafunika kubvundzika: ‘Kodi ine ndingadawa ndisatawira kuti ndadawa, mbandiphemba kulekererwa mwakucepeseka toera kukhazikisa ntendere? Yahova na Yezu anapibva tani ndingatoma ndine kuenda kakhazikisa ntendere na m’bale peno mulongo adandidawira?’ Mitawiro yathu ku mibvundzo ineyi inaticitisa kubvera Yezu mbatienda mwakucepeseka kakhazikisa ntendere na m’bale peno mulongo adatidawira. Tingaenda kakhazikisa ntendere na m’bale peno mulongo, ife tisafunika kukhala akucepeseka. (Aef. 4:2, 3) Tisafunika kucedza naye na cifuno cakuwangisa pontho uxamwali wathu na iye. Kumbukani kuti kukhazikisa ntendere na m’bale peno mulongo ndi kwakufunika kakamwe kupiringana kudziwa kuti mbani adadawira ndzace.​—1 Akor. 6:7. w21.12 tsa. 25-27 ¶13-16

Yezu atsukwala thangwi akhadziwa kuti Ayuda azinji nee mbadatawira mphangwa za Umambo. Na thangwi ineyi Yerusalemu mbadafudzwa, pontho Ayuda azinji akuti mbadapulumuka mbadaendeswa ku ubitcu. (Luka 21:20-24) Mwakutsukwalisa, ninga pikhadalonga Yezu, anthu azinji ankhonda. Kodi anthu azinji asabvesera mphangwa za Umambo mu cisa cinakhala imwe? Khala ndi anthu akucepa anatawira undimomwene unapfundzisa imwe, munapfundzanji na kulira kwa Yezu thangwi ya anthu akhamwazira iye mphangwa? Yahova asatsalakana anthu. Kulira kwa Yezu kusatikumbusa kuti Yahova asatsalakana kakamwe anthu. “Iye nee asafuna kuti munthu afudzwe, mbwenye asafuna kuti anthu onsene atcunyuke.” (2 Ped. 3:9) Lero tisapangiza kuti tisafuna anthu anamwazira ife mphangwa mu ndzidzi unawangisira ife toera kuaphedza kuti adziwe mphangwa zadidi za Umambo.​—Mat. 22:39. w22.01 tsa. 16 ¶10-12

Cikhulupiro canu cinakhala cakuwanga munganyerezera mwadidi pinthu pidacita Yahova kuna atumiki ace na pinthu pidakucitirani iye. Pyenepi mphyakufunika kakamwe, thangwi ufuni wanu kuna Yahova unakula. Mwakupiringana makhaliro anango onsene, ufuni unakuphedzani toera kubvera Yahova, kuwangisira toera kunkomeresa na kupirira mayesero. (Mat. 22:37-39; 1 Akor. 13:4, 7; 1 Juwau. 5:3) Kufuna kwathu Yahova na kukhala na uxamwali wakuwanga na iye, ndi pyakufunika kakamwe kuna ife kupiringana pinthu pinango pyonsene! (Mas. 63:1-7) Kumbukani kuti kucita phembero, kupfundza Bhibhlya na kunyerezera mwadidi pinapfundza imwe pisacita khundu ya kulambira kwathu. Ninga Yezu, sakani mbuto yakusowa dzumbi toera kucedza na Yahova. Calirani pinthu pyakuti pisakudzudzumisani. Phembani Yahova kuti akuphedzeni toera mukhonde kudzudzumika mu ndzidzi unagumanika imwe pa misonkhano, unacita imwe phembero peno unapfundza imwe Bhibhlya. Mungawangisira toera kuphatisira mwadidi kakamwe ndzidzi wanu cincino, Yahova anakupasani nkhombo, pontho munadzakhala na umaso wakukhonda mala mu dziko ipswa ya Mulungu.​—Marko 4:24. w22.01 tsa. 31 ¶18-20

