Yahova asafuna kuti atumiki ace onsene akhale akutsandzaya. Iye ali dhuzi na m’bodzi na m’bodzi wa ife, pontho asadziwa nyatwa zinathimbana na ife. (Mas. 145:18, 19) Onani njira idatsalakana Yahova mprofeta Eliya mu ndzidzi ukhali iye wakutsukwala. Mamuna unoyu wakukhulupirika akhala m’maso mu ndzidzi wakunentsa kakamwe mu Izraeli. Anthu a cidzo a mu Izraeli akuti nee akhalambira Yahova akhatcinga atumiki a Yahova, pontho iwo akhafuna kupha mprofeta Eliya. (1 Ama. 19:1, 2) Cinthu cinango cidatsukwalisa Eliya ndi cakuti iye akhanyerezera kuti akhadasala ekhene ninga mprofeta wa Yahova. (1 Ama. 19:10) Mbwenye Mulungu acita pinthu mwakucimbiza toera kuphedza Eliya. Iye atuma anju toera kupanga Eliya kuti iye nee akhali ekhene, pontho toera kumpanga kuti pakhali na Aizraeli anango akuti akhapitiriza kutumikira Yahova mwakukhulupirika. (1 Ama. 19:5, 18) Yezu apanga anyakupfundzace kuti abale na alongo awo mu mpingo mbadakhala ninga acibale awo. (Marko 10:29, 30) Pontho Yahova, Babathu wakudzulu apikira kuti anaphedza ale anasankhula kuntumikira.​—Mas. 9:10. w21.06 tsa. 8-9 ¶3-4

Anthu azinji asakhonda kubvesera mphangwa zathu thangwi ife tisaphatisira Bhibhlya toera kuapangiza kuti pinthu pinapfundzisa mauphemberi ndi pyauthambi. Atsogoleri a mauphemberi asapfundzisa anthu kuti Mulungu asathabusa anthu akuipa mu djenje ya moto. Iwo asaphatisira pipfundziso pyenepi pyauthambi toera anthu agope. Mbwenye ninga atumiki a Yahova akuti asalambira Mulungu waufuni, ife tisaphedza anthu toera kubvesesa kuti pipfundziso pyenepi ndi pyauthambi. Atsogoleri a mauphemberi asapfundzisambo kuti munthu angafa nzimu wace usapitiriza kukhala m’maso. Mbidakhala kuti cipfundziso ceneci ndi candimomwene, nee munthu m’bodzi mbadafunika kulamuswa muli akufa. Maseze mauphemberi mazinji asapfundzisa kuti pyonsene pinacitikirwa na munthu Mulungu akhadapitonga kale, ife tisapfundzisa kuti munthu ali na ufulu wakusankhula, pontho iye anakwanisa kusankhula kutumikira Mulungu. Kodi atsogoleri a mauphemberi asabva tani tingalonga kuti pinapfundzisa iwo ndi pyauthambi? Kazinji kene iwo asaipirwa. Khala tisafuna undimomwene, ife tisafunika kukhulupira na kubvera pinalonga Mafala a Mulungu. (Juwau 8:45, 46) Mwakusiyana na Sathani Dyabo, ife cipo tinasiya undimomwene. Ife cipo tinacita cinthu cakuti nee cisabverana na pinakhulupira ife. (Juwau 8:44) Mulungu asafuna kuti atumiki ace ‘aide pinthu pyakuipa, pontho awangisire toera kufuna pinthu pyadidi,’ ninga pidacita Yezu.​—Aroma 12:9; Aheb. 1:9. w21.05 tsa. 10 ¶10-11

Tisafunika kucitanji tingadzindikira kuti ndife akudzikuza, pontho tiri na ntima wakufuna pyonsene? Tisafunika kucalira misampha ineyi. Mpostolo Paulu alonga kuti ale ‘adamangwa na nsampha wa Dyabo’ anakwanisa kusudzuka. (2 Tim. 2:26) Lekani kuduwala, Yahova ndi wamphambvu kakamwe kupiringana Sathani. Natenepa tingatawira ciphedzo ca Yahova ife tinakwanisa kucalira misampha yonsene ya Sathani. Ife tinakwanisa kucita pyenepi basi ene na ciphedzo ca Mulungu. Natenepa citani phembero kuna Yahova ntsiku zonsene toera akuphedzeni kudzindikira khala ndimwe wakudzikuza peno muli na ntima wakufuna pyonsene. (Mas. 139:23, 24) Citani pyonsene pinakwanisa imwe toera kucalira kudzikuza na ntima wakufuna pyonsene. Kutomera kale mpaka lero Sathani asakhala ninga nyakusodza. Mbwenye mwakukhonda dembuka iye anamangwa, pontho mukupita kwa ndzidzi anafudzwa. (Apok. 20:1-3, 10) Ife tisafuna kakamwe kuti ntsiku ineyi ifike. Mbwenye ntsiku ineyi mbidzati kufika, pitirizani kucita mphole-mphole na misampha ya Sathani. Wangisirani kakamwe toera mukhonde kukhala wakudzikuza na ntima wakufuna pyonsene. Pontho khalani akutonga toera ‘kuida Sathani, pontho iye anadzakuthawani.’ w21.06 tsa. 19 ¶15-17

