DE FILISTA wieren wada jekomen jäajen Israel kjamfen. David siene dree elste Breeda deenden nu en Saul sien Kjrichshäa. Eenen Dach säd Isai to David: ‘Go brinj diene Breeda waut Jeträajd un Broot un see no, woo an daut jeit.’

Aus David no daut Loaga kjeem, rand hee von doa fuaz no de Städ, wua de Mana sikj hanjestalt hauden toom kjamfen, un socht no siene Breeda. Äwadäm kjeem Goliat väa, de Ries von de Filista, un haud sikj domm äwa de Israeliten. Soo haud dee daut aul 40 Doag lank jieda Zemorjes un jieda Owent jedonen. Dee breld: ‘Wält junt eenen Maun, waut met mie kjamfen saul! Wan dee mie jewent un mie dootmoakt, woa wie june Sklowen sennen. Wan ekj dän oba jewenn un dän dootmoak, woa jie onse Sklowen sennen. Nu komt! Läst junt eenen ut, un dan woa wie mol utfinjen!’

David fruach eenje von de Soldoten: ‘Waut woat deejanja kjrieen, waut disen Filista dootmoakt un dise Schaund von Israel wajchnemt?’

‘Saul woat dänjanjen sea rikj moaken’, säd eena von de Soldoten. ‘Un dee woat dän soogoa siene Dochta to Fru jäwen.’

Oba de Israeliten hauden aula sea Angst fa Goliat, wiels dee soo groot wia. Dee wia bie dree Meeta huach un haud noch uzhent eenen Soldot, waut dän sien Schilt druach.

Eenje von de Soldoten jinjen no Kjennich Saul un vetalden dän, daut David met Goliat kjamfen wull. Oba Saul säd to David: ‘Du kaust nich jäajen disen Filista kjamfen. Du best noch mau een Jung, un dee es aul sien Läwen lank Soldot jewast.’ Oba David säd: ‘Ekj hab eenen Boa uk eenen Leiw dootjemoakt, waut mienen Voda siene Schop metnämen wullen. Un disen Filista woat daut nich väl aundasch gonen. Jehova woat mie halpen.’ Doaropp säd Saul to David: ‘Dan go, un mucht Jehova met die sennen.’

David jinkj no eenen Riefa un hold sikj doa fief glaute Steena un stopt dee en siene Tausch nenn. Dan neem hee sienen Schleida un jinkj dän Ries entjäajen. Aus Goliat am sach, kunn dee daut nich jleewen. Goliat docht soo, daut wudd am nuscht sennen, David doottomoaken.

‘Komm bloos noda’, säd Goliat, ‘un ekj woa dien Fleesch de Väajel un de wille Tieren to fräten jäwen!’ David oba säd: ‘Du kjemst no mie met een Schwieet, eenen Spies un eene Schmietstang, ekj oba kom no die met Jehova sienen Nomen. Vondoag woat Jehova die en miene Henj jäwen un ekj woa die dootmoaken.’

Dan rand David Goliat entjäajen. Hee neem eenen Steen ut siene Tausch, läd dän en sienen Schleida nenn un schoot dän met aul siene Krauft no Goliat. De Steen juach jlikjtoo en Goliat sienen Kopp nenn un dee strempeld! Aus de Filista sagen, daut äa stoakjsta Soldot doot wia, dreiden dee aula om un kleiwden ut. De Israeliten randen dee hinjaraun un jewonnen dän Kaumf.