Manyerezero athu asakhuya pinthu pinacita ife. Na thangwi ineyi, Yezu atipfundzisa toera kucalira manyerezero akuti anaticitisa kudawa. (Mat. 5:21, 22, 28, 29) Mwandimomwene, ife tisafuna kukomeresa Babathu wakudzulu. Na thangwi ineyi, tisafunika kucalira manyerezero akuipa. Yezu alonga: “Pinthu pyonsene pinabuluka pamulomo wa munthu, pisabulukira muntima mwace.” (Mat. 15:​18) Mwandimomwene mafala athu asapangiza pinthu piri muntima mwathu. Natenepa, bvundzikani: ‘Ndisacalira kulonga uthambi ngakhale kuti kulonga undimomwene kunandibweresera nyatwa? Khala ndine mamuna peno nkazi wakumanga banja, ndisacita mphole-mphole toera ndikhonde pfinyira diso munthu wakuti nee ndi ndzanga wa m’banja? Ndisacalira kulonga mafala aulukwali? Ndisalonga mwakukhurudzika munthu anganditsukwalisa?’ Kunyerezera mwadidi thangwi ya mibvundzo ineyi, kunakuphedzani kakamwe. Mungawangisira toera kusiya kulonga mafala akusowa cilemedzo, authambi na aulukwali, pinakhala pyakukhonda nentsa toera kudula uunthu wakale. w22.03 tsa. 5 ¶12-14

Anthu anaphemba anango toera kuapasa uphungu kazinji kene asacita pisankhulo pyadidi kupiringana ale akuti nee asasaka uphungu. Natenepa, khalani na nsambo wakuphemba uphungu. Ndi mu ndzidzi upi wakuti tisafunika kuphemba uphungu kuna abale na alongo athu? Onani pitsandzo pingasi. (1) Mulongo m’bodzi asaphemba m’mwazi mphangwa wa maluso toera aende naye pabodzi ku pfundziro yace. Buluka penepo asam’phemba uphungu toera kudziwa kuti asafunika kucitanji toera kukhala mpfundzisi wadidi. (2) Mulongo wakuti nee amanga banja asafuna kugula nguwo. Natenepa asaphemba mulongo wakuti ali na uxamwali wakuwanga na Yahova toera kupereka maonero ace thangwi ya nguwo zinafuna iye kusankhula. (3) M’bale m’bodzi aphembwa toera kucita nkhani yapakweca paulendo wace wakutoma. Iye asaphemba m’bale wakuti ali na maluso akucita nkhani kuti am’bvesere mu ndzidzi unayesera iye nkhani yace, buluka penepo ampange makhundu anafunika iye kusasanyira. Ngakhale kuti m’bale asacita nkhani mu pyaka pizinji anakwanisa kuphemba uphungu kuna m’bale wakuti ali na maluso akucita nkhani, buluka penepo mbaphatisira uphungu udapaswa iye.​—Mis. 19:20. w22.02 tsa. 13 ¶15-17

Yahova asatifuna, pontho asatitsalakana ninga pidacita iye na Yezu mu ndzidzi ukhali iye pa dziko yapantsi. (Juwau 5:20) Mwacitsandzo, iye aphedza Yezu toera apitirize kukhala na cikhulupiro cakuwanga, amuwangisa mu ndzidzi ukhali iye wakutsukwala, pontho ampasa pinthu pyakufunika mu umaso wace. Kusiyapo pyenepi, Yahova apanga Mwanace kuti iye asanfuna, pontho asakomerwa naye kakamwe. (Mat. 3:16, 17) Yezu nee akhapibva kuti akhali ekhene thangwi iye akhadziwa kuti Babace waufuni ndzidzi onsene akhali na iye, pontho akham’phedza. Ninga Yezu, tonsene tisakwanisa kuona kuti Yahova asapangiza ufuni kuna ife munjira zizinji. Mwacitsandzo, Yahova atitawirisa toera tikhale axamwali ace. Kusiyapo pyenepi, iye atipasa abale na alongo aufuni akuti asatiphedza toera tikhale akutsandzaya, pontho asatiwangisa tingatsukwala. (Juwau 6:44) Yahova asatipasambo pinthu pyonsene pinafuna ife toera tipitirize kukhala na cikhulupiro cakuwanga. Pontho iye asatiphedza toera tigumane pinthu pyakufunika mu umaso wathu. (Mat. 6:31, 32) Tinganyerezera pinthu pyenepi pyonsene pinatipasa Yahova, ufuni wathu kuna iye usathimizirika. w21.09 tsa. 22 ¶8-9