Yahova asakomerwa kakamwe munthu angadziwa undimomwene wa Bhibhlya, mbapangambo anango undimomwene unoyu. (Mis. 23:15, 16) Yahova asatsandzaya kakamwe lero angaona atumiki ace mbamwaza mphangwa mwaphinga na kupfundzisa anthu Bhibhlya. Mwacitsandzo, mwakukhonda tsalakana utenda wa koronaviru, mu caka ca basa ca 2020, abale na alongo acitisa mapfundziro a Bhibhlya akukwana 7.705.765, pontho aphedza anthu akukwana 241.994 toera kuperekeka kuna Yahova mbabatizwa. Natenepa, anyakupfundza anewa apswa anakwanisambo kucitisa mapfundziro a Bhibhlya mbaphedza anthu azinji toera akhalembo anyakupfundza. (Luka 6:40) Mwakukhonda penula, Yahova asatsandzaya kakamwe tingapfundzisa anthu Bhibhlya toera akhale anyakupfundza. Basa yakucita anyakupfundza ndi yakunentsa kakamwe, mbwenye na ciphedzo ca Yahova ife tinakwanisa kupfundzisa anthu Bhibhlya toera afune Babathu wakudzulu. Kodi ife tisawangisira toera kutomesa pfundziro ya Bhibhlya? Panango mu ndzidzi unamwaza ife mphangwa, ife tinakwanisa kuphemba munthu toera kupfundza naye Bhibhlya, iye angatawira tinakhala akutsandzaya kakamwe. w21.07 tsa. 6-7 ¶14-16

Mambo Dhavidhi apereka kobiri na pinthu pizinji pyakufunika, toera kuphedzera kumangwa kwa templo. (1 Kro. 22:11-16) Khala ife nee tiri na mphambvu yakuphedzera mabasa akumanga mu gulu ya Yahova, ife tinakwanisa kupitiriza kuphedzera mukucita pyakupereka mwakubverana na pire pinakwanisa ife. Pontho tinakwanisa kuphedza aphale na atsikana mukuphatisira maluso ali na ife. Mpostolo Paulu akhalimbo wakupasa mwakudzala manja. Mwacitsandzo, iye acemera Timoti toera akhale pabodzi na iye m’basa ya umisionaryo, pontho ampfundzisa njira zakumwaza mphangwa na zakupfundzisa. (Mabasa 16:1-3) Njira zenezi zaphedza Timoti toera akhale m’mwazi mphangwa na mpfundzisi wadidi kakamwe. (1 Akor. 4:17) Pontho Timoti aphatisirambo njira zenezi zidapfundziswa iye na Paulu toera kupfundzisambo  anango. w21.09 tsa. 12-13 ¶14-15

Tinapfundzanji na citsandzo ca Apolo na ca mpostolo Paulu? Amuna anewa awiri akhadziwa kakamwe Malemba. Iwo akhadziwika kakamwe, pontho akhali apfundzisi adidi. Kusiyapo pyenepi, iwo aphedza anthu azinji kakamwe toera akhale anyakupfundza. Mbwenye iwo nee akhacitirana bibvu. (Mabasa 18:24) Thangwi mu ndzidzi udabuluka Apolo ku Korinto, Paulu an’dembetera toera abwerere pontho kweneko. (1 Akor. 16:12) Apolo aphatisira mwadidi maluso ace toera kumwaza mphangwa zadidi na kuwangisa abale ace. Pontho tinakwanisa kulonga na cinyindiro consene kuti Apolo akhali munthu wakucepeseka. Mwacitsandzo, Bhibhlya nee isalonga kuti iye aipirwa na Akila na Priscila ‘pidanfokotozera iwo mwadidi kakamwe njira ya Mulungu.’ (Mabasa 18:24-28) Mpostolo Paulu akhadziwa mabasa adidi akhacita Apolo. Mbwenye Paulu nee akhadzudzumika kuti anthu panango mbadaona Apolo kukhala wakufunika kakamwe kupiringana iye. Ife tingaleri mafala adalemba Paulu kuna Akorinto, tinakwanisa kuona kuti iye akhali wakucepeseka na wa maonero adidi.​—1 Akor. 3:4-6. w21.07 tsa. 18-19 ¶15-17

Adhamu na Eva asankhula kukhonda bvera Mulungu, natenepa iwo nee akhalabve akuthema toera kucita khundu ya atumiki a Yahova. Mphapo ndiye tani anawo? Mwaufuni, Yahova acita masasanyiro toera iwo akwanise kucita khundu ya atumiki ace. Iye acita pyenepi mukuphatisira ntsembe ya Mwanace. (Juwau 3:16) Na thangwi ya ntsembe ineyi, Yahova asankhula anthu akukhulupirika akukwana 144.000 toera akhale anace. (Aroma 8:15-17; Apok. 14:1) Kusiyapo anthu anewa, mamiliyau a anthu anango akukhulupirika asatumikirambo Mulungu. Iwo asadikhirambo kucita khundu ya atumiki a Mulungu kwenda na kwenda pakumala kwa mayesero akumalisa kunkhomo kwa pyaka 1.000. (Mas. 25:14; Aroma 8:20, 21) Ngakhale cincino, iwo asaona Yahova ninga Nciti wawo na ‘Babawo.’ (Mat. 6:9) Kusiyapo pyenepi, anthu anafuna kudzalamuswa muli akufa, Yahova anadzaapasa mwai toera kupfundza pya iye. Ale anafuna kudzabvera pitsogolero pyace anadzacitambo khundu ya atumiki ace. w21.08 tsa. 5 ¶10-11

