Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #83

De Stautsmia von Jerusalem

De Stautsmia von Jerusalem

KJIKJ mol, woo hia jeschauft woat. De Israeliten doonen de Mia rom Jerusalem wada oppbuen. Aus Kjennich Nebukadnezar 152 Joa trigj Jerusalem venicht haud, haud dee de Stautsmia doljebroaken un de Stautsdäaren vebrent. Aus de Israeliten wieren von Babielon trigjekomen, hauden see de Mia nich fresch oppjebut.

Waut jleefst du, woo haft dee daut aul de Joaren jegonen, onen eene Mia rom äare Staut? Na, dee motten sikj haben onsecha jefeelt. Äare Fiend hauden gaunz leicht kunt en de Staut nenkomen un an äwafaulen. Oba nu holp Nehemia an, de Mia entlich wada opptobuen. Weetst du, wäa Nehemia wia?

Nehemia wia een Israelit von de Staut Susa, wua uk Mordechai un Ester wonden. Nehemia schauft en dän Kjennich sienen Paulaust un wia veleicht soogoa een gooda Frint aun Mordechai un de Kjennijin Ester. Oba enne Bibel sajcht daut nich, daut Nehemia fa Kjennich Ahasveros, Ester äaren Maun, schaufen deed. Hee schauft oba fa Artahsasta, dän näakjsten Kjennich.

Kaun die daut noch denkjen von Artahsasta? Daut wia de gooda Kjennich, waut Esra väl Jelt jeef toom Jehova sienen Tempel en Jerusalem oppfreschen. Oba de doljebroakne Mia von Jerusalem haud Esra nich fresch oppjebut. Woo kjeem daut doatoo, daut Nehemia dise Oabeit deed?

Daut wieren aul 13 Joa von don, aus Artahsasta Esra daut Jelt jejäft haud toom dän Tempel oppfreschen. Nehemia wia nu de väaschta Enschenkja von Kjennich Artahsasta. Daut bediet, hee must dän Kjennich met Wien bedeenen un doano seenen, daut kjeena dän Kjennich vejeften kunn. Daut wia eene sea wichtje Oabeit.

Eemol kjeem Nehemia sien Brooda Hanani toop met eenje aundre Mana von daut Launt Israel am besieekjen. See vetalden am von de Trubbels, waut de Israeliten hauden, un daut de Mia von Jerusalem noch emma nich fresch oppjebut wia. Daut muak Nehemia sea truarich un hee deed wäajens dise Sach to Jehova bäden.

Eenen Dach sach de Kjennich, daut Nehemia betriept wia, un fruach am: ‘Wuarom lat die soo truarich?’ Nehemia säd, daut wia wäajens Jerusalem, wiels de Staut soo schlajcht leet un de Mia noch emma nich fresch oppjebut wia. Dan fruach de Kjennich: ‘Waut saul ekj fa die doonen?’

‘Lot mie no Jerusalem gonen un de Mia wada oppbuen’, säd Nehemia. Kjennich Artahsasta wia sea leeftolich. Dee leet Nehemia gonen un holp am soogoa, daut hee fa daut buen Holt kjrieech. Kort nodäm aus Nehemia en Jerusalem aunjekomen wia, vetald hee de Israeliten, waut hee em Plon haud. An jefoll de Iedee un see säden aula: ‘Well wie fuaz aunfangen met buen.’

Aus de Fiend von de Israeliten sagen, daut de Mia emma hecha wort, säden dee: ‘Well wie gonen un de Israeliten dootmoaken un met daut buen een Enj moaken.’ Aus Nehemia daut to hieren kjrieech, jeef hee de Oabeida Schwieets un Spiessen un säd to an: ‘Enjst junt nich fa onse Fiend. Kjamft fa june Breeda, june Kjinja, june Frues un june Hiesa.’

De Israeliten leeten sikj nich enenjsten. De Oabeida hauden äare Waufen Dach un Nacht reed toom kjamfen un schauften wieda. Daut dieed mau 52 Doag, dan hauden see de Mia foadich. Nu kunnen de Menschen sikj enne Staut secha feelen. Nehemia un Esra lieeden daut Volkj Gott siene Jesazen, un aula wieren see schaftich.

Oba daut wia nich mea soo aus daut jewast wia, ea de Israeliten wieren en Babielon jewast. Nu deed de Kjennich von Persien äwa an harschen un see musten dän deenen. Oba Jehova haud vesproaken, hee wudd eenen Dach eenen nieen Kjennich schekjen, un disa wudd de Menschen Fräd brinjen. Wäa wudd daut sennen? Woo wudd dee oppe Ieed Fräd brinjen? Daut dieed bie 450 Joa, bat ieescht mol mea doaräwa jesajcht wort. Dan wort een gaunz besondret Kjint jebuaren. Oba doavon haundelt sikj eene aundre Jeschicht.

Nehemia, Kapitels 1 bat 6