Yoswa 3:1-17
-
Aizraeli awambuka nkulo wa Yordani (1-17)
3 Yoswa pabodzi na Aizraeli* onsene alamuka namacibese kakamwe, abuluka ku Sitimu+ mbafika pa nkulo wa Yordani. Iwo agona penepo namasiku mbadzati kuwambuka nkulo.
2 Pidapita ntsiku zitatu, atsogoleri+ a mbumba apita pakati pa misasa,
3 mbapanga mbumba: “Mungaona kuti bokosi ya cibverano ca Yahova Mulungu wanu yathukulwa na anyantsembe akuti ndi Alevi,+ musafunika kulamuka mbamuitowera.
4 Mbwenye musafunika kukhala kutali, nsindzo wa makovadho 2.000;* lekani kuifendedzera dhuzi, natenepa munadzadziwa kunafuna imwe kuenda, thangwi cipo mukhadapita kale na njira ineyi.”
5 Natenepa, Yoswa apanga mbumba: “Cenesekani,+ thangwi mangwana Yahova anadzacita pinthu pyakudzumisa kuna imwe.”+
6 Buluka penepo, Yoswa apanga anyantsembe: “Kwatani bokosi+ ya cibverano mbamuenda kutsogolo kwa mbumba.” Penepo iwo akwata bokosi ya cibverano mbaenda kutsogolo kwa mbumba.
7 Natenepa, Yahova apanga Yoswa: “Kutomera lero ine ndinakukuza pamaso pa Aizraeli onsene,+ toera iwo adziwe kuti ine ndinadzakhala na iwe+ ninga mudakhala ine na Mose.+
8 Kuna anyantsembe anathukula bokosi ya cibverano, usafunika kuapanga ntemo uyu: ‘Mungafika pagombe ya nkulo wa Yordani, musafunika kuponda mʼmadzi mbamulimira mwenemo.’”+
9 Buluka penepo, Yoswa apanga Aizraeli: “Bwerani kuno toera mubvesere mafala a Yahova Mulungu wanu.”
10 Penepo Yoswa aapanga: “Mungaona pinthu pinafuna kucitika pano, dziwani kuti Mulungu wandimomwene* ali na imwe,+ pontho dziwani kuti iye anadzathamangisa pamaso panu Akanani, Aeti, Aeveu, Aperesi, Ajirgasi, Aamori na Ayebusi.+
11 Onani! Bokosi ya cibverano ca Mbuya wa pa dziko yonsene yapantsi iri kupita patsogolo panu, kuenda mu nkulo wa Yordani.
12 Cincino sankhulani amuna 12 a madzindza a Izraeli, mu dzindza ibodzi sankhulani mamuna mʼbodzi,+
13 pontho anyantsembe anathukula Bokosi ya cibverano ca Yahova, Mbuya wa dziko yonsene yapantsi, manyalo awo angaponda madzi a nkulo wa Yordani, madzi anabuluka kunkwiriro analimira mbakhala ninga mpanda.”*+
14 Natenepa, pidabuluka mbumba mʼmisasa yawo toera kuwambuka nkulo wa Yordani, anyantsembe adathukula bokosi+ ya cibverano aenda kutsogolo kwa mbumba.
15 Anyantsembe akhathukula Bokosi ya cibverano pidafika iwo pa nkulo wa Yordani mbaponda madzi, (nkulo wa Yordani ukhadzala mbutayikira+ mu ntsiku zonsene zakubvuna),
16 madzi akhabuluka kunkwiriro alimira. Madzi anewa alimira mbakhala ninga mpanda* kutali na penepo, ku Adhamu, nzinda wa cifupi na Zaretani. Mbwenye madzi akhaenda kunterero ku Bara ya Arabha, Bara ya Munyu,* apwa. Madzi agwandika, mbumba mbiwambuka dhuzi na Yeriko.
17 Mu ndzidzi wakuti anyantsembe adathukula bokosi ya cibverano ca Yahova akhapitiriza dzololo pa mataka akuuma,+ pakati pa nkulo wa Yordani, Aizraeli onsene akhawambuka na pa mataka akuuma+ mpaka pidamala mbumba yonsene kuwambuka nkulo wa Yordani.
Pidzindikiro Pyapantsi
^ Fala na Fala: “ana a Izraeli.”
^ Cifupi na metru 890. Onani Apendise B14.
^ Fala na Fala: “Mulungu wa mʼmaso.”
^ Peno: “bharaje.”
^ Peno: “bharaje.”
^ Ineyi ndi Bara Yakufa.