Mpostolo Paulu akhadapaswa basa yakumwaza mphangwa, pontho mu pyaka pizinji, iye akhaona basa ineyi ninga yakufunika kakamwe mu umaso wace. Iye akhamwaza mphangwa “pakweca, pontho nyumba na nyumba.” (Mabasa 20:20) Mwandimomwene, iye akhabandza miyai yonsene toera kumwaza mphangwa. Mwacitsandzo, mu ndzidzi ukhadikhira iye andzace ku Atena, iye amwaza mphangwa zadidi kuna nsoka wa anthu a cidzo, pontho anango mwa iwo abvesera mwadidi mphangwa zace. (Mabasa 17:16, 17, 34) Ngakhale mu ndzidzi ‘ukhadamangwa iye na maunyolo,’ Paulu akhapitiriza kumwaza mphangwa kuna ale akhali dhuzi na iye. (Afil. 1:13, 14; Mabasa 28:16-24) Paulu akhaphatisira mwadidi ndzidzi wace. Kazinji kene akhaphemba anango toera amwaze mphangwa pabodzi na iye. Mwacitsandzo, paulendo wace wakutoma ninga misionaryo, iye aenda pabodzi na Juwau Marko; mbwenye paulendo wace waciwiri, iye aenda na Timoti. (Mabasa 12:25; 16:1-4) Mwakukhonda penula, Paulu awangisira kakamwe toera kuapfundzisa kutsalakana mabasa a mpingo, basa yakucedzera abale na pinthu pikhafunika iwo kucita toera athimizire maluso awo akupfundzisa.​—1 Akor. 4:17. w22.03 tsa. 27 ¶5-6

Anthu anango nee asakhulupira Mulungu thangwi iwo asalonga kuti anakhulupira basi ene pinthu pinakwanisa iwo kuona. Mbwenye anthu abodzi ene asakhulupirambo pinthu pyakuti iwo nkhabe kwanisa kupiona ninga força de gravidade, thangwi iwo asadziwa kuti iripo. Cikhulupiro cinalongwa m’Bhibhlya cisaphataniza umboni wa pinthu ‘pyakukhonda kuoneka na maso.’ (Aheb. 11:1) Pasafunika ndzidzi na kuwangisira toera kupfundza umboni wa pinthu pyenepi, mbwenye anthu azinji nee asafuna kucita pyenepi. Munthu wakuti nee asapfundza umboni wa pinthu pidacita Mulungu, iye nee anakwanisa kukhulupira kuti Mulungu alipo. Pidamala kupfundza asiyentista anango pinthu pidacita Mulungu, iwo atoma kukhulupira kuti ndiye adacita pinthu pyonsene kudzulu na dziko yapantsi. Akhakhulupira kuti ndi Mulungu adacita pinthu pyonsene thangwi iwo nee apfundziswa pinthu pyenepi ku universidhadhe. Ngakhale tenepo, apfundza pya Yahova, pontho asanfuna. Natenepa, ife tonsene tisafunika kuwangisa cikhulupiro cathu kuna Mulungu, mwakukhonda tsalakana khala tapfundza kakamwe peno nkhabe. w21.08 tsa. 14 ¶1; tsa. 15-17 ¶6-7

Yezu aphatisira nsangani wa mwana wakutayika toera kutiphedza kubvesesa kuti Yahova asakomerwa kakamwe na kubvera ntsisi anthu. Mwana unoyu abuluka panyumba pa anyakubala ace ‘mbabvunga pinthu pyace thangwi ya pinthu pyakuipa pikhacita iye.’ (Luka 15:13) Mukupita kwa ndzidzi, iye atcunyuka madawo ace, acepeseka mbabwerera kunyumba. Kodi pai wace acitanji? Yezu alonga: “Mbadzati kufika, babace amuona nakutali mbambvera ntsisi. Iye an’thamangira, an’khumbatira mbampswompswona.” Iye nee apasa manyadzo mwanace. M’mbuto mwace, iye ambvera ntsisi, amulekerera, pontho antawirisa toera akhale pontho panyumba. Mwana unoyu wakutayika akhadacita madawo makulu, mbwenye nakuti akhadatcunyuka na ntima onsene pai wace amulekerera. Baba wantsisi kakamwe analongwa mu nsangani unoyu asaimirira Yahova. Munjira ineyi, Yezu apangiza kuti Yahova asafuna kulekerera ale anatcunyuka na ntima onsene.​—Luka 15:17-24. w21.10 tsa. 8-9 ¶4, 6

