Misangani 16:1-33
16 Munthu asakhunganya muntima mwace pinafuna iye kulonga,Mbwenye ntawiro unapereka iye* usabuluka kuna Yahova.+
2 Munthu asanyerezera kuti njira zace zonsene ndi zadidi,*+Mbwenye Yahova asaona mwadidi pinakulumiza munthu toera kucita pinthu.+
3 Nyindira Yahova mu pinthu pyonsene pinacita iwe,*+Natenepa, pinthu pinanyerezera iwe kucita pinafamba mwadidi.
4 Yahova asaphatisira pinthu pyonsene toera pinafuna iye picitike,Iye asacitisambo kuti anyakuipa afudzwe pa ntsiku ya nyatwa.+
5 Anthu onsene akudzikuza ndi akunyanyasa kuna Yahova.+
Khala na cinyindiro cakuti iye nee anasiyiwa tenepo mbakhonda kutcunyuswa.
6 Madawo asalekererwa munthu angapangiza kukoma ntima na kukhulupirika,+Pontho thangwi yakugopa Yahova munthu asacalira pyakuipa.+
7 Yahova angakomerwa na pinacita munthu,*Iye asacitisambo kuti anyamalwa a munthu unoyu akhale naye muntendere.+
8 Mphyadidi kukhala na pinthu pyakucepa munjira yakulungama,+Kupiringana kuwina pinthu pizinji munjira yakukhonda kulungama.+
9 Munthu anakwanisa kunyerezera muntima mwace pinthu pinafuna iye kucita,Mbwenye Yahova ndiye anatsogolera mathanyo ace.+
10 Mulomo wa mambo usafunika kulonga pinthu mwakubverana na pinafuna Mulungu;+Iye cipo asafunika kucita pinthu mwakukhonda kulungama.+
11 Bhalansa yakulinganira na nʼdida wakulinganira ndi pya Yahova;Pyakupima napyo pyonsene pya mʼbudu pyacitwa na iye.+
12 Macitiro akuipa ndi akunyanyasa kuna amambo,+Thangwi mpando waumambo usakhazikiswa mwakuwanga na ulungami.+
13 Mafala a anthu akulungama asakomeresa amambo.
Iwo asafuna munthu analonga undimomwene.+
14 Munthu anakwanisa kuphiwa+ thangwi ya ukali wa mambo,Mbwenye munthu waudziwisi asaukhurudza.+
15 Mambo angabvera munthu ntsisi, munthu unoyu anakhala na umaso wadidi;Ntsisi zace ndi ninga khole ya madzi anabvumba pa ndzidzi wakuthema.+
16 Mphyadidi kakamwe kukhala na udziwisi kupiringana ouro!+
Mphyadidi kuwina luso yakubvesesa kupiringana parata.+
17 Anyakulungama asacalira njira yakuipa.
Ule anaonera njira yace, akutsidzikiza umaso wace.+
18 Kugaya kusatsogolera munthu toera kufudzwa,Ntima wakudzikuza usatsogolera munthu toera kugwa.+
19 Mphyadidi kukhala wakucepeseka pakati pa anthu akupfulika,+Kupiringana kugawana na anthu akudzikuza pinthu pidatapatwa.
20 Munthu anapangiza luso yakubvesesa pakucita pinthu, pinthu pinanfambira mwadidi,Nyakutsandzaya ndi ule ananyindira Yahova.
21 Munthu wakuti ali na ntima waudziwisi anadzacemerwa wakubvesesa pinthu,+Ule analonga mafala adidi asakhuya kakamwe anango.+
22 Luso yakubvesesa pinthu isapasa umaso ale akuti ali nayo,Mbwenye madzemwa asalangwa na udzemwa wawo.
23 Munthu waudziwisi asasankhula mwadidi mafalace,+Pontho asacitisa kuti mafalace atsandzayise anango.
24 Mafala adidi ndi ninga khana ya uci,Asatapira kuna munthu, pontho asawangisa magogodo.+
25 Pana njira yakuti munthu asaiona ninga ndi yadidi,Mbwenye pakumalisa isatsogolera munthu toera kufa.+
26 Kufuna cakudya kusacitisa nyabasa kuphata basa mwakuwanga,Thangwi njala isankulumiza toera kucita pyenepi.+
27 Munthu wakusowa basa asabulusa pakweca pinthu pyakuipa;+Mafalace ndi ninga moto wakupisa kakamwe.+
28 Munthu wanthonga asacitisa anthu kukhonda bverana,+Munthu analonga anango mwakuipa asamwaza axamwali adidi.+
29 Munthu wanthonga asanyengerera ndzace,Mbamuendesa munjira yakuipa.
30 Iye asapfinya diso mu ndzidzi unakhunganyika iye toera kucita pinthu pyakuipa.
Asaluma mulomo mu ndzidzi unacita iye pinthu pyakuipa.
31 Imbvi ndi nthimba yakubalikisa,+Zingakhala na munthu anafamba munjira yakulungama.+
32 Munthu anakhonda kuipirwa mwakucimbiza+ ndi wadidi kakamwe kupiringana munthu wamphambvu,Munthu wakudzitonga* ndi wadidi kakamwe kupiringana ule anakunda nzinda.+
33 Anthu anakwanisa kusaka cidzindikiro,+Mbwenye ndi Yahova anapangiza pinafuna kucitika.+
Pidzindikiro Pyapantsi
^ Peno: “ntawiro wadidi.”
^ Peno: “zakulungama.”
^ Fala na Fala: “Siya mabasa ako mʼmanja mwa Yahova.”
^ Peno: “na njira za munthu.”
^ Peno: “wakuphata ntima; wakukhurudzika.”
