Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #67

Joschafat velat sikj opp Jehova

Joschafat velat sikj opp Jehova

WEETST du, wäa dise Mana sent un waut dee doonen? Dee gonen kjamfen, un de Mana, waut veropp gonen, doonen sinjen. Oba wuarom haben de Sinja kjeene Schwieets un kjeene Spiessen, wan dee kjamfen gonen? Well wie mol seenen.

Joschafat wia de Kjennich von daut Kjennichrikj met de twee Stam von Israel. Hee läwd to deeselwje Tiet waut Kjennich Ahab un Isebel von daut Nuadkjennichrikj met de tieen Stam. Joschafat wia oba een gooda Kjennich. Sien Voda Asa wia uk een gooda Kjennich jewast. Doawäajen hauden de Menschen en daut Siedkjennichrikj met de twee Stam fa väle Joaren een scheenet Läwen.

Oba dan wia doa waut, wua daut Volkj Angst kjrieech. Doa kjeemen Norechta un säden to Joschafat: ‘Doa kjemt een grootet Kjrichshäa von de Lenda Moab, Amon un von daut Boajlaunt Seir toom jäajen die kjamfen.’ Väle Israeliten kjeemen dan en Jerusalem toop, om Jehova no Help to froagen. See jinjen aula nom Tempel, un doa deed Joschafat dan bäden un säd: ‘Oo Jehova, ons Gott, wie weeten nich, waut wie doonen sellen. Wie kjennen ons jäajen dit groote Kjrichshäa nich wäaren. Bloos du kaust ons halpen.’

Jehova hieed dit Jebäd un schekjt eenen von siene Deena daut Volkj sajen: ‘Dis Kaumf es nich june Sach, daut es Gott siene Sach. Jie woaren nich kjamfen brucken. Kjikjt bloos too un seet, woo Jehova junt raden woat.’

Näakjsten Dach zemorjes säd Joschafat to daut Volkj: ‘Velot junt opp Jehova!’ Un hee stald Sinja aun, waut de Kjrichsmana veropp jinjen un Leeda sungen toom Jehova lowen. Weetst du, waut passieed, aus de Israeliten ieescht bat dicht bie äare Fiend kjeemen? Jehova muak daut soo, daut äare Fiend sikj unjarenaunda kjamfen deeden. Un aus de Israeliten bat doa wieren, wieren dee aul aula doot!

Daut wia kluak von Joschafat, daut hee sikj opp Jehova veleet, jleefst nich uk? Uk fa ons es daut emma daut baste, wan wie ons opp Jehova veloten.

1. Kjennichs 22:41-54; 2. Chronik 20:1-30