Lero, atsogoleri azinji a mauphemberi asacita pyonsene pinakwanisa iwo toera kuphimbira undimomwene wakuti Mulungu ali na dzina. Iwo asabulusa dzina ya Mulungu m’Mabhibhlya awo, pontho asakhondesa anthu toera kuphatisira dzina ineyi m’magereja mwawo. Pyenepi pisapangiza pakweca kuti basi ene ndi Mboni za Yahova zinalemedza dzina ya Mulungu. Ife tisadziwisa anthu dzina ya Mulungu kupiringana mauphemberi anango onsene. Na thangwi ineyi, ninga Mboni za Yahova tisacita pyonsene pinakwanisa ife toera kukhala m’maso mwakubverana na dzina ineyi. (Iza. 43:10-12) Ife tacita Mabhibhlya a Tradução do Novo Mundo da Bíblia Sagrada akupiringana mamiliyau 240 akuti musagumanika dzina ya Yahova m’mbuto zakuti m’Mabhibhlya anango dzina ineyi nee isagumanika. Kusiyapo pyenepi, ife tisacita mabukhu akubuluswa m’Bhibhlya akuti asaphatisira dzina ya Yahova mu pilongero pyakupiringana 1.000. w21.10 tsa. 20-21 ¶9-10

Tisalambira Yahova tingaphedza abale na alongo athu anafuna ciphedzo. Yahova  alonga kuti mbadabwezera Aizraeli akuti mwakudzala manja akhapasa pinthu anyakutcerenga. (Dheu. 15:10) Mwandimomwene, ndzidzi onsene unaphedza ife m’bale peno mulongo wakuti asafuna ciphedzo, Yahova asaona pyenepi ninga muoni kuna Iye. (Mis. 19:17) Mwacitsandzo, Akristu akakhala ku Filipi atumiza muoni kuna Paulu mu ndzidzi ukhali iye nkaidi. Na thangwi ineyi, Paulu alonga kuti muoni unoyu ukhali ‘ntsembe yakutawirika, yakununkhira na yadidi pamaso pa Mulungu.’ (Afil. 4:18) Nyerezerani thangwi ya abale na alongo a mu mpingo mwanu, pontho bvundzikani: ‘Kodi alipo munthu wakuti ndinakwanisa kum’phedza?’ Yahova asatsandzaya angationa mbatikaphatisira ndzidzi wathu, mphambvu zathu, maluso athu na pinthu piri na ife toera kuphedza anthu anafuna ciphedzo. Kuna Yahova, pyenepi pisacita khundu ya ulambiri wathu. (Tiya. 1:27) Toera kulambira Yahova munjira yakutawirika kuna iye pisaphemba ndzidzi na kuwangisira. Mbwenye nee ndi pyakunentsa. (1 Juwau 5:3) Thangwi yanji? Thangwi pinaticitisa pisakulumizwa na ufuni wathu kuna Yahova na kuna abale na alongo athu. w22.03 tsa. 24 ¶14-15

Tinganyerezera nyatwa zinathimbana na abale na alongo athu, ife tinakwanisa kuabvera ntsisi. Mwacitsandzo, panango panagumanika mulongo wakuti ali na utenda wakugoswa. Iye nee asapanga munthu thangwi ya utenda unoyu, mbwenye anatsandzaya kakamwe pangaoneka munthu toera kumphedza. Kodi ife tinakwanisa kum’phedza kuphika cakudya peno kupswaira n’nyumba mwace? Panango panaoneka m’bale wakuti aluza basa yace. Ife tinakwanisa kumpasa kobiri, panango mbatikhonda kumpanga kuti adabulusa kobiri ineyi ndife, na cifuno ca kumphedza mpaka mu ndzidzi unafuna iye kugumana basa inango. Ninga Yahova, ife tisafunika kubvera ntsisi abale na alongo athu na kuaphedza, tayu kudikhira mu ndzidzi unaphemba iwo ciphedzo. Yahova ntsiku zonsene asabulusa dzuwa, pontho ife nee tisacita kumphemba toera acite pyenepi. Pontho anthu onsene asaphindula na dzuwa ineyi, tayu basi ene ale anapereka takhuta kuna iye. Thangwi ya pinthu pyonsene pinatipasa Yahova, iye asapangiza kuti asatifuna. Natenepa, ife tisanfuna kakamwe thangwi yakukhala wakukoma ntima na wakupasa mwakudzala manja. w21.09 tsa. 22-23 ¶12-13

Ufuni wakukhonda mala wa Mulungu usankulumiza toera kukhala wakulekerera. Yahova angaona kuti nyakudawa atcunyuka, pontho asiya pyakuipa pikhacita iye, ufuni wakukhonda mala usankulumiza toera kulekerera. Nyamasalmo Dhavidhi alonga thangwi ya Yahova: ‘Iye nee asatitsalakana mwakubverana na madawo athu, peno kutitcunyusa mwakubverana na madodo athu.’ (Mas. 103:8-11) Dhavidhi akhadziwa kuti munthu asapibva tani angakhala na cikumbuntima cakupasika mulando. Mbwenye iye adzindikirambo kuti Yahova ali ‘dzololo toera kulekerera.’ Ninji pinakulumiza Yahova toera kulekerera? Ntawiro usagumanika pa lemba ya ntsiku ya lero. Inde, ninga pidalonga Dhavidhi m’phembero, Yahova ndi wakulekerera thangwi iye asapangiza ufuni wakukhonda mala kuna onsene anaphemba kulekererwa. Ife tingadawa tisatsukwala. Pyenepi mphyadidi, pontho ndi pyakuthema. Kutsukwala kweneku kunakwanisa kutiphedza toera tiphembe kulekererwa mbatisiya madawo adacita ife. w21.11 tsa. 5 ¶11-12

