Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #53

Jefta sien Vespräakjen

Jefta sien Vespräakjen

HAST du aul mol waut vesproaken, waut die oba lota schwoa foll to hoolen? Dän Maun hia opp daut Bilt jinkj daut soo, un doawäajen lat dän soo truarich. Daut es een forchtloosa Rechta von Israel. Sien Nomen es Jefta.

To Jefta siene Tiet deeden de Israeliten nich mea Jehova aunbäden. See deeden wada, waut schlajcht wia. Doawäajen leet Jehova too, daut de Amonita de Israeliten schlajcht behaundlen deeden. Dan prachaden de Israeliten Jehova om Help. See säden: ‘Wie haben ons jäajen die vesindicht. Toom Jefaulen, doo ons doch raden!’

De Israeliten wia daut leet, daut see soo väl schlajchtet jedonen hauden. See wullen Jehova bewiesen, daut an daut werkjlich leet wia, un deeden wada bloos am auleen aunbäden. Un soo holp Jehova an wada.

Daut Volkj wäld Jefta toom jäajen de Amonita kjamfen. Jefta wull jieren haben, Jehova sull am halpen, un soo säd hee to Jehova: ‘Wan du mie woascht jäajen de Amonita jewennen loten, woa ekj die dän ieeschten Mensch jäwen, waut mie entjäajen kjemt, wan ekj trigj no Hus kom.’

Jehova neem Jefta sien Vespräakjen aun un holp am, dän Kaumf to jewennen. Weetst du, wäa am daut ieeschte entjäajen kjeem, aus hee no Hus kjeem? Daut wia siene Dochta, sien eensjet Kjint. Jefta road un säd: ‘Oo miene Dochta! Woo truarich du mie doch moakst! Ekj hab Jehova waut vesproaken un ekj kaun daut nich trigjnämen.’

Aus Jefta siene Dochta von daut Vespräakjen enwort, wia see ieeschtlich uk truarich, wiels daut bedied, see must äaren Voda un äare Frind veloten. Oba see wudd kjennen äa Läwen lank Jehova en sien Aunbädungszelt deenen, waut en de Staut Silo wia. Un soo säd see to äaren Voda: ‘Wan du Jehova waut vesproaken hast, motst du daut uk hoolen.’

Dan jinkj Jefta siene Dochta no Silo un deend Jehova doa äa Läwen lank en daut Aunbädungszelt. Jieda Joa besochten de Frues von Israel ar fa vea Doag un vebrochten eene scheene Tiet met ar. Daut Volkj jleicht Jefta siene Dochta sea, wiels see Jehova soo tru deenen deed.

Rechta 10:6-18; 11:1-40