Trigj nom Enhault

No de Enhaultslist gonen

 JESCHICHT #81

See veloten sikj opp Gott

See veloten sikj opp Gott

VÄLE dusent Israeliten muaken sikj opp de lange Reis von Babielon no Jerusalem. Aus see doa aunkjeemen, wia Jerusalem een eensja Steenaklompen. Doa wond kjeen Mensch. De Israeliten musten aules fresch oppbuen.

Eent von daut ieeschte, waut de Israeliten buden, wia een Aultoa. Opp dän kunnen see fa Jehova Tieren opfren. Eenje Moonat lota fungen de Israeliten aun, dän Tempel to buen. Äare Fiend von de Lenda rom an wullen daut oba nich haben. Doawäajen wullen dee an Angst moaken, daut see sullen opphieren met buen. Schlieslich kjrieejen äare Fiend dän nieen Kjennich von Persien soo wiet, daut dee dän Tempelbu vebeeden deed.

De Joaren vejinjen. Nu wieren daut aul 17 Joa, waut de Israeliten von Babielon trigj wieren. Jehova schekjt de Profeeten Hagai un Sacharja daut Volkj sajen, see sullen wada aunfangen met buen. Daut Volkj veleet sikj opp Jehova un horcht no de Profeeten. Soo buden see aum Tempel wieda, uk wan an daut veboden wia.

Dan kjeem doa een persischa Beaumta, waut Tatenai heet. Dee fruach de Israeliten, wäa an de Frieheit jejäft haud, dän Tempel to buen. See säden, Kjennich Kierus haud to an en Babielon jesajcht, see sullen no Jerusalem gonen un dän Tempel fa Jehova, äaren Gott, buen.

Tatenai schekjt eenen Breef no Babielon un fruach, aus Kjennich Kierus, dee aul jestorwen wia, werkjlich soont jesajcht haud. Boolt schreef de niea Kjennich von Persien trigj un säd, daut wia soo. Dee schreef uk noch: ‘Lot de Israeliten dän Tempel fa äaren Gott buen. Un du saust an doamet halpen.’ Ojjefäa vea Joa lota wia de Tempel foadich un de Israeliten freiden sikj sea.

Väle Joaren vejinjen. De Tempel wia nu aul meist 48 Joa foadich jebut. De Menschen en Jerusalem wieren oam un de Staut uk Gott sienen Tempel leet nich sea schmock. Wiet auf en Babielon kjrieech de Israelit Esra to hieren, daut dän Tempel fäld opptofreschen. Weetst du, waut hee dan deed?

Esra jinkj no Artahsasta, dän Kjennich von Persien, un vetald dän daut. Daut wia een gooda Kjennich un dee jeef Esra väl Gowen, waut hee met no Jerusalem nämen sull. Esra fruach de Israeliten, waut noch en Babielon wieren, aus see am nich wullen halpen, de Gowen no Jerusalem to brinjen. Bie 6 000 Israeliten säden, see wudden. See hauden väl Selwa un Golt un aundre wieetvolle Sachen mettonämen.

Esra muak sikj Sorjen, wiels opp dän Wajch jeef daut Reiba. Dee wudden an kjennen aulet Selwa un Golt fuatnämen un an dootmoaken. Doawäajen kroagd Esra de Israeliten aula toop, soo aus hia to seenen es. Un see deeden to Jehova bäden, daut hee an opp de lange Reis no Jerusalem beschitzen sull.

Jehova beschizt an, un vea Moonat lota kjeemen see onen Trubbel en Jerusalem aun. Wiest ons daut nich gaunz kloa, daut Jehova deejanje beschitzen kaun, waut sikj opp am veloten?