Yahova asafuna dzina yace, pontho asafuna kuti anthu onsene ailemedze. (Iza. 42:8) Mbwenye papita pyaka 6.000, dzina ya Mulungu isapitiriza kupswipiswa. (Mas. 74:10, 18, 23) Pyenepi pyatoma pidalonga Dyabo uthambi kuna Adhamu na Eva kuti Mulungu asaapingiza toera akhonde kukhala na cinthu cikhafuna iwo. (Gen. 3:1-5) Kutomera pa ndzidzi unoyu, Yahova asapambizirwa kuti asapingiza anthu toera akhonde kukhala na pinthu pinafuna iwo. Yezu akhadzudzumika thangwi ya kupswipiswa kwa dzina ya Babace. Yahova ndiye basi adathemba kutonga kudzulu na dziko yapantsi, pontho utongi wace ndi wadidi kakamwe. (Apok. 4:11) Mbwenye Dyabo asanyengeza anthu toera anyerezere kuti Mulungu nee athema kutonga. Thimize pano, nkhabepo munthu anafuna kupenula kuti iye athema kutonga kudzulu na dziko yapantsi. Anthu onsene anadzadziwa kuti Yahova asatonga mwadidi kakamwe, pontho kuti basi ene Umambo wace ndiwo unafuna kubweresa ntendere na citsidzikizo pa dziko yapantsi. w21.07 tsa. 9 ¶5-6

Ndi pyakudziwika kuti nsolo wa banja usafunika kutsalakana nkazace na anace mukuapasa cakudya, cakubvala na mbuto yakugona. Kodi imwe musathimbana na nyatwa yakusowa kobiri? Khala ndi tenepo, midzidzi ineyi ndi yakunentsa kakamwe kuna imwe. Ngakhale tenepo, imwe munakwanisa kuphatisira midzidzi ineyi toera kuwangisa cikhulupiro canu. Citani phembero kuna Yahova, pontho lerini mafala a Yezu anagumanika pa Mateu 6:25-34, buluka penepo anyerezereni mwacidikhodikho. Nyerezerani mwadidi pitsandzo pya atumiki a Yahova lero pyakuti pisapangiza kuti Yahova asatsalakana ale anaphatisira ndzidzi wawo toera kuntumikira. (1 Akor. 15:58) Mungacita pyenepi, imwe munakhala na cikhulupiro cakuti Yahova anakuphedzani munjira ibodzi ene idaphedza iye atumiki ace anango akuti athimbana na nyatwa zakulandana na zanu. Iye asadziwa pinthu pinafunika imwe, pontho asadziwa kuti anakuphedzani tani. Mungaona ciphedzo ca Yahova, imwe munakhala na cikhulupiro cakuwanga cakuti cinakuphedzani toera kupirira nyatwa za ntsogolo. w21.11 tsa. 20-21 ¶3, 6

Akristu azinji asawangisa cikhulupiro cawo angapfundza thangwi ya ciomboli. Iwo asapitiriza kumwaza mphangwa mwakukhonda tsalakana kutcingwa, pontho iwo asapitiriza kupirira mayesero onsene anathimbana na iwo mu umaso wawo. Onani citsandzo ca mpostolo Juwau. Pisaoneka kuti mu pyaka pyakupiringana 60, iye amwaza mphangwa mwakukhulupirika za undimomwene unalonga pya Kristu na ciomboli. Pikhali iye cifupi na pyaka 100, Atongi Aciroma aona kuti ndi pyakugoswa kakamwe kuti iye apitirize na basa ineyi, natenepa iwo amuikha nkaidi pa ntsuwa ya Patmo. Thangwi yanji iye aikhwa nkaidi? “Thangwi yakulonga pya Mulungu na kupereka umboni thangwi ya Yezu.” (Apok. 1:9) Mpostolo Juwau apangiza citsandzo cadidi kakamwe ca cikhulupiro na kupirira. M’mabukhu a Bhibhlya adalemba Juwau, iye apangiza kuti akhafuna kakamwe Yezu, pontho apereka takhuta kakamwe thangwi ya ciomboli. Iye alonga pya ciomboli peno kufunika kwa ciomboli m’maulendo akupiringana 100. (1 Juwau 2:2) Mwakukhonda penula, mpostolo Juwau apereka takhuta kakamwe thangwi ya ciomboli. w21.04 tsa. 17 ¶9-10

Yahova akhafuna kuti atumiki ace apangize citsalakano kuna anthu akulamala. Mwacitsandzo, iye apanga Aizraeli toera akhonde kupasa dzedze dhrodhro peno munthu wakuti asanentseka toera kubva. Dzedze ineyi ikhaphataniza kutsalakana mwakuipa peno kulonga mwakuipa dhrodhro. Pyenepi pikhali pinthu pyakuipa kakamwe kuna dhrodhro! Nakuti iye nee akhabva, iye nee mbadakwanisa kutawira anthu akhamulonga mwakuipa. Kusiyapo pyenepi, pa Levitiko 19:14 Mulungu apanga atumiki ace kuti iwo nee akhafunika ‘kuikha cinthu cakugwegwedusa patsogolo pa boliboli.’ Bukhu inango yalonga tenepa thangwi ya anthu akulamala: “Kale mu Izraeli anthu akulamala akhatsalakanwa mwakuipa.” Panango munthu mbadaikha cinthu cakugwegwedusa patsogolo pa boliboli toera kum’phekesa peno kunseka. Pyenepi pikhali pyakuipa kakamwe! Ntemo unagumanika pa vesi 14 waphedza atumiki a Yahova toera kuona kuti iwo akhafunika kubvera ntsisi anthu akulamala. w21.12 tsa. 8-9 ¶3-4

