Trigj nom Enhault

No daut Unjamenu gonen

No de Enhaultslist gonen

Jehova siene Zeijen

Plautdietsch

Mien Buak met Bibeljeschichten

 JESCHICHT #102

Jesus läft wada

Jesus läft wada

WEETST du, wäa de Fru un de beid Mana hia sent? De Fru es Maria Magdalena. See es eent von Jesus siene Frind. De Mana met de witte Kjleeda sent Enjel. Maria kjikjt hia jroz en Jesus sien Grauf nenn. En disen kjlienen Rum hauden see Jesus nenjelajcht, aus dee jestorwen wia. Oba de Dooden es doa nich mea! Wäa haft dän doa wajchjenomen? Well wie mol seenen.

Aus Jesus jestorwen wia, säden de Priestasch to Pilatus: ‘Wua Jesus noch läwd, säd dee, hee wudd aum dredden Dach oppstonen. Lot daut Grauf leewa bewoaken. Dan kjennen dän siene Jinja dän Dooden nich fuatstälen un sajen, dee es oppjestonen.’ Pilatus säd, see kunnen Soldoten schekjen toom daut Grauf bewoaken.

Oba aum dredden Dach tiedich zemorjes kjeem plazlich een Enjel von Jehova un rold dän Steen von ver daut Grauf wajch. De Soldoten wieren soo veschrocken, dee kunnen sikj nich rieren. Schlieslich, aus dee en daut Grauf nenkjikjten, wia de Dooden wajch! Eenje von de Soldoten jinjen no de Staut un vetalden de Priestasch daut. Weetst du, waut dee dan deeden? Dee jeewen de Soldoten Jelt, daut dee sullen lieejen un sajen, see wieren de Nacht enjeschlopen wast un doaräwa hauden Jesus siene Jinja dän Dooden fuatjestolen.

Äwadäm kjeemen eenje Frues nom Grauf, waut Frind aun Jesus jewast wieren. See wieren sea vewundat, wiels daut Grauf ladich wia. Maria Magdalena rand fuaz Petrus un Johanes daut sajen. Met eenst wieren hia bie de aundre Frues twee Enjel met jlenzende Kjleeda. Dee fruagen an: ‘Wuarom sieekj jie hia no Jesus? Dee es oppjestonen. Got schwind un sajcht siene Jinja daut.’ De Frues randen fuaz loos. Oba hinjawäajes hilt an een Maun opp. Weetst du, wäa daut wia? Daut wia Jesus! Hee säd: ‘Got un sajcht miene Jinja daut.’

Aus de Frues de Jinja vetalden, daut Jesus läwd un daut see am jeseenen hauden, kunnen de Jinja daut nich jleewen. Petrus un Johanes randen nom Grauf selfst noseenen. Oba daut Grauf wia ladich! See veleeten dan wada, oba Maria Magdalena, dee uk trigj nom Grauf jekomen wia, bleef doa. Dit wia nu, aus see en daut Grauf nenkjikjt un de twee Enjel sach.

Weetst du, wua de Dooden jebläwen wia? Gott haud dän loten veschwinjen. Hee wuak Jesus nich met dänselwjen Kjarpa opp. Hee jeef Jesus eenen nieen Kjarpa, eenen jeistlichen, soo aus de Enjel em Himmel haben. Oba daut siene Jinja sagen, daut hee läwd, wees hee sikj an met eenen Kjarpa, dän see seenen kunnen. En de näakjste Jeschicht woa wie mea doavon lieren.

Matäus 27:62-66; 28:1-15; Lukas 24:1-12; Johanes 20:1-12