Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #26

Hiob blift Gott tru

Hiob blift Gott tru

LAT disen kranken Maun hia nich jaumalich? Daut es Hiob, un dee, waut doa biesied steit, es siene Fru. Weetst du, waut see to Hiob sajcht? See sajcht: ‘Flieekj Gott ut un stoaw!’ Well wie mol seenen, wuarom see soont aus dit säd un wuarom Hiob soo sea lieden must.

Hiob wia een trua Maun, waut Jehova emma jehorchen deed. Hee wond en daut Launt Uz, nich wiet auf von Kanaan. Jehova räakjend Hiob sea väl, oba doa wia eena, waut dän nich lieden kunn. Weetst du, wäa?

Daut wia Soton, de beesa Fient. Weetst du noch, wäa Soton es? Daut es de beesa Enjel, dee Jehova schlajcht lieden kaun. Dee kunn Adam un Eva doatoo brinjen, daut dee Gott nich mea jehorchten, un dee docht, hee kunn daut met aule Menschen soo doonen. Oba kunn dee daut werkjlich? Nä! Denkj bloos mol aun aul de true Mana un Frues, wua wia aul von jeläst haben. Kaun die noch von eenje denkjen?

Aus Hiob läwd, wieren Jakob un Josef aul en Ägipten jestorwen, un kjeena oppe Ieed wia Gott soo tru aus Hiob. Jehova wull Soton wiesen, daut hee nich jiedren eenen doatoo kjrieech, schlajchtet to doonen, un säd to dän: ‘Kjikj mol, woo tru Hiob mie es.’

Oba Soton säd: ‘Dee es die doch bloos tru, wiels du dän säajnen deist un wiels dee soo rikj es. Oba nemm dän daut wajch, un dee woat die utflieekjen.’

Doaropp säd Jehova to Soton: ‘Na goot. Du kaust dän aules wajchnämen, waut dee haft. Doo met Hiob aules, waut du west, un wie woaren seenen, aus dee mie woat utflieekjen ooda nich. Du doascht dän bloos nich dootmoaken.’

Daut ieeschte leet Soton Hiob sien Vee un siene Kameelen fuatstälen, un dän siene Schop leet dee dootmoaken. Dan leet Soton eenen Storm oppkomen, wua Hiob siene tieen Kjinja storwen. Nodäm brocht dee dise schlemme Krankheit opp Hiob. Hiob must grulich sea lieden. Daut es, wuarom siene Fru to am säd: ‘Flieekj Gott ut un stoaw!’ Oba Hiob deed daut nich. Schlieslich kjeemen doa noch dree faulsche Frind no am un meenden, hee haud een schlajchtet Läwen jefieet. Oba Hiob bleef Gott tru.

Jehova freid sikj sea äwa Hiob. Lota beloond hee am doafäa, soo aus du opp daut Bilt seenen kaust. Jehova muak am wada jesunt, un Hiob haud noch eemol tieen schmocke Kjinja un noch soo väl Vee un Schop un Kameelen aus ea.

Woascht du Jehova uk emma soo tru sennen, aus Hiob wia? Wan jo, woat Gott die uk beloonen. Du woascht dan kjennen fa emma läwen, wan de Ieed ieescht woat soo scheen sennen, aus de Goaden Eden wia.

Hiob 1:1-22; 2:1-13; 42:10-17