Yakobe ‘akhagopa, pontho akhadzudzumika kakamwe,’ kuti panango m’bale wace akhapitiriza kuipirwa na iye. Na thangwi ineyi, iye acita phembero yakudembetera kuna Yahova thangwi ya pyenepi. Buluka penepo iye atumiza miyoni mizinji kuna Ezau. (Gen. 32:9-15) Pakumalisa, pidagumanikana iwo nkhope na nkhope, Yakobe ndiye adatoma kupangiza cilemedzo kuna Ezau. Iye agodama patsogolo pa Ezau, mbakotamisa nsolo wace mpaka pantsi, tayu kabodzi peno kawiri, mbwenye kanomwe. Yakobe akhali wakucepeseka, pontho apangiza cilemedzo mbakhazikisa ntendere na m’bale wace. (Gen. 33:3, 4) Njira idakhunganyika Yakobe toera kuenda kagumanikana na m‘bale wace na njira idanfikira iye dhuzi isatipfundzisa pinthu pizinji. Mwakucepeseka, Yakobe aphemba ciphedzo ca Yahova. Buluka penepo iye acita pyonsene pikhakwanisa iye toera kukhazikisa ntendere na m’bale wace mwakubverana na pidalonga iye m’phembero yace. Pidagumanikana iye na Ezau, Yakobe nee aketesana naye toera kuona kuti mbani adadawa, pontho mbani adakhonda dawa. Pikhafuna Yakobe ndi kukhazikisa ntendere na m’bale wace. Munatowezera tani citsandzo ca Yakobe?​—Mat. 5:23, 24. w21.12 tsa. 25 ¶11-12

Munganyerezera kuti Yezu afa thangwi ya madawo anu, panango munanyerezera kuti ‘ine nee ndathema kucitirwa pyenepi.’ Thangwi yanji panango munakhala na manyerezero anewa? Thangwi ntima wathu wakusowa ungwiro unakwanisa kutinyengeza mbatitoma kunyerezera kuti ndife akusowa basa peno akukhonda funiwa. (1 Juwau 3:19) Pyenepi pingacitika kuna ife, tisafunika kukumbuka kuti: “Mulungu ndi nkulu kupiringana mitima yathu.” Ife tisafunika kudziwa kuti Yahova asatifuna, pontho anatilekerera, maseze tikhale na mabvero akuti iye nee asatifuna peno iye nee anatilekerera. Kusiyapo pyenepi ife tisafunika kukhala na cinyindiro consene cakuti Yahova asatifuna. Toera kucita pyenepi, ife tisafunika kupfundza Bhibhlya ntsiku zonsene, kucita phembero ndzidzi onsene na kucedza na abale na alongo kazinji kene. Thangwi yanji kucita pinthu pyenepi ndi kwakufunika kakamwe? Thangwi munadzabvesesa makhaliro mazinji adidi a Yahova. Pontho munabvesesa kuti iye asakufunani kakamwe. Kunyerezera mwacidikhodikho pinthu pinapfundza imwe m’Bhibhlya ntsiku zonsene, pinakuphedzani toera kunyerezera mwadidi na “kusasanyira pinthu” pya muntima mwanu.​—2 Tim. 3:16. w21.04 tsa. 24 ¶12-13

Toera tikhale na cikhulupiro cakuwanga, ife tisafunika kucita pizinji kupiringana basi ene kupfundza Bhibhlya. Ife tisafunika kunyerezera mwadidi pinthu pinapfundza ife. Onani pidacitikira nyakulemba wa Masalmo 77. Iye atsukwala thangwi akhapibva kuti iye na Aizraeli andzace akhondiwa na Yahova. Namasiku iye nee akhakwanisa kugona thangwi akhadzudzumika kakamwe na pinthu pyenepi. (Mavesi 2-8) Kodi iye acitanji? Iye apanga Yahova: ‘Ndinanyerezera mwadidi mabasa anu onsene na pyonsene pinacita imwe.’ (Vesi 12) Ndimomwene kuti, nyamasalmo unoyu akhakumbuka pinthu pidacitira Yahova atumiki ace nduli, ngakhale tenepo iye adzudzumika mbabvundza: ‘Kodi Mulungu aduwala kutibvera ntsisi, peno ntsisi zace zamala thangwi ya kuipirwa kwace?’ (Vesi 9) Nyamasalmo anyerezera mwadidi pinthu pidacita Yahova mbakumbuka kuti Mulungu abvera ntsisi atumiki ace nduli. (Vesi 11) Pyenepi pyamphedza tani? Nyamasalmo unoyu akhala na cinyindiro cakuti Yahova cipo anadzasiya atumiki ace. (Vesi 15) w22.01 tsa. 30-31 ¶17-18