Umaso wanu ukhali tani mbamudzati kutoma kupfundza Bhibhlya na Mboni za Yahova? Azinji a ife nee asakomerwa na kunyerezera thangwi ya pyenepi. Panango tikhatowezera makhaliro na manyerezero a anthu anango a dziko peno pinthu pinanyerezera iwo kuti ndi pyadidi na pyakuipa. Khala ndi tenepo, ife ‘nee tikhali na cidikhiro, pontho nee tikhali na Mulungu pa dziko.’ (Aef. 2:12) Mbwenye pidatoma imwe kupfundza Bhibhlya, mwadzindikira kuti muli na Baba wakudzulu wakuti asakufunani kakamwe. Mwapfundza kuti khala musafuna kukomeresa Yahova na kucita khundu ya atumiki ace, imwe mukhafunika kucinja makhaliro anu, umaso wanu na manyerezero anu. Pontho mwapfundza kuti mukhafunika kubvera mitemo ya Yahova na kucalira kucita pinthu pyakuti iye nee asakomerwa napyo. (Aef. 5:3-5) Nciti wathu na Babathu wakudzulu, Yahova, athema kulonga pinthu pyakuti atumiki ace asafunika kupicita. Kusiyapo pyenepi, iye asafuna kuti mbatidzati kubatizwa tiwangisire toera ‘tidule uunthu wathu wakale na macitiro ace’. w22.03 tsa. 2 ¶1-3

Mabira anango asakhalambo akutsandzaya angagumanika pa Cikumbuso. Pontho asakomerwambo na cidikhiro cawo. Iwo asabvesera nkhani ya Cikumbuso, inalonga pinafuna kucita Kristu na anthu akukwana 144.000 kuna ale akuti ndi akukhulupirika mu Pyaka 1000 pya Utongi wa Umambo. Nkati mwa utongi wa Mambo Yezu Kristu, ale anafuna kutonga pabodzi na Yezu anadzaphedza kuti dziko yapantsi ikhale paraizu, pontho anadzaphedza anthu toera akhale aungwiro. Mphyakutsandzayisa kakamwe kuna anthu azinji anagumanika pa Cikumbuso, kunyerezera kukwanirisika kwa maprofesiya a Bhibhlya, ninga analongwa pa Izaiya 35:5, 6; 65:21-23; na Apokalipse 21:3, 4. Thangwi yakunyerezera kwawo mbali mu dziko ipswa pabodzi na anyakufunika awo, cidikhiro cawo cisawanga, pontho asakhala dzololo toera kupitiriza kutumikira Yahova.​—Mat. 24:13; Agal. 6:9. w22.01 tsa. 21 ¶5-7

Kodi ciomboli ninji? Ndi ntengo udalipa Yezu toera kugula pinthu pidaluza Adhamu. (1 Akor. 15:22) Thangwi yanji ndi cakufunika kuna ife? Thangwi n’dida wakulungama wa Yahova unagumanika mu Mwambo ukhaphemba kuti umaso ulipwe na umaso. (Eks. 21:23, 24) Adhamu aluza umaso wace waungwiro. Toera kupangiza ulungami wa Mulungu, Yezu apereka umaso wace waungwiro. (Aroma 5:17) Na thangwi ineyi, iye adzakhala “Baba Wakwenda na Kwenda” kuna ale onsene anakhulupira ciomboli. (Iza. 9:6; Aroma 3:23, 24) Yezu akhali dzololo toera kupereka umaso wace thangwi akhafuna kakamwe Babace wakudzulu pabodzi na ife. (Juwau 14:31; 15:13) Thangwi ya ufuni unoyu, iye akhali wakutonga toera kupitiriza kukhala wakukhulupirika mpaka kufa mbakwanirisa cifuno ca Babace. Thangwi ya pinthu pyenepi pidacita Yezu, cifuniro ca Yahova kuna anthu na dziko yapantsi cinadzakwanirisika. w21.04 tsa. 14 ¶2-3