Misangani 19:1-29
19 Mphyadidi kukhala ntcerengi mbufamba mwakukhulupirika,+Kupiringana kukhala dzemwa mbulonga uthambi.+
2 Munthu wakusowa cidziwiso si wadidi tayu,+Pontho munthu anacita pinthu mwakukhonda kunyerezera asadawa.
3 Udzemwa wa munthu usamuendesa munjira yakuipa,Mbwenye ntima wace usaipirwa na Yahova.
4 Munthu wakupfuma asakhala na axamwali azinji,Mbwenye ntcerengi asathawiwa ngakhale na xamwali wace ene.+
5 Mboni wauthambi nee anasiyiwa tenepo mbakhonda kutcunyuswa,+Pontho ule analonga uthambi ndzidzi onsene nee anadzapulumuka.+
6 Azinji asasaka kukhala akutawirika kuna atsogoleri,*Onsene ndi axamwali a munthu anapereka miyoni.
7 Khala ntcerengi asaidiwa+ na abale ace onsene;Ndiye tani axamwali ace,+ iwo anancalira na kutali kakamwe!
Iye asaenda nduli mwawo toera kuphemba ciphedzo, mbwenye nkhabe anantawira.
8 Munthu anagumana ndzeru asafunika ekhene.*+
Ule anakoya luso yakudzindikira, pinthu pinanfambira mwadidi.+
9 Mboni wauthambi nee anasiyiwa tenepo mbakhonda kutcunyuswa,Pontho ule analonga uthambi ndzidzi onsene anadzafa.+
10 Si pyakuthema tayu kuti dzemwa akhale na mpfuma;Nee ntumiki kutonga akulu-akulu.+
11 Udziwisi wa munthu usamʼphedza toera akhonde kuipirwa mwakucimbiza,+Iye asakhala wakubalika thangwi yakupwaza* pyakuipa pinacitirwa iye.+
12 Ukali wa mambo ndi ninga kulira kwa nkhalamu,+Mbwenye ntsisi zace ndi ninga bume pa tsanga.
13 Mwana wakuti ndi dzemwa asabweresera nyatwa pai wace,+Nkazi wanthonga ndi ninga ntsoi ya nyumba yakuti isapitiriza kucuca.+
14 Nyumba na mpfuma ndi unthaka unapereka pai kuna mwanace,Mbwenye nkazi wandzeru ndi muoni unabuluka kuna Yahova.+
15 Kupolola kusabweresa citulo cikulu,Pontho munthu wakupolola anakhala na njala.+
16 Munthu anakoya matongero asatsidzikiza umaso wace;+Ule anakhonda kucita mphole-mphole na pinacita iye anadzafa.+
17 Ule anacitira pyadidi nyakutcerenga asabwerekesa Yahova,+Pontho iye anadzampasa nkhombo* thangwi ya pinthu pinacita iye.+
18 Langa mwanako cidikhiro mbaciripo,*+Leka kucitisa kuti mwanako afe.+
19 Munthu anaipirwa mwakucimbiza anatcunyuswa;Ungayesera kuntsidzikiza,unacita pyenepi mwakubwereza-bwereza.+
20 Bvera uphungu mbutawira kulangwa,+Toera ukhale munthu waudziwisi ntsogolo.+
21 Munthu asanyerezera pinthu pizinji toera kucita,Mbwenye pinafuna Yahova ndipyo pinafuna kucitika.+
22 Cinthu cakufunika muna munthu ndi ufuni wace wakukhonda mala;+Mphyadidi kakamwe kukhala ntcerengi kupiringana kukhala nyauthambi.
23 Kugopa Yahova kusatsogolera ku umaso;+Ule ananʼgopa anadzapuma mwakupfulika, nkhabe cinthu cakuipa cinafuna kuncitikira.+
24 Nyakupolola asaikha manja ace mu mbale,Mbwenye nee asawangisira toera kuabweza pontho pamulomo pace.+
25 Menya nyakusingirira+ toera nyakusowa luso akhale wandzeru,+Pontho sandika munthu waluso yakubvesesa, toera cidziwiso cace cithimizirike.+
26 Munthu anathabusa pai wace mbathamangisa mai wace,Ndi mwana wakupasa manyadzo na wakupwazisa.+
27 Mwananga, ungasiya kubvesera uphungu,Unadzatayika mbusiya njira ya cidziwiso.
28 Mboni wakusowa basa asapwaza* ulungami,+Pontho milomo ya anthu akuipa isadya pinthu pyakuipa.+
29 Anyakusingirira asadikhira kutongwa,+Pontho madzemwa asadikhira kukwapulwa kunsana.+
Pidzindikiro Pyapantsi
^ Peno: “munthu anapasa na ntima onsene.”
^ Peno: “asafuna umaso wace.”
^ Peno: “yakulekerera.”
^ Peno: “anadzamʼbwezera; anadzamulipa.”
^ Peno: “Langa mwanako mbaciri wangʼono.”
^ Peno: “asasingirira.”