Kodi Yahova asapibva tani thangwi ya amuna na akazi akukhulupirika adafa? Iye asafuna kakamwe kuaona pontho. (Yobe 14:15) Yahova asafuna kakamwe kuona pontho xamwali wace Abhrahamu. (Tiya. 2:23) Kusiyapo pyenepi, Yahova atsuwa kakamwe kucedza pontho na Mose wakuti akhalonga naye ‘nkhope na nkhope.’ (Eks. 33:11) Iye asafuna kakamwe kubva pontho Dhavidhi na anyamasalmo anango mbaimba nyimbo zawo zakusimba Mulungu. (Mas. 104:33) Maseze axamwali anewa a Yahova afa, iye nee aaduwala. (Iza. 49:15) Iye asakumbuka makhaliro awo onsene. Natenepa inadzafika ntsiku yakuti iye anadzaalamusa muli akufa, mbabvesera pontho maphembero awo akubulukira muntima mbatawira ulambiri wawo. Na thangwi ineyi, khala mwaferwa na munthu anafuna imwe, mafala anewa anakwanisa kukubalangazani. Pidatoma anthu kukhonda bvera Mulungu mu Edheni, Yahova akhadziwa kuti uipi mbudatekera kakamwe. Yahova asaida pinthu pyakuipa pinacitika pa dziko yapantsi lero ninga kusowa ulungami na uphanga. w21.07 tsa. 10-12 ¶11; tsa. 12 ¶12

Tingafuna abale na alongo athu, ife tinapangizambo kuti tisapereka takhuta thangwi ya ciomboli. Kusiyapo pyenepi, Yezu apereka umaso wace kuna ife pabodzi na abale na alongo athu. Khala Yezu afera iwo, pyenepi pisapangiza pakweca kuti iwo ndi akufunika kakamwe kuna iye. (1 Juwau 3:16-18) Ife tinapangiza kuti tisafuna abale na alongo athu kubulukira munjira inaatsalakana ife. (Aef. 4:29, 31–5:2) Mwacitsandzo, ife tisaaphedza mu ndzidzi unaduwala iwo, mu ndzidzi unathimbana iwo na mayesero, kuphatanizambo angagwerwa na pidengwa pyacibaliro. Mphapo tisafunika kucitanji khala m’bale peno mulongo acita pinthu peno alonga mafala akuti atitsukwalisa? Kodi midzidzi inango pisakhala pyakunentsa kuna imwe kulekerera? (Lev. 19:18) Khala ndi tenepo, phatisirani uphungu uyu: “Pitirizani kupirirana unango na ndzace mbamulekererana na ntima onsene, mwakukhonda tsalakana khala munthu ali na thangwi toera kutsukwala na pidacitirwa iye na ndzace. Ninga mudakulekererani Yahova na ntima onsene, imwe musafunikambo kucita pibodzi pyene.” (Akol. 3:13) Ndzidzi onsene unalekerera ife m’bale peno mulongo, tisapangiza pakweca kuna Yahova kuti tisapereka takhuta kakamwe thangwi ya ciomboli. w21.04 tsa. 18 ¶12-13

Ife tinakwanisa kutumikira Yahova mwaphinga mbatiphedza anthu azinji toera athambaruke mpaka kubatizwa. Mbwenye tisafunika kudziwa kuti tisakwanisa kucita pyenepi basi ene na ciphedzo ca Yahova. Kusiyapo pyenepi, kubulukira mu citsandzo ca Apolo na ca mpostolo Paulu, ife tisapfundza kuti tingakhala na miyai mizinji yakutumikira mu mpingo tisafunika kuwangisira toera kukhazikisa ntendere. Ife tisapereka takhuta kakamwe kuna akulu a mpingo na atumiki akutumikira akuti asatiphedza toera kukhala akuphatana na antendere. Thangwi iwo asacita pyenepi mukuphatisira Bhibhlya. Pontho iwo nee asaona kuti ndi akufunika kakamwe kupiringana anango, mbwenye asaphedza abale na alongo onsene mu mpingo toera abvere Yezu mbatowezera citsandzo cace. (1 Akor. 4:6, 7) M’bodzi na m’bodzi wa ife ali na maluso adapaswa iye na Mulungu. Panango tinanyerezera kuti pinthu pinacita ife nee ndi pyakufunika kakamwe. Mbwenye pinthu pyakucepa pinacita imwe toera mpingo ukhale wakuphatana ndi ninga usalu unaphataniza mapindi mawiri a nguwo. Natenepa, tendeni tonsene timenye nkhondo toera tikhonde kukhala na nzimu wa mapika. Kusiyapo pyenepi, tendeni tonsene tikhale akutonga toera kukhazikisa ntendere mbatikhala akuphatana mu mpingo.​—Aef. 4:3. w21.07 tsa. 19 ¶18-19

Imwe munakwanisambo kukhala na cinyindiro cakuti anyakufunika anu adamala kufa anadzalamuswa. Kulira kwa Yezu mu ndzidzi ukhabalangaza iye axamwali ace adaferwa kusapangiza kuti iye asafuna kakamwe kulamusa anthu muli akufa! (Juwau 11:35) Imwe munakwanisa kuphedza anthu adaferwa. Kusiyapo kulira kudacita Yezu na Mariya pabodzi na Marta, iye aabvesera mu ndzidzi ukhalonga iwo mbaabalangaza. (Juwau 11:25-27) Ife tinakwanisambo kucita pibodzi pyene kuna ale adaferwa. Dan, nkulu wa mpingo wa ku Australia alonga: “Pidaferwa ine na nkazanga ndikhafuna kakamwe ciphedzo. Abale azinji pabodzi na akazawo, ndzidzi onsene akhali dzololo toera kundibvesera. Iwo akhandisiya kulonga thangwi ya kutsukwala kwanga, pontho nee akhapasika manyadzo mu ndzidzi ukhalira ine. Kusiyapo pyenepi iwo akhandiphedza toera kucita mabasa anango, ninga kutsuka karu yanga, kugula pinthu na kuphika mu ndzidzi wakuti nee ndikhakwanisa kucita pyenepi. Pontho ndzidzi onsene akhacita phembero pabodzi na ine. Iwo apangiza kuti akhali axamwali andimomwene, pontho akhali dzololo toera kundiphedza ‘midzidzi ya nyatwa.’”​—Mis. 17:17. w22.01 tsa. 16 ¶8-9

Yahova asafuna udidi wathu. (Mis. 4:20-22) Tingapaswa uphungu kubulukira m’Bhibhlya, mabukhu akubuluswa m’Bhibhlya peno na abale akuti ali na uxamwali wakuwanga na Yahova, pyenepi pisapangiza kuti iye asatifuna. (Aheb. 12:9, 10) Nyerezerani uphungu, tayu njira idapaswa imwe. M’midzidzi inango tinaona kuti uphungu nee waperekwa munjira yadidi. Mwandimomwene, munthu anapereka uphungu asafunika kuupereka munjira yakuti inakhala yakukhonda nentsa kuutawira. (Agal. 6:1) Mbwenye khala ndife anapaswa uphungu tisafunika kunyerezera pinapangwa ife. Ngakhale kuti tisaona kuti munthu adatipasa uphungu akhafunika kutipasa munjira yadidi, tisafunika kubvundzika: ‘Ngakhale kuti nee ndakomerwa na njira idaperekwa uphungu, pana cinthu cakuti ndinakwanisa kucipfundza kubulukira mu uphungu unoyu? Ndinakwanisa kuduwala madodo a munthu adandipasa uphungu mbandipfundza na uphungu udandipasa iye?’ Tingabvera uphungu unapaswa ife toera tikwanise kuphedzeka nawo tisapangiza kuti ndife audziwisi. w22.02 tsa. 12 ¶13-14

Yahova asadziwa kuti pisakwata ndzidzi, pontho pisaphemba kuwangisira toera kukunda manyerezero na misambo yakuipa. (Mas. 103:13, 14) Ngakhale tenepo, Yahova asaphatisira Mafalace, nzimu wace wakucena na gulu yace toera kutipasa udziwisi, mphambvu na ciphedzo cinafuna ife toera kucinja. Phatisirani Bhibhlya toera mudingike. Mafala a Mulungu ndi ninga supeyu. Iwo anakwanisa kukuphedzani toera kudinga manyerezero anu, malongero anu na macitiro anu. (Tiya. 1:22-25) Pontho ndzidzi onsene Yahova ali dzololo toera kukuphedzani. Iye asadziwa mwadidi kuti anakuphedzani tani, pontho asadziwa piri muntima mwanu. (Mis. 14:10; 15:11) Natenepa, khalani na nsambo wakucita phembero kuna iye na kupfundza Mafalace ntsiku zonsene. Khalani na cinyindiro cakuti mitemo ya Yahova ndi yadidi kakamwe. Ife tinakwanisa kuphedzeka na pinthu pyonsene pinatiphemba Yahova toera tipicite. Anthu anabvera mitemo ya Yahova asakhala akulemedzeka, asakhala na cifuniro mu umaso, pontho asakhala na kutsandzaya kwandimomwene.​—Mas. 19:8-11. w22.03 tsa. 4 ¶8-10

Tisalambira Yahova tingamanga na kusasanyira nyumba za ulambiri. Bhibhlya isalonga kuti basa yakumanga tabhernakulu na pinthu pikhali mwenemo ikhali yakupambulika. (Eks. 36:1, 4) Lero, Yahova asaona basa yakumanga nyumba za Umambo na nyumba zinango za gulu yace ninga khundu ya ulambiri wathu. Abale na alongo anango asamala ndzidzi uzinji m’mabasa anewa. Ife tisapereka takhuta kakamwe thangwi yakuphedzera kwawo basa ya Umambo munjira ineyi. Kusiyapo pyenepi, iwo asacitambo basa yakumwaza mphangwa. Pontho anango mwa iwo panango asafuna kutumikira ninga apainiya. Abale na alongo anewa angaphemba toera kutumikira ninga apainiya, akulu a mpingo anakwanisa kupangiza kuti asaphedzera basa yakumanga angakhonda kunyinyirika toera kuakhazikisa khala ndi akuthema toera kutumikira ninga apainiya. Mwakukhonda tsalakana khala tiri na maluso akumanga peno nkhabe, ife tinakwanisa kuphedzera basa yakucenesa na kusasanyira nyumba zinamangwa. w22.03 tsa. 22 ¶11-12